بعد عدة أيام من اعتزال فيسبوك.. جلست أخيرا أحاول متابعة ما يحدث فى المحروسة.. عندما فتحت صفحتي, هالني ما رأيت.. العديد من الصفحات والجروبات تحمل عناوين: "تضامنا مع انشراح".. "معا لدعم انشراح".. "إنشراح كمان إشمعنى الجماعة".. "حملة المليون خلف انشراح".. "إحنا الأحرار اللى مع انشراح".. اندهشت للأمر.. فيبدو أن بضع أيام بعيدا عن الفيس بوك.. كان فيها الكثير من الأحداث.. فتحت بعض تلك الصفحات وقرأت.. تملكنى الضحك.. فعلتها انشراح.. أمسكت بمحمولى أطلب رقمها.. جاءنى صوتها على الجانب الآخر متعجلا: إنتى فى البيت؟.. قلت: آه.. قالت: أنا جايالك بعد عشر دقايق.. دق جرس الباب.. ففتحت لها.. دخلت واضعة على أذنيها هاتفين محمولين.. تتحدث فيهما فى ذات الوقت.. جلست تكمل مكالمتيها.. وجلست قبالتها شاخصة فى انتظار أن تنتهى.. بعد حوالى 3 دقائق.. أنهت المكالمتين ونظرت لى قائلة: عارفة هاتسألينى على إيه.. أكيد فتحتى الفيس بوك قلت متعجلة: آه فتحته.. إحكيلى بقى براحة وم الأول.. إيه اللى حصل قالت: إنتى ما بتفتحيش الفيس بوك ولا الإيميل وقافلة تليفونك بقالك كام يوم.. فقلت أكيد دخلت الحالة إياها.. فخليها مع نفسها يومين وبعدين أشوفها قلت: مش مهم دة كله.. إحكيلى عملتى إيه! قالت: فاكرة الموضوع اللى كنت كلمتك فيه من كام شهر.. موضوع الهيئة؟ قلت: آه فاكرة.. بس ماكنتش عارفة إنك واخدة الموضوع جد قالت فى لوم: لأ طبعا واخداه بجد.. هو انا كنت باهزر! قلت: طب هو انتى لحقتى تعملى دة فى اليومين اللى فاتوا؟! قالت: اللى هو إيه؟ قلت: إنك يعنى تأسسى هيئة أو مركز وكدة.. قصدى فيه مقر وتصاريح وموافقات وحاجات من دى يعنى قالت ضاحكة: براحة براحة.. مقر إيه وتصاريح إيه وموافقات إيه.. كل دة كان زمان.. ما فيش كلام من دة دلوقت قلت مندهشة: إزاى يعنى؟! قالت: يعنى موضوع التأسيس ووزارة الشئون والمقر وفتح حساب باسم الجمعية والكلام دة كله كان زمان!! قلت: طب معلش إحكيلى انتى عملتى إيه!! قالت: أنا مش قلتلك عاوزة أأسس هيئة شاملة.. تشتغل فى العمل الاجتماعى والسياسى والرياضى والخيرى وكدة! قلت: آه اتناقشنا قالت: طيب.. أنا عملت كدة.. فضيت أودة فى الشقة عندى.. حطيت فيها مكتب وجهاز كومبيوتر.. وبدأت أبعت لكل الناس تفاصيل الهيئة زى ما تكلمنا فيها.. طبعت الورق ووزعته فى الشغل عندى وع الجيران.. ع القهاوى وفى الكافيهات بتاعة الشباب.. عملت جروب ع الفيس بوك للهيئة وقلت إننا هانبتدى شغل من أول أكتوبر. قلت شغوفة للاستماع: وبعدين قالت: يوم فى التانى.. والحياة ماشية فل.. انضم لى ناس كتير من اللى اعرفهم.. وع الجروب بتاع الهيئة بقى عندى فى 3 ايام 5 آلاف عضو.. وبدأوا يشيروا نشاط الجمعية.. وبدأت المواقع والجرايد تنشر.. وعندى مواعيد لبرامج توك شو النهاردة وبكرة وبعده. قلت ادفعها للإسراع: ها وبعدين قالت: بس يا ستى.. فوجئت امبارح باستدعاء من قسم قصر النيل.. قلت باندهاش: قسم قصر النيل!! قالت: آه.. قسم قصر النيل اللى عملتى فيه محضر لما الإخوان هاجموكى فى التحرير قلت: وبعدين قالت: حققوا معايا لأنى عملت نشاط مش مشروع.. عملت جمعية.. وشغلت معايا ناس.. وخدت فلوس.. دون موافقة القانون (قالتها بالعربية الفصحى وهى تضحك) قلت: طب ما دة صحيح يا انشراح! قالت مستمتعة بمغامرتها: لأ ما انا رديت عليهم.. قلت لهم أنا منتظرة القانون الجديد.. لأن أنا هيئة شاملة.. والقانون بتاع دلوقت بينظم عمل الجمعيات والمنظمات بس.. وللا انتو عاوزيننى أقلص عملى عشان يبقى قد قانون صغير عمله المخلوع.. سألونى عن التمويل.. قلت لهم أنا ما باخدش تمويل.. لا من برة ولا من جوة.. أنا هيئتى قائمة على تبرعات الأعضاء.. سألونى مين هايراقب الأموال دى.. قلت لهم دة مال خاص مش من حق حد يراقبه.. الأجهزة بتراقب المال العالم بس.. قالولى بس دة وضع مش شرعى.. قلت لهم الشرعية أنا خدتها من الشعب اللى واقف ورا هيئتى وبيدعمنى.. الشرعية مش من قوانين عملها المخلوع!! ضحكت حتى اغرورقت عيناى بالدموع.. فتلك بالضبط جمل قالها أحدهم مرات عديدة عن جماعته غير القانونية.. قلت لها: طب وبعدين! قال: بس يا ستى.. طلبوا منى أوقف الشغل.. إما آخذ تصريح وأسس الجمعية.. أو أنسى الموضوع.. قلت: وانتى هاتوقفى الشغل وتأسسى الجمعية؟! قالت: لأ طبعا.. لأنها مش جمعية.. دى هيئة اجتماعية سياسية خيرية رياضية شاملة!! قلت: يعنى هاتكملى شغل؟! قالت: طبعا.. انا الشعب معايا.. إنتى مش شايفة الجروبات اللى ع الفيس بوك.. والتضامن معايا من كل الحقوقيين والناشطين قلت: بس كدة خطر يا انشراح قالت: هما اللى ابتدوا.. بينى وبينهم المحكمة.. لو الجماعة إياها أسست انا هأسس!! ثم نظرت فى ساعتها و انتفضت قائلة: يادوب بقى اقوم أجهز نفسى.. هايبعتولى العربية بعد ساعة.. أصل أنا طالعة النهاردة مع الدكتورة قلت مذهولة: دكتورة مين يا انشراح؟! قالت لائمة: الدكتورة.. فاكرة لما قلتلك قبل كدة عاوزة أطلع معاها.. يمكن تدينى صباع روج هدية من الألوان الحلوة بتاعتها! قلت: آه دكتورة هالة قالت: أيوة الدكتورة سألتها وهى تفتح الباب مغادرة: صحيح يا انشراح.. هى جمعيتك اسمها إيه؟ قالت: قلنا هيئة شاملة.. إسمها "هيئة انشراح للمصريين".. اجتماعية خيرية سياسية رياضية شاملة!! إيمان إمبابى Comment *
