كلام مسئول

محمد صلاح: يا مساء الخير هى السياسة فى مصر محتاجة قياسات كبيرة ترموستات يعنى ؟ وساعات مقياس ريختر محتاجة متابعة وقراية وعدادات رادار ؟ السياسة فى مصر فى تقلبات تحالفات سرعة إنحرافات إنتفاضات ومفاجأت إثارة رعب تشويق المطبخ السياسى فى مصر بيقدم لنا الأيام دى أطباق من كل لون وصنف ومائدة بقى مفرودة قدام الرأى العام وعليها 1000 طبق وطبق طبعا هى دى التعددية السياسية بس القضية إن أحنا عايزين نفهم المواطن العادى اللى فى الشارع وأخوه المواطن اللى مش عادى يعنى اللى معاه بطاقة إنتخابية وردية وعايز يشارك المواطن ده عايز يفهم يروح فين ؟ ويجى منين ؟ ما بنقلش توجيه لكن لو هو فى مفترق طرق وعايز بر أمان مش عايز يكبر دماغه يعنى عايزيشارك يروح فين ؟ يجرى على الحزب الوطنى ؟ ولا لازم يبقى المعارضة ؟ وينقى بقى من فوق ال20 حزب يجرى على القوى السياسية وحركات إحتجاجية وخلاص ولاّ يدور على الإستقلالية ؟
ينخرط فى شعارات وهمية ولا ملهاش عازة القصة كلها على بعضها ؟يبقى مع بتوع سلاحف العزوف ولاّ مع فرسان المشاركة ؟
فى كل حتة المواطن ده هيسمع شارك متبقاش سلبى طلع بطاقة وبعدين أتكلم ولا لما يقطع الخطوات دى كلها يا ترى يرسى على أى بر ؟
عندنا ديمقراطية ولا معندناش ؟ عندنا أحزاب ولا أكشاك سجاير ؟ التدقيق جامد اليومين دول على المدخنيين عندنا أحباط لا عندنا سعادة وبغددة ؟ السياسة ناعمة ولذيذة وصناديق قزاز ولا لعب بالنار وبودرة العفريت وتربيطات من تحت الترابيزات ؟ غير التقلبات والناس اللى عمالة تتنقل من حزب للتانى الأحزاب والحياة السياسية بتمثل المجموعة السكانية اللى على أرض مصر بكل خصائصها كده ولا فيه ناس حافظة الكرة والملعب والباقيين إحتياطى ومتفرجين؟ عن السياسة والتقلبات السياسية النهاردة كلام مسئول
تقرير
يغيب عن المراقبين للعملية السياسية فى مصر معرفة الكثيرعن الطريقة التى تدار بها الأحزاب السياسية وعن ما إذا كان ذلك يتم عبر وسائل ديمقراطية داخل هذه الأحزاب إعتبارا من توزيع السلطة والإختصاصات والرياسة والصعود السياسى من القاعدة إلى القمة أو الأكتفاء بالولاء والثقة فيما تتعرض عملية صنع القرار فى مختلف الأحزاب لكثير من الغموض وعدم التبرير أو مجموعة صغيرة أو حتى شخص واحد فى صنع القرار مما يفسر ندرة المؤتمرات الحزبية من جهة والمفأجات والصراعات فى غالبية الأحزاب من جهة أخرى الأنطباع السائد بالعزوف هو ما يميز الحياة السياسية فى مصر وأنه ليس فقط مقصورا على الجمهور العام وإنما على أعضاء الأحزاب أيضا الذى ربما يكتفون بكارنيه العضوية لقد توفر للأحزاب السياسية فى مصر فرصة لإنضمام الناس إليها والمشاركة فى أنشطتها خيارا جاذبا ولكنها لم تضم لعضويتها بعد تجربة تتجاوز ال30 عاما و24 حزب لم ينخرط فى عضويتها أكثر من 4 ملايين مواطن مما يمثل حوالى 5 % من جموع المصريين وحسب تحليلات عدة فأن الأحزاب لم تقترب بشكل كافى فى الشارع المصرى وأن الشارع تم تفريغه لصالح حركات إحتجاجية متنوعة بدء فى الغالب والأعم من دون غطاء فكرى أو سياسى تجربة مصر الحزبية تجاوزت ال100 عام وفى تجربتها الأحدث إعتبارا من عام 1976 تكونت داخل الإتحاد الإشتراكى ثما صدر قانون الأحزاب السياسية رقم 40 لعام 1977 بشأن تنظيم وإنشاء وتكوين الأحزاب السياسية فى مصر ليتم التحول رسميا إلى التعددية الحزبية إلا أن هذه التعددية بسبب قيودا عده فى شئون الأحزاب ولكن تعديلا جذريا فى رقم 177 من عام 2005 نص على أحقيتها فى الحصول على مساحة فى إستخدام وسائل الإعلام متساوية المملوكة للدولة قد يرى البعض أن قطار الأحزاب بطىء لكنه ممكن من ملاحظة حجم ما أنجزته فى السنوات ال5 الماضية ومن نتائج إنتخابات الشورى الأخيرة
محمد صلاح : اللى بيحصل فى السياسة المصرية الأيام دى محصلش قبل كده كل أللى طلب بيقوله ويزعق اللى عايزة يتكلم يتكلم ويقول اللى هو عايزه واللى عايز يدخل حزب أهو بيدخله اللى عايز بقى يغيره تانى يوم أهو بيغيره التنفيس والزعيق والكلام والتبديل ما بين الأحزاب مهياش حاجة عادية ولا ملهاش لزمة هى بس بتصبر الناس؟ لأ دى بتضغط وتغير وبتكشف الغطا على أللى الناس عايزينه دكتورة منى مكرم عبيد هيكون لينا معاها كلام مسئول كلام الدكتورة منى مكرم عبيد أطالب بدولة مدنية تحترم مبدأ المواطنة ومناقشة صريحة وشفافة بين عقلاء المسلمين والأقباط وقالت الدكتورة منى مكرم عبيد ما نحن فيه الأن تكملة للعهود السابقة ولكن نحن فى مفترق طرق وهل تتغير مصر من الأحسن أم الأسوء لانعرف ؟ لأول مرة نخرج من الركود الذى كان يشكل معالم المشهد السياسى عندما خرجت من الوفد لم أخرج بعداء وإنما إختلفت على قرار أتخذ عام 1990 بعدم المشاركة فى الإنتحابات وأنا ضد عدم المشاركة حيث أرى أنه أمرا سلبى خصوصا مع الضغوط المفروضة على الأحزاب فالإنتخابات تعد فرصة ذهبية لا يجب أن نتركها تضيع لنتحدث مرة أخرى مع بعضنا فى الغرف المغلقة المشهد السياسى المصرى مترفع تغيير وحركة وكل يوم فى جديد كل بأسم المواطن ومن أجله من الفيس بوك للرصيف من الأحزاب للرغيف من الصحافة للسموات المفتوحة من الغموض للشفافية من الصحة للمرض ومن الحزب ده للحزب ده دكتور منى مكرم عبيد هيكون لينا معاها كلام مسئول
فاصل
محمد صلاح: أرحب بالقيادية فى حزب الوفد دكتورة منى مكرم عبيد منورانا يا دكتورة
د/ منى مكرم عبيد: منورة بأصحابها
محمد صلاح: ربنا يخليكى بقولك أيه ؟ أنتى كنت عضو فى الهيئة العليا فى حزب الوفد لفترة
د/ منى مكرم عبيد: لفترة طويلة أيه فترة دى ؟ أنا أول أمرأة أتعينت فى الهيئة العليا لحزب الوفد بعد 70 سنة من تكوين حزب الوفد
محمد صلاح: وبعدين رحت سايبة الحزب بقى واستقالتى وشوية وبعدين رحتى راجعة خرجت فى أيه ورجعت فى أيه ؟
د/ منى مكرم عبيد: أولا أنا خرجت وقت ما الوفد قاطع الإنتخابات أنا رفضت هذا القرار وبعد كده يعنى عينت بقرار من قبل رئيس الدولة ودا شرف كبير ليا وقعد بقى 5 سنين فى البرلمان كانوا من أحلى أيام حياتى السياسية بعد كده أنت عارف أنى أنا أول واحدة أتعينت من المعارضة:
محمد صلاح: خدتى ال 5 بتوعك وخلاص
د/ منى مكرم عبيد:وخلاص المهم أنا بعد كده كملت وأنت عارف كويس قوى أنا كنت بكتب بإنتظام فى الحياة يعنى مارست حياتى السياسية خارج البرلمان وخارج الأحزاب أخيرا بقى لما رجعت دلوقتى أنا رجعت دلوقتى بقالى 8 تشهر
محمد صلاح: أنتى نطتيتى فترة الغد
د/ منى مكرم عبيد: دى كانت فترة وجيزة ويعنى ما خدتش غلوة سريع سريع بالظبط وطلعت منه المهم دلوقتى رجعت حزب الوفد أنا مقدرتش أرجع الفترة أللى فيها الدكتور نعمان جمعة دلوقتى طبعا الأمور أتغيرت وأنا فضلت على صلة وطيدة بمعظم أعضاء الوفد
محمد صلاح: قيادات الوفد يعنى
د/ منى مكرم عبيد: قيادات الوفد محمود أباظة وسيد بدوى إلى أخره وكل اللى كانوا معايا فى هذا الوقت الصلة ما أنقطعتش
محمد صلاح: أيوه بس دا يا دكتورة مش دا بيفتح مجال للتساؤل حوالين مسألة الإنتخابات يعنى الحزب خد قرار بمقاطعة الإنتخابات أيا كان صح أو غلط دا فى وقته سنة 90أنتى أعترضتى وروحتى مستقيلة قعدتى شوية وبتكتبى مقالات وبتعملى دراسات وأبحاث ومحاضرات وبعدين تم
د/ منى مكرم عبيد: صديقى العزيز اللى هو محمد أحمد قال بالظبط الكلام ده بس قلتله أنت فى حزب سياسى يسارى دبلوماسى أحنا فى حزب ليببرالى أنا القرار ده كنت ضده أنا
محمد صلاح: الله هو الحزب الليبرالى ما يلتزمش بقرار الحزب ؟
د/ منى مكرم عبيد: لا يلتزم أنا كنت ضد المقاطعة أنا ضد مقاطعة الإنتخابات
محمد صلاح: أنا بكلمك عن الإنتماء عايز أفهم القصة دى بالظبط ؟ وبعدين ما أنتى رحت الغد وده ضد حدود الإنتماء الحزبى أمتى ألتزم بقرار حزب أو ببرنامجه أو بإستراتيجيته أو بأفكاره وأمتى أرفضها ؟
د/ منى مكرم عبيد: ملهاش وقت محدد القرار ده أنا مكانش عاجبنى وأنا ما كنتش مستعدة أفضل 5 سنين تانيين فى غرفة مغلقة نكلم بعض دا اللى بيحصل
محمد صلاح: أنتى قاصدك المشاركة فى الإنتخابات مسألة مهمة جدا
د/ منى مكرم عبيد: علشان دا اللى بيحصلك وجودك الشرعى وأنا رحت لفؤاد باشا وقلتله هذا الكلام
محمد صلاح: المرحوم فؤاد سراج الدين
د/ منى مكرم عبيد: المرحوم فؤاد سراج الدين قلتله هذا الكلام الناس هتنسانا كان فى هذا الوقت لما أنا خرجت كان فيه 35 عضو أنا قلتله بعد 5 سنين مش هنلاقيهم واللى حصل أنوا إنتخابات 95 مدخلش غير 5 أعضاء ومن وقتها كان فى النازل
محمد صلاح: 5 بقى
د/ منى مكرم عبيد: 5 ، 6 ، 7 اللى يطلع يعنى فالوجود فى الشارع وبعدين الحكومة على أحزاب المعارضة دى فرصتهم الوحيدة أنهم ينزلو فى الشارع يقابله الناس يتكلموا على برنامجهم للشباب اللى مش عارف حاجة يعنى مش عارف أيه الأحزاب دى ومعندهوش أى ثقة فى النظام السياسى كله وبالذات فى الأحزاب فدى كانت فرصة محدش يسيبها وأنا بستغرب دلوقتى على اللى بينادوا بمقاطعة الإنتخابات
محمد صلاح: أنتى ضد مبدأ المقاطعة ؟
د/ منى مكرم عبيد: أنا مع المشاركة
محمد صلاح: هرجع تانى لموضوع الإنتقالات ما بين الأحزاب أنا ملاحظ طبعا أنك بتحاولى تفادى الكلام عن الفترة اللى قضيتها فى الغد وأنا هحترم رغبتك إنما دا مش بيفتح برده مكان أنوا القصة مش حضرتك بس برده بقى عامل زى موسم الإنتقالات بين اللاعبين مش دا بيدى إنطباعات للناس أن الأحزاب من الداخل عندها مشاكل كتير
د/ منى مكرم عبيد: مالوش دعوة بالمشاكل الجوانية دى حاجة فردية وبعدين أنا طلعت من حزب بنتمى إليه ورجعت لحزب بنتمى إليه أنا من أقدم الناس
محمد صلاح: من عائلة وفدية أصلا مكرم عبيد والتاريخ كله
د/ منى مكرم عبيد: وبعدين أنا من أوائل الناس اللى دخلت فى التجربة الأولى وقت السادات طبعا دى برده ما خدتش غلوة خدت 100 يوم
محمد صلاح:دى حاجات كده فى السريع
د/ منى مكرم عبيد: فبعد كده رجعنا تانى فى 83 فى عهد الرئيس مبارك فيعنى تقلبات كتير بتحصل فى السياسة وبتحصل فى كل حاجة أنا أفهم تقولى الكلام ده لو مثلا وأنتقلت ورحت حزب يسارى
محمد صلاح:هو الغد ليبرالى برده تعتبريه يعنى ؟
د/ منى مكرم عبيد: دا أمتداد من الوفد بس يعنى
محمد صلاح: طب بتفسرى بأيه إن نائب فى حزب يسارى ويروح الحزب الحاكم الوطنى ؟ برده فى موسم الإنتقالات
د/ منى مكرم عبيد: لأ دى حاجة الحزب الحاكم بالذات إن هو ينزل الإنتخابات مرشحينه
محمد صلاح: لا دا قصة بقى أللى ما بيقدرش الحزب يرشحه
د/ منى مكرم عبيد: وبعدين ياخدوهم تانى
محمد صلاح: لأ أنا بتكلم بعيد عن موسم الإنتخابات خالص وأعضاء بارزين فى أحزاب معارضة بيتركوا أحزابهم على الحزب الوطنى تقييمك للحكاية دى أيه ؟
د/ منى مكرم عبيد: هو بس بغدادى
محمد صلاح: الأستاذ حيدر بغدادى مثلا يعنى ؟ أه يعنى نموذج يعنى تعليقك أيه على الصورة دى ؟ ما هو برده أنا بتكلم هنا عن الإنتماء
د/ منى مكرم عبيد: النهاردة النظام السياسى كله متلخبط :: الأحزاب ملهاش ثقل حزب سياسى فعلى دا بيرجع من ناحية ضعف الأحزاب نفسها ومن الناحية التانية التضيق من النظام السياسى من ناحية أخرى فمتقدرش تلوم الأحزاب لوحدها النظام السياسى النهاردة ما بيفتح مجال لإستقلالية الأحزاب ولا أن يستطيعوا مثلا أن يثبتوا وجودهم فى الشارع
محمد صلاح: يعنى أنتى ليكى تجربة طويلة يا دكتورة الجزء التانى سهل وجالنا ضيوف كتير اتكلموا فيه وهو التضيق على الأحزاب رغبة الحزب الوطنى
د/ منى مكرم عبيد: فى السيطرة
محمد صلاح: خلينا بقى فى الجزء الأولانى وهو الأحزاب نفسها ورموزها عملوا أيه ؟ أنتى من عائلة وفدية قديمة لها تاريخ طويل ضارب فى نجوم التجربة الحزبية فيه البلد وأكيد أنا عايز أعرف بقى رموز الأحزاب والأحزاب ضحت بى أيه علشان تكون موجوده
د/ منى مكرم عبيد: شوف أولا ولادة الأحزاب غير طبيعية رئيس الدولة يقول أنت فى الحزب الفلانى وأنتى هتبقى فى الحزب اليمينى وأنا هبقى فى الحزب الوطنى
محمد صلاح: أنت قصدك على تجربة الرئيس السادات والتحول إلى أحزاب
د/ منى مكرم عبيد: وبعدين تكوين الأحزاب نفسها دى ولادة غير طبيعيه الأحزاب ما بتتولدش من فوق
محمد صلاح: ما خلاص أتولدت أحزاب أخرى من المحكمة
د/ منى مكرم عبيد: زى حزب الوفد مثلا حزب الوفد أول ما رجع كان فيه حماس شديد حتى بين الشباب اللى عمره ما سمع ولا درس ولا حاجة لما فؤاد باشا أدى المؤتمر فى 77 أفتكر فى نقابة المحامين كنت مش تقدر تخش من كتر الناس وعايزين يشوفوا وعايزين يسمعوا حاجة غير ثورة 52 فده جذب ناس كتير قوى فى هذا الوقت
راجع الفترة الإنتخابية البرلمان كان فيه تداول سلطة كان فيه تداول أحزاب مفيش مقارنة
محمد صلاح: قوليلى الأحزاب بتدار أزاى وأنت داخل موقع فى الوفد وكنت طبعا وبعد كده فى النص يعنى ومتابعة طبعا الحركة الحزبية فى البلد على مدى الربع قرن اللى فات ؟
د/ منى مكرم عبيد: ما هو ده بيخلى كل المرارة وكل المعاناة تبقى داخل الحزب فالناس مش طايقة بعض ثقافة الديمقراطية مش موجوده
محمد صلاح: جو الأجزاب ؟
د/ منى مكرم عبيد: أه طبعا الثقافة السياسية الثقافة الديمقراطية القبول بالأخر إحترام الأخر إحترام التنوع فى الأراء كل ده غير موجود فلعشان كده عندك طول الوقت وبعدين فيه شخصية رئيس الحزب كل رؤساء الحزب الحزب بيدور حوالين الرئيس شخصية الرئيس
محمد صلاح: علشان كده فى أحزاب كتير تلاقى للحزب رئيسين
د/ منى مكرم عبيد: لما بينفصلو لما
محمد صلاح: بس دى تجربة حاصلة إنعكاسها أيه بقى ؟
د/ منى مكرم عبيد: تجربة فريدة إنعكاسها أنوا مفيش أى ثقة من المواطن فى الأحزاب السياسية والنتيجة لضعف الاحزاب الحركات الإحتجاجية النهاردة
محمد صلاح: أنتى أخدتى منى السؤال بالظبط أنوا يعنى بقى فيه إحتجاج فى الشارع؟
د/ منى مكرم عبيد: دى النتيجة نتيجة لأنوا المفروض دول يبقوا تحت مظلة حزب الحزب يراعيهم الحزب يشوف طلباتهم أيه هما مش سألين فى الأحزاب خلاص منهم للحكومة منهم للدولة الحركات الإحتجاجية
محمد صلاح: طب لما وصل إن فيه أعضاء ورموز فى أحزاب بيقفوا يعتصموا ويهتفوا طب ما بيرحوش عند حزبهم ليه بيرحوا عند الحركات هى الحركات أحسن من الأحزاب فى أيه بقى ؟
د/ منى مكرم عبيد: الحركات ليهم غرض معين الغرض ده بالنسبة للحركات اللى موجوده غرض إجتماعى البعد الإجتماعى ده غايب تماما عن الدولة طول النهار يقولولنا البعد الإجتماعى فين الإهتمام بالعمال بالأسعار بالتعليم بالصحة بالمرور ؟
يعنى علشان منرحش بعيد قوى فهموم المواطن أنا بشوف دلوقتى وأنا بتكلم عن حزب الوفد علشان ده حزب عريق فأنا شايفة لما بيقولوا مالوش وجود فى الشارع وجود فى الشارع مش لازم تنزل فى الشارع وجود فى الشارع يعنى تبقى قريب من هموم المواطن العادى وتقدر يا أما تبقى واسطة ما بينه وبين الحكومة تطالب بحقوقه يا أما تقدر تلبى طلباته أو تعبر عنها لكن متبقاش منفصل تماما وبتتكلم عن الديمقراطية والإصلاح لازم تربط الديمقراطية والإصلاح بهموم المواطن لأن هو كمان بيوعى أيه هى الديمقراطية دى ؟ النهاردة يقولك ديمقراطية أيه ما تخلينا نعيش
محمد صلاح: ناكل عيش
د/ منى مكرم عبيد: ناكل عيش نتجوز نلاقى سكن مستقبل ولادنا لازم أى رجل سياسة أو لازم تربط بين هموم الناس ووجود الديمقراطية وتفهمهم لما يكون فى نظام ديمقراطى هتقدر تعبر عن نفسك مش ضرورى الإحتجاجات بالطريقة دى إلى أخره يعنى
محمد صلاح: والخناقات اللى حاصلة جوا الأحزاب يعنى كل شوية بنقعد نتكلم الصيغة بتاعة إن فيه 2 رئيس حزب لواحد حزب يعنى ؟ وأنوا عملية تداول السلطة داخل الحزب يعنى معضلات تحدثت نادرا طبعا حزب الوفد خارج التجربة الحزب الناصرى حصل فيه التجربة بس عدت يعنى حزب التجمع بتعدى يعنى إنما الباقى كله أو معظمه يعنى فيه مشاكل داخلية شايفة قد أيه ده بيأثر على مسألة النمو السياسى بغض النظر عن الحزب الوطنى والإستحواذ والكلام اللى سمعناه كتير يعنى؟ دا بيفرز نظام حزبى حديث ولا الحكاية دى كلها ديكور يعنى ؟ أصل أنا سألت الأستاذ سامح عاشور النائب الأول للحزب الناصرى قالك أحنا ديكور أنت أيه رأيك ؟
د/منى مكرم عبيد: أحنا طبعا ديكور لكن تجربة الوفد دى أنا فى رأيى دى هتبقى تجربة محورية للنظام الحزبى فى مصر
محمد صلاح: اللى هى الإنتخابات التى أتت بالدكتور سيد بدوى رئيسا للوفد
د/منى مكرم عبيد: طبعا دا نموزج فريد
محمد صلاح: شكل متحضر
د/ منى مكرم عبيد: شكل متحضر وراقى والمتنافسين بيحترموا بعض مفيش البلطجة والصراخ لا لا لأ أنا فى رأيى أحنا منقلش عن أى بلاد غربية المناظرات اللى حصلت فى التليفزيون بين الدكتور سيد بدوى والرئيس السابق محمود أباظة ميقلش عن اللى شوفناه بين المنافسين الأنجليز بين حزب العمال والمحافظين واالليبرالين والديمقراطيين ورقى ودا كله وأحنا منقلش يعنى
محمد صلاح: التجربة دى هتنقل الوفد إلى أى مرحلة يعنى ؟
د/ منى مكرم عبيد: هتنقل الوفد نقلة تاريخية النهاردة كان بيقول أيه توفيق الحكيم فى كتابه؟ عودة الروح لحزب الوفد حصل ودا الواحد لازم يشكر محمود أباظة اللى كان ليبراليا قولا وفعلا
محمد صلاح: أه بس عودة الروح اليومين دول باثر شوية الوفد بعدها شارك فى إنتخابات الشورى
د/ منى مكرم عبيد: لا لا لأ الدكتور السيد البدوى النهاردة بيستثمر الديناميكية أللى أعقبت الإنتخابات أنت مش شايف كل الناس الللى بتنضم ؟
محمد صلاح: لأ أنا مش شايف لسه ورينى
د/ منى مكرم عبيد: أوريك فين ؟ ما تقرا الجرايد
محمد صلاح: لا لا لأ بقرا أنتى قاعدة على باب الحزب بتشوفى اللى داخل واللى خارج أنتى جوا الحكاية قوللنا
د/ منى مكرم عبيد: وهو عنده رؤية وهو هيطبق هذه الرؤية وهو أدى لنفسه محدش بيعمل كده بيدى لنفسه 18 شهر وبيقول حا سبونى بعد كده مين أللى بيقول كده ؟ ياريت الوزرا يعملوا كده
محمد صلاح: 18 شهر ؟
د/ منى مكرم عبيد: 18 شهر
محمد صلاح: بقولك أيه يا دكتورة التجربة بتاعة حزب الوفد أعقبها على طول أو تزامن معها إنتخابت الشورى ولا مقعد لحزب الوفد
د/ منى مكرم عبيد: أنا بالنسبةلى دى فزورة أولا الحزب ما كنش فاضى
محمد صلاح: كان مشغول بالإنتخابات
د/ منى مكرم عبيد: كان مشغول بالإنتخابات الداخلية فالقيادات الوفدية ما كنتش فاضية تنزل مع المرشح ده ولا المرشح التانى وده اللى حصل لكن يعنى
محمد صلاح: دكتورة ليه لما حصل الحراك السياسى والحركات الإحتجاجية فى الشوارع لقينا أن الأحزاب بدأت فى مرحلة تالية إلى عمل إئتلافات وأخيرا كان فيه إئتلاف ما بين حزب الجبهة وحزب الوفد والحزب الناصرى وحزب التجمع بس مفيش أسبوعين تلاتة كده وحسينا إن الإئتلاف ده أنهار مفيش إئتلاف فين الأئتلاف دلوقتى يعنى ؟
د/ منى مكرم عبيد: هو الإئتلاف ده لازم يجتمع كل يوم ؟ الإئتلاف ده كان عشان يتفقوا على مسائل هما شايفينها مشتركة الإصلاح السياسى تعديل الدستور
محمد صلاح: هما متفقين على كده من الأول يعنى الحريات السياسية والإصلاح السياسى والكلام دا كله يعنى وقانون الطوارىء يعنى كل ده ما أحنا عارفين أنهم متفقين يعنى
د/ منى مكرم عبيد: فيه حاجات تانية هما مش متفقين عليها فالإئتلاف ده مش يعنى يبقى إئتلاف إلى الأبد إئتلاف على حاجات معينة
محمد صلاح: بس الإئتلاف فى البداية له أفق ::يستمر كام شهر كده؟
د/ منى مكرم عبيد: أيوه أنت مش شايف كل الحاجات المتلاحقة ؟ هما لحقوا ؟
محمد صلاح: أيه هى الحاجات المتلاحقة ؟
د/ منى مكرم عبيد: الإنتخابات اللى فى حزب الوفد فيه دلوقتى إنتخابات مجلس الشعب بعد كده إنتخابات الرئاسة بين إنتخابات مجلس الشعب ومجلس الرئاسة أكيد هيكون فيه إجتماعات بينهم وتشاورات وحوارات يعنى يعملوا أيه سوا؟ إلى أخره
محمد صلاح: طب أنتى شايفة يعنى الأمور متجهة إلى فين قبل إنتخابات مجلس الشعب اللى خلاص قربت ؟
د/ منى مكرم عبيد: للأسف الناس شايفة إن إنتخابات مجلس الشورى دى بروفة لإنتخابات مجلس الشعب
محمد صلاح: الناس شايفة كده أنتى شايفة أيه بقى ؟
د/ منى مكرم عبيد: أنا بالنسبةلى إنتخابات مجلس الشورى دى ولا كان ليها وجود ولا كان ليها أحزاب ولا كان ليها حركة ولا حد حس بيها ولا كان فيه ناخبين يعنى حتى تحس إن المرشحين يعنى كده غصبا عنهم
محمد صلاح: المرشحين ؟
د/ منى مكرم عبيد: أه
محمد صلاح: ما حصلت مشاكل برده ما بين المرشحين برده
د/ منى مكرم عبيد: أه برده معلش يعنى كان الجو مشحون ما بين الحزب الوطنى والأخوان لكن غير كده يعنى هى مرت وخلاص
محمد صلاح: طب شايفة الخريطة شكلها عاملة أزاى بقى ؟ فى إنتخابات مجلس الشعب اللى جاية ؟
د/ منى مكرم عبيد: الناس بتهتم بالتعيين اللى فى مجلس الشعب مين اللى هيتعين ؟ مين الصوت اللى هيكون باين أو يمثل حزبه أو يمثل فئة تانية
محمد صلاح: قصدك التعين فى مجلس الشورى
د/منى مكرم عبيد: هوانا قلت ايه؟
محمد صلاح: قلتى الشعب
د/منى مكرم عبيد :لا
محمد صلاح: طيب أنا همشى فى سكة الشعب أنتى خدتى نفسك فى سكة الشورى أحنا بنتكلم فى الشعب
د/ منى مكرم عبيد: دلوقتى الشعب
محمد صلاح: أه
د/ منى مكرم عبيد: الشعب طبعا أهم والناس بتهتم أنا خايفة إن الإنتخابات هتكون عنيفة حتى يمكن دمويا
محمد صلاح: أيه ملامح كده يعنى ؟
د/ منى مكرم عبيد: فى الإطار العام أحنا دلوقتى فى تحول ديمقراطى أنا دلوقتى فى سنة محورية من تاريخ مصر فيه تحول فيه ناس مش عارفة فيه قلق موجود فيه غضب موجود كل دا موجود كل ده هيأثر على الإنتخابات اللى جاية
محمد صلاح: أنتى مع الأحزاب طبعا تشارك ؟ تفتكرى مدى ثقل حزب الوفد بعد الإنتخابات الأخيرة والمشهد الحضارى اللى ظهرت بيه الإنتخابات والإشادات طبعا اللى
د/ منى مكرم عبيد: الكل أشاد ونال إحترام الناس إحترام إنبهار مش مصدقين
محمد صلاح: والتقدير؟
د/ منى مكرم عبيد: والتقدير إنى دا ممكن يحصل فى مصر فدا برده نموذج مش فى الأحزاب التانية نموذج للشباب يديله أمل وأنا مبسوطة أن عندى مجموعة من الطلبة اللى عندى فى الجامعة الأمريكية مهتمين قوى دلوقتى بالتجربة عايزين يعرفوا أكتر هل هيقدروا ينضموا فيه إهتمام بيهم علشان كده لازم الإهتمام بالجيل الجديد النهاردة نحتويهم لما يكون فيه ثقافة ديمقراطية الناس تفهم يعنى ليه بنطالب بالديمقراطية؟ ليه بنطالب بالإصلاح؟ كل دا لابد أن قيادات الأحزاب هى بتوعى الناس
محمد صلاح: والأحزاب عندها القدرة دى ؟
د/ منى مكرم عبيد: أه طبعا معندهاش الإرادة الإرادة حاجة والقوة حاجة أنا مش شايفة إن فيه أى إرادة غير فى حزب الوفد اليوم
محمد صلاح: بس؟
د/ منى مكرم عبيد: بس
محمد صلاح: بس مين يشهد للعروسة بقى ؟ وبقيت الأحزاب بتعمل أيه بقى ؟
د/ منى مكرم عبيد: بتتخانق مع بعض لأ أحنا مش بنقول بس حزب الوفد فيه أحزاب تانيين حزب التجمع الحزب الناصرى الجبهة كل دول ليهم وجود وليهم
محمد صلاح: بتلحقى نفسك ؟ الأول أنتى قلتى كل الأحزاب
د/ منى مكرم عبيد: ضعيفة طبعا أه ما أنا بقول بما فيهم دول بس دول اللى معروفين على الساحة
محمد صلاح: يعنى دول غير دك همّا
د/ منى مكرم عبيد: غير دك همّا دك همّا 24 واحد 24 حزب لو كنت شاطر قلى الأسامى؟
محمد صلاح: هقولها لك بقى بعدين لسه الكلام ما خلصش
فاصل
محمد صلاح: لحقت نفسها الدكتورة منى مكرم عبيد وقالت أن الاحزاب يعنى عندها مشاكل كتيرة بس ال4 أحزاب أللى قالت عليهم قبل ما نطلع كويسين يعنى عندهم مشاكل بس يعنى دكتورة عندنا أراء لبعض الناس فى موضوع الأحزاب ده نشوف الناس بتتكلم عن أيه فى موضوع الأحزاب ؟ ونرجع تانى
مواطن: وألله بالنسبة لأحزاب المعارضة هى دورها مش فعال بالنسبة للشعب يعنى فيه ناس كتير ما تعرفش حزب الوفد اللى هو يعنى من أبرز أحزاب المعارضة وفيه أحزاب كتير يعنى ملهاش دور قوى ملهاش إعلام قوى مفيش أى حد بيدعمها حتى يمكن آخر إنتخابات لحزب الوفد يمكن فيه ناس كتير جدا ما سمعتش عنها ولا إتعملت حتى بشكل سلمى دا دليل حتى أنوا صوتها مش قوى ومش قادر يوصل للناس على قد ما يقدر يعنى
مواطن: أحزاب المعارضة لا ناجحة فى حاجة ولا هتحقق حاجة لأن أحنا شايفين إنا الحزب الوطنى عنده قدرات وإمكانيات هو مسيطر على كل حاجة فى مصر يعنى
مواطن: مفيش أى حزب شاعر أنوا يقدم حاجة للشعب المصرى لازم يكون برنامج قوى يشهد الناس يخلينا أنزل أديله صوتى لحد الأن مفيش أى حاجة
مواطن: نفس الكلام بيتقال والجرايد بتكتب على الفاضى وفيش أى حاجة
مواطن: أحزاب المعارضة بتعتبر ضعيفة إلى حد ما وبعدين ما هو ليه السبب ؟ لأن ملهاش ميزانيات يعنى معروفة وبيجى أى واحد بيجى يخش حزب المعارضة كأنك يعنى بتحارب بتحارب الحكومة فاحنا ما بنحاربش أحنا عايزين الشىء الأصدق يبقى فيه توضيح ميبقاش فيه مناحرة يبقى العمل كله لصالح المجتمع أحزاب المعارضة هى أحزاب ضعيفة جدا ومبتأديش أى غرض هى هوائيات وناس مبيبقاش لها مزاج
مواطن: ولا حد قادر يوصل للمواطن العادى الغلبان الراجل اللى مطحون الراجل اللى صاحب حق من كل حاجة
مواطن: لاتعليق
محمد صلاح: محدش قادر من الأحزاب يوصل للمواطن الغلبان
د/ منى مكرم عبيد: أحنا قلنا نفس الكلام ما أحنا قلنا
محمد صلاح: يعنى دا الواقع
د/ منى مكرم عبيد: دا الواقع فيه فواصل بين الأحزاب والشعب وبين الحكومة والشعب يعنى مش بس بين الأحزاب هو دا النهاردة المشكلة الكبيرة إن الناس اللى ليها القدرة مش حاسة بالناس العاديين
محمد صلاح: لما رجعت حزب الوفد خدتى منصب معين ولا حاجة ؟
د/ منى مكرم عبيد: لأ بس دلوقتى فيه كلام إن يمسكونى لجنة العلاقات الخارجية ودا طبعا شرف عظيم ليا وأنا طول عمرى أشتغلت مع الدكتور وحيد رأفت كنت أنا مقررة هذه اللجنة لمدة 10 سنين ودا مش جديد عليا بس طبعا دى ترقية كبيرة
محمد صلاح: أنتى تستاهلى كل خير مش كده ولا أيه ؟
د/ منى مكرم عبيد: أيه
محمد صلاح: قصة التضييق على الأحزاب بس هنرجع تانى ونقول وفقا للكلام اللى قالوه المواطنين أللى كانوا معانا على الشاشة فى التقرير أن الأحزاب نفسها هل حبت أو أرتضت أو سعت أنها تنزل الشارع وأتمنعت ؟ تتواصل مع الناس وأتمنعت ؟ تقدم خدمات للناس وأتمنعت ؟
د/ منى مكرم عبيد: ليه أنت مش عارف القوانين أيه ؟ العقبات الإدارية والبيروقراطية اللى على الأحزاب هما مش المفروض يسبوا المقر
محمد صلاح: قاعدين فى المقر
د/ منى مكرم عبيد: قاعدين فى المقر فى أوض مغلقة يكلموا بعض
محمد صلاح: علشان كده مصرة على جكاية المشاركة فى الإنتخابات
د/ منى مكرم عبيد: أه طبعا طبعا علشان دى فرصة بتحصل مره كل 5 سنين ولمدة قصيرة اللى هى مدة شهر
محمد صلاح: بس الخطاب السياسى كان موجود نقطة تتعلق بالحوار ما بين الأحزاب وأشتركوا الأحزاب حتى الحزب الوطنى فى الحوار يعنى وتوقف الحوار مع الوطنى فى 2004 ثم بعد كده بدات مسألة الحوار بين الأحزاب
د/ منى مكرم عبيد: دا كان منولوج
محمد صلاح: مش ديالوج؟
د/ منى مكرم عبيد: لأ دا كان منولوج بيسمح لأحزاب المعارضة أنها تعارض إلى الأبد وإن الحزب الحاكم يحكم إلى الأبد هو دا النظام خلاص يبقى حوار أيه ؟
محمد صلاح: طب الحوار بقى بين الأحزاب وبعضها بعيدا عن الحزب الوطنى كان فيه ديالوج بقى ولا برده منولوج ؟
د/ منى مكرم عبيد: لا الإئتلاف ده تم بعد مشاورات محاورات الأحزاب بتحضر مثلا مؤتمرات فى أحزاب تانية مختلفة يعملوا حاجات مشتركة إلى أخره بس دى بداية كويسة لابد أن يكون فى تواصل مع القوى الإصلاحية القوى الإصلاحية حتى فى الحزب الوطنى مش بس فى أحزاب المعارضة
محمد صلاح: على مستوى الحركة فى الشارع فيه قيود زى ما بتقولى طب على المستوى الفكرى أيه الأوراق أللى أتقدمت أو الأفكار لعلاج مشاكل الناس بإستثناء صحف الأحزاب
د/ منى مكرم عبيد: المستقلة
محمد صلاح: لأ أنا مش بتكلم على العمل الصحفى أنا بتكلم على إن بعض الأحزاب أختزلت فى صحف يعنى بقى حزب صحيفة
د/ منى مكرم عبيد: تعرف فى وقت فؤاد باشا سراج الدين كنا عاملين قافلة طبية تجوب محافظات مصر معرفش دى وقفت ليه ؟ يعنى دا نموذج من ضمن النماذج اللى أنا أفتكرتوا دلوقتى يعنى من ضمن الحاجات هى قوة الأحزاب تيجى من الخدامات
محمد صلاح: الخدمات أللى بتتقدم للناس؟
د/ منى مكرم عبيد: طبعا
محمد صلاح: دكتورة منى أمتى يكون عندنا حزب تانى غير الحزب الوطنى قوى؟ زى ما فيه أراء سياسية بتقول أنوا مصر محتاجة حزب آخر وأنو وجود حزبين قويين هو الأفضل يعنى سواء يتبادلوا بقى السلطة أو يتنافسوا دا موجود فى أوروبا والدول المتقدمة وموجود فى أمريكا وموجود فى دول كتيرة قوى
د/ منى مكرم عبيد: أنا من 20 سنة كتبت مقال
محمد صلاح: دا قبل ما تتخرجى من الجامعة؟
د/ منى مكرم عبيد: على هذا الموضوع أنه لابد أن يكون فيه حزبين كبار يتنابوا السلطة مثل العمال والمحافظين فى أنجلتر ومثل الجمهوريين والديمقراطيين فى أمريكا ومثل حتى فى فرنسا اليسار واليمين فدا ما بيقلقش السلطة وما بيقلقش النظام علشان ده نظام مؤسسى الأراء مختلفة التنفيذ مختلف لكن الدولة الدولة موجوده فأنا كنت شايفة فى وقتها كان رؤية فؤاد سراج الدين برده بيقولها فى 77 على أساس أن الوفد ممكن يكون هذا الحزب وأنا شايفة إن النهاردة له فرصة أن يكون هذا الحزب حزبين كبار حزبين مش مختلفين قوى فى الأراء ولكن فى التنفيذ لكن علشان يبقى جزب قوى لازم يقوى نفسه من الداخل أزاى بقى ؟ أنك تقوى الكوادر أللى عندك أنك تدعم الكوادر اللى عندك أنوا تديهم فرصة أنوا يعبروا عن نفسهم
محمد صلاح: لو رسمنا على ضوء الكرم اللى حضرتك بتقوليه دلوقتى صورة للمستقبل هتطلع صورة ملامحها شكلها أيه ؟ ولا سريالى بقى كده زى لوحات وزير الثقافة فاروق حسنى ؟
د/ منى مكرم عبيد: الصورة أنا بشوفها مثلا بعد إنتخابات مجلس الشعب أنت عايز دلوقتى ولا بعد 5 سنوات ؟
محمد صلاح: اللى تجيبيه كويس
د/ منى مكرم عبيد: دلوقتى مش هيتغير قوى
محمد صلاح: الصورة متديش إنطباعات أنوا يبقى فيه تغيير كبير؟
د/ منى مكرم عبيد: لأ برده سيطرة الحزب الحاكم بعد 5 سنين بقى الصورة هتتغير خالص عندك جيل جديد طالع جيل واعى جيل نتعلم جيل مش مستسلم للحالة الراكدة
محمد صلاح: دلوقتى فى إنتخابات الشورى مثلا سيدة واحدة بس
د/ منى مكرم عبيد: هدى الطبلاوى ؟
محمد صلاح: أه كنت فى مجلس الشعب لمدة دورتين ألل هما 24 أمرأة أنتى كنتى معاها ولا ضدها ؟
د/ منى مكرم عبيد: أنا مش محبزا حكاية الكوته لكن دلوقتى كل مسدود أمام المرأة هتعمل أيه يعنى ؟ لكن أنا لو أخدت رأيى من الاول كنت هقولك النظام الإنتخابى أللى هو القايمة النسبية دا بيمنح فرص للمرأة للأقباط للمثقفين للشباب كل ده أللى هما مهمشين من الحياة السياسية ليهم دور ممكن يشاركوا أه الكوته الكوته خلاص
محمد صلاح: شايفة موضوع الكوته ده هو أقر طبعا مرتين دا هيخلى الناس يصوتوا لصالح المرأة يعنى ؟
د/ منى مكرم عبيد: أه لازم يكون فيه تدريب وحسب بقى المرأة فى البرلمان أدائها
محمد صلاح:طبعا الحزب الوطنى معندوش مشكلة يقدر يجيب 64 مرشحة معندوش قضية كبيرة يعنى هل باقى الأحزاب عندها كوادر من السيدانت للترشيح
د/ منى مكرم عبيد: مش مهم مش ضرورى يرشحوا 64 واحدة ياخدوا 10 تنفار مثلا ويدعمهم كويس
محمد صلاح: ما هم هيسقطوا والحزب الوطنى هياخد ال64 يبقى معملناش حاجة يبقى كل القصة الكوته بقت 64 أضيفوا إلى الحزب الوطنى وترجع الأحزاب تانى تشتكى
د/ منى مكرم عبيد: ليه ؟ عندها كوادر معندهاش 64 مرأه سيدة لكنها عندها 15 واحدة دول ندعمهم
محمد صلاح: كل حزب 15 ولا كلهم 15 ؟
د/ منى مكرم عبيد: لا لا لأ كل حزب فيه 18 مش كلهم هينجحوا لكن ممكن كل حزب يقدم 15 سيدة فى إنتخابات الكوته على الأقل يعنى إن ما مكنش أكتر
محمد صلاح: زى مين ؟
د/ منى مكرم عبيد: أسامى يعنى ؟
محمد صلاح: أه من أحزاب المعارضة
د/ منى مكرم عبيد: يعنى مثلا عندك فى التجمع أمينة الحسينى فى حزب الوفد عندك منى مكرم عبيد
محمد صلاح: منى مكرم عبيد تمشى شوية
د/ منى مكرم عبيد: فى الحزب الناصرى عندك
محمد صلاح: دا ،تى معرفتيش تطلعى 3 من كل حزب
د/ منى مكرم عبيد: لا لا لأ حزب الوفد عنده 3 و 4و 6
محمد صلاح: لأ مش من الوفد طلعلى 4 تجمع و3 جبهة
د/ منى مكرم عبيد: مش المفروض أنى أنا أعرف اساميهم
محمد صلاح: طب خليكى معانا كده معانا أراء بعض الناس عن رموز الأحزاب
تقرير
مواطن : فيه حزب التجمع واحد أسمعه سعيد وحزب الغد اللى هو أيمن نور
مواطن:أعرف إبراهيم عيسى بتاع جريدة الدستور وأعرف مصطفى بكرى راجل كويس جدا جدا وأعرف الدكتور شحاته
مواطن : فيه أحزاب الوفد والوطنى مش فاكر أحزاب المعارضة
مواطن: أنا كنت أعرف أستاذ إبراهيم شكرى زمان يعنى دلوقتى أسمع عن واحد أسمه السيد البدوى
محمد صلاح: فرحت قوى الدكتور منى مكرم عبيد أول ما الأخ أللى كان بيتكلم قال أنوا بيسمع عن حد أسمه السيد البدو أتبسطى ها ؟
د/منى مكرم عبيد:أه
محمدصلاح: بس شوفتى ما حدش عارف حاجة تعليقك ايه على الثقافة الحزبيةعند الناس ؟
د/منى مكرم عبيد: هوأنت يعنى تعرف أكتر منهم ؟
محمد صلاح: أشك بحتاج برده أشغل دماغى لحد ما أعرف
د/منى مكرم عبيد: قولى أنت الأسامى
محمد صلاح: لا لأ تعليقك أيه ؟
د/ منى مكرم عبيد: وجودهم مفيش وجود للأحزاب
محمد صلاح: بالإضافة لموضوع كوتة المرأة يقال على فترات مطالبات بكوتة للأقباط أيه رأيك فى الحكاية دى ؟
د/ منى مكرم عبيد: الكلام ده أتعرض على الوفد من 1923 وأكتر الناس رفضوا هذا الأقباط علشان هذا يعنى إن فيه ناس مضطرين إن يكون ليهم إطار منفرد إطار لوحده وهما مش ضمن الإطار الكبير اللى هم الأخوة الوطنية علشان أنا بكره كلمة الوحدة الوطنية مبحبهاش وحدة يعنى أيه ؟ ,أحنا متخنقين علشان يبقى فيه وحدة أحنا أخوه أخوه فى الوطن فأنا ضد طبعا الكوتة كوتة المرأة دى حاجة تانية كوتة المرأة أنت بتشجع المرأة علشان معندهاش فرص كتيرة ولا للتدريب ولا لمشاركة علشان التقاليد وعلشان طبعا همومها كأم وكزوجة والرؤية الذكورية اللى موجوده مازالت فى المجتمع وحتى فى النخبة إلى أخره فكل دا بيأثر فلما تعمل كوتة دا بيسهل دخول المرأة فى مؤسسة نيابية تقدر تعبر عن نفسها بدون خوف لكن بالنسبة للأقباط لأ طبعا
محمد صلاح: أنتى رجعتينى تانى لموضوع كوتة المرأة أمتى الثقافة دى تنتهى يعنى ؟ ولا برضه الحزب الوطنى هو اللى عايز الكوتة دى تستمر يعنى؟
د/ منى مكرم عبيد: طب كويس أنك بترد
محمد صلاح: أيه برده الحزب الوطنى هو اللى عايز كده ؟
د/ منى مكرم عبيد: لأ غير الحزب الوطنى فى حاجة أسمها إعلام فى حاجة أسمها المدرسة التعليم التربية التربية مش موجوده التعليم يعنى
محمد صلاح: دا فى البيت والأسرة
د/ منى مكرم عبيد: لا وفى المدرسة علشان كده الناس بتشجع حكاية المجتمع المدنى المجتمع المدنى مش كله لكن المجتمع المدنى المفروض أنه يشجع الناس أن يتعودوا على الحوار على تداول السلطة على حوار بدون خناق يعنى حوار حضارى رقى إحترام الأخر كل دا مش موجود اللى أحنا كنا بنسمية التربية المدنية وأنا بطالب الوزير ذكى بدر وزير التربية والتعليم وأنا شايفة أنوا بياخد خطوات إيجابية جدا أنوا يدخل المادة التربية المدنية للدراسة دى هتشيل برده نوع من التصعب أللى موجود ونوع من أللى أنت شايفه يعنى
محمد صلاح: لاحظت أنا وأنتى بتجيبى سيرة المجتمع المدنى قلتى مش كله أنتى عند ملاحظات على أداء منظمات المجتمع المدنى ؟
د/ منى مكرم عبيد: أه طبعا عندى ملاحظات كتيرة قوى على ملاحظات غير حكومية اللى بتسهل مش بتشيل ودا مش هنعمم
محمد صلاح: أيه بقى هما دول ؟
د/ منى مكرم عبيد: أنا كنت بشغل رئيسة جمعية غير حكومية أسمها جمعية النهضة فى التعليم وكنت بشوف المدارس الفقيرة نحاول نساعدهم نحاول نعمل تدريب للمدرسين تدريب للولاد فى الصيف كنا بنعملهم معسكرات إلى أخره لكن فيه طبعا جمعيات بتستغل المنح أللى بتاخدها من الخارج فى غير هدف الجمعية لكن أنا مع تشجيع المجتمع المدنى المجتمع المدنى ده بيؤدى خدمة ورسالة
محمد صلاح: من الأسس الموجود دلوقتى شايفة التطور هيحصل أزاى ؟ غير أمنياتك يعنى أو مطالبك
د/ منى مكرم عبيد: أنا شايفة هيكون فيه تطور ديمقراطى من هنا ل8 سنين فى الحياة السياسية فى الأحزاب الأحزاب دلوقتى بعد تجربة الوفد هتفوق لنفسها وأعضاء الأحزاب هما اللى هيفوقوا وهيطالبوا بنفس النموذج الديمقراطى والحضارى الراقى اللى حصل فى حزب الوفد نتمنى طبعا أنه الحزب الوطنى يعمل كده بس أفتكر أنى دى هتحرجه لة معملش هذه الطريقة فالتراكم من هنا لى 5 سنين هيكون عندنا نظام سياسى طبيعى دلوقتى هو غير طبيعى مقيد عندنا نظام تعددى مقيد
محمد صلاح: أنتى شايفه أنوا بعد 5 سنين هيكون نظام تعددى بالفعل؟
د/ منى مكرم عبيد: وبيتهيألى أنه أكتر حزب ممكن يدى المثل فى ده هو حزب الوفد علشان أللى حصل فى 28 مايو أنه يكون فى 1400 واحد يشاركوا بالطريقة دى بالطريقة الديمقراطية بالطريقة الحضارية والنتيجة ودا كله أنا بشوف إن دى حاجة غريبة ما حصلتش فى مصر
محمد صلاح: دكتورة منى مكرم عبيد بتتوقع تغيير مهم فى الحياة السياسية فى مصر خلال 5 سنين يدينا ويديكم طولة العمر وقالت الدكتورة منى مكرم عبيد النهارة معانا كلام جميل كلام معقول كلام مسئول خلص الكلام سلام