انا اسمي الشهيد أحمد بسيوني .. ضحيت بكل حاجة في حياتي ، بزوجتي واولادي وأمي وابويا ، عارفين عشان خاطر ايه ؟ و عشان خاطر مين ؟ عشان خاطر البلد .. عشان تعيشوا في أمان وحب وحرية. زعلت قوي لما شفتكم بتقتلوا بعض ، عارفين خايف من ايه ؟ ، خايف اندم ان دمي نزف علي ارض مصر ، خايف اندم اني مت عشانكم ..لاني حاسس انكم ماقدرتوش دي ، عشان خاطري وخاطر كل شهيد ، حبوا بعض ، امسكوا ايدين بعض ، ما تدوش فرصة لعدونا يفرح فينا ، انا متأكد ان دمي مش ها يروح هدر، عارف ان انا وكل الشهداء غاليين عليكوا ، اوعدوني تنسوا الفتنة دي ، الفتنة ديانة كل اللي ما بيحبش مصر ، عشان كده اثبتوا للعالم احنا اد ايه بنحب مصر ، اثبتوا ان احنا مصريين وبس وميدان التحرير شاهد علينا، لو بتحبوا مصر خافوا علي بعض .
انا اسمي الشهيد مصطفي الصاوي، ضحيت بشبابي ومستقبلي عشان خاطركم ، وانا بموت كنت فرحان وانا شايفكم في الميدان بتحبوا بعض ، حاضنين بعض ، وانا بموت كنت مطمن عليكم لانكم كنتم بجد خايفين علي بعض ، لكني دلوقتي خايف وحزين ، مش ممكن يوصل بينا الامر نقتل بعض ، ايه رايكم لما ننسي كلمة مسلمين ومسيحيين ويبقي اسمنا بس " مصريين " ، انا عن نفسي موافق عشان بحبكم وخايف عليكم وخايف علي بلدي مصر، اوعدوني عشان انام في قبري مرتاح، لو بتحبوا مصر خافوا علي بعض .
انا اسمي الشهيد محمد سعيد هدية، كنت فعلا هدية من مصر لشعبها عشان ينولوا الحرية وتعيشوا بكرامة ،لكن اللي شفته بيقول ان شعبي مش قابل الهدية دي ،معقول نقتل بعض ، دا انا ضحيت بمستقبلي وحياتي واصحابي في المدرسة عشانكم ، تيجوا في الاخر تتخانقوا وتقتلوا بعض ، انا زعلان قوي ، وبدعي ربنا تحبوا بعض يا اغلي ناس في الدنيا دي، لو بتحبوا مصر خافوا علي بعض .
انا الشهيد كريم ابانوب ، انا الشهيد احمد ايهاب ، انا الشهيد حسين طه ، انا الشهيد عمر غريب ، كلنا واكتر من 800 شهيد في صوت واحد بنقول لكم ،خافوا علي بعض ، احنا سايبين مصر امانة في ايديكم .
الرسائل وصلتني عبر فيديو صممه وكتب فكرته واخرجه الشاعر المصري " ماس " ، من يريد مشاهدته يبحث عنه علي اليوتيوب بعبارة " فيديو خطير جدا عن فتنة امبابة لازم تسمعوه " ، الرسائل جعلت الدموع تتساقط من عيني ، اهديها للذين يريدون الخراب لعل ضمائرهم تستيقظ ، اذا كان لديهم ضمائر اصلا ، ليحفظ الله مصر مما يدبر لها من شرور ويجعل فسيح جناته لشهداء الثورة الابرارالذين ضحوا ولم يقدرالبعض تضحياتهم ويريد ان يستثمر دماءهم بسلوكيات رخيصة جدا.
