يسعد صباحك يا دنيا.. وسلام عليك يا زمان- دي مصر كانت عروسة.. وجنة الأوطان.. وميه صافيه بتروي سكة العطشان.. وكلمه حلوه بتشفي الوجع والحزن في الأبدان.. وعيون شايفه الطريق والكل فيها إنسان- لكن ده كله كان زمان. دلوقتي مصر حالها صبح حال وموال من الأحزان.. الكل تايه في دروبها وعيونه شايفه الذل بالألوان.. والحق واضح صريح لكنه متكتف جوه العيون واللسان. يا سحابه يا معديه .. والمطر زعلان.. تشرب جميع الغيطان.. وغيط الوطن عطشان.. كل الخلايق بتجري واحنا في نفس المكان.. تايهين في حواديت حياتنا.. والأمل هربان.. خايف يعدي علينا.. تايه عن العنوان.. وحتي لما بنحلم الحلم ييجي جبان.. وكابوس الهم راكب مليون جمل وحصان.. ورغم الكفاح المر علي طول الزمان.. والبحث في دفتر الحكايات عن كلمة الحرية.. ومعاها الأمان الحلم يفضل كابوس محبوس جوه النفوس.. والعمر ماشي نعسان.. نعيش الحياة مساكين.. واكلنا بالدين.. نتكلم باسم الدين.. لكن كلامنا أنين ماشيين كما العميان.. الجوف صبح عريان.. و العقل كسيح كسلان.. وضميرنا في الميزان. زرعنا حباية عرق في غيطان السكات.. العمر منا اتسرق.. وماتت الذكريات.. وخلصت الحكايات.. واللي مات أهو مات.. والألم في القلب بيزود في الحزاني مئات.. جابر وإسلام شباب ضحايا كلمتنا المسجونة بالآهات.. لا حقهم راجع ولا حق كل شهيد راح من أول ما زارنا الهم.. والغم بقي سطور مكتوبة في الروايات. قالولنا الحرية جاية مع ديمقراطية وحق لكل مظلوم.. لقينا إعلان دستوري قسمنا إتنين وحط علينا بدل الهم.. جبال م الهموم.. وصبحنا حياري بنعد أيامنا اللي جاية بالساعة واليوم.. هي الديمقراطية والحرية كلمة بنقولها وخلاص.. والخلاص منها قدر محتوم.. وملايين البشر بتحصد الحزن.. وبتزرعه من تاني في ليل النجوم.. ونهارها مليان بالغيوم.. والربيع اللي كنا بنحلم بيه صبح خريف مخيف.. والشتا من حبات المطر محروم. يا ليل من الحزن صاحي.. ومن الشقا نعسان.. علي كل صاحب قلب.. والدمع ساكن في الوريد وبيكوي في الشريان.. رسمت بالدم.. هم وبين السطور بركان.. وكتبت علي جدران الزمن أن المحبة أمان.. وسهرت والخلق نايمة والحزن يروي الغيطان.. وصنعت من حبة العين فرحة تملا المكان.. لقيتها دمعة ع الخد والجدران.. حاولت أرسمها بإيديه خدني الزمن وياه لواحة الأحزان.. ودرات الساقيه في مطرحها والميه جفت في العروق وفي الوديان.. ياللي قسمت.. وطرحت وضربت.. القسمه دي مغلوطه ومربوطه ومركبنا مش راسية علي الشطآن.. إعدل وحكم عقلك.. تلاقي قلوبنا تندهلك.. وتحلف باسمك.. وتصبح أبوالشجعان.. وإن كان عنادك مرادك. وكلمتك بس لاولادك وأحفادك.. إعرف إن الزمن دوار.. يوم فوق في العلالي.. ويوم ورا القضبان. الإنسانية صنعة الإنسان.. والقلب حبة حزن.. حبة فرح.. حبة حنان.. العمر واحد والرب واحد.. الحمد لله علي كل شيء.. الفجر أبيض والنسيم فنان.. والكلمة مفتاح سعادة.. وميه للعطشان.. قلها ساعة الأدان.. قلها في كل أوان.. وكل شيء في القلب يا صاحبي لازم في يوم ح يبان. ياللي معاك الحق خصمك دايما جبان.. ما تخفش م العتمة ولا الضلمة ولا من خسيس خوان.. اجمع قوتك وسابق خطوتك وخبي دمعتك ونادي ع الشجعان.. وهات كتاب الحرية واقراه من تاني تعرف العنوان.. العلم في المدرسة والجامعة.. والحق في الميدان.. الصدق نور الأمل.. والكدب ملوش مكان.. بر الخطر شوك لكنه بر الأمان.. والورد لابد يوم ح يفتح ويملا كل الغيطان.. والنصر بإيدينا يطرح سنابل حب في كل عطفة وحارة.. وكل ميدان.