إيه الجحود ونكران الجميل وانعدام الوفاء اللي وصلنا له الأيام دي؟!! عمرنا ما هنتغير أبدا ودايما هنقع في نفس الأخطاء اللي وقعنا فيها قبل كده!! الأسبوع اللي فات احتفلنا بذكري أكتوبر.. 39 سنة في وش العدو.. وفي المناسبة دي. الإعلام المصري قدم حاجات كثيرة أوي وعمل حوارات ولقاءات مع رجالة أكتوبر والقادة اللي لسة عايشين.. ربنا يطول في عمرهم لأنهم داعيا بيفكرونا بايامنا الحلوة وازاي كنا يد واحدة وكانت كلمتنا واحدة.. بسم الله.. الله أكبر بسم الله. حقيقي أنا حزنت وزعلت أوي من أن كل البرامج واللقاءات لم تذكر اسم الرئيس السابق مبارك ودوره في حرب أكتوبر.. كأنه فص ملح وداب!! حتي قادة أكتوبر.. ولا واحد منهم جاب سيرة الراجل ودوره في إعادة بناء القوات الجوية ودوره في كل الحروب اللي دخلتها مصر.. مش عارف ليه دايما بننسي ان التاريخ مبيعرفش يمسك استيكة يشيل بيها كلام عاشته الناس واثر في حياتها واذا عمل كدة مرة.. بيرجع تاني للحقيقة ويرجع كل اللي مسحه قبل كدة. مش عارف ليه بننسي نفرق بين مبارك اللي كان ريس ومبارك اللي كان بطل بشهادة الاعداء قبل الاصدقاء. محاكمة الرئيس مبارك والاتهامات الكثيرة الموجهة له بتمثل نقطة مهمة اوي في تاريخنا.. نقطة نفخر ونتباهي قدام العالم كله.. ان عندنا قانون مبيفرقش بين حد وكل المصريين قدامه سوا من الغفير للوزير وحتي رئيس الجمهورية. مبارك وسنوات حكمه جزء مهم اوي في تاريخنا لازم ندرسها ونستفيد بكل اللي فيها.. الحلو والوحش.. لان تلاتين سنة مش ممكن تتمسح باستيكة من تاريخنا. عيب اوي ان بعض القادة بتوع اكتوبر يشككوا في دور قائد القوات الجوية او انه نسب فضل النصر لنفسه!! عايزهم بس يرجعوا للكلام والحوارات اللي اتعملت معاهم قبل ثورة يناير وكانوا بيقولوا ايه عن الرئيس السابق ودوره في تحقيق النصر ودوره في اعادة البناء بعد أما مسك الرئاسة!! يا ناس عايزين نقول للتاريخ كلمة حق.. نقول الحسنات والسيئات.. اللي له واللي عليه ونفخر ان عندنا قضاة بيعرفوا ربنا علي حق. بلاش الغل والحقد والبغض والكراهية واللي يتجوز امي اقوله يا عمي تبقي هي الحبر اللي بنكتب بيه تاريخنا!