أنا عارف إنك يا مصر زعلانة عارف إنك حقيقى كنتى متهانة لكن يا مصر جيه اليوم وعرفتى انك خلفتى عيال اعذرينى دول فى عينينا والعالم اصبحوا أبطال كتبوا لامهم قبل مايموتو وصيتهم مصر ترجع تانى لحد كدة وقدرنا واللى بعدنا بقى يكملوا ويتمموا مهمتنا مصر بنحبها من جوة قلوبنا وهوة ده اللى ودانا للميدان نصرخ ونعلى صوتنا ولا نخاف ونصد بصدورنا عن إخوتنا واهلنا الضرب فى المليان عارفين ان اللى انكسر فى تلاتين سنة موش بس انتى يامصر لكن اللى هينصلح اكثر لما يقفوا على رجليهم ولادنا مصرنا كانت عليها سحابة وغمامة وعدت علينا كمان وفرمت لحمنا الدبابة عارف انا اللى راح من عمرنا كتير وموش هيرجع فى يوم وليلة بس احنا نحط ايدينا فى ايدين بعض حبنا لمصر موش بس بالتظاهر ده تاريخنا بيقول غير كده البلد دى طول عمرها فيها رجالة ما سابوش فى الارض شبر الا وخطوها رحالة رجعوا لها من شرقها وشمالها وغربها رافعين راسها ومنورين دروبها بوسام اوقلادة منورة يا مصر ياغالية طول عمرك ولادك عشانك سقوا ترابك بدمهم ياه يامصر لوشفت ثورة ولادك هزت اد ايه الأرض هزة ورفعت صوتنا عالى فى كل ميدان من شرقها وشمالها وغربها بفخر وعزة ابنك منير غنى ليكى يا مصر يا أغلى الأوطان قدمنا لسه عبور تانى وحليم علشانك فدائى فدائي وام كلثوم وشاعر النيل سوا كتبوا وغنوا وقتها مصر تتحدث عن نفسها وعبد الوهاب لما قال اخى جاوز الظالمون المدى فحق الجهاد وحق الفدي وقال كمان روحى فدى اوطانى كان الجهاد امانى واليوم يوم جهاد يا ولاد مصر كل مصرى اذى ينادى انا ملك لبلادي وياحبيبتى يامصر يا أمى ياشادية ده حتى وردة على الربابة من زمان غنت حلوة بلادى السمرة بلادي ايه يا مصر ده اللى غنوا ليكى من ولادك كثير واللى غنوا عليكى كانوا اكثر يا مصرى يا أبن النهارده فوق وخد بالك احنا رايحين رايحين وسايبين لك مسؤلية عارفين انك موش لوحدك تقدر تشيل علشان كده بنوصيك ترجع وتشتغل وتخلص فى عملك وتبدع وتنسى كلمة على قد قلوسهم وبوصيكم ياسواقين الميكروباص والله انا موش بتقنصل عليكم ولكن هدى اللون شوية معايا والسكة ممكن بينا تقضى ورزقكم على الله ربنا يزيده بس بالراحة علينا شويا وياولادنا بلاش الحجات الوحشة موش عاوزين نفتح والله فرحت بيكم فى اللجان الشعبية ياولاد مصر انا شفت منكم كتير جميل كان فين ده مستخبى يامصرى خد بالك من بنت الجيران وغطيها بعينك ولو حتى موش واخدة بالها وبتتدلع عليك مد ايدك ليها واكتب عليها قدام ابوها ومتنساش إن ابنك منها هيكون مصري ويا مصرى لو فى جيبك جنيه زيادة اديه لغيرك الفقير وخد بالك من فرحته بيه ورقبتك مرفوعة دايما وللخير سدادة بوصيك تاخد بالك من البريزة والريال اللى وسط الورق ومتعملش نفسك موش واخد بالك وترجعها لصاحبها وتقوله ياعم شغلك على راسى دى موش ليا دى للضرايب مستنية موش عايزين ذنوب ومصايب ورزقك هيزيد وهيغطي كلنا خدامين مصر موش خدامينهنم وياشرطى النهارده بقولك اوعك تقولى تانى انا سيدك شوف انت ايه اللى عملوا فيك سيدك ان كان ده والا ده واوعى تنسى انى انا شعب طيب شايفك يدوبك ابنى واخويا الصغير بفرح لما اشوفك نافش ريشك وياسيدى كرامتك على عينى وراسى من فوق بس انت متنساش الوصية بقول لكل حد هيقعد على الكرسى اه كرسى الريس ومعدتش خايف ياعم خلص شغلك وواجبك وروح وبالقلب داعيلك هما ست سنين وهنفكر ومعادش يهمنا نحبك او لا نحبك ولا هنعمل تانى زعيم من النهارده وغيرك وغيرك وياولاد عمنا عشتم جنبنا فى أمن وسلام وشفتم فى فبراير 2011 اد أيه لمصر حبنا هنعيش كمان وكمان سلام وبعده سلام برأس مرفوعة من غير ما حد يستفزنا والامة العربية النهاردة قامت ده مصر من غيرها كانت العزة والكرامة اتهانت وخلينا ننسا ونفكر فى بكرة قدمنا لسه عبور وطريق وكلام كتير لسه فى ميدان التحرير محفور يا مصرى وصيتك وصية. مصر دى زى امك اللى ترضاه عليها وهى عليك راضية ومرتاحة دعوة دايما ابواب السما ليها مفتوحة يا مصر جيشك هو شعبك وولادك ورجالك النهاردة الكلمة بقت واحدة الشعب هو مصر ومصر هى الشعب
