هاله أبو علم : مشاهدينا الكرام أهلا بكم فى حلقة الليلة من برنامج يحدث فى مصر والحديث الليلة يتركزعن مركزساهم بدورهام وكبير فى مجال التنمية الزراعية وساهم أيضا فى رفع إنتاجية المحاصيل الزراعية والتى أصبحت الصادرات المصرية منها تحتل مكانة عالية بين المنتجات الزراعية العالمية . محمد المغربى : إذن حديث الليلة سيكون عن مركز البحوث الزراعية بوزارة الزراعة والذى ساعد فى تعميم ونشر زراعة الأصناف عالية الجودة ومبكرة النضج والمقاومة للأفات . هاله أبو علم :ومشاهدينا الكرام بفضل هذه الأصناف بلغت إنتاجية فدان القمح فى عام 2008 نحو 18 أردب ومحصول الأرز أيضا زاد إنتاجية الفدان به نحو 4 طن . محمد المغربى : معلومات ونتائج مهمة وأيضا بعض الملاحظات هنعرفها من ضيفنا فى الإستديو دكتورأيمن فريد أبو حديد رئيس مركز البحوث الزراعية بوزارة الزراعة أهلا بك معانا فى يحدث فى مصر . د/ أيمن فريد أبو حديد : أهلا وسهلا هاله أبو علم : أهلا بحضرتك معانا د. أيمن والحديث مع حضرتك هيتواصل ولكن بعد مشاهدة هذا التقرير . د/ أيمن فريد أبو حديد : أهلا وسهلا فاصل " تقرير " الأبحاث الزراعية هى الدعامة الرئيسية للنهوض بالمنتج الزراعى وتُعد مصر من أكثر دول العالم إعتمادا على التكنولوجيا الحديثة لتحقيق زيادة الانتاج نظرا لمحدودية الموارد الزراعية أدركت مصر هذه الحقيقة منذ وقتٍ طويل حتى أن إنشاء الأقسام الفنية فى مطلع القرن ال20 سبق إنشاء وزارة الزراعة ومن ثم كان الإهتمام الدائم بتنمية القدرات البحثية فى الأقسام الفنية فى إطار وزارة الزراعة والتى تبلورت مع بداية السبعينيات فى إنشاء مراكز البحوث الزراعية . عبد الغنى محمد الجندى عضو مجلس البحوث الزراعية والتنمية بمركز البحوث الزراعية البحث العلمى أهميته إن ما فيش أى تنمية زراعية بدون ما يكون لها بحث علمى .. والبحث العلمى هو إللى خلى النهاده إنتاجية المحاصيل كلها بالكامل علية جدا وإرتفعت يمكن بنسب أكثر من 200% ودا إللى قلل الفجوة الزراعية والفجوة الغذائية ما بين الإستهلاك والانتاج هو البحث العلمى الذى ادى ألى ذلك .تمكن مركز البحوث الزراعية فى السنوات الأخيرة من تحسين وصيانة الثروات النباتية والحيوانية والمائية وتطوير طرق الصناعات الغذائية فضلا عن إدخال وأقلمة محاصيل النباتية وسلالات حيوانية جديدة وإيجاد حلولٍ للمشاكل الطارئة التى تعترض العمليات الانتاجية . فاصل محمد المغربى : دكتورأيمن أنا أعتقد إن البداية طبيعية هى إن إنت تكلمنا على معهد أو مركز البحوث الزراعية قول لنا إيه حكايته تاريخه إيه ودوره إيه ؟ د / أيمن فريد أبو حديد : مركز البحوث الزراعية فى مصر واحد من أقدم مراكز البحوث العلمية وهو أكبر معهد علمى للبحوث الزراعية فى منطقة شمال أفريقيا والشرق الأدنى وصولا الى باكستان والهند . هاله أبو علم : متى تم إنشاؤه ؟ د/ أيمن فريد أبو حديد : بدأ إنشاء مركز البحوث الزراعية كأقسام متخصصة للبحوث فى وزارة الزراعة فى سنة 1900 أكثر من قرن من الزمن ومركز البحوث الزراعية بيتطور – تطور من أقسام بحوث موجودة فى وزارة الزراعة الى معاهد مستقلة للبحوث الزراعية تابعة للوزارة الى أن أُنشئ بقرار جمهورى سنة 1983 كمركز للبحوث الزراعية بمثابة جامعة زراعية للأبحاث هذا المركز يحتوى على 24 معهد ومعمل مركزى – كل معهد منهم يُعادل كلية من الكليات .. الطاقة البشرية الإجمالية فى مركز البحوث الزراعية 6600 باحث حاصلين على الدكتوراه بالإضافة إلى المساعدين .. الإمكانيات الطبيعية اللى موجودة فى مركز البحوث الزراعية حوالى 24 ألف فدان خاضعة لمركز البحوث الزراعية تستخدم فى التجارب إنتاج التقاوى والإرشاد الزراعى وفى الانتاج ودعم الأبحاث الزراعية من خلال العملية الانتاجية . محمد المغربى : يعنى كل معهد واخد 1000 فدان ؟ عندنا 24 معهد و24ألف فدان د/ أيمن فريد أبو حديد : لأ هى طبعا هذه المساحة مخصصة كإدارة مركزية بتخدم جميع المعاهد وكل معهد وفقا لإحتياجاته فى بعض المعاهد لا تحتاج الى مساحة من الأرض ولكن تحتاج إلى بيانات وهو معهد الإقتصاد الزراعى فيه معهد بيحتاج الى إنه يعمل نشاط أرشادى مش محتاج مساحة من الأرض ولكن معهد زى المحاصيل الحقلية بيحتاج إلى مساحات ضخمة من الأرض علشان إن أنا أقدر أعمل مزارع توضيحية يقدر المزارعين يحاكوها وبالتالى يزودوا الانتاج بتاعها وكمان أقدر أنتج فيها التقاوى اللازمة للزراعة خصوصا المحاصيل الرئيسية . محمد المغربى : ال24 معهد مقسمين جغرافيا ؟ د/ أيمن فريد أبو حديد : ال 24 معهد موجودين فى مركز البحوث الزراعية مركزيا فى القاهرة ولهم فروع فى محطات البحوث .. محطات البحوث اللى أشرنا الى مساحتها فيها حوالى 48 محطة بحثية موزعة على خريطة مصر وبالتالى فكل محافظة فيها مركز أو أكثر – المراكز الفرعية تابعة لمركز البحوث الزراعية مثلا محافظة كفر الشيخ فيها محطة بحوث سخا وهى محطة بحوث ضخمة جدا الجميزه فى محافظة الغربية سدس فى مصر الوسطى وفى جميع أنحاء الوادى والدلتا هناك محطات للبحوث أيضا فيه محطات للبحوث الزراعية فى العوينات وفى مناطق الإستصلاح الجديدة . هاله أبو علم : دكتورأيمن واضح من كلام حضرتك إن مركز البحوث الزراعية هو مؤسسة علمية ضخمة جدا يمكن حتى لما بنقول إنه مركز يتبادر إلى الزهن إن هو قليل الحجم أو صغير الحجم ولكن واضح من كلام حضرتك إنه يحتوى على 24 معهد وكل معهد بمثابة جامعة . د/ أيمن فريد أبو حديد : بمثابة كلية . هاله أبو علم : كليه . فده مؤسسة علمية ضخمة .. طيب إيه الدور بقى إللى قدر يساهم به مركز البحوث الزراعية فى توفير الأمن الغذائى لمصر– الأمن الغذائى جملة مهمة جدا مَنْ لا يملك قوته لا يملك قراره . د/ أيمن فريد أبو حديد : وهذا هو شعارمركز البحوث الزراعية . هاله أبو علم : بالظبط كده فعايزين نعرف إزاى قدرتوا تساهموا فى توفير الأمن الغذائى لمصر ؟ د/أيمن فريد أبو حديد : أولا البحوث الزراعية بيخدم كافة القطاعات المتعلقة بالزراعة فله فروع للانتاج النباتى هناك فروع للانتاج الحيوانى كزراعة وهناك فروع لصحة الحيوان الطب البطرى وهناك فروع لمقاومة الآ فات والوقاية من الأمراض وهناك فروع خاصة بالعلوم الأساسية التى تخدم الزراعة زى الهندسة الوراثية وزى تكنولوجيا المعلومات وإستخدامها ديه كلها بتخدم قطاع الزراعة بصفة عامه .. دور مركز البحوث الزراعية فى أكثرمن إتجاه أولا حل المشاكل المتعلقة بالزراعة أولا بأول بإستمرار بتطلع مشاكل خاصة بزراعة المحاصيل وإنتاجيتها او بنقلها أو بتخزينها أو بتسويقها فمركز البحوث الزراعية هو القائم بالدراسات والبحوث التى بؤدى إلى حل هذه المشاكل وأيضا حاليا أصبح مسؤل عن النشاط الإرشادى إزاى إنه ينقل هذه النتائج بصورة مفهومة وواضحة الى المزارعين . هاله أبو علم : إيه أهم مشكلة أو قضية زراعية قدر مركز البحوث إن هويحلها وكان له دور كبيرفى حل هذه المشكلة مشكلة زراعية مهمة جدا أرَّقة مصر فى الفترة الأخيرة ؟ د/أيمن فريد أبو حديد : فيه العديد من الأمثلة لكده كلها تتعلق بمثلا مقاومة الأمراض هناك على سبيل المثال . هاله أبو علم : يعنى أمراض النباتات ؟ د/ أيمن فريد أبو حديد : أمراض النباتات أو الحيوان .. معهد صحة الحيوان له دور ضخم فى ما يحدث لمجابهة أنفلونزا الطيور أيضا له دور ضخم فى حصر الأمراض الأتيه عبر الحدود ومنع دخولها الى مصر وتوطنها فيها .. من ناحية النبات معهد وقاية النبات له دور كبير قوى فى حماية السلالات النباتية والأصناف المزروعة من الأمراض والآفات إللى بتظهر ودا دور مستمرمن ناحية التعريف بالمرض والتعريف بوسائل المقاومة بتاعته وتجهيز الحزمة التكنولوجية اللازمة للسيطرة على المرض ونقلها الى الإدارة العامه للمكافحة التى تقوم بتنفيذها على مستوى الجمهورية فبيبقى فى التعاون واضح وخط متصل بين أجهزة وزارة الزراعة وأجهزة مركز البحوث الزراعية فى التشخيص وتحديد العلاج ونقل هذه المعرفة الى المزارع والى الجهات المختصة التى تستطيع أن تقوم بعملية المكافحة .. مثال مهم جدا فى القمح مرض ظهر فى أفريقيا هذا المرض خطير جدا على زراعة القمح إسمه عفن الساق الأسود هذا العفن الأسود ممكن أو صدأ الساق الأسود هذا المرض يهدد زراعة القمح فى حال الإصابه به بطريقة قوية جدا قمنا فى مركز البحوث الزراعية بعمل اللازم لانتاج سلالات مقاومة لهذا المرض وذلك بالتعاون مع المؤسسات الدولية بعثنا بعثات الى كل من السودان وكينيا وأثيوبيا لزراعة الأصناف إللى إحنا أنتجناها هناك بحيث إنها تختبر ضد مرض هناك بعد ما إنتجنا السلاله بتاعتنا جاء لنا طلب من السيميت وهو المركز الدولى لأبحاث القمح بإن إحنا نتبرع بكمية منه لأفغانستان التى ظهر المرض فيها الحمد الله المرض ما ظهرش فى مصر وفعلا قمنا بشحن طن ونصف من تقاوى القمح الى افغانستان لزراعتها فى هذه المناطق الموبوأة وجاء لنا شكر على إن السلالات ديه إتزرعت وإنها ناجحة فى الإصابة بتاعتها .. فإحنا الهدف من إن إحنا نبعتها إن إحنا نمنع ظهور هذا المرض وإنتشاره فى بلد قريب مننا يقل إن هو يتنقل بالرياح إلينا ويسبب ضرر لينا . هاله أبو علم : البطاطس لان ديه فيها مشكلة ؟ د/ أيمن فريد أبو حديد : البطاطس محصول إقتصادى ومن أكبر المحاصيل التصديرية بنستورد التقاوى بتعاته وبنستورد التقاوى بتاعته من بلاد فيها أمراض زى العفن البنى فى نفس الوقت حتى البلاد اللى فيها هذا المرض متوفر ما بتسمحش بدخول بطاطس مصابه يعنى العفن البنى جاء لنا من إستيراد التقاوى من بلاد . هاله أبو علم : هل قدرتوا إن إنتم توجدوا علاج لهذا الموضوع لان فى بعض الأحيان بيتم إيقاف تصدير البطاطس المصرية ؟ د/ أيمن فريد أبو حديد : طبعا فيه برنامج قومى وفيه مشروع واضح للسيطرة على العفن البنى وده بيتم فيه التعاون بين اجهزة وزارة الزراعة قطاع الخدمات مع مركز البحوث الزراعية والحجر الزراعى وبيتم فيه إعلان مناطق خالية من المرض وهى ديه أللى بيتم التصدير منها وهذا البرنامج ناجح الى حد كبير– الحالات اللى بتظهر فيها العفن البنى فى أوربا وبتكون حالات محدودة جدا وقليلة وبيتم التعامل معاها بالطريقة اللى تضمن إستمرارية نجاحنا فى تصدير البطاطس . محمد المغربى : د. أيمن كان لك تصريح مؤخرا وإحنا محتاجين نفهمه أكثر ..إن قلت ما هو نصه " إن مصر ليست بها موارد طبيعية كافية لمواجهة أزمة الغذاء بسهولة .. هنا السؤال يمكن المواطن العادى بيقول أزَّاى مصر هى أصل الزراعة والزراعة هى أصل مصر يعنى مصر فيها أجود أنواع الأراضى والطربة الزراعية مصر فيها مشاريع ضخمة إستصلاح الاراضى الصحراوية مصر فيها نهر النيل وما يحمله من خير فهمنى النقطة ديه ؟ د / أيمن فريد أبو حديد : لا شك إن إحنا بنتعامل مع الزراعة بنوع من العاطفة اكثر من النظرة الموضوعية .. حقيقة الأمر إن مصر بتعانى من نقص حاد فى المياه مياه النيل اللى بتصلنا وهى المصدر الرئيسى ويمكن نقدر نقول بدون مبالغة الأوحد الذى يمكن الإعتماد عليه محمد المغربى : المياه الجوفية ؟ د/ أيمن فريد أبو حديد : المياه الجوفيه قليلة جدا 55,5 هاله أبو علم : فى الساحل الشمالى فيه على إمتداد الساحل الشمالى كانت بعض الأقمار الصناعية رصدت إن فيه مياه جوفية دا كان حديث للدكتور فاروق الباز يعنى . د/ أيمن فريد أبو حديد : طبيعى ولكن كميتها قد إيه ؟ هاله أبو علم : هو بيقول إن ممكن يتم زراعة القمح هناك . د/ أيمن فريد أبو حديد : كل دا طبيعى صحيح 100% إللى أنا بأتكلم عليه 55,5 مليار متر مكعب جايه من النيل – المياه الجوفية الممكن إستخدامها لا تزيد وفقا للتقديرات الحالية الى أن يجد جديد عن 5 مليار متر مكعب وبالتالى إحنا بنتكلم على 90% أو أكثر من المياه اللى موجودة فى مصرمن مصادر سطحية هى نهر النيل وهى ديه المحدده المياه مش بس للزراعة المياه ضرورى للشرب وضرورى للصناعة وضرورى للسياحة وضرورى لأغراض أخرى كثيرة المياه المخصصة للزراعة تعادل نسبة كبيرة من حصة مصر . محمد المغربى : إذن المياه هى أحد العوامل لنقص الموارد . د/ أيمن فريد أبو حديد : إسماه العامل المحدد . محمد المغربى : العامل المحدد لنقص الموارد الطبيعية فيما يتعلق لمواجهة الزراعة .. هنقف عند هذه النقطة ونتواصل بعدها الحديث ولكن بعد فاصل قصير فإبقوا معنا ويحدث فى مصر فاصل هاله أبو علم : أهلا بحضرتك مره ثانية دكتورأيمن فريد أبو حديد رئيس مركز البحوث الزراعية وكنا قد توقفنا قبل الفاصل عند نقطة قلة الموارد الطبيعية فى مصر وهى نقطة تعجبنا ليها كثيرا من هذه النقطة تحديدا ونريد مزيدا من الإيضاح خاصةً وحضرتك قلت المياه – نقص المياه ؟ د/ أيمن فريد أبو حديد : أقول لحضرتك إن مصر مورد المياه الرئيسى فيها هو نهر النيل هو دا وسيلة الرآ الرئيسية فى الوادى والدلتا ومناطق الإستصلاح الجديدة على وجه العموم وقلة قليلة هى اللى بتستخدم فيها المياه الجوفية وإمكانيات المياه الجوفية مازالت تحت الإختبار للمستقبل وإنها هل متجددة ولا لأ دا سؤال مهم لكن بالنسبة لنصيف الفرد من المياه فى مصر أصبح يقرب دلوقت لحوالى 800 متر مكعب فى السنه يعنى فى اليوم الفرد نصيف لا يزيد عن 2,5 متر مكعب من المياه يزرع بهم ويأكل ويشرب ويستحمى وخلافه تخيلوا 2,5 متر مكعب للفرد فى السنه دا مبلغ قليل جدا ومع الزيادة السكانية اللى بتحصل معانا إحنا سنة 80 كنا 40 مليون النهارده إحنا بنقرب من ال80 مليون. هاله أبو علم : يعنى كل مادا بيتناقص نصيب الفرد من المياه؟ د/ أيمن فريد أبو حديد : بالظبط .. ايام ما أُنشئ السد العالى كان نصيب الفرد من المياه فوق ال1500متر مكعب النهارده 800 . محمد المغربى : ما دا برضه يا دكتور دور المركز يعنى المركز عايزينه دلوقت يفكر لنا فى حباية قمح حتى ما تخدش مياه خالص .. إن شاء الله نلاقى . د/ أيمن فريد أبو حديد : حكمة ربنا بتقول لنا إيه بتقول إن أنا ممكن أشرب مياه محلاه من البحر لان إحتياجاتى من المياه 6 لتر فى اليوم فأقدر أشرب من مياه محلاه ومش هتأثر فىَّ والصناعة والسياحة وخلافه كل ديه ممكن إنها تعتمد على تحلية مياه البحر أو على المياه الجوفية . هاله أبو علم : أو معالجة مياه الصرف يعنى الزراعه فى جزء منها بيعتمد على معالجة مياه الصرف د/ أيمن فريد أبو حديد : ما نقدرش إن إحنا نعممها بالقدر دا لان أحنا عايزين نقول – مياه الصرف تقصدى مياه الصرف الزراعى إحنا بنهدف حاليا فى برنامج قومى للتطوير الحقلى بيهدف الى تقليل مياه الصرف الى الحد الأدنى وبالتالى الصرف الزراعى مش هيكون مصدر رئيسى من مصادر المياه لان المفروض إن إحنا نحط فى الأرض كميات من المياه التى تكفى للزراعة بالظبط .. إللى أنا عايز أقوله هو مصر إحنا متعودين على إن إحنا نبص لنهر النيل ونقول إن إحنا عندنا نهر النيل حقيقة الأمر نهر النيل مورده إلينا 55 مليار متر مكعب . محمد المغربى : ونصف يافندم . د/ أيمن فريد أبو حديد : ما يكفيش لرى أكثر من 11 مليون فدان بأحدث النظم انا أُرى حاليا فعلا بنزرع 8,6مليون فدان والباقى قدمنا ما لا يزيد عن 3 مليون فدان اللى نقدر نزوده فمواردنا محدودة جدا . محمد المغربى : حضرتك برضه ما ردتش على سؤالى فى إمكانية إن المركز ربنا يوفقه ويصل الى حبات من القمح التى تستهلك أقل قدر من المياه ؟ د / أيمن فريد أبو حديد : دا برنامج جارى فعلا هدفه الرئيسى من برامج تطوير المحاصيل الزراعيه مع المحاصيل هو إنتاج سلالات وهجن قادرة على تحمل الجفاف وقادرة على إستهلاك كمية أقل من المياه . محمد المغربى : وصلنا فيه لإيه لغاية دلوقت ؟ د / أيمن فريد أبو حديد : الى حد كبير نجحنا .. كنا متعودين إن قصب السكر بيتروى ب 12 ألف متر مكعب فى السنه الفدان النظم الحديثه من الرى لقصب السكر بتستخدم من 7 الى 8 آلاف فقط ووفرنا حوالى 3 أو 4 آلاف .. كل المحاصيل الزراعيه فى البرنامج القومى لتطوير الرى الحقلى حتقل كمية المياه اللى بتروى بها وبالتالى هيتم توفير كمية من نقدر نستصلح بها مزيد من الأراضى ولكن هنبقى دائما فى حدود إن إحنا عندنا 55,5 مليار متر مكعب من المياه كميه قليلة ويجب إن إحنا نحطها فى إعتبارنا جيدا لان لو زدنا – الزيادة السكانيه فى نفس المعدل اللى إحنا ماشين فيه هنعانى من مشكلة ضخمة فى المستقبل نقص المياه وما نقدرش نرجع نقول إزّاى نوفر – الزيادة السكانية قد تكون نعمة لان هيبقى عندنا أيدى عامله وممكن يكون عقول مفكرة وكل ديه حاجات جيدة جدا بس مش هيكون عندنا كميات المياه اللازمة لتوفير الغذاء لهم فيجب المحافطة على إن إحنا ما نزدش . هاله أبو علم : هل إستطاع المركز إن هو يوفرأنواع جديدة سلالات جديدة مثلا من القمح والذره والأرز قليلة الإستهلاك فى المياه ؟ إيه دور المركز فى توفير أصناف جديدة تعتمد على مياه أقل ؟ د/ أيمن فريد أبو حديد : أيوه .. خلال الفترة الماضية الأرز كان بيأخذ فترة طويلة فى الأرض حاليا أمكن إن إحنا ننتج هجن من الأرز أو سلالات بتمكث فى الأرض فترة أقل من 6 شهور يعنى بمراحل وفى نفس الوقت تتزرع بطريق جافه بدون الغمر وتستهلك كميات أقل من المياه وأمكن إن إحنا نوفر فى إستهلاك المياه الى حد كبير بحدود 30 % من كمية المياه اللى بتستخدم فى الأرز وهى نسبة عاليه جدا بتأخذ وقد عشان إن إحنا نقدر ننشر هذه التقنيات وهذه السلالات ونوزعها على ويأتلفوا معاها ويبتدوا يزرعوها ويعرفوا ازَّاى ينتجوها فبتأخذ وقت لحاد ما تتعمم لكن بمجرد ما هتتعمم هتوفر لى كميات كبيرة من المياه نفس الحكاية فى قصب السكر التكنولوجيا الخاصة بالرى بالتنقيط فى قصب السكر بالذات بتوفر كمية كبيرة وكمان الشرايح زراعة الأرز على شرائح أو زراعة قصب السكر على المساطب ديه كلها بتوفر كميات كبيرة من المياه وهذه الانظمة المتطورة هى اساس الزراعة الحديثة – الزراعة الحديثة يجب إن أنا أنسى موضوع المروى والمسأة المفتوح – المروى والمسأة المفتوح مركز البحوث الزراعية بيوصى إنها تكون فى مواسير لان المياه توصل الى رأس الحقل بطريق ماسورة تدى للزراعة إحتياجاتها بالضبط . هاله أبو علم : إيه هو الحل بالنسبة لزراعات الصوب ؟ د/ أيمن فريد أبو حديد : زراعة الصوب من أكفأ الزراعات إستهلاكا للمياه لانها لا تفقد من المياه ولا فى الأرض ولا فى البخر كميات كبيرة . هاله أبو علم : لكن ما نقدرش مثلا نعتمد عليها فى زراعة محاصيل كتير يعنى محاصيل محدودة مثلا . د/ أيمن فريد أبو حديد : بعض محاصيل الخضار ونباتات الزينة وزهور القطف هى ديه اللى ممكن إستخدمها فى الصوب لكن ممكن أستخدم حاجه ثانيه محاصيل العلف بدل ما أزرع الأعلاف فى الأرض وأرويها بكميات كبيره من المياه أقدر أزرعها صوب فى نظام هيدروكونك محكوم يقدر يدينى الإحتياج اللازم من الأعلاف الخضراء لرؤس الماشية أو للحيوانات اللى موجودة فى المزرعة وفى نفس الوقت يوفر كتير جدا فى كمية المياه .. الرسيم الحجازى مثلا بيستهلك إللى بيُزرع فى مناطق الرعى فى الساحل الشمالى بيستهلك 12 ألف و15 ألف متر مكعب فى السنه فى حين لو إتزرع فى الصوب بالصاجات الصغيرة ديه يأخذ 3آلاف فقط فى الطن . محمد المغربى : انا ممكن أفهم من كلامك إن فى تنسيق عالى جدا ما بين مركز البحوث الزراعية وبين شركات الإستثمار الزراعى لان أكيد الشركات ديه بتحاول توفر بقدر الإمكان فى التكلفة لكى تربح بعدها .. أنا عايز أعرف دلوقت إيه علاقة المركز بالفلاح البسيط الفلاح العادى اللى بيمثل رقم مهم فى المعادلة الزراعية فى مصر . د/ أيمن فريد أبو حديد : الحقيقة علاقة المركز بالفلاح العادى أوثق من علاقته بالإستثمار . محمد المغربى : إزَّاى بيدفع فلوس ؟ د/ أيمن فريد أبو حديد : ما بيدفعش فلوس عن طريق الأرشاد الزراعى جهاز الإرشاد الزراعى هو جهاز حاليا تابع لمركز البحوث الزراعية – جهاز الإرشاد الزراعى بيأخذ نتائج البحوث اللى موجودة فى المركز والتكنولوجيا اللى بيحاول المركز إن هو يوفرها بما يتناسب مع الظروف بتاعتنا وينقلها الى المزارعين وبالتالى بيحسن مون الانتاجية لدى المزارعين بينقلها للمزارعين عن طريق المواقع الإرشادية اللى موجودة فى المحافظات المختلفة وعن طريق الحملات القومية اللى بتنشر الوعى الزراعى المتطور لدى المزارعين . محمد المغربى : تقصد إيه بالإرشادية مش قادر أفهم الإرشاديه هنا معناها إيه ؟ د / أيمن فريد أبو حديد : الإرشاد هو تعبير مصطلح متفق عليه هو نقل نتائج المعارف من المعمل الى الحقل. محمد المغربى : إنما ما يجبرش الفلاح يقول له تزرع قمح أو تزرع برسيم ؟ د/ أيمن فريد أبو حديد : ديه بتكون إسمها الدورة الزراعية – الدورة الزراعية إتلغت من حوالى 10 سنوات والفلاح حر فى إنه يختار المحصول اللى يزرعه ومركزالبحوث الزراعية كل اللى يقدر يعمله النهارده إنه يدى للفلاح نصيحة إسترشادية بيقول له فيها ممكن فى أرضك ديه عشان تحقق أعلى إنتاجيه إنك تزرع قمح يليه كذا السنة اللى بعده محصول آخر يليه محصول ثالث بحيث إنه يحافظ على إنتاجية الأرض لا يستهلك العناصرالغذائية اللى موجودة فيها بشدة ويؤدى الى بوارها ولا يتوطن الأمراض فيها . هاله أبو علم : أمال فيه إتهام دكتورأيمن إن فيه جملة أستثمارات مطلوبه لتطوير المجال الزراعى أو مجال التنمية الزراعية 34 مليار جنيه أسقطت من حساباتها الفلاح المصرى ؟ د/ أيمن فريد أبو حديد : فى مجلس البحوث الزراعية والتنمية من إعداد للإستراتيجية الزراعية لسنة 2030 وهى رؤية قام بها العديد من العلماء ليس من مركز البحوث الزراعية فقط لكن من كافة الجامعات المصرية ومراكز الأبحاث الأخرى وخلصت الى إتجاهات بأولويات إيه البرامج اللى ممكن تتعمل فى ظل هذه الإستيراتيجية وتحقيق أعلى إنتاجية من الموارد المائية والأرضية فى مصر.. هذه الإستيراتيجية وضعت الإطار العام لنشاط القطاع الزراعى فى مصر ووضعت أيضا السياسات اللازم تغييرها بحيث إن إحنا نقدر نوصل لتحقيق هذا الإطار وضعت البرامج التنفيذية اللازمة للانتاج فهناك برامج مقترحة لزيادة إنتاجية القمح والمحاصيل الأخرى – برامج لزيادة إنتاجية اللبن لتحقيق الأكتفاء الذاتى منه ومن منتجات الألبان واللحوم البيضاء هناك برامج تفصيلية واضحه للانتاج الحيوانى لوقاية النباتات ووقاية الحيوانات . محمد المغربى :دكتور دلوقت إحنا نفهم برضه إيه مستقبل الزراعة فى مصر مرتبط بشكل كبير بمستقبل مركز البحوث لان عايزين نطمئن على مستقبل مركز البحوث ؟ هاله أبو علم : يعنى هو اللى بيضع برضه السياسة المستقبلية للزراعة المصرية الى حد كبير من خلال الأبحاث اللى بيتوصل إليها يعنى . محمد المغربى : فدلوقت كان فيه كلام عن خصخصة مركز البحوث مثلا سمعناها وهو يمكن السيد وزير الزراعة نفى ده .. وفيه كلام أيضا عن نقص التمويل اللازم للأبحاث وإستعاضته برأس المال لإستكماله فهمنا الحتة ديه لنطمئن على مستقبل مركز البحوث ؟ د/ أيمن فريد أبو حديد : فى حقيقة الأمر أن مصر لديها أولويات عديدة فى مجالات الصحة والتعليم والزراعه والصناعة وخلافه .. إحنا فى الزراعة مركز البحوث الزراعية إذا لم يأخذ ما يكفيه من التمويل مش هيقدر يقوم بدوره ولا يستمر فيه. هاله أبو علم : له : ميزانيته كام يا دكتور ؟ د/ أيمن فريد أبو حديد : ميزانية مركز البحوث الزراعية للبحوث والدراسات فى الماضى من سنة 2000 الى 2005 مثلا كانت فوق ال100 مليون جنيه وكان سعر الجنيه القدرة الشرائية بتاعته أعلى النهارده هذه الكمية إنخفضت الى 40 مليون للعام الماضى ونتمنى إنها تزيد شويه فى العام القادم . هاله أبو علم : دا أكيد بيأثر طبعا ؟ د/ أيمن فريد أبو حديد : حقيقة الأمرإنه بيأثر ولكن إحنا بنتغلب على التأثير دا بطرق أخرى بإن إحنا إبتدينا نبص الى مصادر بديلة للتمويل زى صناديق البحث العلمى والتكنولوجيا اللى موجودة بالذات من وزارة التعليم العالى والدولة للبحث العلمى فقدمنا عدد من المقترحات إتقبلت وعندنا ما يزيد عن ال 30 مشروع . هاله أبو علم : له : حضرتك قبل ما نختم الحلقة حضرتك تعدنا بإيه – يعنى إيه هيقدموا لنا مركز البحوث الزراعية فى خلال الأيام القادمة الشهور القادمة فى أحدث بحث أو أحدث نتيجة توصل إليها ومن المتوقع إن هو يتم تطبيقها على السياسة المصرية الزراعية خلال الفترة القادمة ؟ د/ أيمن فريد أبو حديد :أعد بإستمرار الجهد الجارى فعلا فلى تطوير إنتاجية المحاصيل بحيث أنها تتزايد القمح ممكن فى خلال 5 سنوات يصل من 18 أردب الى 24 أردب فى عدد من المحاصيل الأخرى نقدر نوصل بأكثر من كدا وأيضا أعد بإن هذا الجهد لو توفرت الإمكانيات نقدر نوصل الى أعلى إنتاجية فى العالم وإحنا واصلين فى عدد من المحاصيل لكن نقدر نزود الإكتفاء الذاتى الإقتصادى من الغذاء خلال السنوات القليلة القادمة . هاله أبو علم : دكتورأيمن فريد أبو حديد رئيس مركز البحوث الزراعية بأشكر حضرتك على وجود حضرتك معانا النهارده وعلى الكثير من النقاط التى تم إيضاحها من خلا ل هذا الحوار محمد المغربى : شكرا لكم مشاهدينا الكرام لمتابعة هذه الحلقة والى اللقاء فى حلقة قادمة إن شاء الله ويحدث فى مصر .
