يحدث في مصر

هالة أبو علم : مشاهدينا الكرام أهلا بكم وحلقة جديدة من برنامج يحدث فى مصر، من حقنا أن نحيا حياة اجتماعية راقية ومن حقنا أيضا يحصل كل فرد منا على حقه فى الرعاية الاجتماعية خاصة فى ظل وجود عقبات وبعض المشاكل الاجتماعية التى تواجه هذه الرعاية
عمرو الشناوى : معاش من لا معاش له ، حد أدنى لمن لا دخل لهم ، معاش للضمان الاجتماعى ومعاش لقانون الطفل ومشروعات كثيرة وعديدة لرعاية الأسر الأولى بالرعاية
هالة أبوعلم : مساعدات وإعانات دائمة وعاجلة لتنمية القرى الأكثراحتياجا ، مشروعات للأسر المنتجة وتشغيل شباب الخريجين هذه كلها موضوعات ومشروعات سنتحدث فيها ومع تفاصيلها مع معالى وزير التضامن الاجتماعى الدكتور على مصيلحى لنتعرف منه أين هو المواطن المصرى من أجندة وزارة التضامن الاجتماعى أهلا بسيادتك معانا يا سيادة الوزير
د/ على مصيلحى : أهلا بكم وإن شاء الله تكونوا برنامج مفيد للجميع إن شاء الله
عمروالشناوى : مساء الخير يا دكتور وإسمح لنا نبدأ نشوف التقرير ونرجع تانى
فاصل
عمروالشناوى : شفنا مع حضرتك نماذج من أكثر حاجة ركز عليها التقرير الاستهداف الجغرافى للفقروأعلى تداعيات يعنى احنا استهدفنا جغرافية الفقر
د/ على مصيلحى: أنا اللى بشكركم وبشكرمعد التقريراللى سرد فى عجالة أوجز الكثيرمن المبادرات ويهمنا جدا زى ما حضرتك تفضلت العاملين فى الاستهداف أولا ثم الاستهداف الجغرافى انت عارف جيدا إن وزارة التضامن الاجتماعى أنشئت بهدف أساسى جدا وهو كفائة الدعم الذى يمكن وصوله لمستحقيه وحتى الفئات الأكثراحتياجا واحنا هنا بننظر للتعاون المباشر فقط زى بطاقات التموين أو زى معاشات الضمان وفيه دعم تانى زى الدعم فى التعليم ، دعم فى الطاقة فى كثير من الأمور وبالتالى مهم جدا إن يكون فيه مفهوم العدالة الاجتماعية عشان يتم ده ما ينفعش ندورعلى الدعم فى مناطق الجمهورية كلها لإن كل مواطن مش زى التانى ومناطق الجمهورية مش كلها زى بعض وكون إن أنا أعلم إن فيه دراسة تمت ولازالت بتقول إن ريف الصعيد أفقر من ريف الدلتا فى الصعيد بعض المدن أكثر احتياجا وهناك بعض طوائف فقر كبيرة فى الدلتا الحمد لله كانت جهود التعداد السكانى كانت فى 2006 اللى أعرفه إن هو كان تعداد شامل كل أسر جمهورية مصر العربية وتم الانتهاء من هذا التقريرفى عام 2007 تم الاستفادة من هذه البيانات فى خصائص الأسر والمكان تم عمل ما نسميه نموذج اجتماعى – اقتصادى يعنى مش مجرد بنبص ده فيه أد إيه وده فيه أد إيه ده موضوع يبحث مع الاقتصاديين احنا بنبص على السكن ، الأولاد ، التعليم وده بنسميه طريقة غير مباشرة للقيادة الحقيقة والنموذج ده بنمليه محافظة محافظة وقرية قرية وطلعنا لأول مرة فى يوليو 2007 يمكن وزير التنمية الاقتصادية مع مركز التخطيط ومركز المعلومات وتم إعداد ما نسميه خريطة الفقر لمصر كلها من أعلى الاحتياجات إلى أقل الاحتياجات ، الخدمات الصحية بيدخل فيها العنصر البشرى والتعليم ومستوى التعليم وبالتالى هناك تركيز على الوضع المصرى عمليا وأن هناك تركيز لهذه القرى بدون ما نقول أرقام محددة يمكن 70 % من القرى فى أشد احتياج فى التعليم و 30 % فى البحث
هالة أبو علم : طب يا فندم أنا عايزة أعرف دوروزارة التضامن الاجتماعى فى ال1000 قرية والمعروف إن فيه أكثرمن وزارة بتشترك فى هذا المشروع
د / على مصيلحى : بس عشان نحق الحق بناء على التوجه مع الحزب والحكومة تم اعتماد ما يرفع مستوى الخدمات لهذه القرى الأشد احتياجا وده مشروع ال 1000 قرية عشان يكون متاح للخدمات فى هذه القرى بدرجة جيدة كما يجب أن تكون النوع ده الحقيقة نموذج إذا جاز التعبير فى الحاسبات وهو بناء المدرسة وبناء الوحدة الصحية وبناء الوحدة الاجتماعية فيه الجزء بقى اللى هو البرمجيات أو اللى هو السوفت وير اللى هو بنقوم بمسح اجتماعى للقرية أسرة أسرة وبيتم عمل ملف للأسرة وهنا بيتم إيه بقى تنفيذ الخدمات الواجبة سواء من بطاقة تموين سواء من مساعدات لأول مرة بيتم تقييم وترتيب العمل دلوقتى وصلنا ل 1000 تدريب ل 1000 باحث اجتماعى فى القرى دى احنا ابتدينا فى المرحلة الأولى الحمد لله 152 قرية ومن أسبوعين خدنا المرحلة التانية وهى ال500 من ال 1000 ال 1000 قرية على 3 سنين واحنا أول سنة فى التنفيذ فلما ننجز هذه الكمية من التنفيذ ونحط لنفسنا مسئولية أعتقد فى الحزب هيتم فتح هذا الملف فى وزارة التضامن كان عدد المستفيدين 650 ألف أسرة النهاردة وصلنا ل1.2 مليون أسرة مستفيدة ابتدينا من 50 جنيه بقت 70 جنيه حد أقصى النهاردة بقت من 110 ل 160 جنيه احنا زودناها مرة وبعدين سيادة الريس زود 25 % لما ابتدينا كان حجمه 50 جنيه النهاردة بقى 120 أكثر من الضعف إتزود على مرحلتين مرحلة قبل كده ثم مرحلة ال25 % الزيادة النقطة اللى حضرتك بتقولها لم يكن ذلك فقط فى معاش الضمان الاجتماعى ولكن فى مساعدات التعليم ومتقدم فى موازنة العام القادم 67 جنيه لقانون الطفل
عمروالشناوى : بالنسبة لمعاش الضمان الاجتماعى أنا بتكلم على الفلوس اللى صرفتها وزارة التضامن فى القرى الأكثر فقرا ده اللى أنا بتكلم عليه
د / على مصيلحى : عندنا فى تطويرالوحدات الاجتماعية 50 مليون جنيه بالإضافة إلى التدريب بنتكلم على ال151 حتى فى المرحلة الأولى 50 مليون احنا بنتكلم على مجمعات خدمية ، بنتكلم على مراكز تأهيل بنتكلم على حضانات بنتكلم على كل ما نسميه منافذ أداء الخدمات الاجتماعية يجب أن يكون فيه 15 ألف فى كل وحدة اجتماعية
هالة أبوعلم : هكلم حضرتك على مشروع الضمان الاجتماعى قانون الضمان الاجتماعى يعنى هل هو مجرد تغيير فيه بالفعل قانون للضمان الاجتماعى وهو قانون عبر عن الشعب وإقراره إيه اللى تم فى هذا القانون الجديد يعنى عايزة التفاصيل اللى بيحتويها يعنى إيه بيعمل القانون القديم وليه ما تمش إقراره حتى الآن يا فندم
د / على مصيلحى : أشكرك جدا على هذا السؤال وأشكرك جدا على المدخل فى بداية البرنامج الانتخابى لسيادة الريس معاش لمن لا معاش له بالإضافة مضاعفة كمان الضمان الاجتماعى وزى ما كنت بقول أنا لما ابتديت كان البرنامج الانتخابى كان فى وقت البرنامج الانتخابى المستفيدين 450 ألف ولما أنا ابتديت فى 10 يناير 2006 كان عدد المستفيدين 650 ألف وصل الآن إلى 1.2 مليون الحق يقال احنا نفذنا البرنامج الانتخابى ولكن هناك فئات تحتاج ولكن القانون القديم بيوفر قانون المعاش انتوا عارفين إن القانون ده قانون متميز جدا 1977 لما نقول قانون ، عدد الأسر المستفيدة ضاعفنا أكثر من القيمة
عمروالشناوى : وصلناها ل 160
د / على مصيلحى : بالضبط هل ده يكفى ممكن جدا يكون هناك تطلع أكثر بس كان الضائقة الأكثر إن القانون بتحديده للفئات التى تدخل فى مظلة الضمان الاجتماعى 60 سنة ومحتاج ما أقدرش أدى له فى حدود هذا القانون أو آنسة مثلا لم تتزوج ووصلت 50 سنة 45 ما أقدرش أو يتيم وفيه حد فقير بيرعاه ما أقدرش كان هناك قيود لما قعدنا فى مؤتمر الحزب فى العام الماضى قلنا إن احنا محتاجين نضاعف المظلة النهاردة وخلال سنتين كمان يعنى النهاردة 1.2 مليون أسرة المستفيدة عايزين نخليها 2 ونص مليون أسرة خلال سنتين
هالة أبوعلم : فاصل وهنواصل مع حضرتك مرة تانية وتفاصيل أكثر عن قانون الضمان الاجتماعى الجديد
د / على مصيلحى : اشكرك
فاصل
عمروالشناوى : مشاهدينا أهلا بكم من جديد فى هذه الحلقة من يحدث فى مصر بنتكلم فيها عن اتكلمنا عن القرى الأكثر فقرا دلوقتى هنتكلم عن مشروع الضمان الاجتماعى الجديد وعدد المستفيدين لحد دلوقتى بقى أد إيه ، بالنسبة للبرنامج الانتخابى للرئيس مبارك نرجع تانى لضيفنا وضيف حضراتكم الدكتور على مصيلحى وزير التضامن الاجتماعى معالى الوزير كنا بنتكلم على القانون بشكله القديم لو عايزين ندى يتيم ما كناش بنعرف لو عايزين ندى آنسة تعدت سن الزواج ما بنعرفش ندى فئات كثير هل هذه الفئات دخلت
د / على مصيلحى : متابعة للى كنا بنقوله نظرا للقانون القديم وأنا قلت إنه قانون متميز ولكن كان بيبص على حالات محددة وخصائص محددة فتم استيفاء هذه الاحتياجات ولكن يوجد أسر تحتاج ولا يمكن خدمتها بالقانون
هالة أبوعلم : ما ينفعش تعديله يا فندم
د/ على مصيلحى : هو بالضبط
هالة أبوعلم : مثلا نعدله مش نألف قانون جديد ولكن نعدل القانون القديم
د/ على مصيلحى : هو فى مؤتمر الحزب الوطنى فى العام الماضى تم توضيح ذلك وتم التوجيه من أمانة سياسات الحزب أهمية تعديل القانون ثم خدناه هنا كمسئولية كحكومة وتم وضع مشروع قانون جديد يشيل كل هذه الحدود لفتح المظلة وأنا بتكلم فى خصائص قانون جديد عشان أطمن الناس تم عرضه على مجموعة تشتريه لرئيس الوزراء تم الموافقة عليه من حيث المبدأ بحيث هو فى مرحلة الصياغة دلوقتى ينتقل إلى مجلس الوزراء ثم ينتقل لمجلسى الشعب والشورى من هذا البرنامج المتميز بقول إن هذا القانون هيدخل مجلسى الشعب والشورى هذا العام هذه الدورة تحديدا قبل 30 / 6 هيكون صادر إيه ملامح القانون ، القانون بيبص على مفهوم أكبر من الحالة وهو مفهوم حالة الاحتياج فى الأسرة فبناء على ما تكلمنا عليه اللى هو المستوى الجغرافى ثم استهداف الأسر الأولى بالرعاية داخلة فى خصائص الأسرة فوجدنا هناك محددات معينة منها مستوى التعليم لرب الأسرة نسبة عدد العاملين فى الأسرة بالنسبة للعدد الكلى العمل ده منتظم وللا غير منتظم استهلاك الكهرباء استهلاك التليفون الثابت احنا بنتكلم فى أقل 20 % من المجتمع معاش الضمان لا يحصل عليه النهاردة 10 % من المجتمع
هالة أبوعلم : يعنى أقصد دلوقتى كل المجتمعات سواء حتى فى القرى كلها عندها تليفزيون عندها
د/ على مصيلحى : لما يكون استهلاك الفرد أقل من 10 جنيه دى عناصر مدروسة وواضحة ثم الأهم الملكية وبالذات فى ملكية السيارة وملكية الحيازة الزراعية
عمرو الشناوى : إنما هى بترشدكم
د/ على مصيلحى : بترشدنا هذه الأمور بتغلب لتحديد ما نسميه شدة الاحتياج للأسرة بالإضافة إلى إذا كانت هناك الحالات المذكورة فى القانون القديم فهى تأخذ فورا يعنى كل اللى موجودين فى القانون القديم هيأخذوا إنما هنا أدى لحضرتك مثال ممكن أسرة ما عندهاش حد عاجز وما عندهاش حد مريض مرض مزمن وما عندهاش مسن ولكن راجل على المعاش عنده 4 أولاد محدش فيهم
عمرو الشناوى : نكمل يا فندم بعد ما نشوف ملاحظات الناس ونرجع تانى
فاصل
أحد المواطنين : قانون التأمينات الحالى بيغطيه حوالى 4 قوانين ، 4 قوانين تأمينات على حسب نوعية كل قطاع فهل الكلام ده كله هيشمله قانون واحد جديد بما فيه العاملين بالخارج وأصحاب الأعمال
مواطن آخر : الناس ما عندهاش خبرة فنية الوزير يقول لك هنعمل معاش كل واحد 150 جنيه فى سن ال60 وبعد كده يعمل وثيقة تأمين خاصة مين حمل وثيقة خاصة الاشتراك بتاعها القسط شديد المشروع الجديد بيتعرض لدى وبيدى نفس الميزة يعنى ما أضفش حاجة
هالة أبو علم : سيادة الوزير يعنى حضرتك شايف إن الكلام اللى اتقال على التأمين والمعاشات
د / على مصيلحى : التأمين والمعاشات دول هم عندهم أكثر من قانون بينظمهم فيه معاش لمن لا معاش له واللى ما بيدفعش اشتراك ده الضمان الاجتماعى ثم كان فيه القطاع الخاص وكان فيه من الحكومة وكان فيه التأمينات الخاصة اللى هى بتدفع اشتراك الجزء اللى باشتراكات دلوقتى بعد فصل التأمين والمعاشات عن وزارة الشئون سابقا وبقت مع وزراة المالية هو اللى بيتكلموا عليه اللى هو قانون التأمينات والمعاشات الجديد
هالة أبوعلم : قبل أى كلمة تأمينات ومعاشات التضامن الاجتماعى
د/على مصيلحى : أنا بتكلم بقى فيمن لا معاش له هياخد معاش دون أن يدفع أى شئ
عمرو الشناوى : طب يا فندم الوزارة دلوقتى منزلة ناس عشان تشوف وبتوصل لحد أماكن ناس وبتعمل حصر للى تنطبق عليه أكيد فيه ناس محدش بيقدر يوصل لها أو بيتنسوا نبعت رسالة دلوقتى اللى اتنسى يعمل إيه
د/على مصيلحى : آه طبعا ده كويس الاستهداف اللى اتكلمنا عليه هذا لن يقرر على إن أى بنى آدم يرى أنه محتاج يتقدم باب التقدم مفتوح
هالة أبو علم : طيب إيه شروطه
د/على مصيلحى : باب التقدم فيه عندنا ما نسميه قناة الأسرة أو ما نسميه استقصاء للأسرة استقصاء للحالة بحيث بنبتدى تتسحب المرجعية اللى احنا متفقين عليها وهتنضم فى القانون بحيث هنقول بيحتاج أو قريب من الاحتياج أو غير محتاج فكلمة بيحتاج معناها كل حقوقه يجب أن تصل إليه النهاردة احنا بنشتغل فى قانون المعاش لسنة 77 اللى هو بتاع الضمان الاجتماعى إنما مشروع التجديد اللى احنا بنعمله فى القرى الأكثر احتياجا شغالين بملف الأسرة أو على صحة بحث الملف الاجتماعى التفصيلى وبنديهم النهاردة ليس تحت طائلة القانون ولكن زى ما حضرتك قلتى عندنا حاجة بنسميها مساعدات شهرية ، مساعدات سنوية فبنفتح لهم بند مساعدة شهرية بس لازم تطمئنوا إن النهاردة لأول مرة بنتكلم عن تكامل الخدمات هذا المشروع الجديد بالإضافة إلى النظر للأسرة وليس النظر للحالة بنجمع كل الخدمات العينية والتحويلات النقدية لقانون التأمين الصحى الاجتماعى
هالة أبو علم : كل ده تحت بند قانون التضامن الاجتماعى
د/على مصيلحى : بالضبط زائد إنهم سيتمتعوا بالتأمين الصحى لإن صدوره من التأمين الصحى وكذلك عدم تحملهم أى مصروفات أو أى أعباء المدارس إلى الثانوية العامة دون النظر إن هى مصاريف أو اشتراكات أو غيره ولكن الأهم من ده إن وزارة التضامن هى اللى هتقوم بدفع هذه الاشتراكات للوزارات المعنية بالنيابة عنهم
هالة أبو علم : دى الأسر الأكثر احتياجا
د/على مصيلحى : بالضبط
هالة أبو علم : لكن إيه الأسر بصفة عامة اللى بتحتاج لهذا الدعم من القانون الاجتماعى يعنى
د/على مصيلحى : زمان كنا بنستهدف الشريحة اللى أقل دخل أو أقل زيادة احتياج بتمثل 20 % من المجتمع
هالة أبو علم : طب يا فندم لو فيه موظفين بس دخلهم قليل
د/على مصيلحى : لا مش فى الضمان الاجتماعى ياخد بطاقة تموين ، ياخد دعم الطاقة ياخد قرض حسن فى السكن ، ياخد حاجة تانية إنما احنا بنتكلم مفيش حد بيشتغل وينتظم وياخد معاش الضمان الاجتماعى إطلاقا 70 % منهم أسر تعولها امرأة
عمرو الشناوى : من هذه ال20 %
د/على مصيلحى : من ال20 %
هالة أبو علم : مع وجود رب الأسرة
د/ على مصيلحى : لا يا إما
هالة أبو علم : مطلقة
د/على مصيلحى : توفى أو مطلقة أو
هالة أبو علم : ممكن يكون عاجز مثلا
د / على مصيلحى : لا لو عاجز موجود إنما الواضح كده إن الرجالة بتتجوز وتخلف وبعدين
هالة أبو علم : يهجروا
د/على مصيلحى : يطفش وبيبان ده كمان فى مناطق زى البحر الأحمر ، زى جنوب سيناء ، زى مكان حيث العمالة بتبقى مهاجرة يعنى سوهاج مثلا بييجى ما بيلاقيش شغل يرجع بلده ويسيب الأسرة ، الأسرة التى تعولها امرأة واخدة أولوية 100 % من المعاشات
هالة أبو علم : ده غير المشروعات اللى بتتبناها الوزارة زى مشروع المرأة المعيلة والأسرة المعيلة والبطالة أيضا يعنى كل ده برضه داخل جوة
د / على مصيلحى : فى الشريحة دى أول ما تقول الشريحة دى يدخل قانون التأمين والمعاشات اللى هو دلوقتى مع وزارة المالية اللى هو دلوقت باشتراكات أو بتأمين صحى أو تأمين بطالة اللى لسة عندنا وده مهم جدا إن أى حد قبل سن المعاش وليس له معاش هياخد قيمة الحد الأدنى من المعاش هو كان 100 جنيه إنما دلوقتى بقى 150 جنيه ده اتنقل من قانون التأمين والمعاش لنا كجزء مستقطع من موازنة الدولة محدش بيدفعه
عمرو الشناوى : طب يا فندم حكاية شبكة الأمان الاجتماعى
د/على مصيلحى : كويس جدا النهاردة عندما يكون هناك أمن وتبنى اجتماعى لابد أن يكون هناك شبكة أمان اجتماعى زى ما حضرتك قلت بتحدد التحويلات النقدية ، تحدد الحد الأدنى للأمن الغذائى ، تتمثل فى الحد الأدنى لسكن آمن ، تتمثل فى الحد الأدنى فى توفير الخدمات الأساسية قريبة من المواطن التعليم والصحة تحتها خطوط كثيرة وكذلك نقل جماعى ثم تأتى بعد ذلك إيجاد الفرص للمشروعات الصغيرة والمشروعات الضمانية ومشروعات التعاونيات أو مشروعات المشاركة المجتمعية بصيغة مختلفة هذا الموضوع هام جدا وبدونه مهما زودنا من معاش الضمان نفسه لن يحل مشكلة الفقر ، مشكلة الفقر ليست فقر مادى فقط ، النهاردة لما كنا بنتكلم مع رئيس الوزراء فى حضور وزير الزراعة مهم جدا دفع الاستثمار كمان فى المناطق الأكثر احتياجا
عمروالشناوى : عشان كدة التنمية فى الصعيد
د/على مصيلحى : احنا عايزين ندى قرية معينة ونقول إيه مشروعات التصنيع الزراعى اللى ممكن تتعمل هناك أو إيه مشروعات الألبان اللى ممكن تتعمل هنا أو إيه مشروعات حظائر جيدة للتربية
عمروالشناوى : يا فندم ملفات وزارة التضامن الاجتماعى ملفات متميزة
هالة أبو علم : عديدة جدا
عمروالشناوى : عاوز أقول إنها مرتبطة بالناس قوى فالمسألة محتاجة
د/على مصيلحى : لو سمحتوا لى بس جملة واحدة
هالة أبو علم : إحنا بس عايزين حلقات تانية مع حضرتك
عمرو الشناوى : بالضبط
د/على مصيلحى : أنا كان نفسى أقول إن اللى بيحدث فى مصر إن ما كانش هناك تطلع لتحسينه وأنا بقول بكل الأرقام سواء فى بطاقة التموين أو فى زيادة عدد المشتركين سواء فى معاش الضمان الاجتماعى وزيادة قيمته ، سواء فى مشروع إسكان الأسر الأولى بالرعاية وترجم كل ذلك فى التطوير المتكامل فى القرى ال1000 قرية وكذلك دخول مشروع وسيادة الريس فى خطابه الأخير قال الأولوية لمعاش الضمان الاجتماعى والتأمين والمعاشات والتأمين الصحى وإن شاء الله يكون هناك نظام للأمان الاجتماعى وسيكون هناك بصيص من الأمل ورؤية للتنمية
عمروالشناوى : دكتور على مصيلحى وزير التضامن الاجتماعى شكرا جزيلا لحضرتك والموضوع مستمر وكلامنا متواصل يمكن هنتكلم تانى عن البطاقة التموينية فيه موضوعات كثيرة قوى
هالة أبوعلم : أعتقد إن الحديث هيتواصل مع حضرتك فى حلقات تانية لو حضرتك ما عندكش مانع
د/على مصيلحى : أنا يشرفنى وإن شاء الله أكون عند حسن ظنكم
هالة أبو علم : إن شاء الله يا فندم ومشاهدينا الكرام انتهى وقت هذه الحلقة والحديث يتواصل مرة أخرى مع الدكتور على مصيلحى وزير التضامن الاجتماعى ونشكركم ونلتقى معكم فى حلقة جديدة ويحدث فى مصر