اتكلم

لميس الحديدى: مساء الخير وحشتنى اوى المزيكا دى كل سنة وانتم طيبين احنا الحقيقة كنا معاكم فى شهر رمضان الكريم لابسين قبعات اخرى فى برنامج فيش وتشبيه وبشكر كل الناس اللى تابعتنا الجمهور العظيم جدا اللى انا بحييه تحيه خاصة جدا كل الناس اللى اشتغلت معانا كل الناس اللى تابعتنا طوال شهر رمضان كنا معاكم يوميا نتمنى ما نكنش زهقناكم ورجعنالكم تانى للنناقش هموم الوطن و المواطن ونشوف مصر بتتكلم بتقول ايه ؟ نجوم مصر بيتكلموا بيقولوا ايه ؟
مسئولو مصر بيتكلموا بيقولوا ايه ؟ هنتكلم فى هذا البرنامج كل يوم اتنين على الهواء مباشرتا زى عاداتنا بقالنا اربع سنين تقريبا فى ديسمبر من هذا العام يتم هذا البرنامج عامه الرابع نتمنى نكون بنضيف شيىء الى شاشة التليفزيون المصرى والى شاشة القناة الاولى بالذات والنهاردة الحقيقة حبينا نبعد شويه عن انفلونزا الخنازير ومشاكل المدارس وقصة اليونسكو كل القصص اللى يمكن تتخيلوا ان احنا هنتابعها وانتم عارفين انى انا بروح عكس التيار تماما نشوف حاجة اخرى مثيرة ممكن تقدم ليكم حاجة مختلفة وتثير شىء من الجدل النهاردة اخترنا مسلسل كان له ثقل فى رمضان كان له قدرمن المشاهده يعنى اثار قدر من الجدل قدر من النقاش انا شخصيا تابعته بشكل جيد طوال شهر رمضان وهنشوف بطل هذا المسلسل بطل هذا المسلسل قدم اعمال كثيرة كان ضيفنا فى رمضان اعتقد 3 سنين ماضية يعنى بطل مجموعه من افلام سينمائيه مؤخرا لكنه ممثل مختلف جدا مش جو زى ما بيقولوا مش بقى هذا الفتى ذو الشعر الاصفر وعينيه الملونة والحاجات دى لا ممثل له طابع مختلف لكنه ممثل له فكر نستطيع ان نناقشه انتم الحقيقة اكيد عارفين ان احنا ما بنستضفش فى هذا البرنامج الا نجوم يعنى لهم عقليه معينة وفكر معين وطرح مختلف فى طريقة تقديمهم لنوع الفن النهاردة معانا تاجر السعادة
فاصل*مشاهد من مسلسل تاجر السعادة*
لميس الحديدى : تاجر السعادة خالد صالح هو ضيف اتكلم النهاردة مساء الخير يا استاذ خالد
خالد صالح : مساء الخير وكل سنة وانتم طيبيين
لميس الحديدى: وحضرتك طيب تاجر السعادة دا كان بياع وهم ولا بياع امل ولا بياع ايه ؟
خالد صالح: لا هو بياع امل من وجهة نظره انما من وجهة نظرى انا هو بياع وهم طبعا
لميس الحديدى: بياع وهم طب قبل ما اخش فى المناقشة العنيفة دى انت مبسوط ؟
خالد صالح: الحمد الله جدا
لميس الحديدى: يعنى خارج من رمضان هذا العام راضى سعيد عما قدمته؟
خالد صالح: الحمد الله جدا الحمد الله
لميس الحديدى:انت بقالك 3 سنين على ما اعتقد بتقدم فى رمضان العام الماضى كان بعد الفراق مع هند صبرى والعام اللى قبليه كان سلطان الغرام مع لوسى وعدد كبير من الفنانيين السنة دى تاجر السعادة بتقيمهم بالترتيب كده ايهما اهم بالنسبالك ؟
خالد صالح:هيبقى اخر عمل تاجر السعادة بس هو التقييم فى الحقيقة يعنى انا خلصت المسلسل ومقدرش اخد منه موقف غير لما يتشاف ويجيلى رد الفعل التقييم دائما بيبقى بناءا على رد الفعل اللى بيجيلى فبناءا على رد الفعل فى الحقيقة الحمد الله كان كويس اوى انا ممكن يكون عندى ملاحظات لانى انا متاكد ان مفيش عمل بشرى كامل بس الحمد الله على المشاهدين طبعا بقابل جمهور كتيربيجيلى مكالمات كتير الحمد الله ردود الافعال كانت كويسه جدا
لميس الحديدى : ردود الافعال دى كانت من الجمهورولامن النقاد؟
خالد صالح : من الجمهورفى البداية من النقاد بعد انتهاء العمل يعنى انا ابتدى اقرا بعد انتهاء العمل الحمد الله ناس كتير قالت كلام كويس
لميس الحديدى: كنت بتقرا وانت شغال ؟
خالد صالح:لااثناء العمل ما ينفعش نقده مينفعش قراية نقد
لميس الحديدى : بس النقد بيشتغل من اول حلقة بيبتدى بقى ايه ينطلقوا ؟
خالد صالح: دى بنعتبرها انطباعات انما على علشان نقول ان الناقد قام بوظيفته لابد تقتضى انه يتفرج اولا وبعدين ينقد ثانيا يعنى انا كممثل مقدرش اقدم لحضرتك مصنف فنى غير مكتمل والناقد مش ممكن يحكم على مصنف فنى الا اذا راه كاملا يعنى
لميس الحديدى: طب هيجيلك لجزء النقد لكن لو قيمت تاجر السعادة ضمن هذا الزخم فى رمضان يعنى كام مسلسل حاجة وسبعين يعنى حاجة كده ارقام عجيبه جدا مكناش بنلحق انى احنا نتفرج لو قيمت انت تحس بقى انك كنت نمرة كام؟
خالد صالح: لا صعب بجد لان انا فى الحقيقة وسط اساتذة كبار وفى وسط زملاء وفى وسط وجبة دسمه جدا ممكن انا ماكنش عندى فعلا الوقت الكافى انى اشاهد كل الحاجات انما اتفرجت على حاجات عجبتنى جدا
لميس الحديدى: مين اللى اتفرجت عليه ؟
خالد صالح: اتفرجت على الرحايا مثلا
لميس الحديدى: نور الشريف
خالد صالح: اه طبعا اتفرجت على افراح ابليس اتفرجت على حرب الجواسيس على هدوء نسبى
لميس الحديدى: هدوء نسبى متعرضش على التليفزيون المصرى لكن اعتقد انه اتعرض على عدد من الفضائيات
خالد صالح:اتفرجت على ليلى يعنى اتفرجت على حاجات كتير
لميس الحديدى:اكترحاجات عجبتك ؟
خالد صالح:مش اكترحاجة كل حاجة فيها حاجة عجبتنى الرحايا عجبنى جدا افراح ابليس فى منطقة عجبنى جدا دا على قدر مشاهداتى لان مشاهدتش عمل كامل للاسف هتتاح الفرصة بعد كده انى انا اشوفه السبق اللى عملته استاذة ليلى فى الحقيقة عظيم انا شايف
لميس الحديدى : انها قدمت فى مسلسلين 15 و 15
خالد صالح :اه انا قلت دا فى الحقيقة انى دا سبق اتمنى ان شاء الله يبقى فى صالحنا كلنا يعنى
لميس الحديدى : ليه اخترت دوركفيف؟ الشيخ مصباح رجل كفيف يعنى ابتدى بقى بيعمل اغانى تشجيع وحاجات كده اعتقد انه ازهرى وماكملش دراسة الازهر على ما اعتقد ثم انطلق بعد ده الى عالم الدجل ويقرا الفنجان وهو كفيف ليه اخترت الدور ؟ يعنى دور معقد قوى على الناس يمكن فيه رمضان كمان
خالد صالح:هو انا ما كنتش ناوى السنادى الحقيقة يعنى ان اعمل درامة تليفزيون بس الموضوع ده فكرة مستوحاه من الاستاذ محسن زايد الله يرحمه كتب الموضوع الاستاذ عاطف بشاى ما كنش ينفع اعدى الموضوع ده كده مرور الكرام وكان لازم اقف عنده وافكر فيه ولقيت نفسى بقبله وبعمله شخصية مغريه جدا جدا وصعب جدا وانا لما ابتديت افكر فى الدور الدور ده صعب الممثل يبقبله صعب جدا بس برده انا مؤمن لو انا مش عايز اجازف هقف مكانى لو انا محتاج اخد حطوة لقدام لابد من المجازفة وثقه الجمهور مسئوليه ضخمة
لميس الحديدى: فين الصعوبه؟ هل الصعوبه ان فيه مرجعيه يعنى بمعنى ان دور الكفيف قدم على مدار اوقات كتيره جدا محمود عبد العزيز فى الكيت كات الايام لى طه حسين للراحل احمد ذكى ناس كتير قدمت هذه الادوار وهى دى بتبقى المرجعيه للاسف اللى دايما بيقارنوك بيها
خالد صالح: هو مش فى للاسف هو فى الحقيقة الدور فى حد ذاته مغرى زائد مرجعيته ان فيه ناس عظام عملوه هو مغرى لانه انتى بتغوصى فى ارض مختلفه مشفتهاش قبل كده انا كممثل دى اول مره من المرات اغوص فى الارض دى بس كان مرجعيتى يعنى كان الاستاذ محمود عبد العزيز الله يكرمه من الناس اللى قدمه الشخصيه دى ببراعه
لميس الحديدى:كلمته ؟
خالد صالح:اه طبعا
لميس الحديدى: يعنى انت قلتله يا استاذ عملت الحكاية دى ازاى ؟
خالد صالح:اتقابلنا فى افتتاح فيلم ابراهيم الابيض وكان ليا الشرف انى انا وقفت واتكلمت معاه كتير
لميس الحديدى: الدور ده سالت مين ؟
خالد صالح: سالت مين ولا استعنت بمين ؟
لميس الحديدى:استعنت بمين ؟
خالد صالح:انا قعدت شهرين قبل العمل قبل ما نبتدى خالص شهرين تحضير قابلت ناس كتير جدا زى الشيخ مصباح كده فى الشهرين اتعلمت العود والغنى وافق تانى خالص ما كنش فى دماغى خالص
لميس الحديدى: حركة الكفيف يقال مثلا ان حركة الكفيف داخل المنزل غير خارج المنزل يعنى ان هو جوا بيته يبصر اكتر منى و منك
خالد صالح: بالظبط كده
لميس الحديدى:انت حاسس انك كنت بتعمل ده ؟
خالد صالح:اعتقد انى حاولت جاهدا ان دا طبعا يبقى موجود عايزة اقول لحضرتك انى لو بيمشى وفيه صعوبة قابلتها يعنى فيه حاجات كنت حاسبها وحاجات مش حاسبها صعبة اوى كده مثلا
لميس الحديدى: زى ؟
خالد صالح:انى امشى من مكان لى مكان من طرقة صغيرة صعبه جدا مش سهله يعنى مفيش حاجه فة الدور ده مش سهله لو ماشى بضهرى ممكن يتم متابعتى فلازم ضهره كمان يبقى مش شايف حاجات كتير لو بيجيب كوبايه ميه ايه اللى بيروح الاول ؟ حاجات كتير جدا جدا جدا
لميس الحديدى: بس في نقاد كتيركتبوا انك انت بتقلد بالظبط ما قدمه محمود عبد العزيزوما قدمه احمد ذكى وما قدمه اخرين عن هذا الدور
خالد صالح: تمام يعنى انتى قلتى اسمين عظام جدا على فكرة الاستاذ احمد ذكى والاستاذ محمود عبد العزيز ربنا يخلوهلنا يا رب يعنى لو انا بقلدهم دا فى حد ذاته مدارس كبيرة قوى كويس انى انا عرفت اقلدهم وانا من المعجبين جدا بشغل استاذ محمود عبد العزيز والاستاذ احمد ذكى طبعا فى الايام بس مسئوليتى تجاه الجمهور دا مش رفاهية انى اكون مختلفة ولا رغبه منى انى اكون مختلف دى حاجة ملحة الاختلاف ملح ومسئولية تجاه الجمهور وبعدين انا ما كنش عندى خالص الرغبة فى انى اهرب قوى من الاستاذ محمود عبد العزيز بالعكس انا كنت مستسلم تماما لشبكة اداء اى حد هيعمل الكفيف هيعملها مستسلما زى ايه مثلا ؟ زى اولا من الصعب ان اقارن بين ادائى واداء الاستاذ محمود عبد العزيز بس مثلا زى استخدام الاذن بدل العين استخدام الايد بطريقة ما كل دى والقدم وما الى اخره من رجل بدور وعايزة تشوف كل دا اى ممثل هيعمل كفيف هيبقى عنده ده انا ماكنتش عندى اراده انى اهرب من ده بالعكس انا مستسلمله تماما تماما بس كان فيه لان الشخصية الدراميه مختلفة تماما خالص عن الشيخ حسنى
لميس الحديدى :انت مش حاسس الشيخ مصباح والشيخ حسنى كان فيه بعض التشابه ؟
خالد صالح: لا مختلفين تماما اولا شخصية الشيخ حسنى شخصية متامله يعنى الدراما فيها مختلفه هنا نصاب هنا راجل بيبيع الوهم طول الوقت وعنده مناطق انسانيه قوى مفروده على حلقات جدا عايز اقول انى انا ما كنش عندى كابوس انى اهرب خالص من اداء الاستاذ
لميس الحديدى: يعنى لما كنت بتقرا الكلام ده ما كنش بيضايقك ؟
خالد صالح:اطلاقا اطلاقا يا جماعه لما يقولولى انت عملت زى استاذ محمود عبد العزيز دا فخر دى حاجة عظيمة بس هو فيه اختلاف دا حق الجمهور عليا انا حاولت اعمله اتمنى انى اكون عملته
لميس الحديدى:نخش بقى فى الشخصية بصراحة يعنى الشيخ مصباح فعلا كان بيبيع الوهم وانتم طلعتم هذه الشخصية محببه للناس يعنى هو رجل فجاه بقى نجم فضائيات وبقى عنده فلوس وبقى مشهور الناس بتلجالوا بالعكس بعض المجموعات السياسيه بتلجالوا ان هو يراسها يعنى يعنى فجاه اصبح بائع الوهم مش بس تاجر السعادة اصبح هو ده اللى بيحل المشاكل بيحل مشاكل المسيحيين بيحل المشاكل السياسيه يعنى هل دى الرسالة انكم بتبيعوا الوهم للناس او ان الوهم ده من الدجل هو ده الطريق للحل معندناش حلول تانيه ؟
خالد صالح:تمام انا فى فترة من فترات حياتى كنت بحب قوى اسمع ان المصرى عنده فهلوه وكنت باخد الفهلوه دى على انها ذكاء ومرونة وقدرة على التعامل مع الواقع فى حدود ضيقة جدا وايجاد حلول سريعة
لميس الحديدى: الشاطرة تغزل برجل حمار يعنى ؟
خالد صالح:انا كنت فاكران هى دى الفهلوه فى الحياه وكنت مبسوط بهذه الصفه الى حد كبير بس لما الفهلوة تبقى اقصر الطرق للوصول لاى شىء المساله هنا بتبقى صعبة شوية و لازم وقفه عندها يعنى لما يبقى فيه وظايف كتيره جدا ومفيش العامل الخبير المدرب لما اشوف انا مثلا زمان فى العمارة المصريه هذه الدقة فى الخشب المصرى هذه الدقة فى التصميمات المصريه هذه الدقة فى الميكانيكى فى اللى بيشيل الزباله فى اى حاجة كان فيه دقة وخبرة لا دلوقتى بقى اى حد بيعمل اى حاجة الحقيقة بالفهلوة شوية مبقاش عندنا لا التدريب ولا التمرين ولا المشروع اللى حد عايز ينجزه فبيبذل الجهد المطلوب
لميس الحديدى: والشيخ مصباح ده كان هو نموذج
خالد صالح: نموذج من النماذج
لميس الحديدى:اه بس انت طلعته شخصية محببه قوى اوعاطف بشاى يعنى طلعه فى النهاية احنا الناس بتتعاطف بشكل ما مع هذه الشخصية بتزعل من مراته اللى خانته بتزعل يعنى فى النهاية فيه تعاطف انسانى مع الشخصية .
خالد صالح:هل الناس اللى احنا مش راضيين عنهم شايلنهم فى حته لوحدهم ولا عاشيين معانا وممكن يكون فيه علاقات ؟
لميس الحديدى:اه بس احنا مش لازم هذا النموذج يصبح يعنى نموذج يحتذى به ؟
خالد صالح:انا هقول لحضرتك على حاجة دايما بعملها وانا بشتغل فى هى فوضى مثلا حاتم انا ما كنتش حابب ابدا انه يتكره وماكنش ينفع انه يتكره ومش عايز انا الناس مجرد تاخد موقف من الشخصية وخلاص وتخرج تقول الراجل ده وحش احنا فيه بينا وحوالين وجوانا انا شخصيا ممكن جدا ابقى فى لحظة غريب عن نفسى ممكن جدا اشوف حد قدامى غير مقبول التصرفات ولكن السلوك او الطريقة اللى بيتصرف بيها محببة وموجوده دا موجود فى كل النمازج بما انى انا بقدم نموذج درامى المفروض انه يتشاف ودا النموذج الشعبى بتاع الموضوع لازم يبقى فيه مناطق جذب
لميس الحديدى: جميل لكن فى النهايه انت متدنيش او الكاتب طبعا دى مش مشكلتك انت دى مشكلة الكتابه نفسها الكتابه متدنيش فى النهاية موقف رافض للدجل متدنيش فى النهاية موقف ضد هذه الشعوذة بالعكس دا لجاتله الفنانة ولجاله السياسى
خالد صالح:اسمحيلى لان الادانه هنا لا يجب لان تكون لمصباح فقط هو فى الاخر قال ايه ؟ الوهم اصبح سوق كاتنوا وانتم اللى عليته مكانته هناك بيئة صالحة لصعود امثال مصباح فى كل المجالات
لميس الحديدى:هل ترى ان انت حاسس ان المجتمع اللى انت عايش فيه ده فعلا بيطلع امثال اصحاب هؤلاء الوهم سواء بيبيعوا وهم زى الدجل او بيشتروه او بيبعهولنا سياسه او اى حاجة تانية ؟
خالد صالح:هى حالة مجتمعيه فى الحقيقه وانا ماكنش هاممنى خالص ان مصباح يتكره مش دى القضية الموضوع ان لم يجد مصباح المضخات مضخات الثقه اللى بتجيله من الناس كان هيفضل لوحده انما هو بقى موجود لان فيه كم من الناس حواليه
لميس الحديدى :ليه كان شكل المعارضه السياسيه يعنى مش عايزه اقول تافه يعنى المجموعات اللى هى الخبز الان وكده ان هذه الاشكال من المعارضة السياسية قدمتوها بشكل مسطح شكل يخلينا نقول اه ماهى دى الجمعيات طبعا وكلها قائمة على لا شىء ليه قدمتوه المعارضة بالشكل ده ؟
خالد صالح: يعنى انا كنت اتمنى ان الاستاذ عاطف يبقى موجود ويرد على هذا السؤال انما فى الحقيقة انا اعتقد انه ما كنش هو دا المتن اللى يشتغل عليه استاذ عاطف السياسه احنا لما بنتكلم عن العيش بنتكلم عنة السياسه بس هو استاذ عاطف اتكلم فى دا كتير اوى اوى انما ما كنش المتن عنده او الموضوع الحقيقى بتاع الحكايه ان احنا عايزين نتكلم فى السياسه خالص هو كان عرض ان فيه مجموعه بس فى السياسه وعايزين نربط بينهم وبين مصباح مش اكتر من كده يعنى انما اعتقد ان الموضوع ما كنش داخل فى احزاب ولا ولا
لميس الحديدى: مش داخل بس هو بيفكرنا بى مجموعات كثيرة .
خالد صالح:ناس كتيرة قوى من السياسيين بهذا الشكل شفتهم ايام ما كنا فى الجامعة وشفتهم ايا ما كنا فى المظاهر
الميس الحديدى:ايوه موجوده ده بس موجود الوجه الاخر
خالد صالح:طبعا طبعا لان المسلسل مش بيستعرض حالة سياسيه فا ممكن ما يكونش اتعرض للجانب الاخر انما اكيد اكيد يعنى بديهيا ما يقصدش ان هى دى الحالة السياسية او حالة المعارضة السياسيه اللى موجوده فى مصر
لميس الحديدى: تفتكرى كان فيه حشر لى حاجات كتيرة كده يعنى يعنى انتم اتكلمتوا فى كل حاجه فى نفس المكان 30 حلقة الفروق الطبقيه المشاكل المدنيه المسيحيه المشاكل السياسية يعنى في حاجات كتيرة قوى مشاكل الاعلام والفضائيات وخلافه مش كان شويه كتير ولا علشان نملا ال30 حلقة لازم نملى ال30 حلقه
خالد صالح: خلينا فى موضوع ال30 حلقة خليه سؤال لوحده بس هو الجزء التانى المسلسل كان الغرض منه استعراض هذه الشخصية مصباح مع مواقف كتير بتمر حواليه وموقفه منها مش استعراض الحالات اللى احنا بنتكلم عنها يعنى احنا كنا عايزين نعرف شخصية مصباح فى البدايه فبنعرضه لشوية نمازج لشوية ضغوطات لشوية ضغوطات انما ما بنستعرضش الحاجات دى ولا نغوص فيها دال همنا همنا ان هذه الشخصية بنشوفها وهى بتشوف الست دى ومشكلتها و الراجل ده ومشكلته والطفل دا ومشكلته الحى دا ومشكلته انما مش بالضرورة ندخل البيت ونشوف افراده عاملين ايه كان بس علشان نعمل شكل بانوراما كده على الموضوع من خلال ده نشوف مصباح يعنى المواضيع ما كنش مقصوده لذاتها انما كانت مقصوده
لميس الحديدى:لمرور مصباح عليها ؟
خالد صالح:بالظبط كده انا اعتقد كده انما برده اللى يسال فى ده وبشكل مهنى الاستاذ عاطف
لميس الحديدى:طبعا 30 حلقة احيانا بتحس انهم بيعملوا شوية مط واطالة
خالد صالح:انا بقى اكتشفت ده السنادى اكتشفت ان ليه 32 حلقة ليه ؟ يعنى لمصلحة مين 32 حلقه؟ انا بقول دا على فكرة وانا حسن النيه جدا والله ومقصدش اى حاجة بس كان ممكن جدا يتشال حلقتين ويبقوا 30 حلقه وهيبقى فى صالح كل المجموعه فانا مش مع 32 حلقة
لميس الحديدى:بتحس ان احيانا الايقاع بيقع شوية فى النص؟
خالد صالح:اه طبعا طبعا
لميس الحديدى: هخرج فاصل اعلامى لكن قبل الفاصل اللى النقد اللى نكد عليك
خالد صالح: لا مش نقد يعنى مفيش نقد نكد عليا هقولك مثلا بس دا مش نقد ولا يندرج تحت مسمى النقد حد كاتب بيقول سمعت دى اول حاجة ان فلته عصره خالد صالح وارم من كل البشر خير على فكرة معهد الاورام بيعالج ببلاش كانت قاسيه جدا جدا الجمله وبلا مبرر ما نمتش ما نمتش يوم كاملا
لميس الحديدى: من الغضب ولا من ال..؟
خالد صالح:من انى اسمى دا ايه ؟ دا نقد ولا ايه ده ؟دا معاناه ايه ؟
لميس الحديدى: هخرج فاصل اعلامى ونرجع تانى نتابع خالد صالح الشيخ مصباح بس نشوف بقى خالد صالح بعد الفاصل
فاصل*مشاهد من مسلسل تاجر السعادة*
لميس الحديدى: ودا كان الشيخ مصباح واغانيه مين اللى كان بيكتب له الكلمات دى؟
خالد صالح:الى كتبت كلماتة الاغانى جو المسلسل صديق عزيز اسمه ممدوح مداح ودى اول مره
لميس الحديدى:انا اول مره يعنى اسمع اسمه بس فيه اغنية بتاعة الخوف جبان دى واعتقد فى اغنية عن الفول مثيرة جدا لا الاغانى مختلفة يعنى ؟
خالد صالح: كلمات ممدوح والحان احمد خلف
لميس الحديدى:ليه الغنى مش مقحم شويه موضوع الغنى دا فى شخصية الشيخ مصباح ؟
خالد صالح:انا محستش انه مقحم مش عارف بس انا شخصية محستش لان الشخصية حتى تناول الغنى كان على القهوة لايف يعنى اقصد كل الغنى كان لايف فهى دى حالته يعنى محستش خالص فى لحظة لدرجة انا معرفش مثلا اغنى اى اغنيه الا وانا مصباح جوا البلاتوه روحت الاستديو علشان اسجلها معرفتش حاولت اسجل معرفتش فمحستش خالص انها بعيده عن الشخصيه
لميس الحديدى: طب معانا اتصال هاتفى من السيناريست الاستاذ عاطف بشاى مساء الخير يا استاذ عاطف
عاطف بشاى : مساء الخير يا فندم
لميس الحديدى: مبروك المسلسل
عاطف بشاى : الله يبارك فيكى ومتشكر جدا
لميس الحديدى:احنا كنا بنتكلم مع الاستاذ خالد هل شخصية الشيخ مصباح هو بائع للوهم ام بائع للسعاده وليه شخصية الدجل يعنى بياع الدجل ده خلتونا نحبه المفروض ان احنا منحبهوش المفروض نكره ؟
خالد صالح: هو ممكن اسلم عليك الاول يا حبيبى
عاطف بشاى :احييك جدا طبعا خالد صالح بلا مجامله يعنى مش محتاج هو ممثل عظيم انا كنت فى منتهى السعادة ومازلت بتجسيده لدور بابعاده المختلفه حضرتك طبعا عارفه الشخصية الدراميه لها تلت ابعاد بعد نفسى وبعد اجتماعى وبعد جسمانى الحقيقه انا شايف انه برع بشكل غير عادى من تجسيد الابعاد التلاته دول وعايز اقول بسرعه قبل ما اجاوب على سؤال حضرتك حوالين مساله التشابه دى مساله مزعجة جدا وانا تصديت ليها من اول يوم تخيلى حضرتك بعد حلقتين مقارنات سخيفة جدا وغريبه فى نفس الوقت واحد بيعمل شخصية مختلفه عن شخصيه يعنى الكيت كات رجل تاملى فلفسى وجودى عبسى علاقاته بالحياه والموت والوجود هو العبث وشخصية تانيه بتتكلم يعنى شخصيه شعبيه نصاب دمه خفيف بيمتهن عدة مهن مين طين هذه الارض يعنى يتحول الى دجال بالتدريج طبيعة فبما ان طبيعة الشخصيتين مختلفتين فلا يجوز ابدا المقارنه اللى انا اسمحيلى اقولك انها سخيفة يعنى
لميس الحديدى: ايه اللى ضايقك فى النقد يعنى قبل ما نرجع لشخصية ؟ يعنى انا بتكلم مع خالد قاللى ان فيه جمل من النقد غير لائقة يعنى؟
عاطف بشاى : يعنى هو للاسف يعنى اسمحيلى اقولك ده بشجاعه يعنى هو اصبح لم يعد هناك تلاته اربعه نقاد حقيقيين يعنى اما بقيت الناس فبتكتب انطباعات سريعه وكلها مركزه حوالين يعنى هل تتخيلى حضرتك ان لغاية النهارده تلت اربع اقلام فقط اللى كتبت تحلل الموضوع وتحلل القضية اللى احنا طرحنها وتحلل هذه الشخصيه بينما كل الانطباعات بتتكلم عن خالد صالح كان شبه محمود عبد العزيز ولا لا
لميس الحديدى: وكان اوفرولا ما كنش اوفرولا الكلام ده ؟
عاطف بشاى :انا طبعا كنت اقصد بشكل اساسى انى بتكلم عن مجتمع انا شايف النهارده انه يطلق عليه اللا مجتمع نحن نعيش فى عصر حدثت فيه رده حضاريه وتراجع حضارى ادى الى سيطرة الدجل باشكاله المختلفه والشعوذه على مقدرات هذا الشعب اخر احصائية بتقول ان هناك دجال لكل 200 الف مواطن هؤلاء الدجالين انتشروا اللى كنت عايز اوصله ان الدجل السياسى دخل مع الدجل الدينى
لميس الحديدى : الدجل السياسى بقى يعنى انت صورت المجموعات السياسيه المعارضه لسه كنت بتكلم مع الاستاذ خالد على الموضوع ده بشكل مسطح جدا هذه ليست المعارضه فى مصر
عاطف بشاى : لا لا لا طبعا مش المعارضه الفن اختيار هو الشيخ مصباح لكى يصل الى ان يصبح زعيما لمجموعه من الحركات التى ظهرت فى توقيت معين دا ليس تمثيلا لليسارولا تمثيلا للناصريين ولا تمثيل لاى تيار سياسى نحن نحترمه اطلاقا هى القضيه فى اطار من الفنتازيا ان بائع الوهم استطاع ان يبيع الوهم للبسطاء كما استطاع ان يدخل فى عملية دجل سياسى هوحدثت لحظة بذكاء شديد جدا وبذكاء فطرى انه يستطيع بدلا من ا، يصبح مجرد دجال الى رجل يلعب دورا
لميس الحديدى:طب استاذ عاطف قريتلك تصريحات النهارده فى المصرى اليوم بتختلف فيها مع المخرجة شيرين عادل وبتقول كانت هناك مشاهد هى حذفتها الرقابة اجازتها وهى حذفتها انت مختلف مع شيرين عادل ؟ اتخانقت معاها اختلفت معاها ؟
عاطف بشاى : لا مش خناق بس انا فوجئت انه الحلقه الاخيرة فيها حذوفات لم تحذفها الرقابه واتغيرت مسار حاجات يعنى مثلا من ضمن الحاجات انا كنت بشتغل على فكرة انه حينما ما حدث نوع من الرده اللى بكلم حضرتك عليها وذيوع الدعاه الجدد فى الفضائيات اللى حصل ان الفنانات اللى ارادوا الاعتزال مصباح اثر على شخصية منهم وهى فاديه عبد الغنى خلاها تؤمن بفكرة الاعتزال فتحجبت ثم تزوجها فدا اتغير
لميس الحديدى:دا اتغير طب خليك معايا بقى معايا شيرين عادل على التليفون مخرجة هذا العمل استاذ شيرين مساء الخير
شيرين عادل :اهلا مساء الخير
لميس الحديدى: ليه شلتى حجاب الفنانه وغيرتى فى هذه المشاهد؟
شيرين عادل :اقول لحضرتك ليه ؟ انا عندى تقارير رقابيه بتقول انى انا لازم اشيل هذا الكلام والتقارير عندى وانا ممكن ابعتلكم نسخه منها لو عايزين هو الالتزام بتعليمات الرقابه دا بقى عيب دلوقتى ؟
لميس الحديدى: استاذ عاطف حضرتك سمعت استاذه شيرين قالت ايه ؟
عاطف بشاى :لا يجوز لا يجوز باى حال من الاحوال تغيير اى شىء دا المشهد الرئيسى
لميس الحديدى: بتقولك فيه تقرير من الرقابه؟
عاطف بشاى :حتى لو دا تقرير الرقابه وحتى لو تصورنا ان دا تقرير الرقابه يعنى ينبغى الرجوع الى المؤلف علشان هو بيحط التصور المناسب الشخصيه بالشكل ده كما انها غير موجوده يعنى انا بعمل 30 حلقه علشان اقول ان الست دى هتفضل تمثل يعنى
لميس الحديدى: شيرين انت مرجعتيش لاستاذ عاطف ليه ؟
شيرين عادل :والله الاستاذ عادطف انا عدلت معاه مره واتنين وتلاته واستاذ خالد شاهد على هذا الكلام ان احنا غيرنا الحلقة الاخيره دى تحديدا اربع خمس مرات علشان خاطر نوصل للشكل المناسب لكن هو مش مقتنع وانا مش هعمل حاجة الرقابه مش موافقه عليها
لميس الحديدى: استاذه شيرين الاول مبروك على المسلسل- المسلسل حقيقى جيد
شيرين عادل : ربنا يخليكى ميرسى
خالد صالح: انا لي راى فى الحقيقة
لميس الحديدى: اتفضل
خالد صالح: ان المخرج فى النهاية لما الامور توصل ان فيه رقابه تقول ان المشاهد دى متنفعش وحصل فى اكتر من مشهد ان احنا حاولنا وفى اماكن منفعش ان احنا نصور فيها
لميس الحديدى: زى الكنيسة مثلا اعتقد ان الاستاذ عاطف كان اتكلم فى هذا الموضوع ان الكنيسه رفضت انه انتم تصوروا بعض المشاهد
خالد صالح: كان في خناقة ومشاده قالوا لا دا مينفعش مش هيحصل وكده اعتقد ان المخرج كرب للعمل وارد جدا انه يوصل لحلول بس هى هنا ان الحل ما كنش نفى الشخصية ولا بتر الشخصية هوكانت الشخصية رجعت فى الاخر وقالت تنازلت عن فكرة انها لازم تبقى نجمة كبيرة وقالت لا فيه امكانيه ان انا افكر بشكل مختلف وزى ما بيقولوا ان البطوله مش بالضرورة بالدور المختلفه بعد الازمة الطويلة اللى احنا عشناها مع احلام وكمال فدا حل شافته المخرجة انا عموما ودا رايى ان المخرج له ان يضع بعض الحلول ومفيش مانع ان الاستاذ عاطف كمان يبقى مضايق يعنى لا فيه مانع انها تحط حلول لانها منفتش حلول يعنى ماقلتش حاجه ضده ومن حقه كمان ان هو يبقى مضايق مفيش اى مشاكل
لميس الحديدى: شيرين انتى حسيتى ان المسلسل فى الاخر ايقاعه وقع منك شويه ؟ يعنى انا كنت حاسه ان الدنيا كانت مشدوده فى الاول كنا بنجرى ورا مصباح ده وفجاه يعنى الايقاع فك مننا شويه ؟
شيرين عادل : ايقاع ورق ولا ايقاع مخرج ؟ فيه فرق بين الايقاعيين ايقاع الورق بمعنى ان احنا يبقى عندنا مفيش احداث كفايه مفيش حاجه بتحصل يبقى دا ايقاع ورق انما ايقاع المخرج دا الايقاع الموجود جوا المشهد نفسه ومعتقدش انى انا عندى انى عندى حركة كاميرا باستمرار وانى عندى حركه ممثل باستمرار فانا بالنسبالى انا ما كنش عندى مشكله فى الايقاع جايز يكون فيه حاجه فى الورق بس انا بشكل عام بقول ان المسلسل انا شايفه انه كان كويس انا اتفرجت على مسلسلات كتير وشوفت ايقاعات كتير
لميس الحديدى: مش لازم نقارن بينا وبين اللى اقال مننا انا دايما بقول يا جماعه لازم نقارن بينا وبين الافضل.
شيرين عادل :انا معاكى انا معاكى تماما بس انا اعتقد ان احنا كنا كانت المساله بالنسالنا كانت المساله كويسه قوى انا بس عايز اعقب على حاجه برده قالها الاستاذ عاطف مشاهد الكنيسه مشاهد الكنيسه دى مرفوضه تماما من الرقابه وقايليين انها هتعمل فتنه طائفيه دا النص اللى مكتوب فى تقرير الرقابه رقابة التليفزيون ورقابة المصنفات الفنيه وصور التقارير دى عندى فى منتهى البساطه انا ممكن انشرها والناس تشوفها بعينيها فانا ازاى اعمل مشاهد فيها حاجة زى كده؟ والكنايس كمان رفضت ان انا اصور هذه المشاهد
لميس الحديدى: نسمع بقى الاستاذ عاطف عندك رد قبل ما.؟
عاطف بشاى : في مشهد رئيسى جدا للشيخ مصباح وهومشهد بيدعو للوحده الوطنيه بيذهب مع القرلس الى القس لكى يقولوا يعنى خففوا المساله شوية فى حكاية الزواج التانى وكده يعنى لم تعلق الرقابه على الاطلاق الا فى جملة بس خلوا بالكم يا جماعه ملحوظه كده صغيرة يعنى انه قال يعنى متخلوش القسيس انه يبان انه مش فاهم كل اللى حصل انى انا شلت الجملتين دول اللى قد توحى بذلك انما لا الرقابه ولا الكنيسة والكنيسة اصلها مش سلطة اسمحيلى يعنى الكنيسة مش سلطه على الابداع لا الكنيسة ولا الازهرله سلطات على المبدع احنا بتحكمنا رقابه والرقابة يمكن ايضا مناقشتها يعنى انا اللى مزعلنى انه ازاى يبقى فى لحظة من اللحظات يعنى تبقى الرقابه مستنيرة ويبقى احنا اللى فرضين رقابه مش مطلوبة دا معناه تراجع ضد حرية الابداع
لميس الحديدى:شيرين اخر تعليق ليكى قبل ما اقفل المناقشه دى ؟
شيرين عادل: انا تقاريرالرقابه عندى والكلام ده محذوف
لميس الحديدى: يعنى انتى ما بتناقشيش الرقابة اصل انا عندى مع الرقابة دى يعنى رئات
شيرين عادل: على فكرة كلنا عندنا ده بس انا شخصيا انا مش مقتنعه انى انا اعمل مشاهد ضد الكنيسة او انى انا اقف الموقف ده ضد الكنيسه
خالد صالح: طب انا عايزاقولكم على حاجة يا جماعه انتم الاتنين ان ما فى عمل فنى فى الكون يمكن كلنا ان نتفق على اننا كلنا بذلنا المجهود المطلوب فيه مستحيل يعنى بالنسبه للاستاذ عاطف الاول بس علشان ما نبقاش معلقين المشاهدين انا فخور انى انا اشتغلت ةمعاكم بجد ومتشكر انى انا اشتغلت معاكم وكل واحد فيكم بذل الجهد المطلوب ونتمنى ان احنا التلاته كده نكون قدمنا للجمهور يا رب ان شاء الله اللى يرضيكم كل سنة وانتم طيبيين
عاطف بشاى : وانا بقول لشيرين انتى عملتى شغل جيد جدا وانا راضى تماما
عن المسلسل انما لى ملحوظات كان من حقى ان اقولها
خالد صالح: مش هنتقدم خطوه يا حبيبى ان لم يكن لدينا احنا ملحوظات على نفسنا
عاطف بشاى : بالاضافه انه اللى صعب عليا يعنى انه ارجعيلى ارجعيلى طول والوقت وطول كتابه المسلسل كنت مرن جدا الى ابعد الحدود والاستاذ خالد يعرف يعنى وكنا بنقعد نتناقش وبنختلف وبنتفق ثما بعمل ده بديمقراطيه شديده جدا اللى زعلنى انه تم الاعتداء على حقى فى انى اعدل او
خالد صالح: يا عطوفة 95% ديمقراطيه و 5 % فى نهاية المسلسل كانت ديكتاتوريه مفيهاش حاجه
لميس الحديدى: دا فى المسلسل بس متوقعوناش فى الغلط بقى
عاطف بشاى : دا مسلسل من اعظم المسلسلات اتعرضتلى انا شخصيا ومن افضل الاعمال اللى انا اشتغلتها والمخرجة جيده جدا ومفيش خلاف خالص غير اكتر من غيره
لميس الحديدى: من حق الكاتب ان يقول ومن حق المخرج ان ينفذ رؤيته طبعا لازم تتكلموا مع انا مبسوطة انكم اتكلمتوا مع بعض على هذا البرنامج شيرين عايزة تقولى حاجه عايزة اقفل المناقشه دى
شيرين عادل:اقول لاستاذ عاطف اولا ميرسى طبعا على المسلسل الى انا عايزة اقوله انى انا قعدت معاه قلتله انا هعمل المسلسل ده وسبت مسلسلات كتيرة كانت جيانى واصريت اى انا اعمل الورق ده لانه كان عجبنى فعلا لانه كان ممكن يرفع سماعة التليفون ويكلمنى بمنتهى البساطه
خالد صالح:اعتقد ان هو ده اللى هتعملوه حالا انتوا الاتنين
لميس الحديدى: اشكركم و اهنيكم مره تانية على هذا المسلسل الاستاذ عاطف بشاى السيناريست الكبير والاستاذه شيرين عادل المخرجة المتميزة
خالد صالح:ممكن اقولك على حاجة انى انا دلوقتى انا لقيت نقد مقريتهوش فى الجرايد
لميس الحديدى:ايه هو ؟
خالد صالح: اللى حصل حالا
لميس الحديدى:اه فكرة التشريح يعنى بتستريح انت للشغل مع شيرين عادل ؟
خالد صالح: ايوه جدا جدا
لميس الحديدى:تالت مسلسل حاسه انها..
خالد صالح: يعنى بنفهم بعض بسرعة هى امينة لحد كبير عليا اشتغلنا مع بعض مش تلاته بس هى كمان كانت مساعدة مخرج الاستاذ مجدى احنا عملنا مع بعض احلام عادية وعملنا اكتر من حاجة ومحمود المصرى
لميس الحديدى : طب نخرج فاصل تانى وملفات خالد صالح كتيرة وعندى تليفونات من الجمهور يعنى على كل هواتف البرنامج خالد صالح تاجر السعادة وايضا حاتم فى هى فوضى وايضا كان اسمك ايه فى يعقوبيان ؟
خالد صالح:كمال الفيومى
لميس الحديدى:مين كمال الفيومى ؟
خالد صالح:كمال الفيومى دا شخصيه فى الفيلم
لميس الحديدى: مين فى الحقيقة ؟
خالد صالح: ما نخرج فاصل يا لميس
لميس الحديدى:نخرج فاصل
فاصل*مشاهد من اعمال الفنان خالد صالح
لميس الحديدى: دا بقى خالد صالح مش تاجر السعادة بس يعنى هذا المسلسل قبل ما اقفل ملفه اذكر دورين متميزين مجموعة ادوار هالة فاخر طبعا ممثلة قديرة يعنى ودورالمعدده كان رائع وكمية امثال كانت فظيعة وداليا مصطفى الحقيقة عملت دور كويس
خالد صالح : والله انا مش عايز ازكيهم على الجمهور لان احنا مشتركين فى حاجة واحده بس انا ليا الشرف وفخور انى انا اشتغلت مع هالة او مع داليا جدا جدا
لميس الحديدى: يعنى هى هالة كانت معدده فظيعة وايه كمية الامثال دى جبتوها منين ؟
خالد صالح : دا الاستاذ عاطف بقى
لميس الحديدى: مع ضيوفى بالذات من السياسيين بتفكرنى ليه انت بيحيى شاهين احيانا كتيرة ؟ غريبه مش كده ؟ يمكن علشان هو مثل فى سن مش جان يعنى يعنى مش 25 سنة كده ؟
خالد صالح : ممكن ممكن
لميس الحديدى: انت مثلت متاخر ؟
خالد صالح : اه بالنسبه لعمرى متاخر بس معرفش بالنسبة لى ايه تانى متاخر
لميس الحديدى : متاخر فى السن يعنى انت اساسا خريج حقوق اشتغلت بعد كده فى ايه ؟
خالد صالح : اشتغلت فى التجارة
لميس الحديدى: وبعدين ايه اللى خلاك تخش موضوع التمثيل ؟
خالد صالح :لان هو دا الحاجة الحقيقية اللى جوايا فى الحقيقة يعنى الممارسات الاخرى بتم علشان ظروف الحياه انما الحقيقى اللى كان جوايا كان الممثل
لميس الحديدى: موضوع الحقوق دا ساعدك ؟
خالد صالح : قوى قوى قوى انا مشتغلتش محامى كتير انا اشتغلت محامى شهر بس دراسة الحقوق فى حد ذاتها بالنسبالى مهمة قوى
لميس الحديدى: مين اللى دخلك التمثيل يعنى مين اللى شد رجلك ؟
خالد صالح : اللى شد رجلى وانا فى تلته اعدادى الاستاذ بتاعى كان اسمه استاذ محمد عويس
لميس الحديدى: وبعد كده مسرح اشتغلت مسرح ؟
خالد صالح : اه مسرح
لميس الحديدى: عملت مع يوسف شاهين هى فوضى وكان اخر اعمال يوسف شاهين اللى كان يعنى جو عامل حاجات وكان خالد يوسف كان شغال فيه اعتقد ايه اللى اتعلمته من يوسف شاهين ؟
خالد صالح : اتعلمت حاجات كتيرة قوى ما اكبرش على الدنيا ومحسش انى انا كبير على التجربة انى ممكن استفيد من الشخص اللى انا مستحيل اتصور انى استفيد منه ومن الموقف اللى مستحيل اتصور ان هتسفيد منه على المستوى الفنى يعنى شفت من عين يوسف شاهين ومن خبرة يوسف شاهين ومن طريقة يوسف شاهين فى القيادة الحقيقة قيادة الممثل دى مساله مهمة جدا
لميس الحديدى: يوسف شاهين وخالد يوسف ايضا بيقدما له منهج معين بتختلف بتتفق معاهم ايه موقفك ؟
خالد صالح : هى فوضى فى الحقيقة كان موقفى تناول ظاهرة فى الشارع المصرى هى الفوضى بشكل عام انا مع تماما وجود فوضى فى الشارع المصرى بس هما موقفوش الحقيقة عند الظاهرة وخلاص هما وصلوا حتى حاتم امين الشرطة ضحيه يعنى
لميس الحديدى : هو حاتم امين شرطة يعنى مش سليم قوى يعنى منحرف الى حد ما..
خالد صالح :منحرف جدا جدا ولكن هو كمان ضحية يعنى هو مش منحرف بمزاجه وزلا هو عايز يبقى منحرف لكنه ضحية لظروف كتيرة قوى حواليه هما بيناقشوا الحالة الاجتماعية كلها على بعضها مش مجرد امين الشرط
لميس الحديدى: طب معايا هالة فاخر على التليفون مساء الخير يا استاذة هالة
هالة فاخر: مساء النور
لميس الحديدى: الامثال فظيعة دور المعدده ايه يا هالة عرفت تعمليه ازاى ؟
هالة فاخر: بس الحمد الله يعنى الحمد الله طبعا الاستاذة شيرين عادل المخرجة طبعا الحقيقة بجد تعبت معانا جدا وناهيك بقى عن استاذ التمثيل القمر المنور اللى
قاعد قدام حضرتك ده
خالد صالح : يا هالة هانم
هالة فاخر: يا عم الحج الجميل
لميس الحديدى: عددتى كتير قوى يا هالة اللطم والصويت المستمر
هالة فاخر :عايزة اقولك حاجة يا استاذة لميس انى انا بقى كنت مرعوبه جدا بكلمك بجد مش كلام تليفزيونات وافيشات وحاجات كده انى انا هبقى قدام غول تمثيل زى الاستاذ خالد صالح والحمد الله ربنا وفقنى انى انا ابقى على مستوى كويس او معقول
لميس الحديدى: بس انا عجبنى معدديه وبتلبس نضارة هتبعتلى بقى وهكلم عاطف بشاى يبعتلى لسته الامثال علشان ايه ؟ ناويه استخدمها فى اشياء اخرى
هالة فاخر : يا حبيبتى عينيه الاتنين
لميس الحديدى: كل سنة وانتى طيبه ومبروك حقيقى كان دور مميز جدا يا هالة
هالة فاخر : الحمد الله الحمد الله
خالد صالح : يا حبيبة قلبى انا سعيد وفخور بيكى يا هالة بجد ربنا يحفظك ليا
هالة فاخر : ويخليك ليا يا رب ويخليك لينا كلنا يا انسان يا جميل يا طيب يا قمر ياللى بتتعاون مع الناس كلها ومتواضع مع الناس كلها وكل الناس بتحبك ربنا يحببك فيك الناس يا رب
لميس الحديدى: شكرا للاستاذة الفنانة هالة فاخر قدمت دور مميز جدا هبه من القاهرة اتفضلى يا هبه
هبه: السلام عليكم
لميس الحديدى: وعليكم السلام
هبه: اولا انا بهنى الفنان خالد صالح على العمل بتاعه فى رمضان وبس كان عندى ملحوظة على اساس ان حضرتك كنت بتقولى او فيلم تانى عايزه اقول لحضرتك انى انا بفضل الله زوجى كفيف ومش عايزه اقولك ان نص العمل او تلت تربع العمل اللى عمله اسلاتذ خالد هو نفس سلوك زوجى او اصدقائه الاكفاء والناس دول على فكرة بيعملوا حاجات كويسه وبيدربوا كتير وبتمنى ان المسئولين يبصلهم بنظرة ان هما ناس قادرين يدوا
لميس الحديدى: هو مواطن زينا جميعا يعنى بس هى المفروض الحقيقة ان الحياه نفسها وسائل الحياه الشوارع يعنى برده تبقى مهياه اكتر
هبه: اكيد اكيد طبعا بهنى الاستاذ خالد صالح وبهنيه جدا جدا على العمل بتاعه دوا لان حقيقى ادانا نظرة تانية للناس دول ان هما قادرين يدوا وان هما لازم يكونوا موجودين فى المجتمع باعمالهم وبسلوكهم وبظروفهم
لميس الحديدى: شكرا يا هبه
هبه: وكل سنة وانتم طيبيين
لميس الحديدى: وانتى طيبة
خالد صالح : وربنا يحفظهولك يا حبيبتى
لميس الحديدى: ربنا يحفظه يا رب نادية من الجيزة اتفضلى يا نادية
نادية: الو سلام عليكم
لميس الحديدى: وعليكم السلام
نادية:انا برحب بالاستاذ الفنان الكبير خالد صالح وانا من محافظة فى الصعيد وكلنا بنشوف المسلسل ما كنش حاجة بنشوفها غير المسلسل بتاع الشيخ مصباح
لميس الحديدى:انا فاكرة انكم بتتفرجوا على افراح ابليس بس
نادية: ما هى عندنا
لميس الحديدى:انتوا عندكم افراح ابليس كلها
نادية: الناس كلها بتحبه بساطة مصباح وتلقائيته وعلى فكرة المقارنة ما بينه وبين الشيخ حسنى بتاع الكيت كات لا فيه فرق كبير جدا الشيخ حسنى تحسى انه راجل مالوش فى الحياه راجل اعمى ما بيعرفش غير النزوات و المخدرات لكن الشيخ مصباح كان مبصر بيبعت الامل والوفاء فى كل حاجه شوفتوش حد فى الدنيا بييروح يتجوز ياخد مراته اللى بتعدد ويقلها تعالى هيوريكى كبوليه لما بيتجوز ويسبها تلاقى حاجة تشتغل بيها من بعده دا شىء فى منتهى الجمال انا بقول بس ربنا دايما يخليك خالد ويخليك صالح
لميس الحديدى: يا سلام شفت الجمهور بتاعنا يعنى النقد بتاعه مختلف شكرا يا نادية امانى من القاهرة اتفضلى يا امانى
امانى :الو مساء الخير
لميس الحديدى: مساء النور
امانى : الحقيقة انا احب اسجل بس اعجابى الشديد بالفنان الكبير وبحضرتك وبالبرنامج بس ليا ملاحظات سريعه كده او المفروض ان ال30 حلقة او ال32 حلقه دول يرجعوا زى زمان 10 حلقات يعنى اشوف انا فى الشهر 3 مسلسلات واحب كما الفت نظر ان عدد المسلسلات الكتير اللى بيعرؤض فى رمضان بيخلينا ما نشوفش الكويش من الوحش ممكن امسك انا مسلسل واتابعه يطلع فى الاخر وحش وتروح عليا فرصة انى اتابع مسلسل كويس دى حاجة الحاجة التالته كترالاعلانات اللى بتقطع المسلسلات اروح قلبه المحطه علشان تخلص الاعلانات وبعدين يضيع منى المسلسل الضم فى مسلسل تانى وتحصل لخبطه
لميس الحديدى:اشكرك منطقى جدا ملاحظاتك امانى على من القاهرة اتفضل يا على .
على: سلام عليكم
لميس الحديدى: وعليكم السلام
على:كل عام وانتم بخير
لميس الحديدى: وانت بالصحة والسلامة
على:انا عايزة بس اقدم شكرى الجزيل واعجابى الكبير بالفنان الرائع الرائع الرائع خالد صالح امتعنا فى رمضان امتاع فوق الوصف مسلسل تاجر السعادة كان فاكهة المسلسلات والله كنا بنتتبعه كل يوم لغاية ما كان هيمنعنى عن التراويح
لميس الحديدى: لا الله يكرمك
على: الساعه واحده بقيت اروح التراويح عادى بتفرج عليه الساعه واحده ابداع فوق الوصف ربنا يخليك لينا يا استاذ خالد وتفضل على طول فعلا خالد وتفضل على طول صالح
لميس الحديدى: اشكرك يسرى من القاهرة اتفضل يا يسرى
يسرى : سلام عليكم
لميس الحديدى: وعليكم اللسلام
يسرى :ازيك يا استاذ خالد ازيك يا استاذة كل سنة وانتم طيبيين
لميس الحديدى: وانت طيب اتفضل يالا علشان وقت البرنامج
يسرى :جميل جدا يعنى بجد دور جميل جدا وعايزة اقول لحضرتك المقارنات اللى بتحصل دى جميله جدا دا دليل على نجاح الحلقة بتاعة حضرتك لدرجة انى انا تقمصت الشخصية مع مراتى هنا فى البيت
لميس الحديدى: اى جزء بقى ركز معايا اى جزء ؟ اوعى تكون اتجوزت عليها
يسرى : لا متجوزتش انت زى ما حضرتك كده ضحكتنا انا احب انى انا اضحكك انا بشكر عليه
خالد صالح : الله يحفظك
لميس الحديدى: شكرا يا يسرى بلاش تتقمصوا بس الشخصية دى ماهر من الجيزة اتفضل يا ماهر
ماهر: الو سلام عليكم
لميس الحديدى: وعليكم السلام
ماهر: اولا بشك حضرتك على البرنامج الجميل اللى فى رمضان وطبعا بشكر الاساتذ خالد على انه مثل حاجة غير اللى مثلها الاستاذ محمود عبد العزيز دا باتقان ودا باتقان اخر يعنى بصراحة دى شخصية ودى شخصية اخرى الاستاذ خالبد دايما بيمتعنا بمسلسلات او افلام بصراحة وربنا يخليه دايما كده
خالد صالح : لا هو غالى من زمان
لميس الحديدى: يعنى دلوقتى انت من الاغلى ولا ايه ؟
خالد صالح : لا هو انا بس لانا مبسوط الاستاذ محمود عبد العزيز يعنى دا فخر يا جماعه والله فخر ولم يكن فى ذهنى فى يوم من الايام
لميس الحديدى: بس جمهور واعى ان هو شايف الفروقات فيه اعتقد مشاهده دخلت قالتلك الفروقات كذا وكذا فى جمهور شايف
خالد صالح : اسمحيلى اقول انى انا اتمنى ان استاذ محود عبد العهزيز يا رب بصفته الاستاذ انه يكون راضى يا رب ان شاء الله عن شغلى وعن ادائى بخصوص بقى الاغلى والاجريعنى انا شايف ان حالة الابداع ومسالة الابداع او الفن صدقينى اصعب بكتير من اننا نتكلم فى الاجر واهم من اننا نتكلم فى الاجر صدقينى
لميس الحديدى: صحيح كنت عايز تعمل فيلم عن حسن نصر الله وتراجعت؟
خالد صالح : بصى انا اتازمت شويه من الوقف الاخير يعنى انما مقدرش انكر احترامى وتبجيلى لهذه الشخصية وانه فى وقت من الاوقات اثناء الحخرب اللى كانت موجوده واللى دافع فيها بشراسة وبقوه عن جنوب كان بيرفع راسنا كلنا بس انا اتازيت شويه من اللى حصل يعنى مش عايز ادخل فى تفاصيل انما له فوق راسى كل الاحترام والتبجيل
خالد صالح : اكبر من كل المصريين اللى موجودين دلوقتى
لميس الحديدى: اكبر من كل المصريين؟
خالد صالح : طبعا
لميس الحديدى: وشايف الفن فى مصر ازاى ؟
خالد صالح : كبقية مناحى الحياه فى مصر بس انا ما ينفعش اقف فى صفوف التشخيص لوز سمحتيلى بى ده يعنى كل الظروف اللى فى مصر هى مساله عامة جدا زى الفن زى السياسة زى الاقتصاد زى الصحة زى التعليم زى وزى وزى احنا فى مرحلة فيها ازمة بشكل عام ولكن دور الفن دايما انه يبص لقدام شويه فانا بتمنى انه الفنانيين والمبدعين يبقالهم دور الرياده شويه فى ان هما يخرجونا الى افق مختلفه اتمنى
لميس الحديدى: وانا اشارك هذا التمنى لان الفن هو دا دوره ان هو يعنى يشدنا لافق جديد عندك ايه داخل ايه دلوقتى ؟
خالد صالح :ان شاء الله بنحضر لفيلم اسمه ابن القنصل تاليف ايمن بهجت قمر
لميس الحديدى: دا اول فيلم لبهجت قمر ولا ايه ؟
خالد صالح : لا هو عمل فيلمين قبل كده اخراج عمرو عرفه وزليا الشرف انى ا[قى مع احمد السقا
لميس الحديدى: جميل اشتغلتوا قبل كده مع بعض مش كده؟
خالد صالح :مظبوط
لميس الحديدى: اشكرك ومبروك ومسلسل مختلف
خالد صالح : الحمد الله رب العالمين كل سنة وحضرتك طيبه
لميس الحديدى: وانت طيب كل سنة وانتم طيبيين عدنا اليكم من استديوهاتنا فى ماسبيرو كل يوم اتنين استنونا حلقات ساخنة استنونا فى اتكلم هنتكلم بصراحة كالعاده وعلى الهوا وهذه لميس الحديدى تحييكم وتصبحوا على خير