وجهة نظر

عبد اللطيف المناوي: السيدات والسادة مساء الخير نواصل اليوم الغوص في اعماق المجتمع المصري ونتحدث عن قطاع اخر من ابناء الوطن العمال الذين يروون بعرقهم تروس المصانع وبجهدهم وبكدهم الالات ويسهرون من اجل صناعة مصرية من اجل الامل في ان تغزو العالم بشعار صنع في مصر في حلقة اليوم نناقش اوجاع العمالة المصرية بلسان ابطالها ونطرحها امام الراي العام والمسئولين في ظل ازمة عالمية تهدد العالم بشبح التسريح والبطالة .
السيدات والسادة لم يعد يمراسبوع دون ان نسمع عن اضراب عمالي هنا واعتصام هناك حتى وصلت احدى الاحصائيات إلى اكثر من 10 الاف اعتصام و1250 اضراب واصبحنا بدلا من ان نجد العمال خلف آلاتهم نجدهم امام المصانع يرفعون لافتات الاحتجاجات والتظلم لكنهم يوما لم يخربوا آله او يعطلوا أداة انتاج ومابين احتجاج او مظاهرة تتوالى هموم العمال وتُطرح الاسئلة هل اصبحت الاعتصامات هي الوسيلة الوحيدة التي يستعيد بها عمال مصر حقوقهم واين دور النقابات المهنية والعمالية وهل تصبح النقابات البديلة هي الحل؟ كيف يمكن تحقيق نظام عادل للاجور والحوافز والمعاشات ؟وهل نظام المعاش المبكر يتم بطريقة عادلة ام انه انتحار اجباري لمن يختاره؟ كيف انعكس نظام الخصخصة على العمالة ؟وكيف يمكن ان نرفع انتاجية العامل المصري ومستواه؟ وقبل كل هذا كيف نستطيع حل مشكلة هذا العامل ؟
السيدات والسادة معنا اليوم عاملان مصريان من قطاعين مختلفين لكل قطاع مشاكله وهمومه أ محمد ابراهيم الوكيل نائب رئيس اللجنة النقابية للصناعات الهندسية بالاسكندرية ، وأ صلاح عبد الجواد نائب رئيس النقابة العامة للغزل والنسيج لم نتحدث فقط عن هموم عمال قطاعي الغزل والنسيج والحديد ولكن عن هموم كل عمال مصر اهلا بكما ارحب بيكم في البرنامج .. دعنا فقط نذّكر في البداية ان الاشارة الاساسية في هذا الموضوع الى ان العامل المصري مهما وصلت درجة احتجاجه ومهما وصلت درجة اختلافه مع ادارته الا انه لم يتعرض يوما لآلته كان دائما مدافعا عنها مهما كانت المشكلات التي يتعرض لها احب اسمع من أستاذ صلاح عبد الجواد ي البداية اذا ما اردنا ان نضع مجموعة من العناوين الرئيسية لمشكلات العمال في مصر كيف يمكن ان نضعها بالاضافة الى الاجور والتامينات ؟
أ/ صلاح عبد الجواد - نائب رئيس النقابة العامة للغزل والنسيج: بسم الله الرحمن الرحيم فيما يتعلق بالتامينات والاجور وخاصة في القطاع الخاص لان القطاع العام تقريبا يكاد يكون انتهى .. ودي قضية كبيرة .. القطاع العام تقلص باهمال متعمد من حكومات متعاقبة يعني مش حكومة واحدة كل اللي بيجي بيكمل على اللي قبليه لو خدنا مثال من الشركات العملاقة اللي اسسها طلعت حرب بنك مصر ، كفر الدوار، المحلة ، حلوان .. كفر الدوار قلعة معروفة للعالم كله كانت 25 الف عامل النهاردة 8 والشركة متعثرة ، حلوان كانت 22 الف النهاردة 3 واقسام مقفولة وانتهت نتيجة تقادم الالات اللي الحكومة نفضت ايديها منها بعد حرب 73 انفتح باب الاستثمار لراس المال الوطني والاجنبي أُعطي مزايا لم تعط للقطاع العام المعدات اللي كانت شغالة وكانت بعد الحرب المفروض يتعمل لها احلال وتجديد .. لا .. الحكومة تركتها
عبد اللطيف المناوي: يعني خليني اقول دلوقت ان المشكلة الاولى - من المشكلات الخاصة بالعمالة في صُلب موضوع الملكية والمصانع والصناعة – إن الدولة لم تجدد الآلات الرئيسية بالنسبة للمصانع الكبيرة اللي موجودة النقطة التانية انها اعطت فرص للقطاع الخاص ولم تعط نفس الفرص للقطاع العام مش قادر افهم دي ازاي تحصل ؟
أ/ صلاح عبد الجواد: يعني مثلا انا بشجع الاستثمار ماشي بديله مزايا اعفاءات جمركية على وارداته من معدات لمستلزمات انتاج لخامات من الواردات الخارجية باعفيه من الضرايب دي كلها اعباء مش محطوطة على تكلفة المنتج في البداية القطاع العام مُحمل بكل هذه الاعباء لما ينتجوا الاتنين سلعة واحدة تروح السوق فيه تكلفة عالية تكلفة اقل هنا ادي البداية المنافسة هنا غير متكافئة دي نمرة واحد..نمرة اتنين نتيجة تقادم الالات اصبحت الآلة القديمة في حلبة منافسة مع آلة حديثة متطورة تكنولوجيا بتدي كم انتاج وجودة وبتكلفة اقل
عبد اللطيف المناوي: تكدس العمالة بعدد كبير من العمال اكبر من الاحتياج ناتج من التزام الدولة إنها توظف الجميع
أ/ صلاح عبد الجواد: نتج عن هذا ايه تقلص، تعثر ، مفيش إنتاج فيه توقف اذن مفيش عمال النهاردة لما نقول شركة كان فيها 20 الف بقى فيها الف أو ألفين دا دي الامثلة لكن كل الشركات كده طب العمالة دي راحت فين طلعت معاش مبكر .. انضمت للبطالة
عبد اللطيف المناوي: خليني اسمع أ محمد ابراهيم الوكيل توصيفه الاول للمشكلة وبعدين ندخل في تفصيلات تانية .
أ/ محمد إبراهيم الوكيل - نائب رئيس اللجنة النقابية للصناعات الهندسية بالاسكندرية: بسم الله الرحمن الرحيم هو الصناعات الهندسية عموما صناعة تقيله في البلد يعني عماد من اعمدة البلد ودي من قاطرة التنمية في أي مجتمع يعني اذا ما كنت عايز تنمية في أي بلد فلازم تنظر في المقام الاول الى الصناعات الهندسية والمعدنية والكهربية على سبيل المثال مصنع حلوان اللي أنشئ سنة 58 نجع حمادى الالمونيوم السبايك كل المصانع التقيلة في البلد دي كانت عمالة كثيفة النهاردة حلوان كانت 23 الف عامل النهاردة اصبحت 15 الف او اقل
عبد اللطيف المناوي: هو الاحتياج ل 23 أو الاحتياج ل 15 هي المسالة مش بالعدد بس انما المسالة بمدى الاحتياج .
أ/ محمد إبراهيم الوكيل: لازم يبقى فيه موائمة ما بين الإنتاجية وما بين الاحتياج يعني لازم يكون فيه adaptation للعملية نفسها بحيث ان انت بتحسب تكلفة المنتج على اساس العمالة قد كده ساعات التشغيل زي ما انا بسمي ال 7 M,s زي ما بيقولوا إل manual , material و .. و .. إلى أخره فالنهاردة المشكلة اللي حصلت إن هذه الصناعة ان عمال مصر اللي كانت في يوم من الايام ومازالت وستظل ان شاء الله كانت عضد البلد من قبل الثورة ثم في حرب 67 وفي حرب73 دي كلها عمال مصر بتمد الجيش وبتمد البلد كانت حصن امان للبلد كون إن انا انقل من النظام الاشتراكي او النظام اللي كان معمول الى نظام الخصخصة مرة واحدة دا بيعمل فجوة كبيرة وبالتالي بيعمل هزة للبلد لان البلد مكانتش مجهزة العمال مكانوش مجهزين وبالتالي كان ممكن يعمل حلول اخرى
عبد اللطيف المناوي: استاذ محمد خلينا نعدي مرحلة انه كان ممكن نعمل حلول اخرى انا هنا في مرحلة حاجتين واحد الوضع النهاردة بيقول انه كان فيه قطاع عام موجود مازال موجود بيمارس دوره في محاولة لتطويره وهناك قطاع خاص موجود السؤال هو كيف يمكن ان اطور كلا الجناحين بحيث انه يؤدي الى نتيجتين اساسيتين؟ واحد تطوير الصناعة المصرية اتنين الارتقاء بمستوى العامل مهنيا ومعيشيا
أ/ محمد إبراهيم الوكيل: لاشك ان هو القطاع العام النهاردة في اوروبا وفي امريكا وفي كل مكان .. الدول دي ما استغنتش عنه اطلاقا مش معنى إنها تتحول من اشتراكية الى نظام الخصخصة إن أنا انتهي forever أو ones من كل النظم اللي هي موجودة والدولة لها سلطة لأن النهاردة ده تأمين للبلد لما أجي احتاج للقطاع العام تحت سيطرتي مش حكون تحت سيطرة او تحت إمرة بعض الناس المستثمرين اللي هو ممكن يلعب بالسوق وبالتالي النهاردة لازم يكون فيه شركات آمنة أو تامين اجتماعي للبلد لازم الدولة يكون لها shareكبير فيها
عبد اللطيف المناوي: والدولة مازالت موجودة في بعض هذه المؤسسات او عدد كبير من المؤسسات اللي حضرتك ذكرت بعضها في حلوان في نجع حمادي ويظل السؤال هنا كيف يمكن تدعيم هذه المؤسسات بحيث انها تكون بالفعل عماد للصناعة المصرية ودعم للعامل المصري ؟
أ/ محمد إبراهيم الوكيل: هو تدعيم الصناعة عموما فيه حاجة بيسموها ال7M عبارة عن إل man إل method إلmaterial منها إل management فاختيار الادارة عموما هو المعول عليه لانه في أي حتة أحط لها مدير ناجح هينجح هذا الكلام معروف انه الهندسية هي قاطرة التطوير والتنمية في البلد فهي مشكلة مصر عموما هي مشكلة في الادارة وعلى أي اساس بتختار الادارة فهل هي النهاردة هل احنا بنختار اهل الثقة او اهل الخبرة او كلاهما معا هو المفروض نختار الاتنين مع بعض يعني بدليل انه كنا في يوم من الايام مصر كانت سلة الغذاء في العالم زي سيدنا يوسف ما قال "إجعلني على خزائن الأرض فإني حفيظ عليم" كان عنده صفتين حفيظ بمعنى امين وعليم بمعنى خبير يعني راجل اللي هيختار يعني ما هيختارش مرة واحدة once كده على أل top تلاقي تدريجي gradually انك انت تختاره مهمة صغيرة ثم يكبر ثم يكبر ثم تأمنه عل الوظايف الاخرى فالمشكلة النهاردة وكلنا بنتكلم على موضوع الإدارة إنه الاساس فيها ازاي تختار المدير لانه ليس كل مدير قائد ولكن كل قائد مدير انت عايز واحد يقود عايز صناعات تقود المجتمع تدفع المجتمع لقدام زي ما كنا بنعمل في السد العالي الاعمال الكبيرة دي بتعمل حمله بحيث إنها تشد البلد كلها نحو ان تتقدم وتتطور لان مصر حرام اللي بيحصل فيها لان مصر كانت في يوم من الايام هي ام الدنيا ومازالت وستظل ان شاء الله ام الدنيا ولذلك اختيار قيادات واعية قيادات تؤمن بمبادئها قيادات تؤمن بقضيتها او عندها الهدف الاساسي جواها
عبد اللطيف المناوي: هنا خليني اقول عشان نحط ايدينا على اللي احنا اتكلمنا فيه هنا إحنا بنتكلم عن تحديث الالات وبنتكلم عن الادارة ودول المشكلتين الرئيسيتين في مسألة الصناعة المصرية في المصانع المملوكة للدولة اذا ما اتكلمنا في مسالة الادارة واسلوب اختيار القيادات هنا بينقلني لنقطة تانية مهمة مرتبطة باختيار القيادات العمالية الى أي مدى يمكن للاتحادات العمالية النقابات العمالية الموجودة النهاردة في الساحة هي معبرة بالفعل عن العامل بتدافع عن مصالحه بتحاول إنها تتطور به؟
أ/ صلاح عبد الجواد: تسمح لي هنا اقبل ما اجاوب على السؤال دا وإحنا بنتكلم عن التطوير عشان ننهض بالصناعة نعمل ايه عشان ننهض بهذه الصناعة دا سؤال .. احنا اتكلمنا قلنا القطاع العام ..لا دا احنا وصلنا الى ان الصناعة بقطاعيها العام والخاص في خطر النهاردة القطاع الخاص لما كنا بنتكلم بندافع عن القطاع العام كان بيقولوا أصل أنتوا بتوع الحرس القديم النهاردة بقى مابقاش القديم دا القديم والجديد يعني النهاردة بتكلم عن النسيج بحكم مهنتي النهاردة فيه مصانع كتيرة جدا أُغلقت ومصانع فيها توقف جزئي فيها اجزاء كبيرة تلت ارباع الطاقة نص الطاقة دا ناتج عن ايه عن سياسات برضه بتنتهجها الدولة زي فتح باب الاستيراد على مصراعيه ، الاعفاءات الجمركية للواردات الاجنبية من الاقمشة والملابس والغزل وصلت الى حد ان احنا نخفض الجمارك التعريفة الجمركية اكتر من الالتزام الدولي اللي بتلزمنا بيه اتفاقية الجات على سبيل المثال الملابس اللي انا المفروض ما احطش ضريبة او جمرك اكتر من 40% احنا نزلنا الى 30%
عبد اللطيف المناوي: استاذ صلاح انتوا عاوزين ايه ؟ ... هل انت عايز حماية لصناعة النسيج انا بكلمك كمستهلك دلوقت حضرتك عايز تحط صناعة للنسيج عشان توصل بيها اذا وصلت المسالة الى سمعة الصناعة المصرية في مناطق مختلفة اصبحت صناعة غير جيدة مش هسميها صناعة سيئة فالنهاردة لما نخقض الجمارك بندخل صناعة رخيصة لمستهلك وبتحط الصناعة دي في منافسة هل انت طالب حماية لصناعة النسيج المصرية بحيث ان هي تفرض الاسعار اللي بتعتقد انها ممكن تكون ربحية بالنسبة ليها عشان تقدر تحق النسبة اللي بترى ان هي طبيعية ؟
أ/ صلاح عبد الجواد: هقول لحضرتك دي حاجة الحاجة التانية ان الخامة انا بشتغل بالقطن .. الخامة الرئيسية هي القطن انا بشتري القطن من برة بينما انا اصلا منتج قطن القطن المصري الدهب الابيض الاستراتيجي اللي بنضرب بيه المثل النهاردة القطن المصري مصر كانت بتزرع 2 مليون فدان قطن كانت بتنتج اكتر من 10 مليون قنطار قطن بتصدر نصه والباقي للمصانع المصرية النهاردة مصر بتزرع 300 الف فدان قطن النهاردة موجود في مصر لا قادرين يبوعوه برة ولا قادرين يبيعوه للمصانع المصرية
عبد اللطيف المناوي: طيب مصانع النسيج المصرية بتشتغل على ايه دلوقت ؟
أ/ صلاح عبد الجواد: لان انا ما بدعمش الفلاح زي ماغيري بيدعم الفلاح الهند بتدعم الفلاح امريكا بتدعم الفلاح سوريا بتدعم الفلاح فالقطن لما نقول حماية مش عيب
عبد اللطيف المناوي: حماية على حساب مين حماية على حساب المستهلك يعني انت عايزني اوفرلك الادوات المناسبة عشان تنافس؟
أ/ صلاح عبد الجواد: القطن بتاعي لما يتقال برة ان القطن المصري برة وجوه دي كفاية عليك بيضربولها تعظيم سلام انا مقدرش اشتغل في مصر
عبد اللطيف المناوي: شوف انا عايز اقول حاجة فيما يتعلق بقطاع الغزل معانا مجموعة ارقام وفقا للبيانات الصادرة عن مركز المعلومات التابع لوزارة الاستثمار قطاع الغزل والنسيج فيه 26 شركة خسرانة من اجمالي 38 شركة خسائر الشركات دي واصلة ل2.3 مليار جنيه 2300 مليون جنيه السنة اللي فاتت كانت 2 مليار و190 يعني زادت 110
أ/ صلاح عبد الجواد: اللي بتقوله حضرتك دلوقت بيتبع وزارة الاستثمار اللي هو قطاع الاعمال العام طب والقطاع الخاص
عبد اللطيف المناوي: انا بتكلم دلوقت عن مشاكل قطاع الغزل والنسيج اللي حضرتك بتمثل عماله .
أ/ صلاح عبد الجواد: عدة مشاكل التهريب ، الجمارك ، المناطق الحرة، الترانزيت تجارة الترانزيت ان انا اجيب بضاعة رايحة ليبيا واقوم بدل ما تروح بالبحر تنزل عندي مصر ليه عشان تروح ليبيا عن طريق البر تفضي هنا الحاويات وتعبيها أي حاجة تانية دي بقى نزلت السوق نزلت بدون جمارك بدون ضرايب تهريب وعلى فكرة وزير الصناعة والتجارة من فترة مش بعيدة من شهور قال احنا مش قادرين نتغلب على التهريب
عبد اللطيف المناوي: دي مسالة تؤثر بشكل مباشر؟
أ/ صلاح عبد الجواد: دا دور الدولة تحميها من التهريب تحميها من المناطق الحرة احنا عندنا مصانع ملابس بيضربوا بيها المثل مصانع ملابس ماتشتغلش انتاج وطني بتجيب القماش من برة يعني مثلا اقول ايه لو حضرتك هتفصل قميص هتدي للترزي 3 متر تخيل بقى لا عشان حضرتك توديله لازم تجيب 6 عشان يقصقص 3 ويعمل لك بالباقي قميص ، بياخدوا إعفاء على نسبة هادر بعض اصحاب لنفوذ في مصانع الملابس تصل الى 50% هل يعقل ان حضرتك تعمل قميص تجيب 6 متر عشان يعمل لك منهم قميص ويبقى فيه هدر نص إل 6 متر
عبد اللطيف المناوي: دا في القطاع الخاص ؟
أ/ صلاح عبد الجواد: نسبة الهادر دا في المهنة لا تتجاوز10 ال30% او ال40% بيروحوا فين بيروحوا السوق المحلي بيضرب الانتاج الوطني في نفس الوقت الدولة بتديله دعم على الصادرات هذه الصادرات القماش انا جايبه من برة اديله دعم على القيمة المضافة لا انا اشجع بقى الصناعة بتاعتك خد اعمل قماش مصري صنعه صدره اديك عليه دعم ال15%
عبد اللطيف المناوي: دا كله بنتكلم على مصانع القطاع الخاص .؟
أ/ صلاح عبد الجواد: ماهو دا بيضرب زمايله في القطاع الخاص والعام دي من ضمن الاسباب دا غير التهريب .. تجارة أل drawback تجيب قماش على اساس انه حيصنعه ويرجع فميرجعش
عبد اللطيف المناوي: كل دي الحقيقة اجراءات مبتكرة في التهريب يعني خلينا نقول المطلوب البحث عن اجراءات حمائية تلتزم بالتالي حماية الصناعة من التهريب ، الممارسات غير القانونية من اللي بتدخل الصناعة في منافسة غير شريفة خلق اجواء منافسة طبيعية لكل الاطراف متساوية .
أ/ صلاح عبد الجواد: ما بقولكش افرض رسوم إغراق .. لا .. بقولك دعم الفلاح يعني عندك مثلا تركيا عاملة ايه عاملة حاجة في الجمرك اسمها تسعيرة حُكمية يعني ايه فيه عندي القماش دا الصنف دا مكوناته ايه التكلفة بتاعته تبقى كذا ما يجيش بقى واحد جايبلي فاتورة مضروبة يبقى هو شاري ب100 مليون جنيه ويجيب لي فاتورة ب10 مليون جنيه
عبد اللطيف المناوي: استاذ محمد الاجراءات دي انت تقديرك لها ايه هل دي مسالة ترتقي بمستوى الصناعة ترتقي بالمستوى العام بالتالي بالتبعية ؟
أ/ محمد إبراهيم الوكيل: انا ليا وجهة نظر تكاد تكون مختلفة شوية العامل المصري في كل العصور كان قادر على انه ينافس في أي دولة في أي مكان في العالم ودي تاريخيا موجودة .. موجود القطن وموجود الحديد والصلب هي الفكرة فيه بعض الإجراءات بتعامل عن طريق الحكومة بترفع التكلفة وبالتالي بتخلي انا في المنافسة في السوق العالمي وضعي اقل على سبيل المثال من المعروف ان الصناعات الهندسية عموما مكلفة في الطاقة بتستخدم طاقة كثيفة فطلع قرار من السيد رئيس الوزرا 2008 وسيادتك عارف ان في 2008 كانت الاسعار عمالة تطلع على مستوى العالم طيب احنا طلعنا في أسعار الطاقة من 13 قرش للكيلو وات لمصنع زي الالمونيوم او حلوان ل22 مرة واحدة دي طبعا تكلفة عالية مكانتش في الحسبان طب النهاردة أسعار إل row material نزلت أسعار على سبيل المثال الحديد والألمونيوم على مستوى العالم نزل يبقى بالتالي لازم الحكومة تستجيب وتنزل باسعار الطاقة اللي هي عنصر اساسي في تكلفة المنتج
عبد اللطيف المناوي: خلينا نعدي مسألة الطاقة دي لان فيه اصلا خلل من البداية موضوع الطاقة للصناعات كثيفة الاستخدام الطاقة مدعومة بشكل كبيراسعارغيرطبيعية وغير منطقية
أ/ محمد إبراهيم الوكيل: عنصر مؤثر
عبد اللطيف المناوي: هو عنصر مؤثر لكن فيه خطأ تاريخ الحقيقة بتثبيت سعر الطاقة على مدار عشرات السنين بحيث ما أظنش الصناعات الثقيلة او الصناعات الميكانيكية اللي حضرتك بتتكلم عنها في أي مكان في العالم بتاخد طاقة ب13 قرش
أ/ محمد إبراهيم الوكيل: بس هي الفكرة سعادتك ان نطلع gradually مش التثبيت
عبد اللطيف المناوي: طييب خلينا نعدي مشكلة الطاقة
أ/ محمد إبراهيم الوكيل: دي نقطة ,النقطة التانية انما لما اسمح باي استيراد غير منظم معناه ان انا بفتح مصانع هناك وبقفل مصانع هنا يعني على سبيل المثال في الصناعة بتاعتنا يعني النهاردة المنتج الصيني داخل البلد بكل الوانه لدرجة إن الصينيين نفسهم كناس بشر هل احنا عندنا المكان إن نستوعب ناس تيجي من الصين توصل للحلاقين في البيوت والبيع للبيوت الى اخره كل دا بياخد مساحة من المنتج المصري كون ان انا اسمح بدخول العمالة الصينية او أي عمالة تانية على بلد قيمتها او العمالة بتاعتها 80 مليون النهاردة هذا الكلام لازم يدرس على ان وزارة القوى العاملة أو الجهات المعنية بان هذا الكلام لازم يتحط له ضوابط فحتة انا بفتح الاستيراد على سبيل المثال الشهور اللي فاتت دي 2.5 مليون طن حديد داخلين البلد طب لصالح مين طب بقالنا حوالي 10 سنين مفيش حد رغم انه مفيش جمارك مفيش حاجة ....
عبد اللطيف المناوي: احنا دلوقت مش في موضوع الحديد
أ/ محمد إبراهيم الوكيل: احنا بنتكلم عن الصناعات الهندسية
عبد اللطيف المناوي: احنا بنتكلم عن الاسعارالتى وصلت لمرحلة مستوى غير مقبول من الاسعار وبالتالي بتحاول إنك تخلق حالة من حالات المنافسة دخّل منتج ارخص عشان تتحكم في الاسعار
أ/ محمد إبراهيم الوكيل: هو عندنا الاسعار عموما نزلت هو عموما مش كانت الاسعار هناك غالية وعندنا رخيصة كانت الأسعار 2008 معروفة انها نزلت لكن اللي عايز أوصلة النهاردة الحمد لله فيه بشرى انه القطاع الخاص بدأ يثبت وجوده وبدأ العامل المصري ينتج وبدأ ينافس وبدأ يصدر اذن العملية كلها عملية انك تتيح فرصة لادارة قوية لادارة واعية لادارة فاهمة تقدر تدرس الموضوعات بحيث ان هي تقدر تنافس وتشوف الميزة النسبية عندها في إيه تقدر تاخدها وتقلل التكلفة في الحتة دي
عبد اللطيف المناوي: يعني أنت ترى حدود تدّخل الدولة قد ايه في مسألة الصناعة بشكل عام ؟
أ/ محمد إبراهيم الوكيل: يعني هو التدّخل الكبير مش مطلوب لان
عبد اللطيف المناوي: أيه الحدود اللي انت شايفها اللي بتؤدي في الاخر لنتيجة ايجابية للعامل المصري سواء كان في القطاع الخاص او لقطاع العام ؟
أ/ محمد إبراهيم الوكيل: هي الحدود تعمل عملية موائمة بين الاستيراد والتصدير، استيراد المنتجات عموما المصّنعة الكاملة..لا .. دي يبقى فيها كوتة معينة زي ما بيحصل في أي دولة من العالم في اوروبا وامريكا فيه كوتة محددة وبالتالي تفرض رسوم اغراق على أي دولة بتحاول تنزل بالمنتج زي ما حصل في فترة من الفترات نتكلم عن الحديد عموما على اساس حلوان والالمونيوم والكلام دا كنقابة عامة هندسية فكان فيه فترة اوكرانيا بتنزل حديد بطريقة غير طبيعية وبالتالي لازم الدولة تتدخل يعني هل حضرتك في اوربا بيسيبونا ندّخل أي حاجة ..لا ..بيفرضوا علينا رسوم اغراق يعني في لحظة ما انت عديت الحدود وبالتالي STOP هنا
عبد اللطيف المناوي: يعني يبقى فيه حدود معينه اللي أنت سميتها تنظيم الاستيراد غير المنظم
أ/ محمد إبراهيم الوكيل: بالظبط..
عبد اللطيف المناوي: استاذ صلاح ايه الحدود اللي بتعتقدها لتدّخل الدولة عشان ضبط العملية في الصناعة فيما تصب في النهاية لصالح العمال؟
أ/ صلاح عبد الجواد: احنا مش عايزين اكتر من حماية في حدود فيه اتفاقية التجارة العالمية بتحط علينا شروط زينا- زي غيرنا احنا بننزل عنها وكأننا اقوى من دول اخرى في المنافسة عشان كده بننزل نلتزم بالنسب المحددة او المفروض عليك دوليا نمرة واحد..نمرة اتنين شوف الدول الاخرى ادت دعم للفلاح بحيث انه يطلع قطن ..القطن دا مش مجرد خامة نسيج دا القطن بيطلع منه البذرة ، الزيت ، العلف يعني اكثر من مشتق صناعي شوف من الفلاح لغاية لما يبقى كل المراحل الصناعية دي بتشغل قد ايه النهاردة انا بستورد زيت معنديش بذرة اعصرها اطلع منها زيت النهاردة العمال اللي بتشتغل في المحالج ، المحالج واقفة .. يبقى زي ما قلت لحضرتك دعم الفلاح بحيث يقدر يطلع قطن ما القطن اللي بيجيلي من برة بيجي رخيص ليه لأن البلاد بتاعة بتدعم الفلاح يعني عايزين نقول ان مجموعة السياسات دي بتؤدي الى خلق مشاكل يعاني منها دلوقت صاحب العمل في كثير من اصحاب العمل ويعاني بالتالي منها اللي بيتأثر بيها العمال .. صاحب العمل يوقف نص المصنع يساوي ان نص العمالة تطلع برة تنضم لطابور البطالة وهكذا بتدي بطالة بتدي مبرر بقى النهاردة مثلا فيها العلاوة ال10% احنا في مفاوضات شاقة في شركات الغزل والنسيج توصلتنا الى اتفاقيات مع 50 شركة من شركات القطاع الخاص ودا يعتبر رقم قياسي ونساهم في مفاوضات مستمرة يعني نقعد نتفاوض سنة لغاية ما ييجوا ال10% وبعد كده هو بيشتكيلك حت اللي مش متعثر معروف ان فيه مشاكل في الصنعة اللي قادر اللي عنده تعاقدات وشغال ليل ونهار ومعدل التشغيل كاملا بيعلل انه مشاكل الصناعة انتوا عارفين الصناعة مضروبة ومعلومة ويقعد بقى يبكيلك حاله عايز يبكيك معاه
عبد اللطيف المناوي: خليني انا كنت متوقع ان احنا بمجرد ما نبدا الحوار والحديث حول موضوع العمال ان احنا نتكلم عن المشكلات الخاصة بالتأمينات والأجور وانا وجدت في الحقيقة ان ما أراه الان امامي هو الرؤية الاكثر مفاجاة حتى بالنسبة لي الرؤية الاكثر شمولية رؤية للمصلحة العامة اللي منها بتنعكس على المصلحة الخاصة ودي مسالة في الواقع انما بحترمها جدا وبقدرها يعني انا النهاردة ان ما اجد الان هو شكل من الاشكال اللي بتدل على الوعي لدى عمال مصر ..هنقف عند قضايا العمال بشكل تفصيلي ولكن بعد هذا الفاصل القصير
فاصل
عبد اللطيف المناوي: السيدات والسادة اهلا بكم من جديد الحوار مازال ممتد حول عمال مصر في الفاصل الحقيقة أ محمد ابراهيم الوكيل كان اشار الى إشارة مهمة أود التاكيد عليها نحن عندما نريد التحدث عن العمال في الحلقة فاننا نتحدث عن ان عمال مصر كل عمال مصر لا نتحدث عن قطاع خاص او قطاع عام او ايا ما كانت المسميات ولكن نتحدث عن العامل المصري ايا ما كان موقعه العامل المصري بمفهومه الاشمل والاعم استاذ صلاح كان لك تعقيب..؟
أ/ صلاح عبد الجواد: يعني التاكيد على رؤية حضرتك وتعليقك على الطرح بتاعنا احنا نقابة الغزل والنسيج في 22 /5 سنة 2007 عقدنا مؤتمر بالاشتراك مع اصحاب الاعمال حضره 250 صاحب عمل قطاع خاص لنناقش سويا مشاكل صناعة الغزل والنسيج ولنخرج برؤية مشتركة صعّدناها لكافة المسئولين في الدولة في الصحف وفي التليفزيون ورفعنا توصيات بعتناها لجنة الصناعة في مجلس الشعب بعتناها لكل الدنيا حتى الرئيس
عبد اللطيف المناوي: ودا مرة تانية بنلمسه برؤية اشمل
أ/ صلاح عبد الجواد: انا عايز صاحب عمل مالوش حجة عشان اخد حقوقي منه
عبد اللطيف المناوي: هنا خليني فيما يتعلق بمسألة الحقوق والكلمة دي عشان ننطلق منها الى جزء اخر او موضوع اخر من الواضح وفقا حتى للأرقام اللي اتكلمنا 10 الاف اعتصام 1250 اضراب وعلى الرغم من ان هذه الاعتصامات والاضرابات بعضها شكله ضخم ولكن الاحتجاجات هناك احتجاجات كبيرة واحتجاجات صغيرة لكن هذا هو الاحصاء الموجود والمطروح لدى وزارة القوى العاملة بشكل او باخر السؤال هو ليه زادت هذه الوتيرة هل بتعتقد ان هو دا الشكل الاصح في التعبير عن المطالب هل دا دلالة على ضعف التشكيلات النقابية اللي موجودة
أ/ محمد إبراهيم الوكيل: بداية عمال مصر جزء من العالم كله موضوع التحول من النظام الاشتراكي الى النظام الراسمالي فيه برضه بعض الثغرات الكتيرة اللي اثرت على بيوت الناس على ارزاق الناس فالفترة اللي احنا بنعيشها دلوقت فيه فترة مساحة من الديمقراطية فمكانش في المجتمعات المنغلقة انها تسمح بالنظام دا انه يحصل تعبير عن الراي بصورة أو بأخرى لكن اللي احنا بنؤكده ان كل القاعدة العريضة هي برضه بتحافظ على الانتاج ما بتحاولش تخرب أي حاجة الا بعض الشواذ البسيطة اللي هي لا تذكر في مجتمع فيه 80 مليون فهذه التحركات من القاعدة العمالية نتيجة للتأثير الاقتصادي يعني حضرتك تتساءل ان الواحد بيفقد وظيفة وابنه ما بيشتغلش والبيت كله فيه تلاتة اربعة ما بيشتغلوش طب الوضع الطبيعي هيعبر..هيعبر بطريقة او باخرى طبعا دي نتيجة الاعتصامات الكتيرة وليس هم ضد البلد بالعكس ما بيخربوش فبرضه النقابات متاثرة برضه النقابات مع اصحاب الاعمال او مع الدولة بتحاول مع وزارة القوى العاملة لكن فيه فترة من الفترات بيبقى فيه نوع من عدم التوازن على اساس الانتقال من مرحلة الى مرحلة اخرى لكن بعتقد مع التطوير
عبد اللطيف المناوي: هل تعتقد ان نقابات العمال هي تعبير بالفعل عن العمال الموجودين ؟
أ/ محمد إبراهيم الوكيل: والله النقابات بتحاول تجاهد يعني بتحاول تبذل اقصى مجهود
عبد اللطيف المناوي: لا انا ما بسئلش اذا كانت بتبذل مجهود ولاّ لا هل هي بتعبر بالفعل عن العمال ام تعبير غير حقي عن العمال ؟
أ/ محمد إبراهيم الوكيل: لا تعبير حقيقي بدليل لما بتخش مفاوضات يعني احنا كنقابة عامة هندسية بنخش مفاوضات مع وزارة القوى العاملة كتيرة وننجح كتير ان احنا نعمل عقود مع الشركات وبنحط نظم ولوايح على اساس تطلع تضمن الحد الاقصى انها تاخد حقوقها بنحاول دايما مع وزارة القوى العاملة عن طريق المؤسسات المعنية في البلد النقابات بتتحرك النقابات مش نايمه لكن الموضوع أكبر الموضوع مش عملية أو أتنين أنت بتغير بلد بتغير system البلد كله وبالتالي فهنا فيه قطاع بينزل وهنا قطاع بينزل ففيه حِِراك نتيجة الظروف الاقتصادية اللي الناس بتمر بها لكن النقابات بتحاول
عبد اللطيف المناوي: أستاذ صلاح عايز أسمع تقييمك لهذا الموضوع وخصوصا إن قطاع النسيج صاحب رقم لابأس به من الإضرابات والاعتصامات ؟
أ/ صلاح عبد الجواد: هو صناعة النسيج بطبيعتها تختلف عن جميع الصناعات .. صناعة حساسة بتشتغل بفتله فهي مليئة بالمشاكل تتأثر بدئا من الخامة لو إن الخامة جيدة العامل بيطلع إنتاج جيد وخاصة إنه بيشتغل بالإنتاج يعني أنا سمعت مره في حلقة أحد رجال الأعمال بيقول إن العامل المصري إن مكنش فيه رقابه وحد واقف فوق دماغه ما بيشتغلش.. هذا الكلام مش مظبوط لأن العامل المصري أجرة مرتبط بالإنتاج إذا أنا ما أنتجتش مش حقبض لأن أنا صاحب مصلحة مش محتاج حد يراقبني علشان أقبض وكلما استطعت أعمل مزيدا من الإنتاج علشان أعمل مزيدا من الدخل وبالتالي مش عايز حد يراقبني عشان أنا عايز مصلحتي ، النقابات أولا مهياش سُلطة تنفيذية
عبد اللطيف المناوي: لكنها سُلطة تعبير عن رأي العمال وقوة تفاوضية ضاغطة مع الإدارة أي ما كانت الإدارة سواء كانت دولة أو غيره بمعنى مع المالك أي ما كان
أ/ صلاح عبد الجواد: في الأخر إذا ما تعذر عليّ أي كان اللي بينادي يقول مثلا إيه بنسمع تعبيرات كده تنظيم نقابي حكومي أنا واحد من الناس في حلوان أنا وزملائي بننتخب رغم أنف الحكومة يعني لو الحكومة مش عايزانا ومع ذلك مع العمال هو اللي بينجح في شركة مصر حلوان واخد بال حضرتك دي حاجة المشاكل اللي بتشتغل مع القطاع الخاص ..القطاع الخاص له ألاعيبه الكتير لما أجي اقوله علاوة ييجي هو يقول طب انا متعثر وخسران القانون يقوله قدم شكوى للمجلس القومي للاجور قول اسباب تعثرك وارفق بيها 3 ميزانيات ل 3 سنوات سابقة الكثير منهم ولا شك سُنة ربنا في خلقه البشر مش كلهم واحد فينا من دا ومن دا وايضا رجال الاعمال فيهم البعض ضميره حي عايز استقرار عايز يحافظ على عماله له نظرة راقية الحفاظ على العامل الحفاظ على الاستقرار يديله عائد افضل فيه فكر غير كده فكر انه عاوز ياخد كل حاجة وببلاش وما يديش التامين على العمال وعامل اجره 1000 جنيه على النول بيشتغل أقمشة راقية الحاجات الراقية ذات القيمة العالية فالعامل بتاعه اجره عالي يبقى اجره مثلا 1000 جنيه في الشهر يعمّله على 100 جنيه على اجره الاساسي على الاقل 90% من القطاع الخاص كده دي مشكلة من المنوط بيه هنا له صفة الضبطية القضائية موظف الحكومة القوى العاملة التامينات القانون بيديله صفة الضبطية القضائية يخش يفتش ويطلع على السجلات يشوف الحقيقة ويناقش العمال والكلام دا .. دا مش بيحصل بشكل كويس
عبد اللطيف المناوي: يعني خليني اقول الجانب الخاص فيما يتعلق بالرقابة على التامينات دا مش موجود بشكل جيد ؟
أ/ صلاح عبد الجواد: دا مش عندي انا ماليش هذه السلطة انما لما تجيني مشكلة تخص عمال مصنع اقوم بدوري اروح لصاحب المصنع اتفاوض معاه قد نتفق وقد نختلف
عبد اللطيف المناوي: طب لما يحصل اضراب او اعتصام انت موقفك ايه بتقف مع الاعتصام اوالاضراب ولا بتحاول انك تحل المشكلة ولاّ امتى بتقف معاه امتى بتمنعه امتى بتتفاوض معاه ؟
أ/ صلاح عبد الجواد: معظم اللي اشتروا شركات الدولة اللي متباعة ببلاش واقصد ببلاش يعني اقل من القيمة
عبد اللطيف المناوي: هي نقطة جدلية مش وقتها دلوقت هناك اطراف مختلفة عندها وجهة نظر وهناك البعض لديه وجهة نظر مغايرة ؟
أ/ صلاح عبد الجواد: من وجهة نظرنا العمالية أنا عارف مصنعي اللي بيشتري عينه مش جاي يشتغل عينه على الارض احنا عندنا العقد اللي تدخلنا فيه نقابة الغزل والنسيج بتاع شركة شبين للغزل فيه نصوص محددة بتحفظ حقوق العمال في 1 ، 2 ، 3
عبد اللطيف المناوي: دا اخر عقد اتعمل يعني ؟
أ/ صلاح عبد الجواد: دا اخر عقد لا يوجد في عقود البيع شرط يلزم الحفاظ بالعمالة حقوق العمال كلمة عامة مبهمة اخر حالة دلوقت مثال للخصخصة احد المستثمرين سعودي جه اشترى شركة سنة 2005 المفروض العمال بياخدوا ارباح لهم نظام حافز لهم علاوات اللي بتُقرر سنويا علاوات دورية دي حقوق قانونية مشروعة مش عايز يصرف دخلنا معاه في مفاوضات اخر مفاوضة حضرها معانا أ ستاذ سعيد الجوهري رئيس النقابة العامة مع ممثل الشركة في وزارة القوى العاملة في 6/11 سنة 2008 بياخدوا مثلا حافز على اجر 2004 احنا النهاردة في 2009 اجري في 2008 غير اجري في 2004 حاسبني على اجري فدا مطلب انك تديني على اجري بتاع اليوم دا حقي
عبد اللطيف المناوي: ايه دور النقابة وايه دور الدولة في هذا الموضوع ؟
أ/ صلاح عبد الجواد: بعد المفاوضة وأتوقع عليها مننا كنقابة ومن وزارة القوى العاملة ومن ادارة المصنع او ادارة الشركة ولم يلتزم صاحب العمل احنا القانون بيدينا الحق ان احنا نعمل اضراب سلمي اللجنة النقابية طلبت لما خلاص استنفذت كل الامور كل الطرق الشرعية ومجابتش نتيجة ابلغت باضراب سلمي دا قانون اللي بينظم العلاقة بين العمال وصاحب العمل بشرط ان احنا نخطره ونخطر الجهة الادارية اللي هي ممثلة في وزارة القوى العاملة قبل قيام الاضراب ب 10 ايام تم هذا الاخطار المفروض يجي يقولك انت هتعمل اضراب ليه وييجي يقولك نتقفاوض ونفض المشكلة ماجاش وبالتالي مكانش فيه مفر من الاضصراب
عبد اللطيف المناوي: انت في هذه الحالة كلجنة نقابية وقفت مع الاضراب.
أ/ صلاح عبد الجواد: انا كنقابة عامة طلبت مني الجنة النقابية اني اعمل اضراب إحنا مقتنعين باحقيتهم وافقنا القانون بيقول بثلثي اعضاء مجلس النقابة العامة اما وافق مجلس الادارة العامة بالاجماع الاضراب قام من 31/5 حتى اليوم حتى اللحظة مستمر
عبد اللطيف المناوي: دا راجل مش عايز الشركة تشتغل .
أ/ صلاح عبد الجواد: مش عايز هذا المستثمر اللي لا يحترم العمال ولا يحترم البلد ولا يحترم قوانين البلد مجلس الشعب ناقش المشكلة بناء على طلب احاطة مقدم من نائب من النواب عضو مجلس شعب تقدم بطلب بيان عاجل نوقش في لجنة القوى العاملة استدعته لم يحضر
عبد اللطيف المناوي: يبقى دا ينبغي اتخاذ اجراء ضده ؟
أ/ صلاح عبد الجواد: اخر حاجة الوزيرة الحاجة عيشة وأستاذ حسين مجاور رئيس الاتحاد العام كانوا في اجتماع يوم الخميس مع رئيس الوزرا ...
عبد اللطيف المناوي: طب دا نموذج ل......
أ/ صلاح عبد الجواد: دا نموذج للخصخصة
عبد اللطيف المناوي: دا نموذج لتجربة اثبتت ان المستثمر غير جاد وفشل في إدارة مصنعه استاذ محمد لك تعقيب؟
أ/ محمد إبراهيم الوكيل: حضرتك بتقول النقابات ودورها هو النقابات المفروض ما تستناش المشكلة لما تحصل وبالتالي تتحرك لازم يكون عندها مبدا المبادرة يبقى عندها forecasting تتنبأ بالاحداث على سبيل المثال الموضوع اللي اتكلمنا عليه اللي هو موضوع زيادة اسعار الطاقة النقابة العامة الهندسية بكامل طقمها طلعت 4 ايام للشركات الكبيرة اللي هي الالمونيوم ، الحديد والصلب ، السبايك الحديدية في ادفو وناقشت مع المسئولين على ارض الواقع وشافت واستمعت للعمال وشافت المشاكل اللي هي بتاثر فلازم النقابات تتحرك في مواقع العمل بحيث ان هي تقدر تشوف الحلول للمشاكل اللي موجودة طبعا دي حته الحتة التانية بتاعة النقابات دورها التفاوضي اه .. بتحكم بالقانون 35 لسنة 76 انا عندي قانون اسمه قانون النقابات والحقيقة دا قانون المفروض يفعّل ويفعّل عن طريق كل الاطراف التلاتة سواء القوى العاملة او نقابات العمال او اصحاب الاعمال لان دي بلدنا في النهاية احنا لما نتفاعل احنا التلاتة المثلث دا يعني يشتغل لصالح البلد لكن النهاردة لما طرف يطغى مصلحته على طرف اخر زي ما أ صلاح تفضل دا المفروض يتخذ اجراءات بحيث دي بلدنا ولا نسمح لاي حد انه يعبث بها لانه أي حتة بتنزل في البلد بتنزل في اقتصاد البلد ككل
عبد اللطيف المناوي: الحديث عن العبث الى أي مدى بتعتقد او ما مدى صحة استخدام الاضرابات والاعتصامات والاحتجاجات العمالية المشروعة وتسييسها؟ وكيف يمكن الحرص على او حماية الاحتجاج العمالي يظل الاحتجاج العمالي الاضراب العمالي يظل اضراب عمالي انت تقديرك كيفية المعالجة والتعامل معها اعلاميا وسياسيا ؟
أ/ محمد إبراهيم الوكيل: والله اعلاميا وسياسيا المفروض اصلا لما نستشعر انه فيه مشكلة في مكان ما لا تنتظر لما العمال تصعد الموقف يعني المفروض المسئولين في المكان دا ما تركبش دماغها المفروض ييجي ويجيب نقابة العمال ويحتمي بالقانون ويقعد يتفاوض معاه ويشوف الحد الادنى من التفاوض بحيث احنا نتفق على كلمة سواء
عبد اللطيف المناوي: احترام القانون كلمة سرية وسحرية احترام القانون من الطرفين من كل الاطراف
أ/ محمد إبراهيم الوكيل: القانون دا جاي من مجلس الشعب.. مجلس الشعب ده السلطة التشريعية والرقابية والحقيقة بالمناسبة ان أه عيشة عبد الهادي بتحاول جهدها انها تحل هذه المشكلات قبل وقوعها يعني بتحاول تحل يعني مش تمجيد لها بس بتحاول تاخد الدور دا بحيث البلد داخلة على مرحلة نهضة ومرحلة استثمار فمفيش داعي تحصل اضرابات لكن الاضراب شئ طبيعي او حق قانوني بيلمسه القانون او بيستند اليه في إذا ما المفاوضات دي انتهت
عبد اللطيف المناوي: طب إذا كانت الوزيرة عيشة عبد الهادي هي من الناس اللي بتقوم بده وعندها فكرة ال forecasting اللي بتتكلم عليها هل دا مسألة موجودة على المستويات الإدارية المختلفة الأخرى وهل هي موجودة على مستوى الاتحادات والنقابات الأخرى ولاّ هي مسألة لسّه محتاجة إعادة نظر
أ/ محمد إبراهيم الوكيل: لا دي حاجة شخصية دي هبه من الله فيه على المستويات الأخرى ناس ما بتّقدرش المسئولية وبالتالي بتطنش مشاكل العمال وبالتالي مش عارفة إن ده له مردود في المجتمع .. لأن النهاردة أنا لما أسارع وأحل مشكلة بس النهاردة أخوننا العمال مش معنى إن أنا النهاردة إن أنا عندي مطلب وإن أنا دخلت وحأحل إن أنا حأحل في اللحظة دي لازم أدي فترة معينه للتفاوض وبعدين لازم أقسم المشاكل بال statics بمعني فيه عندي مشكلة نمرة واحد ونمرة أتنين ونمرة تلاتة ونمرة أربعة لما أخش في المنشأت الصغيرة فيه ساعات للعمال مشاكل صغيرة بعيدة كل البعد عن المشاكل الكبيرة اللي هي بتفكرإن الوضع المستقبلي للشركة أو إن الشركة تستمر إلى حد ما فالنهاردة المشاكل الكبيرة لازم يستشعر بها المديرين لأن من مصلحة صاحب العمل إن ميكونش فيه عنده مشاكل
عبد اللطيف المناوي: وهنا بنرجع للنقطة اللي أتكلمت فيها اللي هي مشكلة الإدارة سواء على مستوى القطاع العام أو القطاع الخاص هنا برجع بالسؤال لك تاني يا أستاذ صلاح الاستخدام السياسي أو الإعلامي خليني أسميها للتحركات العمال أنت تقيّم دا أزاي وكيف يمكن الحفاظ على هذه المسألة باعتبارها مسألة عمالية عمالية بالأساس ؟
أ/ صلاح عبد الجواد: الاعتصامات والإضرابات رد فعل طبيعي لتعسف الإدارة ،العمال في لحظة يعملوا إضراب إلا بعد ما تحس إنها – آسف في التعبير – وشه في الحيط بمعنى أنا طالبت والنقابة طالبت والإتحاد طالب ورحت القوى العاملة والوزيرة تدخلت لأن دائما فيه تنسيق بين رئيس الإتحاد والوزيرة علشان يدووا قوة لبعض إلا أنه التعسف في الجانب الأخر ممكن يخلي وأنت نقابي العمال تخرج من أيدك
عبد اللطيف المناوي: لازم يكون فيه قدر من التجاوب أو التفهم وأنا بسميها لازم يكون فيه صبر من العمال على الطرف الأخر
أ/ صلاح عبد الجواد: بدليل إن فيه مصانع مستقرة مصانع الخمسين شركة اللي إحنا وصلنا معاهم لاتفاق صرف العلاوة والناس تجاوبوا وبعتنا لهم جوبات شكر من النقابة على استجابتهم ، طب اللي ما استجابش ما هو العمال اللي أنا بحاول أوصل ومقدمين طالبين مفاوضة جماعية مع العديد من هذه الشركات لو وصلنا بقى في الأخر إلى طريق مسدود لما تحس العمال إن لا أنا ولا الحكومة عملنا لهم حاجه .. الرد الطبيعي حعمل إضراب يارب يحصل ....... ، مش ضعف بقى النقابة التنظيم النقابي دوره تفاوضي في مصر وفي العالم كله دور النقابي أن يتفاوض لتسوية النزاع بشكل مُرضي
عبد اللطيف المناوي: بشكل إن هو يصل إلى حلول لحقوق العمال والحفاظ على سيرالعمل في نفس الوقت وده بيعني في النهاية بحالة من حالات الأمان بالنسبة للمجتمع ، إحنا الوقت عندنا ضيق جدا مره تانيه الموضوع كبير الموضوع مش صغير ولا يكفيه وقت محدد إحنا بس النهاردة بنفتح بعض النقاط اللي بندعوا لأن تكون حوارات مستمرة حول كل هذه القضايا .. إحنا بدئنا هذا الموضوع وبنتمنى إن إحنا نستمر فيه مع القضايا الأخرى .. لكن في الوقت المتبقي عندي قضيتين عايز أتناولهم بشكل سريع لكن مُركز في نفس الوقت ، قضية الأجور أتكلمتوا عن صندوق الأجور والحديث عن الحد الأدنى وكذا هل تعتقدوا أن هذا الموضوع قابل للتطبيق كيف يمكن تطبيقه هل هو يعمل حالة من حالات الارتياح النسبي للعمال؟
أ/ محمد إبراهيم الوكيل: لا شك النهارده لما أتحدد القانون ب 7% الحد الأدنى للأجور دا مكنش محطوط اعتباطا وبعدين بينظر فيه كل فترة دورية وبالتالي العامل الأساسي المهم لأي إنسان على قيد الحياة هو إنه يعيش في مستوى كريم والحد الأدنى من متطلبات المعيشة تلبية ، إذا كان الأجر مبيلبيش الحد الأدنى طبعا الإنسان مش وحتى مش حيبقى راضي عن عمله وحيؤدي العمل عن طريق ضغط عن طريق إن فيه ظروف اقتصادية معينة فيه بطالة وبالتالي بيقبل العمل ب 12 ساعة في بعض الشركات على 300 ، 400 جنية ده كلام لا يقره عقل ولا منطق ولا دين ولا أخلاق حتى فبندعوا رجال الأعمال إن هي تبص بصه إن دي بلدك أدتك كتير ومنحتك كتير أدي جزء صغير .. وأنا بقترح إنه إيه المانع في تكريم العمال في عيد العمال إن سيادة الريس يدي جايزة لأحسن صاحب عمل أو رجل أعمال بحيث إن إحنا نكّرمه مع العمال .. لأن النقابة ، العامل ، صاحب العمل ده المثلث اللي هو يهم مصر وبالتالي أنا بقترح في عيد العمال تكريم لأكتر واحد عين ناس لأكتر واحد بيراعي الحقوق لأكتر واحد نصير العمال
عبد اللطيف المناوي: هل المثلث ده لو بقى مربع ودخّلنا فيه ما يحاول البعض إدخاله بإنشاء نقابات موازية لتشكل قوى ضغط هل هذه المسألة تعتقد إنها حق أم إنه حق يراد به باطل ؟
أ/ محمد إبراهيم الوكيل: نشوف النقابات الموازية تاريخها وتاريخ الناس اللي قائمين عليها الآن هل هي كانت فعلا ناجحة في عملها النقابة دي طارئة انا لما دخلت الشركة عندي مش داخل نقابة أنا داخل أصلا أشتغل في شركة وبالتالي انا لازم تاريخي يؤهلني لكن اذا كنا احنا بنّمُول من جهات خارجية او بنعمل propaganda لشئ ما .. لا .. مصر اولى بيك ماتحاربش مصر لان مصر ام الدنيا
عبد اللطيف المناوي: سؤال اخير استاذ صلاح هتديني التعليق اللي عايز تعلقه وتجيبني على السؤال فكرة العامل المصري ومستواه وجودته وكفاءته هو ناقص التدريب حاجتين دول هتقولهم لي وهتجاوبني عليهم باختصار ؟
أ/ صلاح عبد الجواد: العامل المصري بيشهد له بره اصحاب الاعمال في الخارج العامل المصري ماهر لو اتيحت ليه الفرصة هو اولا عنده قدرة تحمل عنده صبر عنده مهارة بدليل ان احنا بيجيلنا ماكينات في كثير من مواقع المنشات بتيجي ماكينات من برة ويدّخل عليها تعديل من العامل المصري على التصميم بتاعهم
عبد اللطيف المناوي: لكن عدد العمالة الماهرة والمدربة مش بالدرجة الكافية بدليل هناك احتياج أنك بتجيب النهاردة عمالة من الخارج ؟
أ/ صلاح عبد الجواد: بيستوردوا عمالة من الخارج ليه يعني مثلا المناطق الصناعية فيه حاجتين انا هتكلم فيهم الأجور والنقابات الموازية حضرتك ضفت استيراد العمالة مثلا مناطق صناعية في اماكن زي برج العرب العامل بقى اللي يروح برج العرب او يروح العاشر من رمضان او يروح 6 اكتوبر اللي جاي من الفيوم واللي جاي من المنيا واللي جاي من المنوفية يسكن فين وبكم اجره مايكفيش سكنه يبقى هنا الأجر .....
عبد اللطيف المناوي: أحد العوامل اللي بتحدد جودة العامل بقت المشكلة مش جودة العامل لكن المقابل اللي بيخليه يتحرك
أ/ صلاح عبد الجواد: فبيعمل ايه بيجيب عمالة من برة يسكنها ويشغلها عنده ليل ونهاربرغم ان هو بيرجع بيكلفه اكتر طب ما تدي الاكتردا للعامل مصري عايز اقول كمان حاجة في الاجور قبل النقابات الموازية الاجور القانون 203 قانون العمل نص على انشاء مجلس قومي للاجور وكل 3 سنين يقرر المفروض عشان يقول الاجور يعمل سلة احتياجات البني ادم هذه السلة تساوي كام دا ما بيتمش ولم يجتمع المجلس القومي من 2003 حتى الان
عبد اللطيف المناوي: والحاجة عيشة قالت الكلام دا وهي معايا في البرنامج .. ايه النقابات الموازية ؟
أ/ صلاح عبد الجواد: النقابات الموازية انا عجوز انا كنت احد العمال الضحايا للمطالبة للانضمام للنقابة العامة في الخمسينيات لغاية صدور القانون 91 لسنة 59 كان فيه في كل منشاة نقابتين وتلاتة .. نقابة عمال ورش ، نقابة عمال الغزل ، نقابة عمال النسيج لما يبقى فيه مشكلة واجيلك يا صاحب العمل وزميلي يختلف معايا ونختلف يقولك روحوا اتفقوا وابقوا تعالوا وحدة العمال النهاردة شركات متعددة الجنسيات اذن فيه كيان امريكا على ايه على ايه كونوا راس مال يعملوا شركة .. العمال في مواجهة هذا الراس المال القوي المتوحش دا ... تفتيت العمال مش لصالح العمال
أ/ محمد إبراهيم الوكيل: موضوع التدريب هو موضوع خطير وشائك يعني للاسف الشديد انت لو حضرتك شفت الميزانية اللي تصرف على البحوث والتطوير والتدريب في دولة زي اسرائيل دي قد ميزانية دولة عربية اذن التدريب لا يقتصر على العمال فقط على كل المستويات بما فيها الادارة العليا يعني انا مش عايز فكرة التدريب معناها ان انا اقف عند هنا واقول ان انا وصلت للقمة بالعكس دا اليابانيين بيتدربوا في امريكا وامريكا بتتدرب في اليابان
عبد اللطيف المناوي: اذن خليني اقول عندما تحدثنا عن مشكلة الادارة لم نتحدث عن الادارة باعتبارها فقط مشكلة ادارة العمال ولكن ايضا مشكلة جودة الادارة ومستوى الادارة
السيدات والسادة عندما تحدثنا اليوم عن مشاكل عمال مصر نحن نتحدث عن كل عمال مصر وليس القطاع العام او القطاع الخاص فقط ولكن عن كل عمال مصر ، في الواقع الحوار الليلة كان حوار على مستوى يرقى لتاريخ عمال مصر وتاريخ الحركة العمالية المصرية الحديث عن الادارة عن التدريب عن الاجور عن الحماية عن الاجراءات الحمائية المختلفة للصناعة المصرية وضع ضوابط لعملية التهريب التي يُبتكر اشكال مختلفة وجديدة تؤثر في النهاية في الصناعة المصرية وضع سياسة جديدة للاجور كل هذه الامور في الواقع قضايا مطروحة نحن اليوم فقط فتحنا الحوار ليمتد مرة اخرى على مستويات مختلفة اظن ان مسالة الحوار ما بين الاطراف المختلفة هي التي يمكن ان توصّل إلى نتائج ايجابية انا بشكر أستاذ محمد ابراهيم الوكيل نائب اللجنة النقابية للصناعات الهندسية بالاسكندرية واشكر أستاذ صلاح عبد الجواد نائب رئيس النقابة العامة للغزل والنسيج السيدات والسادة شكرا لكم والى اللقاء في مرات قادمة باذن الله