حديث المدينة

مفيد فوزى: أهلا بحضراتكم أي حد قاعد مكانى في موقع المذيع أو المقدم لازم يقول مقدمة عنترية ويطلع أدام الناس وبتاع أنا مش هقول مقدمة عنترية أنا هقول إن هو واحد من صناع الأمل عشان كده هقول له هو صاحب المقدمة من أنت ؟
د.هشام زعزوع: اسمى هشام زعزوع ، كلفت بالوزارة فأنا حاليا وزير السياحة ، بعمل في هذا القطاع منذ حوالى 30 سنة ، اشتغلت فيه من أول السلم زى ما بيقولوا لغاية لما كلفت بالوزارة
مفيد فوزى: إيه المراحل ، إيه الأبعاد
د.هشام زعزوع: اشتغلت في القطاع الخاص فترة طويلة سافرت في الخارج في أول حياتى في الولايات المتحدة الأمريكية واشتغلت في شركة هناك ثم رجعت مصر في أوائل الثمانينات لافتتاح فرع لهذه الشركة اللي كانت متخصصة في منطقة الشرق الأوسط وتحديدا مصر بعد اتفاقية كامب ديفيد كان فيه يعنى هجوم سياحى إن جاز التعبير من الولايات المتحدة الأمريكية على مصر بعد يعنى الرئيس السادات الله يرحمه عمل شغل سياحة لنا بدون أن يشعر ففتحت فرع في القاهرة هنا في أوائل الثمانينات ثم استمريت لغاية التسعينات في نفس هذه الشركة ثم اشتغلت في شركة أخرى كمدير عام لمجموعة شركات كبيرة في مصر ثم انتقلت لمرحلة مديرا تنفيذيا للاتحاد المصري للغرف السياحية وهى المنظمة أو الهيئة اللي بتمثل صوت القطاع الخاص ورجال الأعمال من خلال الغرف السياحية المختلفة اللي هي بتمثل النشاط السياحى في مصر إذا كانت شركات سياحة أو فنادق أو مطاعم إلى آخره أو غوص الشركات المتخصصة ومراكز الغوص إلى آخره وكان لها علاقة وثيقة بالوزارة واتخاذ القرار طبقا للقانون اللي أنشأها ثم طلب منى إنى أنضم للحكومة في أواخر 2004 فجيت وزارة السياحة كمعاون للوزير ثم رقيت إلى مساعد أول وزير ثم أخيرا كلفت بوزارة السياحة خلال هذه المرحلة الطويلة يعنى السنين دى كلها
مفيد فوزى: كام سنة
د.هشام زعزوع: 30
مفيد فوزى: 30 سنة في السياحة
د.هشام زعزوع: آه 30 سنة المدة دى كلها الحقيقة برضه أتيح لي أبعاد دولية في العمل وأنا في الاتحاد المصري للغرف السياحية رشحت نائبا لرئيس مجلس الأعمال التابع لمنظمة السياحة العالمية اللي هي جزء أو أحد منظمات الأمم المتحدة وكنت يمكن العربى الوحيد اللي تم انتخابه مرتين لدورتين متصلتين خلال الفترة دية من 2007 لغاية 2009 متتاليتين كنائب للرئيس بالإجماع ما كانش فيه خلاف وبيتعمل انتخابات وكنت بترشح فدى الحقيقة ساعدتنى يكون عندي علاقات دولية في مجال المنظمات والأعمال الدولية لأن منها فيه منظمات كثيرة جدا بتعمل في السياحة على مستوى العالم إنما الأم لهذه المنظمات أو الأساس هي اللي تابعة للأمم المتحدة اللي هي منظمة السياحة العالمية وبالتالي أتيح لي هذا البعد
مفيد فوزى: إذن يفهم من كلام هشام زعزوع أنه قادم من رحم السياحة بمعنى إن إيده في هذا المكان يعنى عاجن السياحة وإن صح التعبير فهم المفردات والطقوس هو وزير فنى بمعنى أنه يدرك تماما هذه الصناعة صناعة الأمل ما الذى أحسست به عندما كلفت لأول مرة بمنصب الوزير وأنت في مقاعد المتفرجين صحيح أنت مساعد أول الوزير ولكنك ترى بوضوح تام جروح السياحة النازفة تعبير دقيق اللي قلته ده
د.هشام زعزوع: جدا تعبير دقيق جدا فعلا السياحة بتنزف والسياحة بتئن الحقيقة أصيبت بضربات متلاحقة خلال الفترة اللي فاتت وأعتقد إن انقطاع ككل متوقع منى بعد التكليف دوة إنى أعمل حاجة لصالح مصر من خلال موقعى في السياحة
مفيد فوزى: مهمة ثقيلة
د.هشام زعزوع: جدا ، جدا ، جدا
مفيد فوزى: قطع الطرق لا يزال قائما حتى الآن مش ممكن تقول لي أبدا إن التدفق السياحى بخير
د.هشام زعزوع: لا مش بخير مؤكد إنه مش بخير
مفيد فوزى: طيب انت عملت فورا يمكن من أيام ومن ساعات ع الفيس بوك موقع وسميته هشام زعزوع وقصدت به إنك تعمل تواصل بينك وبين الناس ربما الشكاوى وربما ، وربما ، وربما من المؤكد إن عذابات الناس اللي سرحتها هذه البطالة هم أكثر الناس المعذبين من هذا الموقف وبتصور إن الناس اللي بتشوفنا أكيد كان فيه بيوت كانت مفتوحة بالسياحة ومفتوحة في الفنادق ومفتوحة في الأعمال وأظن فيه حوالى 91 مهنة فيما أتصور
د.هشام زعزوع: 75
مفيد فوزى: 75 مهنة مبنيين على السياحة
د.هشام زعزوع: مرتبطين ارتباط وثيق بالسياحة
مفيد فوزى: آه والناس دى في حالة بطالة وقاعدين في بيوتهم ومتوقعين منى إنى أسألك ماذا أنت فاعل لهؤلاء
د.هشام زعزوع: أول عذابات هؤلاء الناس في محلها وأنا يعنى قلبى بيدمى لما بسمع قصص مختلفة عن ناس تم الاستغناء عن خدماتها وناس بتعانى مرشدين كانوا بشتغلوا وللأسف فقدوا الشغل بسبب انحصار الحركة السياحية وعدى إن هعمل جاهدا على بنظرية إنى أجيب الصنارة وما اديش السمكة يعنى فيه ناس كانت طالبت إعانات جمعيات بترعى هؤلاء الناس اللي بيعملوا في السياحة على أساس تساعدهم على تخطى هذه المرحلة قد ده يكون حل ولكن مش حل دائم الحل الدائم ويمكن نتعرض في حديثنا يا أستاذ مفيد مع حضرتك على ازاى
مفيد فوزى: الحلول
د.هشام زعزوع: الحلول لكن الحل إن حركة السياحة تعود لإن مجرد عودة حركة السياحة هتضمن الرزق لكل من هو مرتبط بهذه الحركة وبالتالي تحل مشاكلهم فأنا عينى على إن السياحة ترجع دى نمرة واحد
مفيد فوزى: دى طبعا فكرة جيدة لإنهم مليون ونصف
د.هشام زعزوع: اللي بيعملوا
مفيد فوزى: اللي هم المتسرحين
د.هشام زعزوع: الرقم مش دقيق قوى يا فندم
مفيد فوزى: كام ، أد إيه
د.هشام زعزوع: تراوحت الأقوال إن هم قوة العمل في السياحة حوالى 4 مليون وقيل إن 40 % ده الرقم اللي حضرتك بتتكلم عليه دلوقتى اللي هو يقترب من 1.6
مفيد فوزى: بالضبط كده أنا بتكلم على ده
د.هشام زعزوع: الأرقام اللي جاية لي من حتت ثانية نصف هذا الرقم وأقل فعشان أكون دقيق مع حضرتك أنا أعتقد ما تم الاستغناء عنه هم الناس اللي كانوا بيتشغلوا كعمالة مؤقتة واللى علمت إن جزء منهم كان بيشتغل في حاجات ثانية وكان بينضم للسياحة لما بتنتعش
مفيد فوزى: نحن بشر
د.هشام زعزوع: طبعا
مفيد فوزى: بشر وعايز أقول لك إذا كان واحد استغنى عنه أو مشى حتى لو كان من العمالة المؤقتة من المؤكد إن وراه بيت
د.هشام زعزوع: طبعا
مفيد فوزى: وأفواه مفتوحة
د.هشام زعزوع: أنا بدور يا فندم على حل مشكلة اللي بيبيع كارت بوستال في الهرم ده بالنسبة لي مهم برضه يعنى أكل عيش الناس دى وأنا رحت يعنى أنا ما أخفيش على حضرتك في زيارة مفاجئة مع وزير الدولة للآثار لمنطقة الهرم قريب واتقابلت مع الناس اللي بتشتغل في هذه المنطقة اللي بيبيعوا منتجات مصرية للخوجات طبعا بيعيطوا وبيبكوا الحل يا فندم الحل الحقيقى اللي على الأرض إن أنا أشتغل بطريقة علمية وإنى أرجع حركة السياحة ثاني هتسألنى تقول لي الأمن طيب وقطع الطرق طيب والحاجات زى كده ولذلك هو ده الملف الأولانى اللي بشتغل عليه
مفيد فوزى: الأمن وقطع الطرق والتحرش بالسياح وغش السياح
د.هشام زعزوع: طبعا كل دى الملفات لازم أشتغل عليها لما أعرف أطلعها
مفيد فوزى: عايز أسألك هشام باشا هو أنا لما بقول غش السياح ، التحرش بالسياح يعنى عايز أسألك كمسئول في الوزارة هل أنا النهاردة لما أقول الكلام ده وقد يترجم انت عارف إن فيه سفارات بتترجم كل كلمة على شاشات التليفزيون هل ده ينبغى إن أنا أكذب
د.هشام زعزوع: إطلاقا
مفيد فوزى: يعنى ينبغى إن أنا أقول لك إيه والحقيقة إنك لازم تاخد بالك من السياح وما تضايقهمش وتطبطب عليهم هم بيركبوا الحقيقة تاكسيات وأحيانا يعنى طبعا ده كلام فارغ ونوع من المداهنة لكن أتصور إن لازم أقول لك غش السياح هل ده خطأ إعلاميا
د.هشام زعزوع: لا مش خطأ إعلاميا بل بالعكس الإعلام بيلعب دور إنه يلفت نظر المسئول على إن المسألة تفاقمت إلى أن أصبحت مشكلة بتهدد اقتصاد مصر
مفيد فوزى: انت من خلال تجربتك في العالم لما يشوفوا إن أنا بقول غش السياح ، تحرش بالسياح هل ده يعمل دعاية مضادة لنا
د.هشام زعزوع: لا يعمل دعاية مضادة إذا ما كانش مقابل هذا الكلام تصريح أو إجراء حقيقى على الأرض من جانب الحكومة لوقف مثل هذه الممارسات فإذا كنا صرحاء فهنكتسب ثقة العالم إذا قلنا إن فيه بعض المظاهر أو أنا بخفف كلام سعادتك بس مظاهر سلبية في التعامل مع السياح في بعض المواقع ما هو موجود في العالم حضرتك بتسافر وبتشوف بتروح في حتت سياحية أو أثرية وبتلاقى واحد يحاول يبيع لك
مفيد فوزى: بروح إيطاليا وبتعرض للنشل
د.هشام زعزوع: فإذن ده إجراء معروف الفرق إنه يعدى مرحلة معينة إلى إن السائح يشعر بضيق شديد ونفور من إنه محاصر بقى يعنى المسألة مش مسألة واحد بيحاول يبيع له حاجة لا ده بيبيع له ويصل إنه يمسك إيده عشان يشترى منه السلعة أو زى ما بيقولوا يركبه الجمل عندنا ويقول له مش هتنزل إلا لما تدفع لا دى مرحلة فيه فرق إنى أحاول أبيع الخدمة بتاعتى زى ما بيحصل في العالم كله ساعات بتبقى فيها مبالغة شوية موجود في العالم لكن إن أنا أتعدى خط معين تخش بقى في مسألة ثانية ده لازم إجراء
مفيد فوزى: طيب خطف السياح بتعمل في ده إيه دى مشكلة أمنية
د.هشام زعزوع: دى مشكلة أمنية لا يعنى خطف السياح ده مصيبة
فاصل غنائى
مفيد فوزى: الرئيس مرسى سافر قنا أو الاقصر
د.هشام زعزوع: الأقصر وأنا كنت معاه
مفيد فوزى: وقابل هناك السياح الذين جاؤوا بقصد أسميه أنا سياحة الآثار أنا مندهش حتى الآن أنه لم يذهب إلى الغردقة لم ير الجونة لم يذهب إلى شرم الشيخ لم يقف وسط السائحات بالمايوهات والشورتات لم يخاطب العالم فيما أتصور في مسألة سياحة الشاطئ ماذا أنت فاعل كوزير السياحة
د.هشام زعزوع: لا أنا الحقيقة أستأذن سعادتك الريس أولا يجب أن ننظر للمسألة دى بزاوية مختلفة خالص
مفيد فوزى: وهى
د.هشام زعزوع: تم تشكيل الحكومة في 2 أغسطس وأول اجتماع للحكومة في 2 أغسطس كانت برئاسة رئيس الجمهورية أول إجراء عمله ثاني يوم هو الذهاب للأقصر دى دلالة بالغة جدا على اهتمامه بملف السياحة ككل
مفيد فوزى: نحن في الصيف وكنت أتمنى إن الزيارة تبقى
د.هشام زعزوع: ما أنا هقول لحضرتك كان مخطط له إنه يزور قنا فحرص إنه ما يكونش في قنا
مفيد فوزى: وما يروحش الأقصر
د.هشام زعزوع: وما يروحش الأقصر ده معناه إنه مهتم بالملف فاحنا عاوزين ننظر إلى نصف الكوب الممتلئ وليس الخالى دى نمرة واحد ، نمرة اثنين أنا كنت معاه هناك تم تصوير سيادة الرئيس في معابد الأقصر والكرنك في وجود عدد ضخم من السائحين بما فيهم سائحات بلبسهم العادي لم يعترض على هذا ، 3 من موقعه هناك في هذا المعبد أرسل رسالة للعالم من خلال أسئلة قال انتوا هنا في الأقصر بتستمتعوا بزيارة المزارات الأثرية والثقافية في مصر لكن أنا أدعوكم انكم انتم تكملوا زيارتكم أو تيجوا مرة ثانية مصر فيها أماكن مهمة زى الغردقة وشرم والجونة وذكر أسامى مناطق سياحية كثيرة جدا وبالنسبة لي أنا شخصيا على جنب قال لي إن شاء الله لما تتاح فرصة ثاني أنا عاوز أزور بقية المناطق السياحية زى شرم الشيخ والغردقة فأنا مش عاوز أزايد يا مفيد بيه أنا عايز أقول إن بعض الناس بيطالبوا بحاجات
مفيد فوزى: أنت وزير للسياحة
د.هشام زعزوع: أيوة طبعا
مفيد فوزى: ومن حق الناس أن يعلمون جيدا ما رأى الرئيس في سياحة الشاطئ وأنا بقولها بشكل مهذب
د.هشام زعزوع: هو ليس ضدها ليس ضدها السيد الرئيس ليس ضدها بالعكس هو مهتم بالملف بالكامل كون إن هو يطلب منه شئ زى إن هو يقف في وسط سياح بلبس الشاطئ لم تحدث من قبل ولم تحدث مع أي رئيس في العالم والحساسية المبالغ فيها دى يجب إن هي تزول أنا سمعت لنفسى للسيد رئيس الجمهورية قبل ما يبقى رئيس في لقائه مع مجموعة سياحيين وأنا كنت موجود في الخلف سألوه على التقاليد بتاعتنا وخصوصيتنا وماذا يجب أن يراعوا رئيس الجمهورية في ذاك الوقت هو ما كانش رئيس جمهورية قال لم أر ما يقبح عينى من السياح وما معناه وأنا بقول وبؤكد أن السائح يأتى إلى مصر ويراعى خصوصيتنا أكثر ما احنا بنراعيها لكن لازم نفهم الثقافة دى رسالة توعية للشعب المصري قبل أن تكون رسالة للرئيس السائح لم يأت النهاردة إلى مصر ويذهب إلى كنيسة أو جامع بيراعى في المكان ده إنه مكان مقدس
مفيد فوزى: لكن الشاطئ لا
د.هشام زعزوع: هو عنده حاجة أخرى اسمها لبس الشاطئ
مفيد فوزى: زى إيه لبس الشاطئ
د.هشام زعزوع: اللي هو المايوه
مفيد فوزى: والشورت
د.هشام زعزوع: هل احنا متوقعين كمصريين إنه لما يروح يسبح في الشاطئ يلبس بدلة وينزل يعوم أكيد لا فأنا عايز أقول إن السائح بيحترم خصوصيتنا وهو موجود في فندقه في شاطئه بيمارس حياته عادى
مفيد فوزى: أنا بتكلم كلام محدد السائح في فندقه بيشرب مش كده ما اعتقدش إنه بيشرب على البلاج وإن كان فيه بعض الناس بيروق لها إنها تشرب كحوليات على البلاج هل دى ممكن تتكسر هذه الحرية
د.هشام زعزوع: يا فندم مش فيه قانون عندنا بيحكمنا ما ينطبق على السائح ينطبق على المصري مش القانون بيسمح بهذا داخل الفندق
مفيد فوزى: القانون بيسمح دلوقتى داخل الفنادق يعنى خلال فترة رمضان كان يسمح القانون بأن تقدم خمور للأجنبى
د.هشام زعزوع: ولا تقدم للمصرى ، ده هو ، هو بقى لنا 3 سنة مش دلوقتى هي ، هي مستمرة كما هي لم يحدث إجراء جديد ما خلط على الناس لما
مفيد فوزى: أنا بتكلم عايز أوضح بس نقطة مهمة جدا لأتفهم غلط أنا لما بتكلم عن خمور بتكلم عن حريات السائح في مصر انت مش هتجيبه من آخر الدنيا عشان تقول له في مصر اشرب يانسون
د.هشام زعزوع: يا فندم السائح مش عامل ندر عشان ييجى ويقيد حريته إذن حريته مكفولة تماما في إطار القانون نسأل بقى القانون بيسمح له بهذا أو ذاك احنا بنحترم القانون ونطبقه إلى أن ده يتم تغييره احنا مستمرين في عمله ومش هيتم تغييره لإن احنا وكل التيارات السياسية في مصر يعنى على رأس أولوياتها قامت الثورة علشان خاطر الحرية فاحنا مش هنقيد حريات الناس اللي هتزور مصر استحالة مش وارد لكن الآداب العامة والحفاظ على الآداب العامة موجود في أي دولة في العالم
مفيد فوزى: هل أنت مع سياحة الشاطئ بكل ما فيها من حريات
د.هشام زعزوع: يا فندم يعنى أنا مش عاوز أتكلم كثير في الموضوع ده لإنى هأفهم غلط أنا عايز أقول رسالة صغيرة جدا عشان نحسم هذا الموضوع السائح الذى يأتى إلى مصر للاستمتاع بالشاطئ المصري سوف يستمتع به في إطار من القانون أنا لا أتصور إن السائح يطلع بشورت يمشى في ميدان التحرير سائحة أو سائح إنما وهو قاعد عاوز ينزل البحر هينزل المايوه اللي هو لباس البحر عشان يعوم يعنى ده منطقى مش معقول أقيد هذا
مفيد فوزى: مش خايف من اعتداءات بعض المتشددين على المصايف
د.هشام زعزوع: أتمنى ألا ده يحدث أولا أتمنى لكن أنا بعلاقاتى من موقعى من قبل حتى ما أكون مسئول كوزير أنا اكتشفت إن التيارات الدينة المختلفة ساعات الإعلام بيسيئ طرح أفكارها بشكل أو بآخر وساعات بعض الناس من هذه التيارات بتطلع تقول كلام قد يكون محسوب على هذا التيار وهم بيتكلموا بصفة شخصية وليس بهذا التيار أنا أعتقد إن فيه فهم كامل والدين أصلا بيحترم الحرية والخصوصية يعنى فيه آيات كثيرة في القرآن بتقول لك ولا تتجسسوا وهكذا إنه بيضع حدود للإنسان إن هو يخترق حريات الآخرين فأنا أعتقد إن السائح في فندقه فيه عقد ما بيننا وبينه كدولة أن يكون في أمان ومأمن إن احنا نحترم خصوصيته كما هو يحترم خصوصيتنا
مفيد فوزى: انت عملت ليه موقع على الفيس بوك
د.هشام زعزوع: أنا عملت موقع على الفي سبوك لسببين إنى أولا عايز موضوع إن المسئول يفضل اليوم كله في مكتبه يستمع لشكاوى فردية لا هيحل الشكوى ولا هيشتغل أنا مؤمن بالمؤسسية إنى أحول كل حاجة إلى شكل مؤسسى فعملت حاجتين عملت الموقع عشان الناس تبقى عندها حرية تكتب ما تريد وتشكو أو تقترح ما تريد ومقابل لهذه الشكوى هعمل لحاجتين ثاني أو في سبيل استخراج هذا القرار ، 1- إنى أعمل لجنة زى ديوان مظالم في الوزارة تاخد ممن على الموقع واللى عاوز ييجى يتقدم بهذه الشكوى للجنة محايدة لحلها بإذن الله حسب قدرتى على حلها ، الحاجة الثانية المقترحات تتحول إلى واقع إذا كان يفيد القطاع فأنا الحاجتين دول عملتهم عشان يبقى فيه تواصل بخلاف إنى أنا هتواصل شخصيا مع الناس إنى هجعل يوم في الإسبوع مفتوح أقابل فيه كل من عاوز يقابلنى عملت لجنتين على المستوى الفنى على مستوى السياحة لجنة تعالج كل الفنادق والمحلات السياحية ومشاكلها في خلال مدة أقصاها أسبوعين يعنى الوزارة ما تبقاش نظام فوت علينا بكرة يا سيد احنا عاوزين نلغى بقى النظرية دى يحصل رتم سريع لحل مشاكل الناس لإن أنا في النهاية أرى إن دور الوزارة زى جسم واقف على رجليه الاثنين رجل منهم رقابى لازم يستمر والرجل الآخر إنى أسهل التعامل للمتعامل أو المستثمر في الوزارة لحل مشاكله لإن هم دول اللي بيجيبوا السياحة الوزارة ما بتجيبش سياحة
فاصل إعلانى
مفيد فوزى: انت عندك أمل يحصل التدفق ازاى
د.هشام زعزوع: أول حاجة وده ابتديتها فعلا إن مع السيد رئيس الوزراء والسيد وزير الداخلية إن احنا نعمل لجنة بين قطاع السياحة والمسئولين في الأمن لوضع خطط أمنية لتضمن تأمين حركة السياحة في المناطق السياحية دى نمرة واحد وأعتقد دى بتتم في الوقت الحالى
مفيد فوزى: الفوج السياحى اللي بيتحرك في الأقصر أو الفوج السياحى اللي بيتحرك على الشواطئ في شرم الشيخ أو غيره هل دى مؤمنة
د.هشام زعزوع: مضبوط وده بيتم تأمينه دلوقتى
مفيد فوزى: مؤمنة بمعنى إيه بمعنى إن قبل الفوج أو قبل الأتوبيسات فيه أمن بعد الأتوبيسات فيه أمن يعنى عايز أعرف الآلية
د.هشام زعزوع: يعنى مثلا فيه سياح عندهم مثلا بيقوموا بعملية زيارات لمواقع سياحية هم موجودين في الغردقة مثلا على سبيل المثال وعاوزين يروحوا يوم يزوروا الأقصر ويرجعوا فاحنا دلوقتى بنعمل منظومة إن فيه قول تصاحب الأتوبيسات اللي هي ماشية من الغردقة تروح لغاية الأقصر ليستمتعوا بها ، تأمين المدينة نفسها دى مسئولية المديريات
مفيد فوزى: لا أنا بتكلم على الفوج
د.هشام زعزوع: الفوج نفسه لما بيتحرك في توقيتات معينة خلال اليوم ويتم تأمين هذا الفوج وهو بينتقل من النقطة أ إلى النقطة ب دى يعنى في وقت من الأوقات كان فيه اعتراض على عملية التأمين لما كانت المسألة وصلت لتأمين السايح شاعر بأمان كامل وما كناش محتاجين لهذا الإجراء في وقت ما إنما نتيجة الانفلات الأمني اللي كلنا كمصريين بنعانى احنا منه يجب إن احنا نبدأ نحتاط لهذا لإن أنا مفيد بيه ما أقدرش أتحرك خارجيا و أورج بدون ما أشعر إن ظهر محمى كمسئول فأنا أول ملف ابتديت به كلمت السيد وزير الداخلية اللواء أحمد جمال الدين وكلمت السيد رئيس الوزراء واقتنع تماما بإن هذا الملف يجب وحاليا فيه خطط أمنية بتوضع على أعلى كفاءة إن شاء الله بإذن الله مع توجه الدولة أصلا ما يحدث في سيناء من إجراء لضرب البؤر الإجرامية إلى آخره كل ده بيساعدنا وبينقل الصورة حقيقة إن مصر جادة في حجم الشارع المصري للخارجين على القانون الحرية مكفولة والتظاهر مكفول والاعتصامات مكفولة طالما إنها تكون في إطار القانون
مفيد فوزى: شرطة السياحة هل هي بعافية
د.هشام زعزوع: بعافية جدا
مفيد فوزى: ازاى
د.هشام زعزوع: أنا على اتصال يومى مع السيد اللواء المسئول عن شرطة السياحة وهم أكثر الناس
مفيد فوزى: إيه دورهم يا فندم
د.هشام زعزوع: دورهم إن هم فاهمين أولا طبيعة القطاع وطبيعة العملية السياحية نفسها والوصول وسفر السياح واحتياجاتهم وإلى آخره فأنا لما بتكلم معاهم على تأمين السياح ، على مشاكل السياح ، على شكاوى السياح أكثر ناس تقدر ترجع لي بحلول من الزاوية الأمنية ولذلك دورهم محورى بالنسبة لي الشرطة المتخصصة
مفيد فوزى: إيه عيوبهم
د.هشام زعزوع: عندهم نقص في المعدات عندهم نقص في الإمكانيات الموجودة
مفيد فوزى: ازاى
د.هشام زعزوع: وعندهم مشكلة احنا سببنا ما كناش متواصلين معاهم في الفترة اللي فاتت محتاجين إن هم يساعدونا على تدريب الناس اللي بيقوموا بتأمين الفنادق إلى آخره ومحتاجين نتواصل معاهم نشوف احتياجاتهم إيه
مفيد فوزى: حضرتك كان لك وجهة نظر فيما يتعلق بمكاتب السياحة مديرى مكاتب السياحة ويبدو إنك بتفكر في نوعية معينة لمكاتب السياحة أنا لا أدرى إيه رؤيتك
د.هشام زعزوع: لا رؤيتى إن احنا عايزين مديرين مكاتب بدرجة سفير إن جاز التعبير عايزين سفراء
مفيد فوزى: مديرين مكاتب بدرجة سفير
د.هشام زعزوع: عاوزين سفراء سياحة أنا مش موظف تقليدى بيروح هناك يروح الساعة 9 ويمشى الساعة 5 ويأيد في دفتر ويمشى احنا عايزين ناس السياحة 24 ساحة قايمين نايمين بها شاعرين بمهمة وطنية أفضل واجهة لنا احنا في هذه البلد لإن هذا المدير بيمثل بالنسبة لهم مصر هو ده اللي بيتعاملوا معاه كل يوم قبل ما ياخدوا القرار بإنهم يبعتوا سياح بالنسبة لمنظمى الرحلات أو السائح نفسه اللي بيكلم المكتب ياخد معلومة فإذا كان زى ما بيقول المثل البلدى " إذا كان رب البيت بالدف ضاربا " فأنا عاوز أداء الرجل يضبط ده كله من أول التليفون اللي بيستقبله للرد على سؤال ما سايح لغاية الإجراء الفنى اللي بيتم عشان يزود حركة السياحة من مصدر هذا البلد
مفيد فوزى: برجع أقول لك البوستر free on the coast مصر 2012 وفى الخلفية بنت بشورت هل أنا غلطان
د.هشام زعزوع: لا مش غلطان
مفيد فوزى: يعنى صحح لي هو أنا بسألك ليه يعنى انت عارف أنا بفتح معاك على الآخر ليه لأن من قلب المهنة واللى بقول لك عليه ده ليس اختراعا إنما انت من قلب المهنة فانت أدرى تماما كيف يفكر العالم فيك الآن
د.هشام زعزوع: مؤكد ، ممكن أرد بس على الحتة دى
مفيد فوزى: اتفضل
د.هشام زعزوع: عشان أحسم هذا الأمر الواقع الحقيقى والعلمى والعملى في قطاع السياحة على مستوى العالم نحن إذا أردنا حركة السياحة أن تعود إلى مصر ي يجب أن نراعى مش نراعى يجب أن نخضع للآليات الدولية للعمل في قطاع السياحة هذه الصناعة لها آليات ومعايير فمنظمة السياحة العالمية طلعت تقرير قيم جدا بيقول من هنا لغاية 2030 ، 61 % من حركة السياحة في العالم هي سياحة ترفيه سياحة الترفيه في بعض الدول اللي ما عندهاش شواطئ هي الجبال والبحيرات زى سويسرا ، زى النمسا ، بالنسبة لمصر سياحة الترفيه بالنسبة لنا هي سياحة الشواطئ المصرية إذا أردنا إن احنا نضيف منتجات أخرى لا ضير ولا بأس في ذلك لكن هيفضل سياحة الترفيه إذا كنا عاوزين أعداد ونعتمد على الحركة وندخل دخل لمصر اللي اقترب مش اقترب كان 12.5 مليار في عام 2010 ضعف إيراداتنا من قناة السويس أو أكثر لإن قناة السويس 4 إلى 5 مليار
مفيد فوزى: أضيف كلمة
د.هشام زعزوع: اتفضل
مفيد فوزى: كان فعل ماضى
د.هشام زعزوع: ما أنا بقول لحضرتك احنا مطلوب منا نرجع لهذه الأرقام بل نتفوق عليها لصالح مصر والمصريين الهدف مقاصدنا نبيلة فلازم نخضع لهذه الآليات
مفيد فوزى: انت ازاى بتدى للسايح ياكل ويشرب وينام وبتاع 135 دولار في اليوم ازاى
د.هشام زعزوع: ده قل دلوقتى
مفيد فوزى: كمان
د.هشام زعزوع: أقل
مفيد فوزى: والمصرى ده غلبان
د.هشام زعزوع: لا يا فندم أنا عايز أشرح
مفيد فوزى: المصري مش غلبان
د.هشام زعزوع: لا المصري غلبان جدا أنا بس عايز أشرح لإن الموضوع ده محتاج السياحة الداخلية في مصر محتاجة تنظيم لما تنظم السياحة الداخلية هيبقى فيه عروض مميزة للمصريين طبيعة سياحة المصريين أولا اللي ما يسمى بالإنجليزية last minuitآخر دقيقة يقرر المصري ده بكرة العيد أنا عاوز أطلع شرم الشيخ ، مرسى مطروح إلى آخره فلما ييجى ياخد قراره في آخر دقيقة في فترة ذروة موسم في حركة سياحة خارجية ومصريين حاجزين من الأول عاوزين يروحوا اللوكاندة بتقول لك قوى العرض والطلب انت جاى لي في آخر دقيقة
مفيد فوزى: زى الطيران
د.هشام زعزوع: زى الطيران آخر دقيقة سعر الأوضة كذا أنا ما أقدرش كحكومة أفرض على سوق العرض والطلب السوق إن هو يشتغل بآليات مختلفة دى حاجة ، الحاجة الثانية عشان يبقى الأسعار زيه زى الخوجات الخواجة بيعمل إيه منظم الرحلة بييجى لمصر بيتعاقد إداريا مع الفندق أو شركة السياحة ويقول لها بصى بقى أنا هاجى عندك في 2012 و 13 و 14 و 15 لمصر في الحتت الفلانية احجزى لي 500 أوضة في الحتة الفلانية 200 أوضة في الحتة الفلانية عدد ليالى أد كذا بس بما إن أنا بقى تاجر بملى لك وبضمن لك دخل يا لوكاندة ادينى سعر يعنى فيه مفاوضة تجارية عشان ينزل بالسعر هو بياخد نسبة صغيرة من السعر اللي نزل ده ويبيعها بسعر مخفض للأجنبى المصري ما عندناش إطار مؤسسى منظم يضمن نفس الإجراء اللي بيتم مع السياحة الخارجية مع المصري فييجوا يقولوا اشمعنى الخواجة بياخد في الأوضة 50 دولار أو 60 دولار اللي هي تساوى مثلا 6*50 ب 300 جنيه وأنا بدفع 1000 جنيه وأنا رايح مارينا فأقول له احنا محتاجين نقعد مع شركات السياحة والفنادق وننظم مع النقابات والبنوك يعنى العملية محتاجة وشركات النقل الجوى والبرى وده موجود وممكن يتم وأنا هكلف ناس عشان أعمل إجراء وننمى ثقافة يا مفيد بيه ثقافة السياحة لدى المصري إن هو ما يجيش هناك في الويك إند ممكن يطلع يسافر الإسماعيلية أو الفيوم
مفيد فوزى: بس بيحجز قبلها
د.هشام زعزوع: مطلوب ده مش بطلب منه هو
مفيد فوزى: طيب عايز أكلمك في حتة صغيرة أكيد تكون يعنى فاتت عليك الحتة القدرية لما بتقول السائح الأجنبى بيقول إن سنة 13 أنا هاجى لك سنة 14 يعنى بيدى لنفسه آفاق زمنية بعيدة المصري ما بيعملش كده
د.هشام زعزوع: هقول لك ليه
مفيد فوزى: ليه ، يحيينا ربنا مش كده
د.هشام زعزوع: آه مضبوط ولا فيه عنصر آخر
مفيد فوزى: وأنا أفول على نفسي ليه ده فين يا ما أحداث هو حد ضامن نفسه بعد نص ساعة يعنى عايز أقول إيه هناك أشياء لما تدرس نفسية المصري أو العربى عموما بشكل فيه هذه الأبعاد بتدرك شخصيته
د.هشام زعزوع: مضبوط
مفيد فوزى: محدش أبدا أنا لما أقول لك أنا عايز إن شاء الله ، إن شاء الله واخد بالك من التعبير ده جزء في سلوكى وتكوينى عند الأجنبى لا الأجنبى ما بيحطش الاعتبارات دى بيقول إن هو هيحجز في فبراير 2013 ييجى الأقصر وبيبعت يقول ويشوف الشركة اللي ممكن تعمل له ما يسمى بالأسعار الخاصة عند المصري لا كيف يمكن المعادلة للمعادلة المصرية في السياحة الداخلية
د.هشام زعزوع: تسمح لي أقول لحضرتك احنا يمكن ما طرحناهوش هلفت نظر حضرتك الأجنبى بيعمل اللي حضرتك قلته والمصرى ما بيعملوش ليه مش بس الناحية القدرية اللي وصل على مدار ال60 سنة اللي فاتت بعد الحرب العالمية الثانية السياحة فضلت تتقدم ضمن الأولويات والاحتياجات للأجنبى إلى أن أصبحت بيعتبرها حق زى الأكل والشرب يعنى أجازته دى مقدسة ، السفر ده مقدس بالنسبة له فأصبحت جزء من احتياجاته يوفر كل شهر عشان آخر السنة يقدر يعمل الرحلة بتاعته ده مش موجود عندنا ليه لإن احنا ظروفنا الاقتصادية أنا بتكلم مش للصفوة أو للنخبة اللي عندها قدرة مالية أنا بتكلم على العموم فاحنا عشان ندخل ونفادى حتة القدرية دى وإنها تخش ضمن احتياجاته يجب احنا كحكومة وقطاع خاص نشتغل على توفير السياحة كمنتج أو كسلعة بيريدها إن تبقى في متناول يده فنقدر نعمل منظومة للمصرى العادي إنه يسافر مثلا بالتقسيط وأعلن عليها يوم ما أعلن عليها تبدأ الدورة يقول آه والله ده أنا ممكن آخد الولاد وأطلع الاسماعيلية أو الفيوم وبرقم وفيه أتوبيسات طالعة بأسعار مهاودة أغير جو بدل ما أنام في بيتى يوم الجمعة
فاصل غنائى
مفيد فوزى: الآن هل التناغم يصنع شيئا مفيدا لمصر
د.هشام زعزوع: بلا شك
مفيد فوزى: بمعنى إيه قل لي يعنى فيه لجنة انت بتقعد معاها اسمها لجنة الحكماء قل لي بتعمل إيه مع وزير الطيران في مثل هذه الجزئية
د.هشام زعزوع: أنا باخد بعضى وأنزل آخد ميعاد من وزير الطيران وحصلت قبل كده مع الوزير السابق منير فخرى عبد النور نروح ما نقعدش بتليفونات وجوابات أنا بشوف المشكلة إيه وآخد ميعاد يا إما يشرفنى يا إما أروح له نقعد ندور على حلول لها مش شرط كل مرة نقعد نلاقى الحل لإن فيه وجهات نظر لكن بنحاول نقترب من الحل وده الإجراء اللي فيه الأداء أسرع وده اللي هتشوفه الوزير الحالى اشتغل في قطاع السياحة من زاوية الطيران كان رئيسا لشركة هي الذراع السياحة بتاعت وزارة الطيران وبالتالي هو فاهم احتياجات السياحة وأنا اتكلمت معاه أخيرا
مفيد فوزى: في إيه بالتحديد
د.هشام زعزوع: أولا إيجاد وسائل جذب بالذات للصعيد لإن الصعيد كان بيئن إذا كان السياحة الشاطئية اللي حضرتك كنت بتتكلم عليها أداءها مش جيد لكن كانت الأرقام أفضل هنا من الأقصر وأسوان خلال الموسمين اللي فاتوا دول فاحنا نقدر نعمل إيه اللي أنا بتكلم عليه إن نطلع ببرنامج مشترك نخاطب به كبار منظمى الرحلات عشان أشجعهم لتحويل طائراتهم بالذات في الشتاء إلى الأقصر وأسوان فمثلا نقول لهم انزل في طياراتك في أسوان أو الاقصر بدون تكلفة صفر تكلفة مش بيدفع تكاليف نزول وهبوط هندور البرنامج بتاع التحفيز اللي مقدماه الوزارة لبرنامج التحفيز بتاعنا ممكن نقترب لفترة معينة عشان يتشجع يجيب الناس إن هم ينزلوا الأقصر وأسوان دى أحد الملفات ملفات أخرى على التسويق المشترك مع الشركة الوطنية
مفيد فوزى: مع الطيران
د.هشام زعزوع: مع الطيران
مفيد فوزى: إذا سألتك وقلت لك إن السياحة هي استقرار سياسى ما نصيب مصر من هذه المعادلة
د.هشام زعزوع: في الوقت الحالى نتيجة الظروف اللي مرينا بها لا مش جيد احنا محتاجين استقرار مصر واستقرار الشارع المصري يجب أن يكون هناك فترة استقرار قادمة حتى تتمكن هذه الحكومة أنا بالنسبة لي في قطاع السياحة أن تستعيد عافيتها وتنطلق إلى آفاق أفضل وعندنا الفرصة دى هناك طرف ثالث مستنى الشارع يستقر
مفيد فوزى: سؤال صريح مباشر هل أنت وزير إخوانى
د.هشام زعزوع: لا يا فندم
مفيد فوزى: هل أنت تملك ميول إخوانية
د.هشام زعزوع: لا يا فندم
مفيد فوزى: هل أنت تتصاهر أو تتناسب مع أسرة إخوانية
د.هشام زعزوع: لا يا فندم