اتجاهات

حنان منصور: سيداتي سادتي السلام عليكم ورحمة الله بنحيى حضراتكم وبنتكلم في حلقة جديدة النهاردة في اتجاهات عن موضوع بيهم كل المصريين موضوع الباعة الجائلين ، موضوع إشغالات الطريق نعمل إيه يعنى من 60 سنة صدر قانون للباعة الجائلين كانت إيه عقوبة أو مخالفة إشغالات الطريق ، العقوبة هي المخالفة الأولى 1000 جنيه ، مصادرة البضائع ، وحبس 3 شهور في حالة تكرار المخالفة بتكون العقوبة 5000 جنيه ، مصادرة البضائع و6 شهور سجن هل ده طبق ، هل هذا هيطبق الحقيقة الأجهزة الأمنية والتنفيذية بتواصل في محافظات القاهرة والجيزة واسكندرية ومحافظة القاهرة بمشاركة شرطة إدارات المرافق والأمن المركزي حملات إزالة التعديات والإشغالات وإجلاء الباعة الجائلين من الشوارع ومن الميادين طبعا ده عشان نعيد الانضباط للشارع المصري ونعيد أيضا الوجه الحضاري لميادين مصر وأيضا علشان نحقق السيولة المرورية وإخلاء الرصيف للمارة لإن الرصيف الحقيقة اختفى تماما تحت وطأة هذه الإشغالات فيه فوضى عارمة كان لابد إن احنا نواجهها بعد ما تجاوز الأمر من مجرد إشغالات إلى ما يشبه احتلال الميادين والشوارع وتأجير أماكن منها من قبل البلطجية للجائلين كمان كان هناك إقامة أكشاك في أي مكان ده يعتبر تحدى صارخ للدولة ولهيبة الدولة وفى نفس الوقت فيه بعض الأهالي عارضوا وبعض أصحاب المحلات عارضوا وجود أسواق اليوم الواحد كحل لهذه المشكلة في شوارعهم أو بالقرب منهم ، اعترض أيضا بعض الباعة الجائلين مطالبين بأسواق دائمة مش سوق اليوم الواحد ولكن في النهاية بيبقى المواطن المصري هو الأكثر تضررا لإن مفيش مكان في الشارع ومفيش مكان في رصيف لا يقدر يمشى ولا يقدر يسوق عربيته بعد أن اختزلت بعض الشوارع إلى النصف تقريبا بإشغالات الباعة الجائلين طبعا ده بالإضافة إلى إن بيكون فيه مخاوف صحية كثيرة جدا ومادية بتتعلق ببعض السلع اللي بيتاجر فيها بعض هؤلاء الباعة مناقشة هذا الموضوع في الاستديو ومعنا ضيفينا معنا ضيفانا سيادة اللواء سيف الإسلام عبد الباري نائب محافظ القاهرة للمنطقة الغربية أهلا وسهلا بسيادتك
ل.سيف الإسلام عبد الباري: أهلا بحضرتك
حنان منصور: معنا أيضا اللواء إسماعيل عز الدين مساعد وزير الداخلية مدير شرطة مرافق القاهرة أهلا وسهلا سيادة اللواء ، يعنى المقدمة دى اللي احنا قلناها في البداية والموضوع اللي هو أكثر أهمية في الشارع المصري وطاغي موضوع إشغالات الطريق سيادة اللواء إسلام سيف الدين كيف ترى الحل ؟
ل.سيف الإسلام عبد الباري: هو زى ما حضرتك قلتي الوضع تفاقم باعة متجولين في الشوارع بعد ثورة 25 يناير توافد إلى القاهرة وخاصة وسط المدينة العديد من المواطنين من المحافظات الأخرى طلبا للرزق وافترشوا الشوارع وافترشوا الأرصفة بحيث إنهم عطلوا حركة المرور زى ما سيادتك شرحتا بالضبط تعطل حركة المرور المشوار اللي بتروحيه في 5 دقائق بتروحيه في 4 ساعات ده له مردود سلبي على كافة مصالح الحياة اقتصادية وكل حاجة تتخيليها سيادتك كان لازم إن احنا نضع حد أو حل لهذه المشكلة وطبعا دول مواطنين مصريين والمحافظات كلها بتطرد الأعمال اللي موجودة عندهم المحافظات كلها بتطرد العمالة اللي عندها طاردة إلى القاهرة كل بتوع المحافظات عايزين ياكلوا عيش في القاهرة مفيش مانع اللي موجود حصرناه كله بالكامل وكان ممكن يعنى نطرح كذا حل فيه حل آجل اللي هو بناء أسواق في أطراف المدينة والحاجات دى ودي بتاخد وقت بتاخد فلوس كمان وفيه حل عاجل اللي هو اختيار بعض المواقع عشان يتواجد فيها الباعة المتجولين طبقا لنص القانون قانون الباعة المتجولين قانون الباعة المتجولين بيقول جهة الإدارة اللي هي المحافظة بتحدد الأماكن التي يتواجد فيها الباعة المتجولين ويجب على الباعة المتجولين دول الالتزام بهذه المواقع كانت فكرة سوق اليوم الواحد هو اسمه سوق اليوم الواحد على أساس إن أنا بآخده أقعده في الموقع وآخر النهار بيمشى ما يبيتش فيه غير السوق العادي اللي هو ده بيته بقى يعنى محل ويقفله ويحط فيه بضاعته ويمشى دى الفرق إنما هو مش يوم واحد فقط اللي هو بيقعد فيه لا ممكن أكرر اليوم مرة واثنين وثلاثة يعنى فئة شبه ثابتة وفئة من الثبات الكبير حاجة أحسن من الاعتراض الكبير اللي هو لا كل يوم مش في حتة لا ده انت ثابت انت بس يوم واحد في الأسبوع اللي بقول لك روح في أماكن متميزة
حنان منصور: يعنى مثلا زى سوق الحد ، دلوقتى فيه سوق الجمعة ، فيه سوق الثلاثاء في أماكن معينة
ل.سيف الإسلام عبد الباري: نفس الفكرة باجى كل يوم بحدد له 5،6 مواقع وهذه المواقع على فكرة معظمها بيتكرر كل يوم بنسميه سوق السبت ، سوق الأحد ، سوق الاثنين وفى نفس المكان مفيش إنى أنقل من حتة لحتة وكده يعنى فيها شئ من الثبات ثبات جامد يعنى وروعي في اختيار هذه المواقع إن هذه المواقع تكون داخل الكتلة السكنية ومش في أطراف المدينة وفى أماكن لا تعوق حركة المرور والمشاة عشان ما ردش على هذا
حنان منصور: طب أنا في بداية الحلقة قلت إن فيه بعض الأهالي وبعض أصحاب المحلات رفضوا
ل.سيف الإسلام عبد الباري: ما أنا هقول لحضرتك الرفض جاى منين هو مالوش حق يرفض ولو فيه
حنان منصور: ليس من حقه الرفض
ل.سيف الإسلام عبد الباري: ليس من حقه الرفض صاحب المحل له محله والرصيف أدام منه واحنا ما حطيناش أدام محلات أو في نهر أرصفة أو في طريق إلا في الأماكن اللي سبق إغلاقها ضد السيارات وخليناها للمشاة فقط فأصحاب المحلات المتواجدة هناك أو المقاهي غير المرخصة اعتادوا على إنهم يفرشوا نهر الطريق ده كله ويحطوا على الرصيف كراسي ويشربوا شيش يعنى هو مخالف مش مرخص وفى نفس الوقت مفترش نهر الطريق ده بالنسبة للحتة بتاعت الشريفين ، الألفي حضرتك احنا لما رحنا عملنا فيها معاينة وسيادة المحافظ كان معانا شارع الألفي بالكامل ترابيزات وكراسي وشيش طب أنا أسيب راجل يشرب شيشة في نهر الطريق
حنان منصور: يعنى حضرتك بتقول إن هو مش واخد ترخيص ومخالف وقاطع لإن ده يعتبر قطع طريق طب المنطق المسنود عليه إيه
ل.سيف الإسلام عبد الباري: أنا بقول لحضرتك احنا لا نحارب إذا كان من باب أولى إن احنا واقفين جنب البائع المتجول علشان مصدر أكل رزقه وعيشه هنيجى ندى المحلات اللي هي مرخصة وبتدفع ضريبة للدولة مش هيحصل أبدا أنا المحل وقلنا لهم اجتمعت بهم أصحاب المحلات والألفي والحاجات دى المحل له طبقا للعقد أو طبقا للقانون له المحل بتاعه والرصيف اللي أدامه يبقى فاضي وإذا كان الرصيف يسمح بإن هو يشغل جزء منه الرصيف واسع وكبير برخص له هذه المساحة وأديها له هو بقى أصحاب هذه المحلات بعد أحداث ثورة 25 يناير وفى ظل الانفلات السلوكي والانفلات الأمني في بعض الأحداث المظاهرات والاعتصامات والكلام ده كله فرشوا في الشارع خدوا الشارع كله بالكامل لما نيجى دلوقتى نقول له ارجع المحل بتاعك ثاني لإن احنا هنجيب بائع متجول نحطه في هذا الشارع عشان لا يعيق حركة المرور سيادته مش موافق لإنه عايز يقتسم الشارع بالإضافة إلى إن زى ما سيادتك قلتي المعترض على هذا القانون البلطجية اللي بيأجروا الشوارع ، بعض أصحاب المحلات اللي بيأجر الشارع اللي أدامه للباعة المتجولين ويشتكى ويقول إلحقنى بعد كده ، حضرتك احنا بنعمل هذا المشروع وحددنا فيه بعض المواقع ما كانوش يوافقوا أبدا إن الباعة المتجولين يقعدوا أبدا فيها ، حديقة الأزبكية ، المنطقة بتاعت الألفي ، منطقة الشريفين دى بالكامل اللي كنت بكلم سيادة اللواء عليها منطقة الشريفين دى محصورة ما بين قصر النيل
حنان منصور: يعنى سيادة اللواء هل فعلا زى ما سمعنا في منطقة الألفي إن الشوارع فضيت والباعة المتجولين مشيوا وبعدين رجعوا ثاني
ل.إسماعيل عز الدين: لا هو اللي حصل إن احنا لما نزلنا مع السادة رؤساء الأحياء وأعضاء المحليات والسادة الضباط لتنفيذ مشروع سوق اليوم الواحد البيان اللي هيتنقل لهم الباعة بتوع قصر النيل رفضوا قالوا هتحصل مشاجرات يومية بيننا وبين المجموعة اللي هتيجى الباعة المتجولين خافت هيجيبوا لهم بلطجية وبالتالي مش هيعرفوا ياكلوا لقمة عيش ومش هيستمروا فبالتالي هيرجعوا ثاني في نفس مكانهم ويبقى أنا ما حلتش المشكلة اتكلمنا معاهم اتناقشنا معاهم طب إيه الحل ما هو تواجدكم في الأماكن اللي انتوا موجودين فيها دى مستحيلة احنا دلوقتى بنسعى لهدف إخلاء منطقة وسط البلد مثلا من الباعة الجائلين
حنان منصور: يعنى بتبتدوا بمحاور يا سيادة اللواء يعنى محور وسط البلد كبداية وللا جميع المحاور اللي فيها باعة جائلين
ل.إسماعيل عز الدين: مش كله زى بعض احنا فيه حملات على مستوى القاهرة بالكامل بتجيب نتائج هايلة جدا ، جدا وأولها على سبيل المثال مثلا 4 ، 5 حملات كبيرة جدا النهاردة كانت في مدينة نصر في محور الحي العاشر شلنا سوق كامل يعنى كانت بؤرة من ضمن البؤر للباعة الجائلين في الحي العاشر شارع بالكامل اتجاهين كان مغلق تماما وجبنا لوادر والسيد رئيس الحي هو وبتوع الإشغالات وجبنا صاروخ قطعنا به الحديد اللي كانوا قافلين به عيني كانوا عاملينه سوق هو فيه صور النهاردة منطقة شبرا حملة كانت ضخمة جدا بدأت من منطقة المظلات انتهت لحد الدوران
حنان منصور: طب الإشغالات كانت بس باعة جائلين وللا باعة جائلين وبلطجية وما إلى ذلك
ل.إسماعيل عز الدين:الحملة مش باعة جائلين بس
حنان منصور: أمال إيه
ل.إسماعيل عز الدين: فيه إزالات جميع أنواع الإزالات بنشوفها لو فيه توك توك طبعا بنشيله ، موتوسيكلات ، مخالفات مرورية وموتوسيكلات بدون لوحات ، حملات على المرور ، البيئة مخالفات البيئة القهاوى والشيش والكلام ده كله بنرفع جميع الإشغالات أمام المقاهي بيتم رفعها
حنان منصور: بيبقى فيه ضمان
ل.إسماعيل عز الدين:بيتعمل محاضر
حنان منصور: طيب بعد ما بتتشال بتبقى فيه ضمان ألا تعود مرة أخرى
ل.إسماعيل عز الدين:احنا بنطبق القانون وبننفذ القانون بنعمل محضر وبيعرض على النيابة المختصة والنيابة بقرارها تنفيذ القانون والغرامة الموقعة على البائع وغالبا لما بيقدم طلب علشان ياخد البضاعة بتاعته بيستلمها بعد يوم أو يومين فلما طبق القانون بيعود البائع ثاني لنفس مكانه
حنان منصور: يعنى أنت ترى أن القانون الحالي بمواده أو بعقوبته على الباعة الجائلين بتراه ضعيف
ل.إسماعيل عز الدين:يافندم احنا المشكلة دى
حنان منصور: محتاجين يعنى عقوبات أكثر
ل.إسماعيل عز الدين: ما أنا هقول لحضرتك احنا في خلال الفترة بتاعتنا اللي 7 ، 8 شهور والمشكلة دى فعلا بتؤرق جميع المسئولين في الدولة عقد بشأنها مجموعة اجتماعات في مجلس الوزراء السابق حضرها رئيس الوزراء ووزير الداخلية ووزير الحكم المحلى والتخطيط وهكذا الداخلية قالت فيها خطتها اقترحنا فيها حضرتك بعض النقط أولا تغليظ العقوبة لأنها لا تتماشى مع حجم المخالفة وبالتالي البياع بيرجع ثاني لنفس مكانه والسيد رئيس الوزراء وجه وزير الحكم المحلى
حنان منصور: طب تغليظ العقوبة يعنى أنا قلت 1000 و5000 و3 شهور حبس
ل.إسماعيل عز الدين: ده الجديد
حنان منصور: ده التغليظ
ل.إسماعيل عز الدين: آه العقوبة الأولانية كان بيدفع 100 جنيه ويقدم طلب ويستلم بضاعته فبالتالي كان بيرجع في نفس مكانه وهى التي ما زالت مطبقة حتى الآن
حنان منصور: يعنى اللي أنا قلته ده تغليظ للعقوبة
ل.إسماعيل عز الدين: ده التغليظ فحضرتك السيد وزير الحكم المحلى قدم مشروع قانون ولم يصدر حتى تاريخه وهو العقوبة اللي حضرتك قلتي عليها 1000 و3 شهور ومصادرة وفى حالة أن يعود5000 و6 شهور ومصادرة ده العقوبة اللي هي اللي لسه لم تصدر حتى الآن مشروع القانون لم يخرج زى ما بيقولوا هو حضرتك مشكلة الباعة الجائلين فيهم مجموعة كبيرة جدا من الشباب حاصلين على مؤهلات عليا ومؤهلات متوسطة ولكن بيسعوا للقمة عيش شريفة فاحنا ما بنتعاملش معاهم برضه على إنهم يعنى دول يعنى ناس مفسدين في الأرض إطلاقا لا احنا بنوجد لهم حل فقلنا يا جماعة دول أعداد كبيرة جدا ازدادت جدا بعد الثورة
حنان منصور: يعنى أد إيه مثلا تم حصر عدد
ل.إسماعيل عز الدين: لا صعب حصرهم
ل.سيف الإسلام عبد الباري: يعنى في المنطقة الغربية لما حلينا المشكلة وعملنا أسواق زى سوق بولاق الجديد وحاجات من دى أنا المتبقي عندي 126 بياع في المنطقة الغربية لوحدها ومحصورين بالأسماء والأرقام وكل حاجة وبموجب لجان مشكلة شاركت فيها شرطة المرافق وإدارة الباعة المتجولين محصورة ومحصورة أماكنهم وعلى أساسها احنا حددنا المواقع البديلة لهم إيه يعنى النهاردة الشارع ده فيه كذا بياع حددنا المكان اللي ممكن ينتقل إليه
حنان منصور: طب لما يحصل رفض للمكان البديل يا سيادة اللواء
ل.سيف الإسلام عبد الباري: أنا هقول لحضرتك على حاجة
حنان منصور: يعنى يحدث رفض من الأهالي ، من أصحاب المحال ، من البائع الجائل دلوقتى اللواء إسماعيل بيقول احنا مش بنتعامل معاهم على إنهم قطاع طريق بل بالعكس
ل.إسماعيل عز الدين: لازم حضرتك أوجد لهم حلول من خلال أسواق والسيد رئيس الوزراء طلب مبلغ 72 مليون جنيه لإنشاء 18 سوق ده كان في أثناء بحث مشكلة الباعة الجائلين
حنان منصور: طب اعتراضهم ليه يعنى إيه الأسباب نبسطها للناس
ل.سيف الإسلام عبد الباري: هقول لحضرتك لماذا يعترضوا أولا احنا لما نضع قرارات أو بننظم أو بنضع حلول نراعى فيها تماما مصلحة البائع المتجول ومصلحة صاحب المحل والشارع نفسه يعنى الرصيف للمواطن يمشى والشارع للعربيات وحق سيولة حركة المواصلات اللي بتيسر لي الكثير
حنان منصور: طب إذا كان حل بيرضى جميع الأطراف
ل.سيف الإسلام عبد الباري: لا اللي بيرفض بقى صاحب مصلحة خاصة وأحيانا بتكون غير قانونية أنا أكون صريح صاحب المحل اللي يرفض إن البياع يقف في الشارع في مكان أنا عامل له غلق للبياعين محدش يقرب من الرصيف بتاعه علشان هو سيادته اللي عايز يشغل هذا الشارع يبقى الكلام غير قانوني يعنى أنا صاحب محل أدامه رصيف همنع له أي إشغال أدام منه وهنظم عملية تنظيم نهر الطريق اللي أنا أصلا قافل هذا الشارع ما بتمرش فيه عربيات علشان مش هتأثر معايا في الحركة المرورية حطيت فيه بياع بدل ما يقعد في شارع طلعت حرب بنقله في شارع أنا قافله مافيهوش أصلا مرور مقفول من 15 سنة
حنان منصور: لكن انت يعنى بشكل حتى لما اتكلمت معاهم يا سيادة اللواء وجدت أسباب اعتراضهم منطقية أو موضوعية
ل.سيف الإسلام عبد الباري: أنا جبت عندي في المكتب 5 ممثلين عن شارع الألفي منهم محل كبابجي الألفي وكذا وخرجوا من عندي مبسوطين تماما وبيقولوا متشكرين احنا وراءك في كل حاجة فيه محل بتاع كهرباء يا إسماعيل ، محل كهرباء على مقهى وللا مقهتين اللي هم يشغلون الشارع بالشيشة وإشغال الشارع كله بالكامل رافضين ، رافضين ليه أصل اللي هييجوا هنا البياعين دول بلطجية يا سيدي دول مش بلطجية احنا عاملين لاجل التنظيم وفيها شرطة المرافق والحي وكذا ، وكذا ، وكذا يعنى فيه أمور كده يعنى نقول لصاحب المحل الثاني اللي بيرفض إن هو بيأجر المكان اللي أدامه للبياع وهو مستفيد منه
حنان منصور: يعنى أفراد أصحاب مصلحة كيف يتعامل الأمن مع تضارب هذه المصالح
ل.إسماعيل عز الدين: ما أنا زى ما بقول لحضرتك احنا ما بنتعاملش معاهم على إنهم يعنى دى ناس عايزة تاكل لقمة عيش حاليا بنحاول إن احنا نوجد لهم أسواق بديلة دى نمرة واحد ، بنحاول نسلط الضوء الإعلامي بكثافة على المشكلة وأسبابها وفحص أسبابها ، بنحاول نوجد لهم رابطة تجمع الباعة الجائلين وتكون أداة الوصل بينهم من جميع الأجهزة وبالفعل وبنغلظ القانون بحيث إن احنا ننزل وننفذ القانون يبقى فعلا مجدي البياع اللي تم تنفيذ القانون عليه لن يعود إلى مكانه مرة أخرى القانون لم يصدر حتى تاريخه إلى أن يصدر يبقى احنا المنوط بنا تنفيذ القانون أقول لحضرتك على حاجة ، متى يبدأ دور الشرطة بعد قيام الأجهزة المحلية اللي هي زى سيادة اللواء سيف أوجد إن هيتم النقل
حنان منصور: ما هي أوجدت الحلول
ل.إسماعيل عز الدين: أخدها وخططها اجتمع مع البائعين للاتفاق معهم على كده وبعد كده يبدأ دور الأمن بعد كده
حنان منصور: يعنى دور الأمن دور لاحق
ل.إسماعيل عز الدين: أيوه
حنان منصور: مش في نفس الوقت
ل.إسماعيل عز الدين: احنا معاونة للأجهزة المحلية في إعداد ذلك لإن فيه لجان بتشترك مع رؤساء الأحياء في تحديد الأماكن ، الأماكن المناسبة لنقل البياعين إليه وبعد كده بييجى دور الأمن احنا اتفقنا إن احنا ننتقل لهذا المكان والمفروض ننتقل له فيه ناس هتخاف وهترفض وهتستمر يبدأ دور الأمن وهو الوقفة ضد الخروج على أي شرعية
حنان منصور: طب بصراحة يا سيادة اللواء عندما عاد رجل الشرطة مرة أخرى إلى التعامل مع المواطن العادي هل وجد فرق يعنى اللي بيتقال دلوقتى إن الشعب أو الباعة الجائلين بالتحديد طالما احنا بنتكلم في المشكلة يقول لك احنا غلبنا الحكومة ما حدش يقدر يكلمنا احنا ما حدش يقدر يعمل لنا حاجة فعند العودة الآن مظاهر الانضباط التي بدأت بدأ يشعر بها المواطن هل هناك اختلاف في المعاملة وجدتها من المواطن العادي تجاه رجل الشرطة والعكس
ل.إسماعيل عز الدين: هو حضرتك المواطن بيبقى في قمة الاستقبال لضابط الشرطة وهو بيقوم بتنفيذ واجبه في الشارع يعنى حضرتك لو تحضري معانا حملة من الحملات وبيشوفوا كثافة وتواجد ضباط الشرطة الناس داخل السيارات والناس المارة في الشارع بيقفوا معانا على جميع المستويات بيقفوا مجموعات علشان يؤازروا الشرطة في أداء عملها ومبسوطين جدا بعودة الأمن احنا حضرتك الشرطة موجودة والمواطن واقف النهاردة مع ضابط الشرطة أكثر من أي وقت ثاني ونتمنى ، المشكلة في حالة توفير مكان بديل له ولم ينتقل إليه يبدأ دور الأمن هنا إن أنا أبدأ أنفذ عليه القانون
ل.سيف الإسلام عبد الباري: احنا وفرنا الأماكن البديلة فعلا والأماكن دى في وسط المدينة في منطقة سكنية البائع قاعد دلوقتى فين ، قاعد في نهر الطريق جايب دلوقتى طاولة بيبيع فيها في نهر الطريق بيعطل حركة المرور أنا قلت له اتفضل يا سيدي بدل ما انت قاعد في نهر الطريق ده أقعد في نهر الطريق اللي أنا قافله ده إيه المشكلة وده حل عادل لا بيحتاج صرف ولا تجهيزات ولا بيحتاج أي حاجة لحين الانتهاء من المشاريع اللي قال عليها إسماعيل بيه اللي هي الأسواق يعنى لا مبرر له ، أنا ما حاربتوش في أكل عيشه أنا خليته ياكل عيش في نفس المكان بس اللي هو متضرر بهذا البلطجى اللي كان بيأجر له المكان القديم لما نصدر قرارات لابد أن تكون فيه هيبة للدولة
حنان منصور: هيبة ما هو
ل.سيف الإسلام عبد الباري: وأي مشروع في بداياته تحصل بيقتل فيه الكلام وبيحصل فيه تعثرات وبتاع لما جينا نخلى شارع القصر العيني اتجاه واحد مش حصل اعتراضات وبعد كده اتنفذ المشروع ما بقاش متصور دلوقتى إن شارع القصر العيني يبقى اتجاهين ثاني أنا اللي أقصده إيه قرار الدولة بيبقى لصالح المواطن يا جماعة احنا الرأي البناء احنا مستعدين نناقشه ونشوفه وإذا كان فيه حاجة غلط نعدلها إذا كانت الناس تحب أماكن ثانية يقولوا لنا عليها واحنا نعدلها
حنان منصور: طب سيادة اللواء فيه دول أخرى زى مصر بتعانى من مشكلة الباعة الجائلين بتعانى من مشكلة العمالة غير المنتظمة هل تم مثلا معرفة تجربة من تجارب هذه البلد الناجحة ممكن نطبقها في مصر
ل.سيف الإسلام عبد الباري: أنا هقول لحضرتك أنا شفتها بنفسي في الخارج احنا عندنا السلوك فيه شئ من الانفلات أنا لو جبت البائع المتجول قلت له هتقف هنا ساعتين هلاقيه قاعد طول النهار مش هيمشى أنا كنت بسحب الفندق وأحضر مؤتمرات فيه ميدان كبير من 7 ل 10 مليان بياعين الساعة 10 بالضبط ما تلاقيش ولا بياع في الشارع فيه انضباط وفيه سلوك والراجل بيحافظ على بلده وبيحافظ على نظافتها أنا لما أقول إن هو هينزل يبيع في ميدان التحرير يوم الجمعة فيه إيه أكثر من كده فيه إيه أحلى من ميدان التحرير يبيع فيه لما أقول هيبيع في ميدان عبد المنعم رياض يوم الجمعة ما أقدرش استغنى بقى عن الساحات في الميادين دى إلا يوم الجمعة بس والكلام ده مطبق في جميع أنحاء العالم ميدان محترم شهير ييجوا يروحوا عاملين فيه سوق يوم واحد كده يقعد فيه شوية ويمشى لازم الباعة المتجولين يلتزموا بالأماكن المحددة لهم ولازم يكون سلوكهم حضاري يليق بمصر وباسم مصر والقاهرة بتاعتنا اللي هي العاصمة بتاعتنا ترجع بقى نظيفة زى زمان
حنان منصور: ما هو دلوقتى الشرطة بتقول إن الأمن خطوة لاحقة بعد صدور القانون وبعد
ل.سيف الإسلام عبد الباري: احنا كلنا شغالين في مركب واحد وكلنا شغالين مع بعض وبنحدد الأماكن مع بعض يعنى العملية مفيش فيها أنا ببدأ امتى ودوري يبدأ امتى احنا كلنا مع بعض
ل.إسماعيل عز الدين: احنا طبعا ما نقدرش نعمل مواجهة مع الأعداد الرهيبة اللي موجودة الباعة الجائلين طلبنا وجميع الأجهزة وافقت على إنشاء أسواق بديلة لهم اتخصصت مبالغ ولكن لم تنشئ هذه الأسواق حاليا دى الحلول الآجلة طالبنا تغليظ العقوبة ولم تصدر حتى الآن بإذن الله لما تصدر هيبقى فيه نوع ثاني خالص حاليا احنا بنعمل إيه احنا بندعم الأجهزة المحلية في أداء عملها في جميع الأوجه بننزل في حالة البياعين احنا بننزل نعاونهم لنقل البياعين ، بنعمل حملات يومية على مستوى القاهرة بنزيل جميع الباعة الجائلين في جميع المناطق الشعبية وغير الشعبية وبقول لحضرتك حملات يومية وإعلاميا بتنزل وسائل إعلام كثيرة جدا بتصور مجهود الحملة وإن احنا يعنى ما بنتقاعسش عن تنفيذ القانون ولا احنا مستنيين الحلول الآجلة لا احنا يوميا بنشتغل ويوميا بنقف ضد البائع الجائل ويوميا بنفتح الطرق ويوميا بنشتغل وبننفذ القانون وإلا حضرتك ما كانش يبقى فيه مواطن مصري عرف يمشى في شارع من شوارعها وخاصة الشوارع العامة والميادين
حنان منصور: يعنى مثلا يعتبر فيه برضه باعة جائلين كثير ، فيه دلوقتى فيه كراسي بتتحط الناس بتقعد تشرب فيها قهوة تشرب حاجة ساقعة العربيات كمان بتعمل كده
ل.إسماعيل عز الدين: بننزل وبنعمل محاضر وبتعرض على النيابة وبننفذ القانون والقانون غير كافي لردع هذا البائع هو مهنة بيزاولها ما بنفقش فيها أي نفقات وتدر عليه عائد هائل والقانون غير كافي لردع هذا البائع
حنان منصور: يعنى المشكلة في تنفيذ القانون يعنى القانون حتى بعد تغليظه المشكلة ستكون في تطبيقه
ل.إسماعيل عز الدين: الشرطة قادرة إنها تواجه الخروج على القانون طب ما احنا النهاردة بننفذ القانون حضرتك ، القانون البائع النهاردة بييجى يتمسك بيروح يدفع 100 جنيه ويقدم طلب ياخد بضاعته بيرجع ثاني نجيبه ثاني يوم وثالث يوم ورابع يوم ما هو ده القانون ولكن لما البائع يتمسك ويلاقى نفسه اتحبس واتصادرت البضاعة بتاعته لن يعود إلى هذا المكان وهيلتزم هنقول له فيه سويقة هتتنشئ هنا فيه سوق هتتنقل له هنا هينفذ القانون
حنان منصور: طب حضرتك من شوية بتقول كل يوم احنا كل يوم في حملات مستمرة كل يوم في حملات مستمرة هل الشارع المصري محتاج تواجد 24 ساعة يومي تطبيق القانون مطلوب يوميا التواجد الأمني
ل.سيف الإسلام عبد الباري: التواجد من جميع الأجهزة مش من الأمن فقط دى مشكلة بتتظافر فيها جميع الجهات احنا ماشيين بخطة احنا دلوقتى ما شيين مع الباعة المتجولين وعملنا لهم الأماكن البديلة واحنا ماشيين بننفذها وعلى فكرة هي المشكلة في التنفيذ في منطقتين بس منطقة الألفي ومنطقة الشريفين ودي فيها 200 بياع والثانية فيها 168 بياع بقية المناطق بقية الأحياء فيه عند سيادتك تغطية إعلامية من جميع القنوات التليفزيونية والمحطات أظن بتشجع البائعين نفسهم أظن نزلوا بولاق وشافوا الأسواق والحاجات اللي عملناها لهم وفى الجمالية الساحات اللي اتعملت واتنقلوا فيها البياعين هناك يعنى شغالين فيها لكن المكانين دول اللي فيهم اعتراض لوجود أشخاص هيتسبب التنفيذ لهم بغلق منافع غير قانونية
حنان منصور: هل هؤلاء الأشخاص أسماءهم معروفة ومرصودين ومعروف اتجاهاتهم
ل.سيف الإسلام عبد الباري: أنا بتكلم أنا دلوقتى في مرحلة حوار ونقاش عشان ما يحصلش صدام إنما في الآخر هننفذ ، هننفذ وبالقانون هننفذ والمخالف هنتخذ ضده الإجراءات القانونية وهننفذ اللي هو في مصلحة البياع ومصلحة الدولة أنا بقول لسيادتك دلوقتى خدي وعد منى هننفذ ، هننفذ أنا بقول لحضرتك إن فيه حوار في مؤتمر من شوية إن البياعين زى ما قال إسماعيل بيه أصحاب شهادات والكلام ده كله هو التنفيذ بالقانون اللي سيادتك قلتي عليهم كوبري أكتوبر وكوبري قصر النيل والحاجات دى وكورنيش النيل
حنان منصور: لإن فيه ضرر
ل.سيف الإسلام عبد الباري: دول هيزالوا تماما
حنان منصور: فيه ضرر على الاقتصاد وعلى السياحة
ل.سيف الإسلام عبد الباري: أنا هقول لحضرتك هيزال تماما وليس لهم بديل عندي لإن ده قاعد بياخد أنبوبة بوتاجاز ، قاعد في وسط الشارع بيعمل شاي وقهوة عامل لي قهوة على الرصيف هذه خطورة ما تتعملش في الشارع ولا في أي سوق دول فئة طفرة كده ظهرت خلال الأحداث اللي فاتت مؤخرا وأنا بأعد حضرتك ومعانا شرطة المرافق وشرطة البتاع أن هذه الظاهرة هتنقضى تماما خلال 3 ، 4 أيام عشان منظمين حملات
حنان منصور: في خلال
ل.سيف الإسلام عبد الباري: 3 ، 4 أيام بالكثير لإن احنا دلوقتى مشغولين بحتة سوق اليوم الواحد وهنطلع على كوبري أكتوبر حملات مكثفة وأنا هبقى معاهم هنقضى على كل ده بالكامل كل اللي موجودين على الكوبري من بائعين ومن كراسي هتتشال وعلى فكرة احنا شلناها بعد الأحداث
حنان منصور: المواطن فعلا يشعر لكن من كتر إن المواطن عاوز أمن واستعادة الانضباط واستعادة الهيبة عايز هل من مزيد ولكن
ل.إسماعيل عز الدين: ما أنا بقول دلوقتى لازم تشتغل جميع الأجهزة في تنفيذ القانون النهاردة لما آجى أخش على سوق أزيله ببص ألاقى بعض الناس
حنان منصور: يعنى ممكن تفسر لي يا سيادة اللواء ما هي الأجهزة المنوط بها وكيف يساعد يعنى أنا كمواطن كيف أساعد
ل.إسماعيل عز الدين: هقول لحضرتك أنا المفروض النهاردة نازل حملة في منطقة معينة بلاقى ناس بتقول حرام عليكوا ده بياع بياكل لقمة عيش ما تسيبه في حاله كلمة في كلمة في تجمع بتعوق عملنا ولكن النهاردة لو كل مواطن وقف معانا ومع ضابط الشرطة ومع رئيس الحي ومع المهندسين ومع الأجهزة كل الأجهزة اللي بتقوم بالتنفيذ وقف معانا ده هيبقى له أثر كبير حتى أثر معنوي كمان للقوات إن المواطن مبسوط وحاسس إنك بتعمل عمل بيفيد البلد وبيفيد المواطن دى طبعا بتعطيهم دفعة معنوية جميلة إنما لما نلاقى مقاومة من المواطن العادي احنا بنهيب بالمواطنين كل المواطنين النهاردة في سبيل هدف الشرطة واستعادة الأمور الكل يتكاتف معانا في تنفيذ القانون
حنان منصور: يعنى حضرتك بتقول الناحية المعنوية إن هو لا يعيق العمل طب والله سيبه ياكل عيش ده بيسترزق
ل.سامح عز الدين: انتوا جايين ع الغلابة انتوا سايبين مش عارف إيه
ل.سيف الإسلام: الكراسي اللي موجودة على كوبري أكتوبر مين اللي بيقعد عليها
حنان منصور: الناس
ل.سيف الإسلام عبد الباري: ليه ما يقاطعش الأماكن المخالفة ليه ما يقاطعش المكان المخالف ويقعدوا في المكان السليم ده سلوك لازم ينتشر أنا لما ما أقعدش في المكان اللي أعلى كوبري أكتوبر الراجل لما ما يلاقيش زبون هيسيب المكان ويمشى ده بالإضافة إلى إن احنا متكفلين بإزالة هذه المخالفات لكن أنا بتكلم على دور الأجهزة الثانية أبقى أنا قاعد في نهر الطريق بشرب كوباية شاي وأنا مواطن أقبلها على نفسي ازاى
حنان منصور: إذن في نهاية الحلقة نقدر نقول إن أهم حاجة بعد 25 يناير بعد ثورة 25 يناير أن نهتم فعلا بالاتقاء بالعنصر البشرى يعنى مش إشغالات طريق فقط ، إشغالات التفكير اللي المواطن داخل عقله وداخل مزاجه يبعد إشغالات الأفكار الخاطئة ده المطلوب أساسا يعنى
ل.إسماعيل عز الدين: أنا عايز مظهر حضاري للشارع طب ما تفكر انت إيه دورك يعنى لولا تواجدك انت ما انت بتشجعه
حنان منصور: نختم الحلقة بكلمة إزاحة الصدأ من التفكير أو من العقل المصري حتى يعود العقل المصري وطنيا مخلصا ضميره صاحي الانضباط الداخلي يؤدى إلى الانضباط الخارجي البشر، البشر، البشر بنجيي حضراتكم جدا نشكركم جدا على هذا الكلام ومبسوطين من هذا الوعد إن بعد 3، 4 أيام يعنى إن شاء الله سوف يشعر المواطن العادي سيادة اللواء سيف الإسلام عبد الباري بنشكرك شكرا جزيلا سيادة اللواء إسماعيل عز الدين شكرا جزيلا تنتهي هذه الحلقة من اتجاهات وكانت عن إشغالات الطريق نلتقي الأربعاء القادم إن شاء الله شكرا لكم سيداتي سادتي والسلام عليكم ورحمة الله وبركاته