كلام مسئول

الجمعة 3/12/2010
محمد صلاح : يا مساء الخير أتنقل برنامجنا كلام مسئول لديكور جديد بعد أكثر من 80 حلقة إشتغلنا فيها على الديكور القديم اللى جواه طرحنا كل القضايا اللى بتهم الوطن والمواطن إذا كان الديكور اللى أحنا واقفين فيه النهارده جديد وأستديو جديد لكن كلام مسئول هيفضل يناقش وبكل إهتمام وتقديرإحترام عقلية المشاهد وقضايا الوطن والمواطن مع كل ضيف سواء مسئول فى منصب من الحيثية والجدارة بحيث أنا يكون مسئول عن كلامه معانا ومعاكم مش من الحاجات المريحة أنا عارف لوزير الإعلام السيد أنس الفقى انه حد يشكره فى برامج التليفزيون لكن أنما بوجهله التحية على إهتمامه بكلام مسئول وعلى مساحة الحرية الكبيرة اللى أحنا بنتحرك فيها كمان رئيس مركز أخبار مصر الأستاذ عبد اللطيف المناوى لابد إنى أحيه على إهتمامه بالبرنامج وكمان على فكرة وتنفيذ الديكور الجديد النهارده يا جماعة أحنا بين ميعادين أو بين جولتين فى إنتخابات الطحن اللى هى إنتخابات مجلس الشعب خلصت جولة وفاضل جولة الإيعادة عملت أيه الإنتخابات فى شوارعنا وميادينا وحوارينا ؟ عملت أيه يا سياد النائب سواء كسبت ولا خسرت بالإعلانات اللى من كل لون وورق وقماش اللى على كل حيطة وكوبرى وعمود نور ومابين بلكونتين ؟ ما فرقتش بقى ما بين شارع هادى وشارع صاخب ال5 تلاف مرشح عملوا بروباجندا جامدة قوى صرفت كام حكاية الدعاية دى ؟ رسمى ومن تحت الترابيزة رسمى المفروض نضرب 5000 مرشح فى 200 ألف جنيه يطلعوا مليار جنيه تحت الترابيزة بقى وتقديرات بقى ما نعرفش أولها من أخرها هنعتمد مثلا على إتصرف فى الإنتخابات الأخيرة سنة 2005 إتقدرت ب 6 مليارات جنيه لو راعينا بقى فرق الأسعار والحاجات اللطيفة دى ووسائل الدعاية وإرتفاع أسعارها من 5 سنين فاتت ممكن نوصل ل 10 مليار عموما دا موضوع تانى المهم أننا كل يوم نتكلم عن العشوائية والعشوئة فجت الإنتخابات والدعاية وزودت العشوائية والعشوئة حواليها هو أحنا ناقصين ؟ عن اللى عملته فينا الإنتخابات ودعايتها هيكون لينا النهارده كلام مسئول
تقرير
حضرت الدعاية الإنتخايية بقوة فى الإنتخابات الحالية لمجلس الشعب فى مصر وهى إذ مثلت مظهرا من الصراع الساخن المحتدم بين جميع القوى والمرشحين المتنافسين على مقاعد المجلس وهى تنفق ببذخ لم تراعى أبسط قواعد الدعاية والذوق السليم وخرجت على كل القوانين وتنظيم يخص الأحياء والمدن أوالمحافظات الأصل فى الدعاية والإعلان والعلاقات العامة ودعوة الجمهوروجذبه هو التنظيم وليس الفوضى وبمجرد إعلان القوائم النهائية للإنتخابات إعتبر المرشح ومؤيدوه الدائرة مستباحة وأن أبعادها الجغرافية من أملاكا الشخصية يبدوا مقبولا تنظيم حملة دعائية قوية للمرشح لإعلام الناس وشرح البرامج ولكن الإنفاق المبالغ لجذب الناخبين والإلحاح على حواسهم إتخذ رغم الظروف الإقتصادية الراهنة وسائل تتسم بالرفاهية من أوراق دعاية ولافتات فاخرة يرى الكثيرون أن الدعاية المفرطة تخل بتكافؤ الفرص بين المرشحين ولكن القضية الغائبة هى إنعدام الحرص على الشكل الحضارى للدعاية والإلتزام بأماكن محددة وبوسائل لا تترك تشويه وتلقى الدائرة فيما بعد على زيادة التلوث البصرى على كاهل المحليات
محمد صلاح : إن كانت الدعاية ضرورية وهى فعلا ضرورية ما هو لازم الدعاية توصل ما ينفعش الحاضر يعلن الغايب زى زمان لازم الغايب كمان يكون عارف والميت إن أمكن هنوصل هنوصل لكل الناس بس كان ممكن الإلتزام بسقف ال200 ألف وكمان الإلتزام نحط الإعلانات فى الأماكن المخصصة للإعلانات بدل مولد سيدى الإنتخابات والتحرش بأى حيطة فاضية ألزق ما يهمش فى سبيل تحت القبة كل يهون رئيس جهاز التنسيق الحضارى الأستاذ سميرغريب هيكون لينا معاه كلام مسئول أرحب برئيس الجهاز القومى للتنسيق الحضارى الأستاذ سمير غريب منورنا يا أستاذ غريب
أ/سميرغريب: أنت اللى منور يا بيه
محمد صلاح : حظنا حلو أنو رئيس الجهاز القومى للتنسيق الحضارى يكون معانا فى أول يوم فى الديكور الجديد أيه رأيك فى الديكور ؟
أ/ سميرغريب: حلو
محمد صلاح : تنسيق حضارى يعنى ؟
أ/ سميرغريب: طبعا حضارى
محمد صلاح : حضارى يعنى ؟
أ/ سميرغريب: طبعا حضارى وأنا أحب أحيى مهندس الديكور اللى عمله الديكور حلو والجو حلو والاضاءة حلوة
محمد صلاح : إن شاء الله نعمل حلقة حلوة أستاذ سمير أنتخبت ؟
أ/ سميرغريب: طبعا
محمد صلاح : فى دايرة أيه ؟
أ/ سمير غريب: الدقى
محمد صلاح : وأنت بتنتخب والأيام اللى قبل الإنتخابات ملاحظاتك أيه على الأسلوب اللى أتبع فى موضوع الدعاية عندك ملاحظات ؟ شوفت بإعتبارك متخصص طبعا ومسئول عن الجهاز القومى للتنسيق الحضارى كان عندنا تنسيق ؟
أ/ سمير غريب: لأ عمرنا ما كان عندنا تنسيق الفكرة انه أصل الدعاية ليها أساليب مختلفة يعنى ممكن إتصالات مباشرة بين الناخب وبين المرشح ومؤتمرات ومش عارف أيه إنما أنا معنى أو الجهاز القومى للتنسيق الحضارى معنى بالصورة البصرية
محمد صلاح : أحنا معنيين معاك النهارده بالصورة البصريه حصلها أيه بقى فى الإنتخابات ؟
أ/ سمير غريب: زى ما أنت شوفت يعنى الصورة البصرية يعنى شوشرة جامدة
محمد صلاح : إدينى تفاصيل ؟
أ/ سميرغريب: يعنى طبعا بس دا سلوك قديم قوى يعنى مش بس فى الإنتخابات فى أى حاجة الواحد لما بيجى بيحب يعلن عن نفسه أوعن حاجة ما بيبصش طبعا أحنا عندنا دا موسم الإنتخابات هو موسم رواج الخطاطين لو أن أنا لاحظت طبعا إن هما مهتموش قوى بالخطاطين السنادى يعنى فيه خطوط عجيبة جدا فى بعض الملصقات أه يعنى مفيش حتى الإهتمام بجمال الخط وحلاوة الخط واليفطة بتضاء حتى المرادى من الحاجات اللى أنا لاحظتها كان الأول بيجيبوا خطاطين يبدوا انه الخطاطبن قلوا أو يبدوا انه اليفط كترت فبيبقوا مستعجلين قوى إن هما يكتبوا الأسماء نمرة واحد انه اللافتات القماش دا رواج طبعا لبتوع القماش ورواج للبيكتبوا يفط وإنما بتتحط على قد ما يقدر يعنى
محمد صلاح : اللى يطول حتة بيضرب فيها إعلان ؟
أ/ سمير غريب: غير كده اليفط الورق أو البوسترات أو الملصقات الورقية دى بتتحط فى أى حتة
محمد صلاح :اللى يشوف حيطة فاضية يلزق
أ/ سمير غريب: وعمدان النوروالشجر الملاحظة كمان الباردة فى الميادين تبقى المعلينيين أوالمرشحين حزموا الميدان من فوق
محمد صلاح : عندنا الميادين بتتحزم فى الإنتخابات ؟
أ/ سمير غريب: بيحزموا من فوق ما هو مش هيقدر يحزموا من تحت حزموا الميدان باليفط يعنى الحبل متصل الحبل دائرى أو حبال دائرية متصلة عملوا دايرة من فوق بحيث انه أنت لما تخش تلقى فيه ميدان تانى فوق راكب على الناس اللى تحت فأنا رأيى انه الشيىء اللى بينقلب إلى ضده اللى بيزيد عن حده بينقلب لضده دا مبدأ عام يبدوا انه فى حمى الدعاية الإنتخابية انه من كترالإعلانات الناس ممكن ما تشوفش الإعلانات ممكن ما تخدش بالها
محمد صلاح : بإعتبارك خبيريا أستاذ سميرتوصف المشهد مشهد الدعاية قبل الإنتخابات فى الجولة الأولى اللى دارت أخيرا وطبعا قبل الجولة التانية اللى هى بعد كام يوم توصف مشهد مصر بى أيه ؟
أ/ سمير غريب: سوق كبيرجدا سوق بمعنى أنت لما بتخش السوق بالطريقة بتاعتنا بتلقى كل داخل فى كله السلع والبضاعة والبايعين والأصوات والميكرفونات والأصوات البشرية مع كاسيتات مع راديوهات كل دا فى السوق مشهد سوق كبير بيبقى العمران المصرى المدن والقرى والشوارع المصريه عبارة عن سوق كبير
محمد صلاح : طب المفروض دور الجهاز أيه هل أنت رفضت الكلام ده ؟
أ/ سمير غريب: ما أنا من الإنتخابات اللى فاتت برضه
محمد صلاح : فى 2005 ؟
أ/ سمير غريب: أه
محمد صلاح : وما حصلش حاجة ؟
أ/ سمير غريب: لانه دى ثقافة لازم تتغيرثقافة الناس ثقافة الناخبين وثقافة المرشحين العملية الإنتخابية دى عملية طرفاها المرشح والناخب لازم ثقافتهم هما الأتنين تتغير وخصوصا ثقافة المرشحين لأن المرشح هنا هو اللى بيعمل الدعاية لنفسه
محمد صلاح :ممكن القانون يفرض على الجميع يعنى ؟ يعنى فيه قانون بيلزم الناس يعنى انه يتبع أساليب معينة فى الدعاية ؟
أ/ سمير غريب: القانون ما بيتعملش للناخبين ما بيتعملش للإنتخابات مخصوص عندنا قانون للتنسيق الحضارى
محمد صلاح : بيقول أيه بقى القانون ؟
أ/ سمير غريب: قانون 119 لسنة 2008 فى الباب التانى فى الفصل التانى الخاص بالإعلانات واللافتات
محمد صلاح: فى أى موسم؟
أ/ سمير غريب: ما قلش الإعلانات أواللافتات الخاصة بالإنتخابات لأن القانون ما بيتفصلش على حدث معين أو نطلع قانون مخصوص عن الدعاية الإنتخابية ولا حزب ولا مرشح ولا حاجة فالإعلانات واللافتات يدخل ضمنها لافتات الدعاية الإنتخابية
محمد صلاح: قولى أيه مواد القانون اللى تم خرقها بواسطة المشاهد اللى بنشوفها ؟
أ/ سمير غريب: مفيش قانون أصلا مفيش علاقة باللى بيحصل بالقانون
محمد صلاح: دا حاجة خارج القانون المريخ يعنى حاجة فى كوكب تانى ؟
أ/ سمير غريب: يعنى بناءا على القانون ده بينص على انه الجهازيضع أسس ومعايير الإعلانات واللافتات يعتمدها المجلس الأعلى للتخطيط التنمية العمرانية برئاسة الأستاذ الدكتوررئيس مجلس الوزراء وقد حدث ذلك فى الجهازعلى أسسس اللافتات وإعتمادها رئيس الوزراء اللى بيحصل ده لا ليه علاقة بالأسس ولا بالمعايير ولا بالقانون
محمد صلاح:يعنى ما أقدر أقولك خرقوا القانون فى أيه ؟
أ/ سمير غريب: خارج القانون أصلا مالوش علاقة إطلاقا
محمد صلاح: أدينى نموذج؟ يعنى القانون ممكن يقول أيه علشان نعرف حجم اللى حصل فى البلد يعنى ؟
أ/ سمير غريب: القانون بيقولك ان الإعلانات اللافتات ما تتحطش على واجهات المبانى
محمد صلاح: هو فيه واجهات عندنا ؟
أ/ سمير غريب: وبيقولك انه الإعلانات ما هوخلى بالك دى مش لافتات يافطة الإنتخابات دى إعلان إعلانات عن مرشحين بقصد الحصول على مكسب للمرشح لكل مرشح انه يفوز فى الإنتخابات كل مرشح بيعلن عن نفسه لكى ينتخبه الناس ويفوز بالكرسى بتاع الدايرة فهنا عملية تسويقية عملية تسويق انه نائب عايز يسوق نفسه علشان فى النهاية يحقق النتيجة انه يسوق نفسه للناخبين علشان الناخبين ينتخبوه دى عملية تسويقية داخلة فى الإعلان اللافتات ممنوعة اللافتات على واجهات المبانى من حيث المبدأ مفيش وخصوصا على المبانى التراثية والمبانى المتميزة يعنى فيه مناطق زى مناطق القاهرة الخديوية ومناطق القاهرة الخديوية ومناطق جاردن سيتى والزمالك ومصر الجديدة والمنيل كل دى مناطق فى القاهرة الكبرى مناطق تراثية متميزة
محمد صلاح:مش باينة دلوقتى متغطية بيافطه؟
أ/ سمير غريب: دا من حيث الواجهات والمبانى من حيث الإعلانات متحد لها أماكن معينة بالأسس والمعايير
محمد صلاح: فين دى فى مصر ؟
أ/ سمير غريب: فى القانون بيقولك القانون نظريا حاجة واللى بيحصل فى الشارع حاجة تانية فالإنتخابات زيها زى أى حاجة تانية الإعلانات بتاعتها بتلتزم بالأماكن المخصصة للإعلانات فى الشوارع والميادين وهذه الأماكن محددة فى دليل أسس ومعاييرالإعلانات وللافتات المعتمد من المجلس الأعلى للتخطيط والتنمية العمرانية فزيها زى أى شارع مصرى تتحط فيه المكان المخصص للإعلانات
محمد صلاح: أستاذ سميرقضيتنا دلوقتى فى الإنتخابات بس ولا حتى قبل الإنتخابات مفيش إلتزام أصلا بالمعاييرالسليمة لوضع الإعلانات؟
أ/ سمير غريب: مفيش كلام آمال أيه ؟
محمد صلاح: حتى قبل الإنتخابات ؟ الإنتخابات زودت المشهد سوءا
أ/ سمير غريب: دى أحد التحديات اللى موجودة أمام جهاز التنسيق الحضارى فيه تصليح التشوهات اللى حصلت
محمد صلاح: طب أنت حضرتك قلتى دلوقتى انه حصل فى الإنتخابات اللى فاتت فى 2005 طب ليه ما حاولش الجهاز انه يتفادى تكرار ما جرى فى 2005؟
أ/ سمير غريب: لأ هقول لحضرتك حصل خلى بالك انه 2005 ماكنش فيه قانون كان رفض موجود بين الجهاز ثانيا ما كنش فيه أسس ومعايير للإعلانات
محمد صلاح: أهو بقى فيه قانون وبقى فيه أسس
أ/ سمير غريب: اللى حصل أيه بقى هذه الأسس والمعايير القانون طلع فى أخر 2008 اللايحة التنفيذية بتاعته طلعت فى أوائل 2009 الأسس والمعاييرطلعت السنة اللى فاتت أحنا أولا القانون واجه التنفيذ بمجرد صدوراللايحة التنفيذية بتاعته بدون إخطاريعنى مش لازم أنا أبعت لسيادك خطاب وأقولك انه فيه قانون طلع سنة كذا من فضلك ألتزم لأن هذا القانون بينزل فى الجريدة الرسمية وهذا القانون بيوزع عند كل الملتزمين بتطبيقه
محمد صلاح: طب جاوبنى على السؤال بقى .
أ/ سمير غريب: ما هو دى الإجابة على السؤال الإجابة طويلة إلا لو كنت أنا عايزأقولك كلمة واحدة
محمد صلاح: ييعنى اللى أنا أقصده يا أستاذ سميرانه أنتم رصدتم قبل صدور القانون مساوىء التلوث السمعى والبصرى اللى حصل فى إنتخابات 2005 وبالتالى متهيألى انه خبراء الجهازتوقعوا أحنا عارفين نفسنا أنت كنت متوقع انه دا هيتكرر وبقى فيه قانون أيه بقى الخطوات اللى كان المفروض تتعمل وما تعملتش أو أيه الخطوة اللى إتعملت وما إستمعتش ؟
أ/ سمير غريب: اللى إتعمل انه القانون طلع وبيواجه التنفيذ من السنة اللى فاتت والأسس والمعايير طلعت وإعتمدت ووزعتها على جميع محافظات مصر بكميات الألاف النسخ ونشرناها على الموقع الأليكترونى للجهازالقومى للتنسيق الحضارى وبعت لكل المعنينيين بالإعلانات فى مصرزى جمعيات الإعلانات ووكالات الإعلانات وزى أيضا الهيئات أللى ليهاعلاقة بالإعلانات زى هيئة الطرق والكبارى والمدن الجديدة المجتمعات العمرانية الجديدة لأن هى هيئة المجتمعات العمرانية الجديدة فى المدن الجديدة زى مدينة أكتوبروالتجمع المدن دى أجهزة المدن دى بتتعاقد مع شركات إعلانات لوضع إعلانات فى المدن فإذنا هى ملتزمة أيضا بتطبيق الأسس والمعايير
محمد صلاح:آمال الخرق اللى حاصل دلوقتى دا مين المسئول عنه ؟ والخرق اللى حصل قبل حتى الإنتخابات مين اللى مسئول عنه المحافظين حكم محلى طرق وكبارى السكة الحديد مين اللى مسئول ؟
أ/ سمير غريب: كله لانه تطبيق القانون فى العمران منوط بالإدارات المعنية بالتنمية المحلية اللى هى الأحياء والمدن والمحافظات والمحافظين ورؤساء أجهزة المدن الجديدة والوزارات المعنية بالهيئات لانه وزارة زى وزارات النقل بتعمل إعلانات بتدى تراخيص إعلانات على بعض الطرق مثلا الطرق بتاعتها محطات السكة الحديد وهيئة الطرق والكبارى وكل دا دا أنا بعت لكل دول الأسس والمعايير
محمد صلاح:طب لما جهة حكومية ليه ما بتسمعش الكلام ليه ما بتلتزمش بالقوانين ؟ يعنى برضه المحافظات مثلا فى الشوارع والميادين فى كل المحافظات مضروبة بالإعلانات مفيش محافظ مفيش مسئول حط نزل قال لأ أنا حاطط قواعد للإعلانات هى طبعا اللجنة العليا للإنتخابات حط قواعد تتعلق
أ/ سمير غريب:أنا عايزأقول انه فيه مسئولين إستجابوا يعنى فيه محافظين زى محافظ أسكندرية إستجاب اللواء عادل لبيب وطلع قرارات تنفيذية بإلزام الشركات بالإعلانات وتطبيق الأسس والمعايير بتاعة التنسيق الحضارى فى الإعلانات
محمد صلاح:أه بس فى الإنتخابات برضه العملية باظت شوية؟
أ/ سمير غريب:أه طبعا موسم الإنتخابات أصعب ليه أحنا لما نقدر فى الأول نطبق القانون فى الأيام العادية اللى مفيهاش ضغط إنتخابات يبقى بعد كده نقدر نركز ونطبقه فى الإنتخابات إنما أحنا ما بنطبقهوش فى الأيام العادية فمن باب أولى نطبقه الأول فى الأيام العادية اللى مفيهاش إنتخابات
محمد صلاح:طب أنت متخيل انه المرشح دا مفترض انه هيبقى نائب بعد كده يكون حريص على الذوق العام ويكون حريص على شكل البلد ويكون حريص على انه يطرح أفكار لمواجهة العشوائيات علشان يبقى نائب والناس هتصدقه وممكن يدافع عن مصالح الناس ومن بين برضه مصالح الناس هو تصويرها؟
أ/ سميرغريب:هنا بقى أنا معرفش أزاى نحقق الكلام اللى سيادتك بتقوله لانه دا داخل فى تكوين ثقافة المرشح أنا عايزأقولك على حاجة المرشحين الألاف فيهم ناس ثقافتهم وتعليمهم عالى
محمد صلاح: يعنى من فئات مختلفة
أ/ سمير غريب:المرشح اللى عنده دكتوراه بيعمل إعلانات زى المرشح اللى مش واخد شهادة جماعية سوق يعنى فيه برضه قبل كده هيئة الطرق والكبارى وزارة النقل بعتلهم إنما لما جه المهندس علاء فهمى الحقيقة لاقيت فيه تجاوب الحقيقة مع التنسيق الحضارى وأدى تعليمات فى سبيل الأسس والمعايير بتعاة الملصقات بس برضه لما قال المحافظ المسئول يدى توجيهات بالتنفيذ درجة الإستجابة الحاجة التانية فيه مقاومة من شركات الإعلانات يعنى اللوا عادل لبيب أدى تعليمات الأسس والمعاييروبدأ يشيل فعلا إعلانات فوجئت بى شركات الإعلانات عملت إستغاثة مدفوعة الأجرفى الصحف اليومية فى الصفة الأولى يعنى صرفوا عليها مئات الألاف من الجنيهات
محمد صلاح: يعنى فى مقاومة وأنت بتقام فى إتجاه آخرعلشان تطبق القانون وفى نفس الوقت عندك معركة مع نقابة الأطباء ومع الأطباء تتعلق بى لافتات الأطباء وأنت بتخوض المعركة وداخل فى سجال كبير قوى فى الموضوع وبتحاول تنفذ الموضوع ليه بقى فى الإنتخابات ما حاولتش تنفذ القانون ؟
أ/ سمير غريب: القوى التنفيذية لتنفيذ القانون موجودة فيه مؤسسات التنمية المحلية الجهاز القومى للتنسيق الحضارى لا يملك الأرض الى بيصلحها الأرض اللى بيصحلها بيملكها المحافظين ورؤساء المدن ورؤساء الأحياء وهما أصحاب القرار وهناك سلطة اسمها سلطة المرافق دى تابعة للمحليات يعنى المحافظ يقدر يوجه لمديرشرطة المرافق فى محافظته انه ينفذ كذا وينفذ كذا لإى إزالة الخلافات
محمد صلاح: طب مفيش حاجة حلوة كده فى الحملة الدعائية ؟ ما شفتش لافتات عجبتك مثلا ؟ ما لاحظتش حاجة كده زى ما عجبك الديكور بتاعنا كده ؟
أ/ سمير غريب: فى بعض المرشحين بدأوا حملتهم مبكرا بس إعجابى باليافطة مش معناها انه اليافطة دى محطوطة صح
محمد صلاح: ممكن اليافطة حلوة بس محطوطة فى مكان وحش ؟
أ/سمير غريب: المبدأ غلط لافتات الدعاية الإنتخابية زيها زى إعلان يجب أن تلتزم بالأماكن المخصصة للإعلانات يعنى يافطة حلوة ومحطوطة فى مكان جنينة مثلا أوافق عليها ؟ ما هومفيش إعلان فى الحتة دى مش معناها جنينة ويافطة حلوة يبقى رومانتيكية لأ اليافطة لازم تتحط فى مكان الإعلانات
محمد صلاح: أستاذ سميرمعانا تقرير كده نشوف فيه أراء الناس اللى المفروض إن هما الناخبين بعد كده يعنى نشوف رأيهم كده قالوا أيه ؟ نشوف رأيى الناخب فى الإعلانات اللى قدامه دى كلها ونرجع تانى
تقرير
مواطن: أول مرة أشوف حملة بالطريقة دى ألأول مرة الدعاية كبيرة قوى الإعلانات كتيرة قوى وعلى العربيات وعلى المحلات
مواطن: الصوت الضوضاء أللى هى لحد الساعة 12 بالليل مشغلين أغانى بطريقة فظيعة 3 ساوند على عربية لو فيه تعبان مش هيقدر يرتاح
مواطن : اليفط دى كان الناس الغلابة أولى بيها الكوبرى لسه جديد ومعلقين الورق على الحيطان أزاى تشوه المنظر ده ؟ أزاى أحنا شايفين الكوبرى حتى ما كملش من تحت
مواطن: اليفط دى عاملة إحباط للناس أللى مش معاها فلوس أقل يافطة بتتكلف بال300 ، 400 جنيه وفيه ناس مش لاقية تجيب كيلو لحمة ب 20 جنيه
مواطن : يعنى دا شيىء مستمر وشيىء موجود بيتعمل فى كل إنتخابات لكن بعد كده بتيجىى المحافظة وبيجى الحى وبيبتدى يرفع الحاجات دى كلها وياخد وقت ومجهود وطبعا تكلفة على أساس انه يشيل الحاجات دى كلها
مواطن : أنا بدل ما أعمل يافطتين وتلاتة أنا أعمل ندوة للناس دى وأتكلم عنهم واللى فيه النصيب أديهلهم بدل اليفط
محمد صلاح: الراجل بيقولك أقل يافطة 200 ، 300 جنيه وفيه ناس عايزة 20 جنيه تجيب بيها ربع كيلو لحمة مش نص ولا حاجة مش فيه تناقض شوية يا دكتور سمير انه إن الناخب اللى بيعمل اليفط دى أقصد المرشح عفوا المرشح اللى بيعمل اليفط دى علشان يلفت إنتباه الناخبين ما الناخبين مضيقين أهو
أ/ سمير غريب: هو فيه حد قال كلام كويس انه اليفط دى معناها اليفط دى ملهاش أى لزمة وفيه حد تانى قال انه الفلوس دى لوأتصرفت على الفقرا هتبقى مجزية أكترمن الدعاية الإنتخابية واقع الأمرانه الناخبين ما بينتخبوش حد بناءا على اليفط يعنى فعلا دا إهدار
محمد صلاح:آمال أيه ؟ الإتصال المباشر والعصبيات والعائلات ودا شوفناه فى الجولة الأولى يعنى ليه الإصرارالرهيب على كثافة فظيعة جدا فى اليفط والإعلانات ؟
أ/ سمير غريب: ثقافة يعنى ثقافة متوارثة ثقافة خاطئة فاكرين انه كل ما يكتر اليفط هو الحقيقة مش بيعلن عن نفسه كمرشح هو بيعلن عن فلوسه عن ثروته يعنى المرشحين اللى أقل ثروة بيحط اليفط قليلة الأكثر ثروة بيحط يفط كتيرة ومش شرط اللى بيحط كتير يكسب مفيهاش كلام فهنا دا علميا وعمليا مالوش علاقة بالعملية الإنتخابية دا إستعراض ثروة لناس بتستعرض عضلاتها معاها فلوس قد أيه ؟ وكمان مستوى اليافطة تلقى فيه حاجة مستواها غالى جدا وفيه حاجة مستواها متواضع دا كله إعلان عن ثروات مرشحين نمرة واحد نمرة أتنين لا يجدى فيه إختيار الناخبين للمرشحين لأن لما بتبدأ العملية الإنتخابية بيبقى كل ناخب رايح الدايرة المقر الإنتخابى وهو عارف هينتخب مين
محمد صلاح: بغض النظر عن اليفط هو مين المسئول عن مولد الإنتخابات ده والدعاية مين اللى بيشيله بعد كده؟
أ/ سمير غريب: الأحياء بتطلع عمال وبتطلع عربيات وبتطلع أدوات بتزيل اللزق بتزيل العدوان دا كله
محمد صلاح: العدوان ؟
أ/ سمير غريب: طبعا عدوان على العمران وعدوان على الجمال وعدوان على الثقافة مفيهاش كلام
محمد صلاح:قولى الجهاز مسئول برضه يعنى حتى واحد من المواطنين أتكلم عن التلوث السمعى الدوشة والميكرفونات اللى ماشية الساعة واحدة بالليل اللى بتقول أنتخبوا فلان وعلان مسئوليا أنتم عن الكلام دا برضه ؟
أ/ سمير غريب: مش مسئولي بشكل مباشر إنما هو دا تشويه أيضا للعمران وبعدين فيه بالمناسبة يعنى طبعا أنت عارف حضرتك فى قانون البيئة قانون حماية البيئة
محمد صلاح: أحنا عندنا قوانين كتيرة قوى زى القانون اللى مع حضرك ده بس ما بيطبقش.
أ/ سمير غريب: قانون حماية البيئة ده يعنى من أبرز المواد اللى فيه منع الميكرفوانات
محمد صلاح: وما قلش انه فى الإنتخابات يبقى فيه ميكرفونات ؟
أ/ سميرغريب: لأ دا ميكرفونات الشوارع نفسها عليها ضوابط ممكن طبعا تبقى خاطئة يبقى ميكرفون الجامع غلط يبقى ميكرفون الجامع مخالف لقانون البيئة أو قانون حماية البيئة يعنى الجامع نفسه مش الدعاية الإنتخابية المهم عندنا نطبق القانون يا أستاذ محمد يعنى أحد مشاكل مصرالكبرى انه مصر قاعدة عندها ماكينة إصدار قوانين ولا تطبق
محمد صلاح: هل أنت مجالكش الأحساس دا يا أستاذ سميروأنت بتجهز للقانون ده يعنى بتجهزوا قانون للتطبيق الحضارى طبعا هيطبق لانه صح وبعد صدوره وبعد صدور اللائحة التنفيذية وبعدين دلوقتى بقاله 4 سنوات تقريبا يعنى
أ/ سميرغريب:لأ القانون بقاله سنتين
محمد صلاح: سنتين مجاش فى بالك بقى انه تنفيذه مسألة صعبة جدا؟
أ/ سميرغريب : طبعا أصل دى ثقافة مجتمع
محمد صلاح: خلاص يبقى أحسن ما أطلعش القانون .
أ/ سمير غريب : لا لا لأ مينفعش عملية إصدارالقانون فى حد ذاتها عملية واجبة لانه لابد أن يكون هناك إطاريحكمها بدون إطاريحكم هتبقى العملية فوضى إصدارالقانون واجب وتطبيق هذا القانون أوجب المسألتين لازم يمشوا مع بعض
محمد صلاح:هو عادة كل تجربة بتفرزأخطاء وبتفرز مزايا تجربة القانون أثبتت ان المحليات مش ملتزمة قوى بتنفيذ القانون والمحافظات بعض الهيئات التابعة للحكومة اللى بتصرح أنها تمنح تراخيص إعلانات أو توقف هذه التراخيص أو تحاسب اللى شوهوا منطقة ما كوبرى نفق شارع ميدان أنت مش حاسس انه القانون يعنى محتاج تطويردلوقتى ؟
أ/ سمير غريب:محتاج تطبيق يعنى أنا هبص فى القانون أو هعد القانون قبل ما يطبق ؟ ما عايزين نشوف صداه فى الواقع أو صداه
محمد صلاح: عايزين نطبق القانون نعمل أيه ؟
أ/ سمير غريب: المسئول عن تطبيق القانون يطبقه يعنى أنا دلوقتى مجلس الإعلانات واللافتات الإعلانات مفيش إعلان بيطلع بدون رخصة الإعلان الغيرمرخص دا من باب أولى يجب أن يدان ويعاقب اللى شاركوا فى تعليق الإعلان أو وجوده بدون تصريح أما الإعلان المرخص برخصة فدا لازم الجهة التى تمنح ترخيص الإعلان هى اللى تلغى الترخيص بالإعلان أولا تمنح الترخيص لإعلان فى مكان مخالف للقانون أومخالف لأسس ومعايير الإعلان يعنى أنت كمسئول محلى كرئيس حى أو مدينة أو محافظ منديش تنرخيص فى مدينة لإعلان فى مكان غير قانونى
محمد صلاح: لأهو فى الإنتخابات أصلا بيبقى فيه تراخيص دا يمكن فى الإعلانات العادية اللى على الطرق والكبارى يعنى الإعلانات التجارية يعنى فى الإنتخابات بقى مفيش قانون أصلا دا كله بيعلن فى أى حته
أ/ سميرغريب: خلاص يا بيه أنت دلوقتى لما بتلقى مبنى مخالف المفروض يحصل أيه ؟ القانون بيقولك هده مظبوط ؟
محمد صلاح: أصل نص البلد أتبنت بشكل مخالف.
أ/ سميرغريب: أحنا دلوقتى بنتكلم فى تطبيق القانون فبديك مثل القانون بيقولك لما يطلع مبنى مخالف بدون ترخيص هده هل فيه حد خد رخصة واحدة علشان يعلق يافطة دعاية إنتخابية ؟
محمد صلاح: مفيش ؟
أ/ سميرغريب: كان مفروض ياخد رخصة واخد بالك من فضلك أعمل لقاءات مع رؤساء الأحياء فى مصر لأو عينة منهم وقولى كام رئيس حى أدى رخيصة تعليق يافطة إنتخابات ؟
محمد صلاح: فى لقاءاتك معاهم بيقولك أيه ؟ يعنى فى لقاءاتك مع المحافظين وبحثك عن تطبيق القانون وتنفيذ اللايحة التنفيذية لى وعن القضاء على التشويه اللى حاصل فى البلد سواء فى الإنتخابات أو قبل الإنتخابات عاداتا المحافظين بيقولك أيه يعنى ؟
أ/ سميرغريب: ممكن ما يردش أصلا
محمد صلاح: ما يردش أصلا يريح دماغه المخالفين ما بيردوش بقى؟
أ/ سميرغريب: ما يهتمش بالرد أو مش عايزيرد
محمد صلاح: ليه ؟ تحليلك أيه ؟ شايف القصة أحنا مزودنها يعنى ؟ يعنى أيه يا عم يافطتين عادى يعنى كراكيب عادية ما تعدى
أ/ سمير غريب: هى فكرة كويسة للبرنامج أنك حضرتك تجيب السادة المحافظين ورؤساء الأحياء وفعلا نطرح السؤال ده لأن فعلا عايز أعرفه بشكل عام
محمد صلاح: أنت ما تعرفهوش خالص من شغلك فى الجهاز ؟ يعنى ما حدش رد عليك قالك حاجة ؟
أ/ سمير غريب: أنا ببعت جوابات ما بيتردش عليا طب أمال أيه ؟
محمد صلاح: تليفون كده لقاء مع حد أنت ما بتردش عليا ليه ؟ أصل نقطة لازم أوصلها لحل يعنى ما بيردوش عليك ليه ؟
أ/ سميرغريب: أنت بتتكلم على محافظات مصر كلها ما بتتكلمش على واحد
محمد صلاح: كل المحافظات ما بتردش ؟
أ/ سميرغريب: بقول بتحصل حاجات كتيرة ما بتردش
محمد صلاح: أكيد أنت مطلع وبتسافركتيروبتابع يعنى بتشوف فى أوروبا وفى الدول المتقدمة الدعاية الإنتخابية بتتعمل أزاى ؟
أ/ سميرغريب: أنا عشت فى أوروبا وعشت فى نيس سنوات وعشت فى روما سنوات وحضرت إنتخابات عايزأقول لسيادتك انه مشفتش دعاية إنتخابية خارج الأماكن المخصصة للإعلانات
محمد صلاح: أه الإعلانات العادية مفيش ظرف إستثنائى مثلا علشان الإنتخابات ؟
أ/ سميرغريب: يعنى المكان المخصص للإعلان فى الشارع اللى بيعلنوا عنه على عربيات وبيعلنوا عن سلع مختلفة فى فترة الإنتخابات بدل ألقى إعلان عن عربية ألقى إعلان عن زيد أوعبيد مرشح فى الدايرة دى فى نفس البروازالمخصص للإعلانات عن أى سلعة فى وقت الإنتخابات بيحصل أيه ؟ اللى بيحصل المرشح المرشحين هناك فى أوروبا بيلجأوا لشركات إعلانات يعنى أوروبا والدول المتقدمة ما بيلجأش لخطاطين وترزية بيلجأ لوكالة إعلان وبيقوله قبلها بيبقى طبعا واخد قرار قبلها بشهور
محمد صلاح:دا أحنا عندنا فيه منجدين بيعملوا إعلانات.
أ/ سمير غريب: فقبلها بشهوربيتفق مع وكالة إعلان يقولها من فضلك أحجزيلى الأماكن الخاصة دى للدعاية الإنتخابية بتاعتى من فترة الإنتخابات من كذا إلى كذا ولذلك هناك عملية جدية عملية الترشيح للإنتخابات ولذلك ما تلقاش هناك فى الدايرة 20 ، 30 مرشح فى داير واحدة رغم وجود الأحزاب كلها هناك عملية جدية اللى بيخش هو اللى وراه حزب والحزب بيساعده على التمويل وبيبقى عندهم أمكانيات مادية قوية
محمد صلاح:و يلتزم بالقانون؟
أ/ سميرغريب: الألتزام بالقانون مش على الناس مش على المرشح دا على المحافظ والوزير وكل المسئولين عليهم واجب الألتزام بالقانون قبل بقيت الناس
محمد صلاح: أنت لما بتشوف المشاهد اللى حصلت فى الدعاية وبتفتكر لما كنت فى باريس أوفى روما بتفكر أزاى يعنى بيجى فى بالك أيه ؟
أ/ سميرغريب: يبقى أنا فى مصر
محمد صلاح: يبقى أنت أكيد أكيد فى مصر طب خليك معانا
فاصل
محمد صلاح: يبقى أنتم أكيد أكيد مش مصر لما هنشوف الدعاية الإنتخابية فى دول أخرى نشوف الدعاية الإنتخابية فى دول أخرى أكيد أكيد مش مصر بيحصل أيه ؟
تقرير
فى الوقت الذى تعانى فيه مصرمن فوضى الإعلانات الإنتخابية فأن دولا أخرى يبدوا فيها المشهد مختلف فى كل إنتخابات عندها دعاية منظمة مرتبة ولا يمكن للمرشحين أن يخترقوا القوانين كانت الإنتخابات البرلمانية فى مملكة البحرين التى جرت الشهر قبل الماضى قد شهدت مساحة أكبرمن الإنضباط فى دعاياتها الإنتخابية إذ أبدى المرشحون قدرا من الإلتزام فى أماكن وأسلوب عرض دعايتهم الإنتخابية أما فى غالبية دول أوروبا والولايات المتحدة فأن شعوبها قطعت شوطا طويلا فى هذا الصدد إذ أن هناك إلتزاما صارما بالإعلان عن البرامج الإنتخابة تعد خصيصا لهذا الغرض وبأسلوب محدد فلا
لافتة تقطع شارعا ولا ملصق يشوه مبنى وأعتمد المرشحون فى هذه الدول على الإنترنت كوسيلة دعائية أيسروأسرع فى الوصول إلى جمهورالناخبين وإذا ما نزلوا بالدعاية إلى الشارع فأن الإنشغال بأماكن الدعاية هو سيد الموقف ومن دون فوضى أوتشويه
محمد صلاح: إذا كانت الثقافة هى اللى بتنقصنا أستاذ سمير أزاى يبقى عندنا هذه الثقافة اللى موجودة فى دول أخرى ؟
أ/ سمير غريب: والله العملية متكاملة يعنى لازم من التربية والتعليم لازم من البداية لازم من الطفولة
محمد صلاح: هو كل ما نناقش مشكلة يقولوا من التعليم ؟
أ/ سمير غريب: للأسف
محمد صلاح: يعنى المسألة تاخد وقت طويل قوى ولا أيه ؟
أ/ سمير غريب: طبعا لأن أنت بتغيرثقافة مجتمع تغييرثقافة مجتمع معنهاها إن أنت بتغيرطريقة تفكيره وبتغيرأفكاره نفسها وقناعاته وبتغيرسلوكه مش هتقدرتغيرسلوكه اللى بيحصل فى الشارع المصرى ده نتيجة طريقة تفكيرعند الناس وسلوك هو طريقة تفكيرهم كده وسلوكهم كده لازم السلوك والتفكير دا يتغير علشا نشوف رد فعل أو نتيجة عملية فى الشارع تبقى مختلفة
محمد صلاح: يعنى الحكاية مش بس ممكن يكون عقاب صارم مثلا بتطالب ان القانون مثلا يكون فيه عقوبات صارمة ؟
أ/سميرغريب: تخيل أنت لو حولت موضوع الدعاية الإنتخابية ده والقانون بيقولك كل دا غلط قانون التنسيق الحضارى بيقولك تعليق اللافتات دى كلها والدعاية دى كلها غلط القانون بيقولك أيه ؟ فيه عقوبات بس العقوبات دى مين اللى هيصدرها المحكمة مش كده ؟ وقبل المحكمة هتروح فين ؟ النيابة بتبلغ النيابة النيابة بتحوله على المحكمة دخل بقى مصركلها النيابة والمحكمة على فكرة القانون بتاع التنسيق الحضارى فيه ميزة فى العقوبات إن هو بيدخل المسئول اللى سمح بالمخالفة شريك مع مرتكب المخالفة
محمد صلاح: من ساعة بقى ما بتدأه القانون كم مسئول دخل؟
أ/ سميرغريب: ولا واحد
محمد صلاح:ولا مسئول دخل والدنيا ضاربة فى الإعلانات
أ/ سمير غريب: ما أنا بقول لحضرتك أحنا هنا أمام حالة
محمد صلاح: حالة تسمم دعائى مش كده ولا أيه ؟
أ/ سمير غريب: وحالة مناعة ضد القانون
محمد صلاح: قولى هو خبراء الجهاز القومى للتنسيق الحضارى يعنى الناس دول أكاديميين شوية ؟
أ/ سمير غريب: أسمحلى أقول لحضرتك أنا بتغاظ من الرأى ده
محمد صلاح: أنا مش متعمد أغيظك بس أنا أصلا متغاظ .
أ/ سميرغريب: أنا دلوقتى يا الواحد عايز يبقى محترم يا عاوز يفضل زى ما هو إذا قررالواحد انه هو يبقى محترم لازم يعمل زى ما المحترمين بيعملوا
محمد صلاح:يعنى عايز تقول أيه أدينى مباشر يا أستاذ سمير أنا بكلمك مباشر أدينى مباشر؟
أ/ سميرغريب: إذا كان الواحد عاوز يبقى محترم فىزم يلتزم بأسس ومعايير ونظام ملهش علاقة بقى بالوضع الواقع إذا كان الواقع غلط وهتراعى الواقع الغلط متعملش بقى لا تنسيق حضارى ولا أسس ولا معايير ولا تطلع قانون وتريح دماغك خليك فى الواقع ما هو الواقع غلط يقولك راعى حالة المصريين راعى وضع المصريين أيه وضع المصريين ؟ ما أحنا عايزين المصريين زى أحسن ناس فى الدنيا وكانه المصريي أحسن ناس فى الدنيا ويستحق المصريين إن هما يونوا أحسن ناس فى الدنيا أنا بتغظنى قوى حكاية أيه ؟ راعى ظروف المصريين أيه ظروف المصريين دى ؟ ظروف المصرى دا لازم يبقى محترم زى أى واحد أجدع واحد محترم وأحسن واحد محترم فى الدنيا وهوالمصرى كان محترم ويجب أن يكون محترم ويجب أن تكون ثقافته أرقى ثقافة وسلوكه أرقى سلوك وكان ويستحق ومصرفيها مقدرات تخلى المصريين أحسن ناس فى الدنيا وتخلى مصر من الدول المتقدمة
محمد صلاح: ويخلى الإنتخابات تحصل من غيرالمشاهد اللى أحنا ينشوفها ؟
أ/سميرغريب: طبعا يا محمد بيه سكة التقدم واضحة وسكة التخلف واضحة سكة التقدم معناها نظام وتطبيق قانون بأسس ومعاييرسكة التخلف معناها عشوائية وفوضى هتقولى خلى ظروف المصريين فيها عشوائية وفوضى أوافق أنا على الكلام دا أزاى ؟ ولا المصريين المفروض ما يوافقوش على هذا الكلام لانه سكة التقدم واضحة اللى عايز يتقدم يتفضل يمشى فى السكة دى يلتزم بالقانون ودى أول شروط التقدم وانه يغير ثقافته إلى ثقافة أكثر تطورا وأكثر تقدما ويغير تعليمه إلى تعليم أفضل وهكذا يعنى واضحة فيه روشتة الدول المتقدمة مشيت عليها بقت متقدمة الدول المتخلفة والنص نص المتخلف ما مشيش عليها والنص نص رقص على السلم
محمد صلاح:طب كملى الروشتة بالأضافة إلى موضوع التعليم شايف أيه اللى المفروض يحصل علشان تكون كل البلد منسقة حضاريا يعنى ؟ وخصوصا أحنا فى جولة الإنتخابات وقبى إنتخابات الإعادة علشن يبقى عندنا إنتخابات فيها تنسيق حضارى
أ/سميرغريب: هى عملية متكاملة التعليم وتطبيق القانون بنتكلم عن التعليم فى تغييرالثقافة وبنتكلم عن القانون فى تطبيق القانون وبنتكلم على ضلع مهم جدا فى العملية وهو حل مشاكل الناس المادية والإقتصادية وعمل تنمية شاملة فى المجتمع ليه ؟ لانه على سبيل المثال فيه أكشاك مثلا هديك مثال فيه كشلك بيعملوها على الأرصفة ما يصحش تعمل أى كشك على الرصيف
محمد صلاح:دا فيه أكشاك داخل محطة مصرأنا كان بقالى كتيرمدخلتش محطة مصر وكان البهو كده بتاع المحطة بفرح بيه زمان كان فى أفلام باب الحديد والحاجات دى كان ليهم شوط من بعيد يجبلك المحطة دخلت لقيت بقى أكشاك معمولة حلويات وبطاطس محمرة وبطاطس مقلية مفيش بطاطس بوريه دا ناقص يعملولها كشك يعنى أنا ذهلت أيه حكاية الأكشاك دى ؟
أ/سمير غريب: هو بالنسبة لمحطة مصر وزارة النقل الحقيقة بتغيرجوا محطة مصر هذا السيزون وهذا التغييرمش هيسمح بوجود أكشاك لانه هيعمل مول أو مجمع تجارى جوا محطة مصر
محمد صلاح:أحنا مش ناقصين مولات كترت فى البلد أنت موافق عليها جوا المحطة ؟
أ/ سميرغريب:دلوقتى هيعملوا محلات جوا محطة مصر بقولك معلومة
محمد صلاح: دا هما عايزين ينقلوا قطارات الوجه القبلى يبقى فى الجيزة والوجه البحرى يبقى فى قليوب تقريبا عشان منطقة رمسيس ومحطة مصرتهدى يعنى يعملوا مول ؟ هيزحم الدنيا وهيبوظ التنسيق الحضارى هيبوظ الدنيا أنت اللى جبت سيرته أصلا يعنى خلينا فى الإنتخابات يا أستاذ سمير
أ/ سميرغريب: فبيبقى حضرتك فى بعض الأحيان الأكشاك فى مصربتتحط فى منطقة بتقفل الرصيف ما ينفعش تقفل الرصيف خدت بالك طب أنت علشان تفتح الرصيف ده لازم تشيل الكشك
محمد صلاح: الراجل بياكل عيش بقى ؟
أ/ سميرغريب: علشان كده بدأت مع سيادتك أنك بتعمل تنمية شاملة تحل مشاكل الفقراء والمعلنين والمحتاجين فى مصر وترفع مستوى الإقتصادى لعامة الشعب ده هيساعدك فى التنسيق الحضارى يعنى النظرة المباشرة ممكن ما توصلش للربط ما بين التنسيق الحضارى والحياة الإقتصادية إنما النظرة الواعية التنمية المتعمقة هتقولك انه كل الناس ....... وكل ما مستوى الدخل إرتفع كل ما تمكنت من تحقيق تنسيق حضارى على سبيل المثال الباعة الجائلين يعنى أنا عندى مشكلة فى تطويرأى حتة خصوصا الميادين الكبيرة يعنى المشروع اللى عملناه فى الخزندار الخزندار هو دلوقتى عبارة عن محلات تجارية إنما المأساة بتاعته الباعة الجائلين اللى مفترشين الأرصفة وقافلينه فأنت لما بتيجى تعمل تطويرلازم تبعد الباعة الجائلين عن حوالين صينداوى بس هتبعدهم تقطع عيشهم ولا تحل المشكلة ؟ لازم تحل المشكلة متقطعش العيش بتاع الناس ولازم تقنع العاملين دول أوالباعة الجائلين دول انه حل المشكلة دا فى مصلحتهم فى مصلحة البلد بشكل عام تربية وتعليم تثقيف تطبيق قانون وأيضا تنمية إقتصادية شاملة فى المجتمع
محمد صلاح: أستاذ سمير بعد 5 سنين هيكون عندنا إن شاء الله إنتخابات مجلس شعب جديدة كلامك معناها انه مفيش أمل ولا هنلحق نعمل الكلام ده الروشتة دى هتطبق ؟
أ/ سمير غريب: يعنى أرجوا ان أحنا ..........
محمد صلاح: لأ ما أحنا نرجوا ......... أصل اللى بتتمناه حاجة وعلى أرض الواقع بيبقى حاجة تانية
أ/ سمير غريب: أنا بخبرتى العملية ومعايشتى وإنتمائى لهذا الوطن بعد 5 سنين هيبقوا زى ما هما تغييير بسيط جدا
محمد صلاح: لازم الروشتة على بعضها مش ممكن جزء منها ناخد شوية مقويات يعنى ؟
أ/ سمير غريب: نطبق القانون بحزافيره خليط حازم فى تطبيق القانون السادة المحافظين يقرروا انه الدعاية الإنتخابية تلتزم بالأماكن المخصصة للإعلانات قرر دى وطبقها هتتغير
محمد صلاح: جميل انه يكون عندنا ديمقراطية أحنا مع الإنتخابات ومع الإختيار الحرلكل ناخب ومع المرشحين فى الترشيح وفى الوصول للناس وفى الإتصال المباشر بجمهور الناخبين وبعرض برامجهم على الناس لكن برضه بنحب مصر وعايزين مصرزى ما يكون فيها ديمقراطية يكون فيها تنسيق حضارى واضح انه فيه عبء كبيرعلى المحافظين طبعا عندهم حاجات تانية كتيرأنابيب البوتجاز والعيش والطرق والكبارى والدراسة والكتب الخارجية والكتب الداخلية والحاجات اللطيفة دى كلها بس برضه عليهم إن هما يطبقوا القانون هما ساهموا يفترض بإعتبارهم مسئولين فى الحكومة فى إصدار القانون هما أول ناس عليهم إحترام القانون بدعى انه الإنتخابات اللى جاية إن شاء الله بعد 5 سنوات ما يكونش نفس نكون أتغيرنا شوية ونبقى أكيد أكيد فى مصربس فى موسم إنتخابات متخلف شوية عن الموسم ده وقال رئيس الجهازالقومى للتنسيق الحضارى الأستاذ سمير غريب كلامه معانا النهارده كان كلام جميل كلام معقول أكيد كان كلام مسئول خلص الكلام سلام نلتقى فى حلقة أخرى نورت يا أستاذ سمير
أ/ سمير غريب: أشكرك دا نور سيادك