ياسبحان الله .. أمال قاعدين تخوّفونا ليه والدنيا ورد ومهلبية وشفتشي ع الأخر .. واللي مش مصدق يسمع خطاب الرئيس مرسي أمام مجلس الشورى " التشريعي " الجديد .. اللي مش عارف راسه من قفاه .. ومستني بس التعليمات اللي حيطلبها مكتب الإرشاد عشان يشرّع ويطلّع عين اللي خلفونا بشوية تشريعات مشوية ع الفحم .. تشبع من شمة ريحتها بس. ما الدنيا حلوة اهى ومزهزهة .. واحنا ميت فل وعشرة .. الاقتصاد " امسك الخشب " في العالي ، واللي بيقولوا ان مصر حتفلس .. هم المفلسون .. " مسا التماسي مسا التماسي .. تصفيق حاد يا طرابيش قاعدين على الكراسي " .. والسياحة كانت صحيح بعافية حبتين ، بس دلوقتي مش عارفين نودي السياح فين من كترهم .. حيموتوا ويجوا مصر بعد حكم الإخوان .. وبكرة ليلة راس السنة وشرم الشيخ والغردقة والاقصر واسوان متعرفش تمشي فيها من عدد السياح .. ماشيين والخمرة في ايديهم بعد ماعرفوا ان الريس مرسي رفع الضريبة عليها بس .. لكن اللي عايز يشرب وينبسط ويدعي لرئيس مصر ، يشرب براحته ع الأخر .. هى حرام صحيح عند المسلمين والقرآن حرّمها نصا .. لكن عند مرسي الإخواني المسلم مش حرام ، عشان السياح والنسوان العسل تهل على بلدنا ويعملوا مابدالهم في ليلة راس السنة .. اللي عايز يبوس يبوس .. واللي عايز يقفّش يقفّش .. واللي جايب صاحبه معاه ومبيحبش النسوان من أساسه وبيموت في الرجالة .. برضه معندناش مشكلة. .. ايه الخطاب الحلو ده اللي قاله مرسي .. ده انا كانت ايدي على قلبي خوفا على البلد .. بحكم اني مصري وشارب من نيلها وفكرت مليون مرة أغني لها بس هى مش عايزة تسمع .. لكن الحمد لله ..كل مشاكلنا الاقتصادية اتحلت في 24 ساعة .. أصل من يومين بس وانا بتابع البرامج ، مش لاقي واحد يبل ريقي بكلمة تطمني على اقتصاد بلدي مصر .. اللي يقولك مش حنلاقي ناكل بعد شهرين .. واللي يقول لك ان الصندوق رجع في كلامه تاني .. واللي يقول لك قطر كانت حتدينا 20 مليار لو قلنا نعم ع الدستور .. بعدين شاورت نفسها ، ورجعت في كلمتها لمّا جات تحسبها صح بالورقة والقلم والكمبيوتر فعرفت ان " لأ " هى الصح واللي كان لازم تكون نتيجة الاستفتاء .. بس اللعب والتزوير ومنع الناخبين بالملايين من الدخول للجان خلى النتيجة " نعم " .. فقالت للقرضاوي المتحدث باسمها " سك على موضوع ال 20 مليار " وخلّيها في انتخابات مجلس الشعب الجاية ، وخلّي المبلغ 100 مليار لو كانت الأغلبية الكاسحة للإسلاميين .. بس بشرط بدون تزوير. ياجماعة .. عهد مرسي هو عهد مبارك بالتمام والكمال.. والدليل اهه .. فاكرين مسلسل " سكة الهلالي " من يجي 6 سنين كده .. يعني أيام مبارك السودا اللي مفيش اسود منها الا ايام مرسي ..كان التتر بتاع المسلسل اللي كتب كلماته الرائع ايمن بهجت قمر بيقول ايه .. تعالوا نسمع : دي لا باظت ولا خربت ولا جابت جاز لامؤاخذة .. دي عيشة ظريفة جدا .. " اى والله العظيم عيشة هباب وطين " .. ولافتنة انضرمت ولا حد بيشتكي لحظة ماشية والأشية معدن .. " صحيح مش عارفين نودي الفلوس فين " .. عايشين في حرية ، زمن القيود اختفى .. " ماشاء الله ، ابراهيم عيسى وباسم يوسف والابراشي وقنديل والبقية تأتي .. كلهم عندهم محاكمات.. ده غير البرادعي وحمدين وعمرو موسى الخونة اللي عايزين يقلبوا نظام الحكم " .. اتحدى لو واحد يوم انضرب بالقفا .. " عندك حق تتحدي لو كان واحد بس انضرب بالقفا .. لكن 90 مليون كل يوم ينضربوا على قفاهم لمّا قفاهم ورم .. من خطابات مرسي وعمايله السودا " .. والناس بتختشي .. " ان جيت للحق أوي ..دول بعيد عنك شالوا برقع الحيا ومرسي بيشكر الشعب المصري الأصيل اللي قال كلمته في دستور بلاده .. شفت اكتر من كده خشا؟ " .. ولا حد بيرتشي .. الله على الحياة بقى لونها شفتشي .. " شفتشي ع الأخر وكل حاجة باينة من تحت قميص النوم .. ويكدب عليك ويقول لك دي جلباية صوف .. ازاى شفت الاندر وير يا منافق؟" . نكمل أغنية الرائع ايمن بهجت قمر عشان نتأكد ان مفيش حاجة اتغيرت الا للأسوأ .. نسمع : متأمنين م الفقر الضنك .. " الناس بتاكل من صفايح الزبالة " .. تعليم علاج وحساب في البنك .. " ده انت لو لك الف دولار اتحداك لو رضيوا يصرفوهم لك من الأزمة السودا اللي حاصلة ، فما بالك باللي مفيش في جيبه تمن سندويتش طعمية" .. شقق مرمّية والشغل في كل حتة ، واللحمة بسبعة جنيه وساعات نلاقيها بستة .. " كيلوا اللحمة اخر مرة اشترتها في العيد الكبير كان بتسعين جنيه " .. والناس بتختشي ولا حد بيرتشي الله على الحياة بقى لونها شفتشي .. ده احنا لا صوتنا اتنبح ولا في مالطا بندن .. " بقى لنا سنتين يامحترم بندن في مالطا من ساعة استفتاء مارس 2011 .. اللي انتوا بتعملوه ده غلط .. واتنبح صوتنا فعلا ولا حد عبرنا لحد ماخربت بجد". شفتوا بقى خطاب مرسي أوحى لي بإيه وفكّرني بإيه .. انا راضي ذمتكم .. مش هى هى بالضبط .. نفس الكذب .. نفس الاونطة .. نفس السحنة .. لأ وايه .. نفس المانشيتات العرجاء في جرايد الحكومة .. مصر لن تفلس ولن تركع الا لله .. " زغرتي ياللي مانتش غرمانة " .. والحياة بقى لونها بمبي وانا جنبك وانت جنبي .. اخبار .. اهرام .. جمهورية .. وشك في الحيط وقفاك ليا!!.