اذا قلنا ان محمد مرسي هو هو بذات نفسه حسني مبارك .. واذا كنا بنقول على مبارك في أيامه السودا والغبرة الرئيس الرصين ، وكان قبل منه السادات الرئيس المؤمن ، واللي قبل منه عبد الناصر الرئيس الزعيم .. فمحمد مرسي بما انه " نسخة " من حسني مبارك يبقى الرئيس الرصين. وبما ان المشايخ والدعاة - مش كلهم عشان نكون موضوعيين ومنظلمش حد - يؤيدون محمد مرسي على طول الخط بالصح والغلط .. وعلى رأسهم عم الشيخ الهمورجي " نسبة إلى الهامر اللي راكبها ومش عارف جابها منين ومنين جاب الملايين دي كلها عشان يشتريها ويشتري معاها بودي جارد يحرسوه " .. هما والشيخ ابو دقن جنان محمد افندي حسان " مع .. الرصين ".
.. م الأخر كده وطس في وشهم دوغري واللي يزعل منهم يتفلق ويتحرق بجاز وسخ .. هما " مع .. الرصين " .. عاجبهم ياسيدي يكونوا " مع .. الرصين " .. انت زعلان ليه ؟ .. أيوه انا زعلان ومتضايق وحطق من جنابي كمان .. ماهو مش معقول اللي بيقولوا على نفسهم دعاة ورجال دين ومشايخ يبقوا بالبجاحة دي في مخالفة الحق .. الشمس طالعة وتعمي عين التخين ويقولوا لك .. لأ .. دي مش الشمس .. ده احنا داخلين ع المغرب وانت متهيألك .. راجل بشنب يقف عليه الصقر ماشي في الشارع تقوله ده راجل يقولوا لك لأ .. دي ست وزي القمر كمان .. يا عم ده شنبه واكل نص وشه .. فيضحكوا ويردوا : لأ .. دي ست ، بس نسيت تعمل " حلاوة ".
شوفوا التعنت والمغالطات .. لأ وتيجي منين .. من واحد زي الشيخ حسان .. اللي مصمم ان يكون في صف دائما ابدا اللي " مع .. الرصين " .. ايام مبارك يقولك ببجاحة متناهية وقلة أدب .. " ايوه قلة أدب " الخروج على الحاكم حرام وكفر .. ربنا قاله كده .. جاله الوحي وهو في المحراب ، وقاله اخطب في أمتك يا حسان وقل لهم ان الخروج على مبارك حرام ومن الكبائر .. وجاله برضه نفس الوحي وهو لسه قاعد في المحراب من ساعتها وقال له : اخطب فيهم يا عم الشيخ وقل لهم ان الخروج على مرسي حرام وكبيرة الكبائر كمان .. وده وحي مش هزار.. مش احمد عفيفي مثلا الغلبان اللي قال له همسا الكلام ده .
دي جاتله من فوق .. من فوق اوي .. فلازم يقول .. ويوصف اللي خرجوا على مرسي وقاعدين بقالهم عشرة أيام في ميدان التحرير انهم ميعرفوش ربنا ، بتاعه هو مش بتاعنا .. مش عاجبه عم الشيخ " اللّمة " اللي في الميدان .. وبيتحدانا .. بصباعه الصغير ممكن يحشد هو لوحده مليون .. والشيخ صفوت حجازي ربنا ينتقم منه هو كمان ، يقدر يحشد مليون ، والبلتاجي وابو اسماعيل وعم الشيخ يعقوب بتاع غزوة الصناديق وغيره وغيره .. يعني بإشارة من صباعهم ممكن نلاقي في الميدان نقول كده عشرين مليون .. بس لم يقل لنا الشيخ حسان بأى صباع .. صباع ايده ولا رجله ولا صباع ايه بالضبط .. ؟ عم الشيخ اللي حسابه عند ربنا يوم المشهد العظيم حيكون عسيرا .. بيقولك ان الاعتراض على الحاكم لا يجوز ، وحسب كلامه نصا " كونه رئيسا ذا شرعية قرآنية ونبوية .. ثم شعبية " .. طيب شعبية ماشي.. انما قرآنية ونبوية ازاى .. انا حافظ سور كتير من القرآن .. ولم يصادفني اى أيه تقول ان الخروج على مرسي حرام .. اسم مرسي أساسا لم يرد في كتاب ربنا .. موسى أه .. ذكر اسمه كثيرا .. يكونش الشيخ حسان اتعمى في بصره وبصيرته وافتكر ان موسي كلمة موحية بأن " مرسي " سيأتي نبيا مثل موسى .. والفرق بين الكلمتين حرف الواو؟!
لأ يا عم الشيخ .. مرسي بتاعكم مش موسى .. ده الفرعون اللي ربنا أرسل اليه نبيه موسى ليهديه سبيل الرشاد .. فقال له ولقومه انا ربكم الأعلى .. ومرسي معتمد على شوية جهلة مثلك عشان تروّجوا له هذه الأكذوبة القذرة .. فيتخيل فعلا انه فرعون بجد ، واننا مش حنقدر عليه لأننا لا نملك عصا موسى اللي نشق بيها البحر فيغرق مرسي وجماعته وكل الدعاة والمشايخ اللي مش بيخافوا ربنا وبيخافوا منه هو ومن المرشد العام اللي في مكتبه بالمقطم يصدر الأوامر .. والافندي اللي هو رئيس مصر ينفذ.
طيب ده عن الشيخ حسان ربنا ينتقم منه .. أما الشيخ التاني اللي معرفش اسمه ولا يشرفني اني اعرف اسمه .. خطيب جامع الشربتلي اللي مرسي صلى فيه الجمعة امبارح .. فده بقى اقسم بالله عايز ضرب النار .. واقسم بالله كمان مرة عايز ينضرب على قفاه لمّا يبان له صاحب .. واقسم بالله لتالت مرة عايز نحطه على حمار بالمقلوب " خلف خلاف " ونمشي بيه مع الحمار في ميدان التحرير وكل اللي يشوفه " يتف عليه ".
الراجل اللي معندوش دم ولا خشا من ربنا بينافق مرسي عيني عينك في الخطبة ويشبهه بالنبي محمد " ص " واحنا المعارضين له بالكفرة .. وطبعا ربنا أراد انه يظهر الحق قصاد مرسي اللي كان قاعد منشكح اوي والخطيب " الرّمة " بيغازله ويتغزل في محاسنه .. وهو - اى مرسي - الدمعة حتفر من عينيه ياحبة عيني من الكسوف " اخجلتم تواضعنا " .. ويثور على الخطيب " العِرة " الكثير من المصلين في الجامع من فجاجة النفاق والرياء والوساخة عندما تخرج من رجل يؤم المصلين في صلاة جمعة.
عموما .. ربنا ينتقم من شوية المعاتيه دول ويورينا فيهم يوم .. ومعاهم بقى – والشىء بالشىء يذكر – احبابنا الحلوين الطعمين بتوع اللجنة التأسيسية .. اللي لو بيصححوا امتحانات الشهر في مدرسة ابتدائية كانوا خدوا وقتهم اكتر من كده .. انما دستور مصر يسهروا عليه للصبح زي الحرامية اللي سارقين سريقة وعايزين يهربوا بيها قبل البوليس مايطب عليهم .. او زي المقاول اللي عايز يشطب شقة العريس والعروسة عشان لازم العريس يدخل و " يفتح " وينبسط الليلة .. انا موافق على التشبيه ده مع انه تشبيه وسخ .. بس انا موافق بشرط واحد مفيش غيره .. احنا الشعب الحر الاصيل " العريس " .. وهما اى اللجنة التأسيسية والمشايخ اللي " مع .. الرصين " والكبير بتاعهم ذات نفسه " العروسة " .. وسمّعونا بقى أصواتكم الحلوة وانتوا بتدلّعوا وتتمخّطروا زي النسوان : " متذوقيني ياماما قوام ياماما .. ده عريس حياخدني بالسلامة ياماما !!
