عمري في حياتي ما شربت خمرة .. ولا اعرف طعمها إيه .. مرة واحدة كنت في ألمانيا في مهمة صحفية .. وزميلتي مراسلة مجلة " كل الناس " هناك واسمها سلوى الرافعي كانت عاملة حفلة .. كلها مصريين عايشين في بون وميونخ .. ولقيت الجرسون بيلف بصينية عليها كاسات مليانة حاجات .. فاخدت منه كوباية وانا فاكرها عصير تفاح على لمون عشان كان فيها رغوة بيضا شكلها حلو .. وشربت " بق " يا محترم ولقيت معدتي قلبت .. إيه يا سلوى اللي انا بشربه ده ..؟ فضحكت وقالت : دي شمبانيا يا فلاح.. وانا عمري ما شفت الشمبانيا غير في الأفلام .. ولازم اللي ماسك القزازة يشيل غطاها بطريقة معينة وهب يغرق الأرض ويملا الكاسات .. واشرب واسكر وادلع. ايه مناسبة الكلام ده .. مناسبته وزير " الأباحة " قصدي السياحة بتاعنا منير فخرى عبد النور وتصريح قريته له على موقع " الدستور الأصلي": زيادة حظر الخمور والمشروبات الروحية لتشمل كافة أيام الاحتفالات الدينية بدلا من قصرها على شهر رمضان فقط مثل رأس السنة الهجرية والإسراء والمعراج ومولد النبي ويوم وقفة عرفات .. ماشالله عليك يا عم الوزير .. ايه الحلاوة دي .. طيب اسأل سؤال : هو ليه احنا بنحظر بيع الخمور في رمضان .. والإجابة .. عشان الخمور حرام .. ورمضان شهر فضيل .. اذن هى حرام .. مش انا اللي باقول .. ده ربنا جل علاه هو اللي بيقول .. مفيش أية في القرأن قالت الخمور في رمضان بس حرام .. وبقية شهور السنة حلال مصفي.. يبقى تصريح زى ده ملهوش لازمة من أساسه .. إلا اذا كنا عاملين فيها " صيّع " .. وبنستعبط على ربنا.
بعدين خد بالك من التصريح بتاع الافندي : الحظر على المصريين بس .. والأجانب لأ .. لأنهم أجانب .. والخمرة بيشربوها زي الميه عندنا .. والسياحة حتنضرب لو قلنا لهم الخمرة لأ .. مش حيجوا عندنا تاني عشان احنا ناس كخه ومانعين الخمور.
وعلى فكرة انا مش إخواني ولا ليا صلة بالإخوان المسلمين ولا السلفيين .. بس التصريح نرفزني وحسيت انه تصريح أهبل مالوش محل من الإعراب .. من غير ماتقول يا سيد عبد النور .. اللي بيشرب فينا خمرة بيبطلها في رمضان .. مش تديّن ولا حاجة ، انما من باب " الخشى " من ربنا .. وعايز تضحك بقى .. أخر يوم في رمضان وأول ما المفتي يعلن ان العيد بكره .. اتفرج على محلات بيع البيرة والخمور في مصر .. بالطابور ياسيد .. وانت وحظك .. وعربيات تنزّل حمولتها وترجع تعبّي تاني كأننا شعب خمورجي .. والواحد فينا نازل من بطن امه يقول انا جدع ..
انفصام عجيب في الشخصية عند بعض المصريين.. ما هو إما الخمر حرام فلا يجوز الاقتراب منها .. وإما حلال فلا حرج من شربها .. لكن امنعها في رمضان واشرب ب " هبل " ليلة العيد احتفالا ، ليس بهلة العيد علينا ، ولكن بانقضاء شهر رمضان اللي كنا محرومين فيه من الفوديكا والجن والهباب الأزرق.
رحت شرم الشيخ كتير جدا .. وكذلك الغردقة .. والمضحك ان موظف الفندق لازم يشوف بطاقتي العائلية ، رغم ان معايا ولادي الأطول مني .. في حين ألاقي نفس الموظف يتعامل بشياكة منقطعة النظير مع واحدة أجنبية جاية ومعاها صاحبها .. وهما الاتنين يدخلوا الغرفة ويتقفل عليهم الباب وهاتك يا مسخرة من غير ماحد يجرؤ يقول لهم تلت التلاتة كام .. والاقي واحدة أجنبية برضه نايمة على البلاج عارية الا من قطعة تحتانية واحدة .. قال ايه بتاخد حمام شمس .. الهي ربنا ياخدك يا بعيدة وانت نايمة عريانة ملط .. والقفا اللي جنبك قاعد يدعك لك ضهرك وفرحان اوي ان الناس بتتفرج على صاحبته .. وعينهم حتخرج عليها .. وهو لوحده بس اللي حيدخل معاها الغرفة عشان تخلع اخر حتة كانت بتسترها وهى بتاخد حمام الشمس.. هى دي السياحة اللي احنا خايفين عليها تنضرب .. الهي تنضرب في قلبها متحطش منطق وتغور في داهية وتغور الملايين اللي بتيجي من وراها.
وبالمناسبة بقى .. الناس من ساعة مرسي ما بقى رئيس .. خايفين اوي ان شارع الهرم ممكن يتقفل .. ويمكن كمان نلغي الرقص الشرقي وتغور دينا وفيفي عبده في ستين مصيبة .. قال يعني الدنيا حتخرب لو صحينا من النوم مالقيناش دينا وفيفي عبده .. داهية تاخد الاتنين في ساعة واحدة .. هو ده اللي شاغلنا اوي ومخوّفنا من الإخوان .. ايكش يولعوا في شارع الهرم .. ايكش كمان يمنعوا الخمور تماما في مصر .. هو احنا شعب خمورجي .. احنا 90 مليون .. و89 مليون ميعرفوش طعم الخمرة ايه ونص ال 89 مش لاقيين الميه يشربوها أساسا .. حيزعلوا اوي يعني لو الخمور حرقناها بجاز؟ .. طبعا لأ .
عشان كده شايف مبالغة غبية حين نتحدث عن السياحة والبكيني والخمور .. كأن الأجانب بيجوا عندنا بس عشان يشربوا خمره ويناموا مع بعض .. كأننا لامؤخذة " مركبين قرون " .. ولا مؤاخذة ليه ؟ .. ما احنا فعلا بنركب قرون مع الاجانب ونعمل فيها ابو الشرف مع بعضنا .
..وعلى فكرة .. الكلام ده مش بقوله عشان احنا في شهر رمضان .. ده رأيي في رمضان وشعبان ورجب وذي القعدة وذي الحجة وكل الشهور .. اللي يزعل من كلامي في دي بالذات يتفلق .. واللي يقول عني متخلف .. يبقى كتر خيره وحلال عليه القرون .. ايكش ينبسط .. الحق خد لك صورة بسرعة قبل القرون ما تشح وتغلى .. يا تكم الغم .. انتوا والكبير بتاعكم اللي اخدته الجلالة وخايف اوي من ربنا فقال لك ممنوع الخمرة في رمضان .. وبعد ما الشهر يخلص نشرب سوا في صحة القرون!!