لم يكن احد يتوقع ان يختفي القمر الصناعي بهذه الطريقة العبيطة وفي هذا الوقت بالذات ... -انا مش عارف القمر بتاعنا راح فين يارجالة !!! دا كأنه فص ملح وداب !!! -يادي المصيبة دا احنا كده ح نروح ورا الشمس!! وحياة عينيك يا باشمهندس تدور كويس يمكن يكون مستخبي هنا والا هنا!! لكن البحث لم يؤد الى نتيجة فتم ابلاغ ممبار بيه ... -حلوة اوي الحكاية دي!! القمر ضاع وجايين تدوروا عليه في مكتبي!!! تلاتة بالله العظيم القمر لو ما ظهر لأخرب بيوتكم!! -يا ممبار بيه احنا قلبنا عليه الدنيا وبرضه ما فيش فايدة!! ياريت سيادتك تدلنا على طريقة نلاقيه بيها ينوبك ثواب!!! -وهوه انتو شايفيني حاوي؟!! عليا الحرام من بيتي القمر لو ما رجع لابلغ حسونة بيه عشان يعلقكم من رجليكم وينفخكم بالمنفاخ بتاعه!!!! وفور وصول الخبر الى حسونة بيه أصيب بحالة سعار... -ضيعتوا القمر يا ولاد ال...!! ضيعتوا احلى حاجة في الدنيا!؟ ده انا ح ادبحكم واشرب من دمكم!! هوه انتو مش عارفين انه عهدة وانتو ماضيين عليها؟؟!! -يا باشا احنا عارفين انه عهدة وأمانة في رقبتنا!! بس ح نعمل ايه يعني؟؟ اهو ضاع زي ما حاجات كتيرة بتضيع!! يعني جات ع القمر؟!!! -خلاص يبقا انتو متحولين للتحقيق عشان نعرف الهباب ده ضاع ازاي!!! ومين اللي ضيعه؟!؟؟ وفي التحقيق... -ممكن تفسر لنا يا با شمهندس حلاوة ازاي القمر ضاع مع ان معمول له شيفرة الجن الأزرق نفسه ما يعرفش يفكها ؟! -يا باشا الشيفرة دي اللي حطها الخبراء الاوكرانيين اللي جبناهم عشان يشغلوا القمر!!! عشان كده انا بأقول اكيد الجماعة دول همه اللي خطفوا القمر !! -عندك دليل على كده؟؟؟ -يا ريت سعادتك تسأل ممبار بيه عشان هوه اللي جاب الناس دول من اوكرانيا!!! وباستدعاء ممبار بيه ومواجهته.... -مستحيل الاوكرانيين يعملوا كده!!! دول ناس محترمين وشبعانين!!! وانا ما جبتهمش الا بعد ما اتأكدت منهم كويس!!! وبعدين دا حتى احنا طردناهم بعد كام شهر وغيرنا الشيفرة بتاعتهم !!! -أمال بتشك في مين سيادتك!!!؟؟ -مافيش جنابك غير المهندسين اللي استلموا مكانهم!! دول اشتغلوا معانا شوية وبعدين سابونا وهربوا ع الخليج عشان يشتغلوا هناك ويقبضوا بالعملة الصعبة !!! -عندك دليل على ان الجماعة دول همه اللي خطفوا القمر ؟؟؟ -لا والله ما عنديش دليل!!! بس حسونة بيه هوه اللي جاب العيال دول على ضمانته وهوه اللي اشرف بنفسه على تغيير الشيفرة!!! فتم استدعاء حسونة بيه .... -عليا الحرام من بيتي ما اعرف حاجة عن الشيفرة ولا بافهم في الكلام ده!! ده انا حيال الله دبلوم زراعة!! اللي حط الشيفرة الجديدة سعادتك متولى بيه ابو شادوف!! وباستدعاء ابو شادوف.... -ايوه انا اللي غيرت الشيفرة بأوامر من فتح الله بيه وكيل أول الوزارة !!! سيادته كان قلقان أوي ع القمر خصوصا بعد ما طردنا الخبرا الاوكرانيين !! ولما زاد قلقه جه بعد يومين وغير الشيفرة تاني زيادة في الاحتياط !!! وبا ستدعاء فتح الله بيه انكر هذا الكلام جملة وتفصيلا -انا راجل اداري وماليش علاقة بالنواحي الفنية!!! انا كل اللي عملته اني كلفت مجانص بيه يغير الشيفرة لأني بصراحة كده كنت قلقان من ابو شادوف بيه!! -و ياترى ايه سر قلقك مع انه دراعك اليمين ؟؟؟ -يعني !! عرفت بالصدفة ان ابو شادوف بيه راجل خمورجي ولسانه فالت!! وكنت خايف يدي الشيفرة لأي حد وهوه سكران!! وهكذا تم استدعاء مجانص بيه على وجه السرعة.. -هوه ايه بس اللي حصل يا اخوانا عشان تجيبوني على ملا وشي من جنازة المرحوم ابويا؟؟ يعني ماكانش ينفع تستنوا عليا شوية لغاية لما احضر الدفنة !!! -ارجوك يا مجانص بيه تقدر خطورة الموقف !!! القمر الصناعي ضاع والدنيا مقلوبة!!! ممكن اعرف بالظبط انت اللي غيرت شيفرة ابو شادوف بيه والا لأه؟!! -ايوه انا اللي غيرتها!!! بس شعبولا بيه وكيل اول الوزارة طلب نسخة منها عشان يحتفظ بيها في مكتبه زيادة في الامان!! واللي يعرف الحدوتة دي حسب الله بيه مدير مكتب سيادة الوزير!!!! وباستدعاء حسب الله بيه... -الكلام ده مظبوط وتمام التمام!!! بس اللي ما تعرفوش جنابك ان سيادة الوزير عمل اجتماع وطلب مننا نغير الشيفرة لما عرف ان شعبولا بيه أخد نسخة منها !!! -وايه سر القرار ده ؟؟؟ -ابدا اتضح ان شعبولا بيه واخد الدكتوراة بتاعته من اوكرانيا!!! عشان كده معالي الوزير كلف الاخ الزعبلاوي يحط شيفرة جديدة باعتباره رئيس المكتب الفني مع انه يا دوبك واخد الابتدائية القديمة ومالوش في الشيفرات!!! وباستدعاء الزعبلاوي .. -مظبوط يا باشا!! بس أنا ولامؤاخذة ما حطيتش شيفرة من دماغي لأني أصلا ما عنديش دماغ !! انا كل اللي عملته اني رجعت الشيفرة الأولانية بتاعت الخبرا الاوكرانيين!!!!