رغم الأوضاع المهببة التي تشهدها مصرنا هذه الأيام والاكتئاب الذي أصابني وأصاب الملايين بسبب العك الانتخابي الحادث في المحروسة ، إلا أنني لم استطع أن أمنع نفسي من الضحك حين تم الإعلان من قِبل حملة مرسي بفوز مرشحهم بفارق يقارب المليون صوت .. فأردت على الفور أن اعرف ماذا سيقول توفيق عكاشة في برنامجه القذر " مصر اليوم " ، فإذا بي أرى مسرحية معفنة زي قناته اسمها " كده اوكيه " .. واختفى تيفة وزبانيته والاضيشه وشلته العرجاء نفر.. نفر. وكان قبل ذلك .. وقبل بدء جولة الإعادة قد أعلنها المذيع الأرنب أو الفأر ، قل عنه ما شئت ، أنه فور الإعلان عن فوز مرسي ، سوف يهرب فورا إلى أى بلد أجنبي .. " معايا تلت تأشيرات جاهزة لثلاث دول أجنبية .. معقول اقعد في البلد والإخوان هما اللي حيحكموها .. دول حيدبحوني ويقصوا رقبتي في ميدان التحرير زي الخروف ، وزي ماعمل إخوان تونس في شارب الخمر في الشريط اللي أذعته على الملأ .. لا يابا .. العمر مش بعزقة وانا أمي صاحبة القناة مالهاش غيري .. انا الحيلة بتاعها .. تصحى الصبح تلاقيني مدبوح .. معقولة.. لا يا حبيبي ، قال على رأى المثل .. عيش جبان تموت مستور .. ومادام مرسي جه ، احط جزمتين في بق أمي واهرب على بلد اللي يروح مايرجعش " . طيب ياسي توفيق يا جبان يا أناني تهرب وتسيب " ديلة الكلب " اللي اسمها حياة الجرجيري .. البغبغانة اللي ربّتها على ترديد كلامك العفن ، وهى مش فاهمة اى حاجة عن اى حاجة .. مجرد آلة تسجيل تطرش اللي في بقها ومعدتها " ياتها القرف " .. وقاعدة قصادك زي الجارية تسمع اللي بتقوله وبتغني عليها به ، وتقولك .. الله اعد ونبي كمان .. وهنا يرد تيفة العوكش : كل واحد يتعلق من عرقوبه .. واحدة غبية انا مالي ومالها .. وأقول له : طيب ماتخليك راجل وتاخدها معاك عشان نرتاح من وشكم انتم الاتنين .. فيرد : لا ياعم اللي معايا على قدي انا لوحدي وطريق السلامة يابا .. هو انا كنت ضربتها على ايديها .. واحدة عايزة تبقى زي ديل الكلب .. هى حرة .. وساعة الجد كل واحد يشوف مصلحته. هذا هو توفيق عكاشة الذي يعترف اعترافا صريحا انه أرنب وجبان وفأر مذعور .. وبمجرد أن حدث الهرج والمرج وتضاربت الأنباء وظهر الصراع بين حملتي مرسي وشفيق ، وقيل ان شفيق هو الكسبان " شم نفسه " تاني ، ورجع وجاب الدلدولة بتاعته حاطة على وشها 200 كيلو ماكياج " وبرضه وحشة " .. وراح 5 ساعات يحكي لها عن أبوه واللي خلفوه وجده العمدة ، وان خطه كان حلو اوى وابويا كمان كان خطه حلو ، عشان كده انا ورثت الاتنين وخطي أحلي منهم . .. مالي انا ومال خط جدك ولا أبوك ان كان حلو ولا " زي وشك " .. انا مالي يامتخلف عقليا .. وبعدين يدخل البيه المحلل البرلماني ويشكك في النتيجة اللي اعلنتها حملة مرسي وان المحاضر اللي معاهم بخط واحد ، قال يعني مزورة .. وخد عندك بقى كام مداخلة من كام متخلف زي الاتنين " احنا بنحبك اوي ياسي توفيق .. وربنا ينصرك على من يعاديك .. ويا راجل يا وطني يا مصري يا اصيل .. وهلم جرا من مثل هذه الهرتلة التي لاتدل الا على التخلف والانحطاط الفكري اللي يخلي واحد بيعترف على الهوا انه جبان وأرنب .. يبقى مصري ووطني أصيل. طيب تصدقوا مع إني ضد العنف والدم وفكرة الانتقام عامة ، إلا أنني تمنيت أن ينجح مرسي بجد ، ولا يتمكن هذا الفأر من الهروب ويتعكش في المطار عشان اشوف تيفة وهو بيوطي يبوس الجزمة " ماهى متعودة .. دايما " ، وبيقول : معلش .. حقكم عليا .. كنت حمار ومش فاهم.. وان الإخوان مفيش أجدع منهم .. ابوس ايدك ورجلك .. سيبني اروح لأمي. مشهد والله اتمناه مع هذا البني ادم وان كنت متأكد ان مرسي او الإخوان مش حيحطوا واحد زي ده في دماغهم .. هو أحقر من ان يُلتفت إليه .. القوي لا يشعر بقوته إلا إذا صارع فارسا ، أما الأرانب فمصيرها في النهاية حلة ملوخية نبص لها .. معدتنا تقلب نقوم نرميها في الزبالة. كل شىء وله حد يا جماعة .. توفيق عكاشة أصبح عارا على الإعلام المصري .. فضحنا وقصّر رقبتنا قدام الناس .. واحد صاحبي هنا في الكويت شافه بالصدفة فقال لي : مين المتخلف عقليا ده .. ومين اقنعه انه بيفهم وانه مذيع .. بقى مصر اللي طلع منها حمدي قنديل وليلى رستم وأمال فهمي وأماني ناشد وكل العمالقة دي تخلّف واحد زي توفيق عكاشة .. لمجرد إن أمه معاها قرشين تفتح له قناة ويشوه وجه مصر بكل هذه الوقاحة .. هى دي حرية الإعلام .. ان كل من هب ودب يطلع يقول اللي هو عايزه .. وياريته أد كلامه وفتحة صدره .. والله كنت احترمته.. إنما يقولها بصريح العبارة انه جبان وخوّاف وانه حيهرب لو الإخوان حكموا .. طيب ما تلم نفسك يا بعيد وتتنيل على عينك وتشوف لك اى داهية تانية تشتغل فيها .. بدل القرف اللي انت قاعد تقوله كل يوم .. والله حاجة تكسف ان قناة مصرية تبقى بكل هذا الانحطاط.
