أحمد عفيفي يكتب: الواد «منصور».. مبيجمعش!!! أحمد عفيفي المثل بيقول اللي مالوش كبير يدّور له على كبير ، وعمنا مرتضى منصور لمّا راح يدّور ، ملقاش غير تيفة الشهير بتوفيق عكاشة .. رايح جي في ديله علشان يبقي له ضهر وهو بيرشح نفسه لرئاسة الجمهورية .. " بئس الطالب والمطلوب ". سقطة تضاف إلى سقطات صاحبنا مرتضى.. توفيق عكاشة يا راجل ؟! مسخرة هذا الزمان وكل زمان ، تيجي معاه 4 ساعات على قناة أمه ، ويسلط عليك الكاميرا .. و " عقلك " ، وهاتك أنت وهو شرشحة لفلان وعلان ، والافندي قاعد قصادك بضحكته البلهاء يسمع لك ويُنصت، وانت بتتكلم عن ابراهيم عيسى وريم ماجد ويسري فوده ومنى الشاذلي ، ودول خونة ، ودول عملا ، ودول عايزين الحرق .. ودي كانت بتوطي تبوس الجزم ، ودلوقتي عاملة فيها أبو زيد .. وناسي يا عم مرتضى " القفا " اللي قاعد قدامك وهو بيوطي مرتين يبوس إيد صفوت الشريف .. نسي الافندي إبن أمه أنه قال : انا هاجمت وزرا ورجال أعمال كبار ، لكن مبارك وابنه ؟ .. لأ يا عم لحد هنا و " ستوب " .. مش يختشي على دمه وهو فرحان فرحة الأهبل بفضح من تتصورون - بتخلف واضح - أنه تلّون قبل وبعد الثورة .. عامل فيها سي تيفة انه رجل حر وشايل كفنه على يده ، وهو لامؤاخذة اللي يقول له " حبسك عليه " يجري ويعض! ملقتش ياعم مرتضى غير توفيق عكاشة يبقى في ضهرك ، وانت عشمان عشم ابليس في الجنة إنك تبقى رئيس مصر .. طب ده آخرة اللي يطمع فيه اى واحد وهو بيمشي مع تيفة انه يكون عامل مجاري او بيّاع فجل ، مع كل احترامي للاثنين. المهم شفتك يا عم مرتضى مؤخرا مع عمرو الليثي .. " مبلوعة عمرو غير تيفة " .. على الأقل واحد بيفهم .. ومعاك شنطة السفر بتاعتك.. أنا قلت في عقل بالي ، انك من االبرنامج ع المطار عدل .. مسافر يعني .. أتاري الشنطة دي لا تفارقك في أى برنامج .. ومش مليان هدوم وبدل وملابس داخلية .. لأ .. مليانة ورق وسي ديهات ومستندات وهباب أزرق .. نفسي أعرف عقلك فين ، وانت رايح جي ب" الشنطة " التي تتوهم أن اللي فيها يعلّق خصومك على حبل المشنقة .. نفسي أشوف واحد بس من اللي انت قاعد تتهمهم وماسك عليهم ذلة .. اتحبس .. حتى شوبير وهو من طينتك وعينتك رغم الثورة العارمة اللي كانت بينكما ، رست في الأخر على منعه من الظهور في برنامجه ، واهو رجع تاني بنفس بجاحته وتخلفه العقلي وجهله التام بقواعد الإعلام ونزاهته .. يعني انت إما أن تعادي شوبير .. أو تصاحب توفيق عكاشة ، يعني " اتلم المتعوس على خايب الرجا". وأخر خصومك بقى يا عم منصور.. عصام سلطان .. جي مع عمرو الليثي ومشمّع الفتلة ومعاك شنطة السفر اللي مليانة مستندات تودي ورا الشمس ، ومعندكش صبر .. الراجل يسألك عن برنامجك الانتخابي ، وانت ترد : لازم أتكلم عن سلطان الأول .. يا سيادة المستشار ، والله حاخليك تتكلم ، بس الأول نعرف لو بقيت رئيس جمهورية هتهبب ايه .. قصدي حتعمل إيه ؟ .. وانت راسك والف " ... " لازم أتكلم عن عصام سلطان .. طب اتكلم وخلصني .. يقول عمرو الليثي بعد ما زهق منه .. " والله العظيم - والكلام ي - انا افتكرت انه ماسك على عصام سلطان مسكة سودة كأنه مثلا كان بيلمّع الجزمة لمبارك ويعمل لعياله مساج ، ويجيب الخضار من السوق للست هانم ودلوقتي عاملي فيها زعيم المعارضة ومش عاجبه العجب ولا الصيام في رجب " .. يطلع بقى كل اللي قاله عم مرتضى عن أخونا سلطان انه كان محامي طليقة ممدوح حمزة.. طيب وفيها إيه ديه ؟ يسأل الليثي ، ويرد مرتضى : ازاى .. مش قاعد يهاجم حمزة ويصفّي حساباته القديمة.. وبعصبية يرد الليثي : وانت مال أهلك .. قصدي وانت مالك ؟ .. فيكمل سي منصور بكلمة م الشرق وكلمة مالغرب على طريقة منصور ابن الناظر في " مدرسة المشاغبين " ..ويقول ل الليثي : انت عارف الضابط اللي أخد علقة من ابن رجل أعمال مشهور ورفع عليه قضية ، وجه معاه عصام سلطان عند الست منى الشاذلي .. ماهو سلطان كان المحامي بتاعه .. أبو المتهم اللي هو راجل أعمال مشهورعرض عليه مليون جنيه ويتنازل عن القضية .. يقوم سلطان يطلب 6 مليون جنيه للضابط.. واضطر رجل الأعمال أن يدفعهم عشان يلم الموضوع ... الليثى وقد فاض به الكيل : انت مال أمك .. قصدي وانت دخلك إيه ؟ يصرخ منصور : ازاى يا عمرو .. الراجل عرض مليون .. يقوم يطلب الافندي 6 مليون ؟ .. " من عندي انا .. والله العظيم جدع انه عرف يجيب 6 مليون جنيه من رجل الأعمال عشان بعد كده يعلم ابنه الأدب ". خلصنا من رجل الأعمال ندخل على شوبير اللي عصام سلطان كان المحامي بتاعه في قضيته مع مرتضى وخسرها وكسب عم منصور الحكم .. وعشان كده هو متغاظ من مرتضى منصور .. طيب عمل إيه بقى عشان متغاظ من سعادتك .. ولا حاجة .. لأ .. اسف بينبش في حكاية موقعة الجمل .. لكن إيه في كل اللي انت قلته يُدين عصام سلطان اللي انت مصمم تتكلم عنه وتفضحه قبل ما تتكلم عن برنامجك الانتخابي .. ولا حاجة .. بالضبط زي " مرة من المرات " جنّنت معتز الدمرداش وانت بتلف لفة من أسوان للإسكندرية عشان تقول إن الراجل اللي شهد ضدك في موقعة الجمل وقال عنك بلطجي ، حماته رافعه عليه قضية عشان ضرب بنتها لمّا رجع ولقاها عاملة بامية وهو كان نفسه في الملوخية .. عشان كده قال عني بلطجي .. شفتوا بقى .. بالضبط كأن منصور ابن الناظر هو اللي بيتكلم و" مبيجمعش " .. وعلى رأى سعيد صالح : إيه يا بني اللي انت بتقوله ده .. خالتي وعمتي وستي والواد حمقه .. عايز جملة مفيدة ، وفي الأخر الواد منصور بعد ما طلّع عين زميله .. طلعت الكلمة " يا مينز " يعني يا رجالة. وبمناسبة الرجالة - متزعلش مني ياعم مرتضي - .. مصر مش " هفيّة " ولا واحدة مطلقة وعندها 12 عيل وعايزه ضل راجل ولا ضل حيط يسترها ويأكل عيالها .. مصر يا عم مرتضي عروسة في عز شبابها ..عفيّة وقوية وزي البدر في ليلة تمامه .. مصر يا عم مرتضي عايزة راجل .. راااااجل ، مالوش في لعب العيال ده واللت والعجن ، وخالتي وعمتي وست ابوها والبامية والملوخية ..مصر عايزة رااااجل ميكنش أعز اصدقائه توفيق افندي ابن الحاج عكاشة .. مصر أكثر نزاهة من شنطة سفرك ومستنداتك الخايبة وسي ديهاتك العفشة اللي لاتودي ولا تجيب ، ومش وراها غير وجع الراس وميمنعش من شوية ضحك ، وانت مدوّخ المذيع من الشرق للغرب ومن حماة صاحبك لطليقة ممدوح حمزة .. وكل ده أهم عندك من أن تتحدث عن برنامجك الانتخابي اللي أخيرا رضخت لرغبة مُضيفك وقلت ويا ريتك استمريت في هزلك والكلام الأهبل التاني .. فما قلته عن برنامجك الانتخابي اقسم بالله لو جبت اللص التايب ، أو الأسطى " جادون " العجلاتي ، ماكنش حيقول اكثر م اللي قلته ، بل يمكن قال كلام أكثر فائدة وواقعية وتلمّسا للواقع المهبب اللي بنعيشه .. مثال بسيط وانت بتتكلم عن الانفلات الأمني : أى رجل شرطة من العسكري ل اللواء لازم يحترم اى واحد من الشعب من الخفير للوزير .. وبالتالي لازم كلنا نحترم الشرطة.. ماشي يا عم الفهمان نوّرت المحكمة وجبت التايهة .. طيب نعمل ايه في ميتين أم الشرطة عشان تنفذ اللي انت عايزه .. تحترم المواطن عشان المواطن يحترمها ؟ لا اجابة .. كلام في الهوا .. وعلى فكرة ميفرقش كتير عن كلام مرشحين تانيين .. كله في العموم والمطلق ومحدش عارف يحط إيده على مكمن الداء عشان نعرف إيه هو الدواء الأنسب للعلاج. تعبتني يا عم منصور ولعبت معايا لعبة دوخيني يا لمونة .. لما دوخت منك أكتر ما انا دايخ من إخوانا السلفيين اللي فتحوا عليا النار عشان " دقيقة حداد لله " ، واتهموني بالكفر والعياذ بالله وان انا بسب السلف الصالح وأصحاب الرسول عليه الصلاة والسلام ، وطبعا هم لاعلاقة لهم من قريب او بعيد بالسلف الصالح .. بس عايز تكفّر واحد .. مش حتغلب .. والقرعة تتباهى بشعر بنت اختها ، وانت يا عم مرتضى بتتباهى ب " سندة " تيفة ليك ، ومشيه وراك ، وفي الأخر مش حتاخد منه غير كام " بطّاية " وجوزين حمام ، وفوق البيعة المذيعة " الشغّالة " عنده تبقى سكرتيرتك .. واوعى تنسى احمد وزة " مذيع عنده برضه " بس خد بالك .. ده للتسلية مش للأكل. ... لا اله الا الله .. اش دخل السلف والتلف في منصوروتيفة ووزة .. الله يجازيك يا عم مرتضى .. انا كمان مبقتش أجمّع .. وبالمرة بقى مادام المسألة هبل في هبل : شاور كده .. هات ايدك يمين او شمال .. أيوه : مرتضى منصور اتهزم يا " مينز " يعني يا " رجالة " .. وقبل ما انسى واقفل المقال : دي انجليزي دي ياعم مرتضى؟!!