يا ولاد .. يا بنات يا رجاله .. يا ستات مصر اديتنا ألف معاد وماجيناش فيهم إستنتنا سنين وساعات ماجيناش فيهم فِضلت صابره وكله بيهبُر منها هَبره ياما استنت حد ف يوم يُصرُخ علشانها يحمي كيانها يا ما قالت موحشكوش حضني تعالى وخُدني قلبك كان دايماً عنواني جوه عنيك ياما شافوا مكاني ليه بتسيبني تعالي حاسبني ونشوف ذنبك إيه من ذنبي أنا إديتك نيل يحييك أرض بتطرح من تحتيك بعد ما كنت تقول دي حبيبتي فجأه لقيتك قَليت قِمتي زباله رميت حنفيات مفتوحه نَسيت كتابه ورسم عجيب ع الحيط كَفك بَطَل ليه يحييني حتي العلم اللي بيكسيني أصبح بالنسبة لك حاله يوم ما بنكسب ماتشات كوره بص وشوف بعنيك الصوره ينفع تجني ف يوم علي أمك اللي ف قلبها حضن يضمك ينفع يوم تتبرا من اختك أو من بنتك تقدر توجع قلب حبيبتك بتقول إن انا ياما نسيتك حد بينسى عياله يا مصري ياما اديتك وانت ماخدتش ياما ناديتك سديت ودنك.. ليه ماسمعتش عشت كسول عشت سنين عمرك مجدول جوه حبال إهمال أو رفض بص يا مصري واسمع مني.. علشان لا اتعب قلبك يا ابني ولا تتعِبني أنا محتاجه إيدين تتشَمَر تتعاون مع بعض تعَمَر تبني.. تكَبَر ولا تتكَبَر عقل يفكر واللهُ أكبرإنتوا كتير يومها حقول أهو ده التغيير اللي ولادي راحوا عشانه ف التحرير بَطَل أُف إوعي تتُف لّم زبالتك من حواليه رَجَع صورة بلدك عاليه إوعى تعاكس بنت ف شارع ف مجال شغلك خليك بارع إوعى تمد ايديك بالرشوه وتقبَل عيشه فيها حرام إوعي تقَطَع فَرش مواصله كان إتوبيس أو حتي ترام لما تسوق إحترم الغير خاف علي جارك واعمل خير إعرف إن سجارتك ضاره لما تدخن أُخرُج بَره التدخين بالنسبه لغيرك مش حاجه ساره لو ع النُصح انا عندي كتير بس انا عايزه أشوف تأثير لكلام قولته جوه يناير اللي طلبته بإيدك نولته واللي بعيد عن بالك طولته ياللا يا إبني لّم صحابك وتعالي إبني وانتي يا بنتي بدورك بنتي ياللا بعزم يا مصريين الدور جه عليكوا طول عمركوا ع الخير قادرين تسلملي إيديكوا أقَفُم صف وقولوا بلادي حَرُد واقول وَحَشوني ولادي ولادي ولادي ولادي ليكوا حبي وحضني وفؤادي