زهقنا م الفول في السحور .. كل يوم مراتي تسأل : عايزينه زيت ولمون ولا بيض وسمنة بلدي .. وكأن الواحد اذا ما اتسحرشي فول مش حيعرف ابدًا يكمل يومه في الصيام .. المهم امبارح سألتني أنا والولاد نفس السؤال : زيت ولمون ولا سمن ؟ .. فقلت لها لا ده ولا ده .. خلاص .. الفول جاب أخره معانا .. شكرا ليكي وله .. فضحكت وسألت : هو كلام وخلاص .. لو مش حتاكلوا فول .. حتتسحروا إيه؟ قلت لها : نغيّر النهارده .. نطلق الفول بالتلاتة اليومين الجايين .. نمشيها جبنة وزيتون أو بيض عيون .. فقال ابني : وماله الفطير المشلتت .. حد قال لكم إنه حرام في رمضان؟!!
صحيح ليه لأ .. وانا أعرف واحد مصري هنا في الكويت بيعمل فطير مشلتت محصلش .. إذن سحور اليوم فطير مشلتت ومعاه "مِش" وقشطة وعسل ابيض كمان.
.... مساء الفل يابو محمود .. رمضان حرمنا منك ومن فطيرك الحلو .. عايز بقى احلى فطيرة من ايدك الحلوة.
من عنيا يا استاذ .. فينك من زمان .. مشفتكش يمكن من ساعة " مرسي " ما مشي .. انت نزلت مصر ولا ايه ؟
قلت : ابدا والله .. لا نزلت ولا طلعت .. بس انت فكرتني ب " مرسي " .. ياترى انت لسه زعلان عليه يابو محمود ؟
قال : يا اخي ربنا ينتقم منه مطرح ما هو قاعد هو وكل اللي زيه .. خربوا البلد خراب مايعمر
قلت : تصدق اني كنت فاكرك " اخواني " .. بس الحمد لله طلعت مش منهم خالص
قال : انا لا اخواني .. ولا عمري كنت ولا عمري حاكون .. وعلى فكره مزعلتش على مرسي ابدا لاني بعد حكمه بكام شهر بانت نواياه .. وفعلا كان لازم يمشي.
قلت : الحمد لله اهو غار في داهية .. وجانا السيسي .. وربنا ينفخ في صورته وينوّر بصيرته
قال : بس للأمانة يا استاذ .. انا مش مبسوط م اللي بيحصل
سألته : من ايه بالضبط؟
قال : من السيسي ذات نفسه
قلت : ليه .. عمل ايه؟
قال : معملش حاجة .. وهى دي المشكلة ..
قلت : لأ .. عمل وعمل كتير كمان .. الحد الاقصى للأجور ونزّل اتوبيسات الجيش في الشارع بتذكرة موحدة بجنيه .. ولسه حسب ما وعد ، الامور حتبقى كويسة اوي بإذن الله.
رد : بس الكهرباء بقت تقطع اكتر ما كانت بتقطع ايام المدعوق مرسي .. ولسه الأمن بعافية .. والشرطة رجعت تاني صحيح .. واستردت هيبتها .. بس عايز اقولك : رجعت ريما لعادتها القديمة .. بقينا نسمع عن اللي بيموتوا في الحجز من التعذيب .. ورجعوا الضباط تاني يتكلموا من مناخيرهم.. بس كل ده مش مهم .. المهم أمن البلد يا استاذ .. احنا بقينا مكشوفين اوي .. انا لسه من شوية كنت بتفرج على الراجل الخبير ده اللي كل يوم يطلع في التليفزيون اللي اسمه سيف اليزل .. وكان بيشرح ازاى الارهابيين بتوع الفرافره دخلوا وقتلوا الجنود بتوعنا .. ولو كان اللي بيقولوا ده صح وزي ماكان بيشرح بالرسوم .. يبقى احنا لامؤاخذة حاجة مسخرة .. ولو هو ده التأمين بتاعنا .. يبقى حنشرب لمّا نقول كفاية حرام..
قلت : وايه رأيك في حكاية غزة وضرب اسرائيل ليها ليل نهار؟
رد : حاجة توجع القلب .. بس لامؤاخذة يا استاذ .. احنا عندنا شوية اعلاميين .. لامؤاخذة يعني " متقلعهمش من رجلك " .. واحد زي توفيق عكاشة .. زمان كنت بحبه ومشدود له لأنه راجل بلدي وبيتكلم على راحته لحد ماحسيت انه راجل متخلف عقليا ومش فاهم حاجة في اى حاجة .. لدرجة انه يقول عن غزة واهل غزة عايزين ضرب الجزمة ويارب يولعوا بجاز لدرجة ان مذيع اردني مسح به الارض في قناة اردنية وقلع جزمته على الهوا في وش توفيق عكاشة .. يعني حاجة تقرف انك تلاقي مصري مخه راكب شمال ويجيب لك العار.
ده بقى غير عمرو اديب وموسى وغيرهم .. والله يا استاذ .. ساعات بحس انهم بيمثلوا علينا .. ولا هما زعلانين على حد مات ولا فارقة معاهم من الاصل.
ثم قال : سامحني الكلام أخدنا .. عايز الفطيرة بتاعتك ساده ولا بالعسل والقشطة ولا بالسكر البودرة؟
قلت : تفتكر بعد اللي قلناه حاخدها إيه يعني ؟
رد : خد واحدة سادة وواحدة بالسكر ..
قلت : وليه مش قشطة وعسل؟
قال : مين عارف يا أستاذ .. يمكن ربك يعدلها وتبقى ايامنا كلها قشطة وعسل ولوز وملبن .. احنا شعب غلبان وطيب .. ونستحق اننا نعيش محترمين والكل يعمل لنا ألف حساب.
