رأيت فيما يري المسطول انني قد قررت في يوم اسود ومنيل اني «أسكور».. و«الأسكوريشن» لمن لا يعرفه - وإللي ما يعرفه يجهله يا اخويا - هو شراء قرش الحشيش من الديلر.. والديلر لمن لا يعرفه برضه هو بائع الحشيش ورمزه الكودي ابو رباب.. المهم فوجئت باني «مفير كاشات».. وهو لمن لا يعرفه - يا ساتر ع الجهل- هو الأشفرة والمعادل الموضعي للإفلاس.. يا نهار طين وهصطبح منين دلوقتي؟! فكرت اعمل اتصالاتي بأعلي دماغ في العيال أصحابي حبيب قلبي المعلم بيبو - إللي فرقع جيجي - وطبعا قالي ولا يهمك حلك عندي.. «والجمعية معايا».. فرحت جدا لأن الجمعية لمن لا يعرفها هي اشتراك كل الشباب المأشفر وإللي عايز يصطبح عشان يجمعوا كاشات ويسكوروا سويا... بعد كام مكالمة جمعنا الكاشات بفضل دعاكي يا امه... وكلمنا الديلر إللي مظبطنا.. إيه يا مان ؟! دليفري والا هنروحله ؟!!.... لقيت بيبو في فيو عمري ما شفتها قبل كده... ترقرقت الدموع في عينيه ولمعت نظرة مليئة بالحزن والاسي في عينيه ولا عماد حمدي في اذكريني... ولف زي أحمد مظهر في الرجل الثاني وقال بحركة سلو موشن : «مفيش حشيش يا في البلد».... إيه؟ مفيش ازاي يعني؟؟ ده احنا في سينا يا معلم؟ الأمن الدماغي بتاع مصر كلها.. ده احنا بنصدره من هنا.. يا نهار طين مطين بطين.. طب والعمل إيه دلوقتي ؟! لقيت الكبير جو بيقول إن دي مشكلة مصر كلها وان مفيش حشيش خالص... واحنا مالنا بمصر دلوقتي يا مان.. رد كوكي الراشق ملعون ابو كده.. والراشق لمن لا يعرفه هو الشاب السيس إللي لازق في اي حوار... وبعد شوية الفاظ واصوات خارجة شالتها الرقابة وحطت تيييييييييييييييييييييت فكرت: هاصطبح ازاي؟!.... دي مؤامرة علي طلبة الجامعة إللي عندهم امتحانات بكرة والمثقفين إللي مش بيفلسفوا غير لما يشوفوا الدخان الأزرق والفنانين إللي مش بيفنوا غير لما يبيكوا... والباك لمن لا يعرفه هو ان واحد يشد جامد وبعدين ينفخ في وشك بتركيز.... أنا مش هسكت كده علي طول مش هستني العمر يمر.. انا مش هسكت لازم أقول قد ما هدفع قد ما «هرول».. و«الرَل» لمن لا يعرفه هو لف ميكس الحشيش داخل ورق البفرة لعمل جوب.. وبعد ما سخنتني شيرين وطلعتها في دماغي قلت أنا لازم أعمل حاجة.. دخلت ع الفيس بوك وقررت أعمل اعتصام وعملت جروب سميتها «من غير حشيش مش عارف أعيش» وبعت انفيتشنز بالعبيط...وعملت ايفينت للاعتصام علي رصيف مجلس الشعب - اشمعني يعني العمال والناس إللي عايزة مرتبات ؟! هم أحسن مننا في إيه يعني؟! - مش ده مجلس الشعبولازم يتكلم عن هموم ومشاكل المواطن الخرمان المطحون.. والخرمان لمن لا يعرفه هو المتكحرت إللي زيي ومش عارف يصطبح..... ولعت يا معلم.. في ثواني.. كل الخرمانين دخلوا الجروب.. ولقيت كل فئات الشعب العاملة وغير العاملة معانا - إللي لسه بتاخد الكاشات من الحاج وبتمصلح يعني- ... قلت تمام نظبط الاعتصام بقي... بعت مسدجات ل «ماكوبيتزا هاتوكيه اف سي» عشان يفتحوا فروع متنقلة.. وبيبسي عشان يبقي الراعي الرسمي للاعتصام... وإللي قفلني وفصلني وخلاني العن تييييييييييييييييييييييت ام كده.. اني لقيت واد نايتي من إللي لسه بياخدوا المصروف كل يوم الصبح من بابي وبيصطبحوا ع الكلام عن الحشيش من غير ما يشوفوه عامل كومنت ع الوول: «من حقنا من حقنا نحلم ب (جوب) يرولنا».