صحيح فيه حاجة اسمها تفاهم وفيه حاجة اسمها مصالحة حتى في الحروب اللي الناس فيها بتقتل في بعض .. عادي .. لكن في الحروب العدو بيبقى صريح ومطالبه - من وجهة نظره - مشروعة .. وفيه حاجة اسمها تبادل اسرى .. يعني هات رجالتي اللي عندك وخد رجالتك اللي عندي ويادار مادخلك شر . حصل ده مع اسرائيل ومصر وبين دول تانية كتير .. لكن – مرة اخرى – كل ده في الحروب اللي بين بلدين العدو فيها صريح .. انما الوضع عندنا مختلف كليا .. فلا الاخوان هما اسرائيل ولا احنا بنحاربهم او غاويين حرب معاهم .. احنا فقط بنقاومهم عشان يقفوا عند حدهم .. فبمزاجنا او غصب عننا ، للأسف هما مصريين ، ولا احنا عايزين نقضي عليهم ونمحوهم من الوجود .. بس ابعد عني واكفيني شرك .. عٌك زي ما انت عايز بره .. لكن تقرب مني بتضطرني اواجهك .. يموت من عندك ناس .. تقتل من عندي ناس .. خلاص غصب عني حطتني في موقف مكنتش احبه ولا عمري سعيت له .. بس انت اللي اخترت وانا معنديش خيار تاني .. اما انت او البلد .. والاجابة طبعا صريحة .. أمن البلد وأمن شعبها أهم عندي من أمنك انت ومطامعك وتطلعاتك المريضة .. فإن كنت عايز تسمّي اللي بينا حرب ، فلتكن .. بس لازم تعترف اني مش انا اللي بدأتها .. بس كمان مرة ، انا – ومعايا ربنا – اللي قادر انهيها. د- حسن نافعة – وله كل الاحترام – عامل مبادرة بيقول عليها مبادرة صلح مع الاخوان .. وقبله بشهرين كان عامل نفس المبادرة د احمد كمال ابو المجد وفشل فشلا ذريعا .. والواقع بيقول ان اى اتنين متناحرين وواقفين قصاد بعض وتدخّل بينهم من يريد الاصلاح .. فحتما ولابد ان الطرفين يقدموا تنازل عشان المركب تمشي .. طيب احنا كطرف الحكومة والشعب مستعدين نتنازل ونسامح .. " شوفوا ممكن نوصل لحد فين " .. ونقولهم كمان عفى الله عما سلف .. بس كل واحد بقى يتكّن في بيته ويكفي خيره شره ويخرج تماما من المشهد ويحمد ربنا انها وصلت لحد كده. ده من جانبنا احنا .. وكفاية دم وتفجير وهم ازرق مكناش نتخيل اننا حنشوفه في مصر .... وربنا بيقول " فإن جنحوا للسلم فاجنح لها " .. لكن هل هما قدموا اى مبادرة للسلم .. لأ .. هما ممكن يقعدوا معانا على مائدة تفاوض ، لكن تعالى شوف ايه اللي ممكن يطلبوه حتى وان لم يعلنوا عنه بشكل صريح .. مش حنقول انهم حيشترطوا الافراج عن اعضاء الجماعة المسجونين .. " وان كنت اشك ان الطلب ده مش حيكون من اولى طلباتهم " .. لكن لنفترض مش حيقولوه .. بس حيقولوا حاجة تانية .. عدم استبعادنا من المشهد السياسي .. والاعتراف بنا كفصيل وبالتالي الغاء قرار الحكومة بأننا جماعة ارهابية .. واذا تم ده يبقى من حقنا ندخل انتخابات الرئاسة ومجلس الشعب .. ونكون طبعا حزب وميتقلش عننا جماعة محظورة .. ونعيده م الاول وجديد .. وننام كام سنة في الدرة ونخطط ونتصل باللي بره واللي جوه لحد ماتيجي اللحظة المناسبة ونط ع الحكم تاني ونخلّص تارنا من الجيش والشعب اللي ايدهم في ايد بعض .. حنقطع لهم ايديهم الاتنين. المثل عندنا بيقول اللي اتلسع م الشوربة بينفخ في الزبادي .. واذا انضحك عليك مرة ماشي .. بس لو انضحك عليك بنفس اللعبة مرة تانية .. تبقى غبي وتستاهل اللي يجرى لك .. واللي لسه شايف ان الاخوان نيتهم صادقة في التصالح ، يبقى لسه مش عارف تاريخ الاخوان .. واذا كان عارف وبيستعبط .. يبقى له غرض - مش حلو ابدا - من طرح المبادرة .. ولينا حق لو دماغنا راحت لبعيد وظننا بصاحب المبادرة كل الظنون السيئة .. لان اللي ميشوفش م الغربال يبقى اعمى .. واللي لسه فاكر ان الاخوان ممكن يبقوا بني ادمين .. يبقى واحد منهم .. ولو كان واحد منهم يبقى يبعد بعيد خالص عننا .. ولا يقوللي مصالحة ولا زفت .. يسكت او ينقطنا بسكاته زي ما ابو المجد سكت و " لم الدور " .. واللي يخون مرة ممكن يخون ميت مرة .. واللي يبيع ارضه .. يبيع بسهولة جدا عرضه .. والغاية عنده تبرر الوسيلة .. ازاى اوصل للمشروع الكبير اللي بنحلم به من 80 سنة ؟ .. يموت ناس ؟ طظ .. نهتك الاعراض ونبيعها ؟ طظين .. امريكا معانا واسرائيل في ضهرنا وفلوس قطر زي المطر .. بس هنا لازم اقول يا ابن الهبلة انت وهو .. كانت امريكا نفعتك .. كانت نفعت نفسها اساسا .. ولا اسرائيل ولا قطر .. عشان احنا كشعب وجيش على حق .. انتوا بتدافعوا عن باطل واحنا بندافع عن حق .. وصاحب الحق هو دايما بأمر ربنا الكسبان. المعركة طويلة عارفين .. بس احنا كمان نفسنا طويل .. وبدأناها .. ومش ناويين نقف في وسط الطريق .. نهايته عارفينها وشايفنها وبأمر الله .. بأمر الله .. حنوصلها. عشان كده مبادرتك ياعم " نافعة " .. مش " نافعة " .. فنقطنا بسكاتك الاهي يعمر بيتك .. مرارتنا اتفقعت وروحنا بقت في مناخيرنا .. ومش ناقصين تنطيط القرود !!