من فترة كنت زهقان أوي ، قلت أكسر الملل واتفرج شوية على التليفزيون،" لعل وحسن" أقدر أخرج من "البااد مود" بتاعي. القصد مسكت الريموت وبدأت رحلة التقليب بين المحطات، حاجة خنيقة ملهاش أي تلاتين لزمة بس اللي حصل بقى: - فتحت تليفزيون دبي لقيته لسه بيعيد في مسلسل قصة الأمس لمفجرة الثورة إلهام شاهين. فكك منها شوفتها قبل كده مرتين تلاته. رحت على الحياة – لا مؤاخذة – الحمرا، لقيت لبني عسل ومعاها ضيف نص وشه دقن. لبني: حضرتك عايز تقنعني إن اللي بيعملوه الإخوان في الشارع المصري ده مش إرهاب؟. الضيف: وحضرتك عايزه تقولي إن فض الاعتصامات بالقوة المفرطة في الجامعات ورابعة والنهضة مش مجزرة وجريمة ضد الإنسانية، وألا أحكام سجن الطلبة 17 سنة وغرامات كام ألف لمحاولة اقتحام مشيخة الأزهر دي مش انتقام ، دا اللي قتل الثوار مخدش ساعة حبس ، يا أستاذة. لبنى: نخرج فاصل ونكمل الحوار. أنا : اخرجي على مهلك يا شابة وماله يا حبيبتي وماله. بصيت على الأون تي في : المذيعة تسأل مراسلة القناة وقد انقسمت الشاشة لست قطع ولا أجدعها بيتزا؟ ماذا يحدث عندك الآن ؟ المراسلة: أنصار مرسي بيضربوا طوب على الإخوان؟
المذيعة : من يضرب من ؟ المراسلة: أنصار مرسي بيضربوا طوب على الإخوان زيمبؤلك كده. المذيعة: يبدو أننا فقدنا الاتصال بمراسلتنا. أنا: أحسن برضه مش ناقصه عته ، نصيحة وانتوا بتسلموا المراسلين رواتبهم، يا ريت تسلموهم صنف أصلي ، لأن البلد مليانة حشيش مضروب وولاد الحرام مخلوش لولاد الحلال حاجة بجد. - الحياة الموف: الحلقة 2011 من الجزء العاشر من المسلسل التركي العشق الممنوع.. كفاية بقى مش طالبة حفيد مهند كمان. - النهار: والمذيعة مبتسمة تقول: نصب تذكاري لشهداء الثورة بميدان التحرير. شريط الأخبار أسفل نفس ذات القناة: تحطيم أجزاء من النصب التذكاري بالتحرير. بالسرعة دي؟ بصراحة المفروض المرة الجاية تعملوا "النصب الرسمي" ده من العجوة ، وبدل ما يحطموه ، يأكلوه وأهو كله يستفيد. - الفراعين: عوكاشة: أحذر اليهود من مخطط إخواني لتدمير إسرائيل. أنا: يا راجل مخطط مش كاروهات ، شوف كده كويس ودقق في الخبر بدل ما يطلع فاكس والا حاجة؟ - سي بي سي : خيري رمضان: شركة سيجال الإسرائيلية تقوم بأعمال تأمين قناة السويس ولا تديرها كما أدعى المغرضون. أنا: بلا إدارة بلا تأمين بلا كلام فارغ، وإحنا مالنا ومال أم القناة دي مش الريس مورسي باعها لقطر من سنة تقريباً ؟ - روسيا اليوم: وقد نجح فريق من العلماء الألمان في التوصل إلى ..بينما أكمل العلماء الروس بنجاح تجربة ..وأنتج الحائزون على نوبل في الكيمياء لأول مرة في العالم ..ومن مصر نجح وزير التموين في ضبط المخابز التي تتلاعب بالدقيق في السوق السودا ..ووعد الوزير بحل مشكلة رغيف الخبز نهائياً خلال الخمس سنوات المقبلة إن كان لينا عمر. مليت بصراحة وقلت أرجع لقديمه واشوف حاجة حصري ع التليفزيون المصري. - القناة الأولى: وما زالت أجواء الحزن تخيم على جماهير الكورة المصرية، بعد هزيمة المنتخب القومي أمام منتخب غانا أو البلاك ستارز الذي تأهل بسهولة على حساب الفراعنة. أنا : الفريق الغاني جامد فعلاً ..والمثل بيقول الغاني تمنه فيه ، خلينا نعيش أربع سنين تاني مع الكابتن مجدي عبد الغاني ونشوفه ركنها يمين ازاي ؟ - الفضائية المصرية: مسلسل قديم مش فاكر اسمه، عبد المنعم إبراهيم يردد جملة واحدة بس: " بقت ستميت حته" .. يا مراري يانا يأمه ..ارجع يا عم لهري التويتر والفيس بوك، وشوف كده عمك سامي عنان خلص قراية الجورنان وإلا لسه ؟!