طبعا عنده حق وميت حق كمان .. وانا لو منه اعمل اكتر من كده .. مادام بعمل كل عملة والتانية ومحدش بيقوللي بتعمل ايه .. يبقى لازم اللي يجي على دماغي واللي يقوللي عليه المرشد او الشاطر لازم اعمله .. لأني لو معملتوش مبقاش من الإخوان .. ولو مبقتش من الاخوان حابقى من الشعب المصري .. والشعب المصري لامؤاخذة بياخد على قفاه .. وانا لامؤاخذتين محبش حد يضربني على قفايا .. عشان كده انا ضد الشعب المصري وحافضل ارقعوا على قفاه لحد ما قفاه يورم ويجيب دم .. وخلاص عرفت أخره .. شوية مظاهرات فيها يجي 200 او 300 يفكوا عن نفسهم شوية ويرجعوا بيتهم قفاهم يقمر عيش.. ودي على فكرة حاجة مش وحشة .. القفا لمّا يسخن من السكع ، ممكن نقمّر بيه العيش ، وممكن لو سخن اكتر واكتر نحط عليه الرغيف عجينة وبعد دقيقتين يبقى ميت فل وعشرة .. وبالطريقة دي نحل ولو جزئيا أزمة السولار اللي بيشغل الأفران ونوفّر عمالة ويبقى الحل البديل للأفران والسولار .. قفا المواطنين.! صح يا مرسي .. انا لو منك اعمل اكتر من كده .. عملت إعلان دستوري وهاجت الناس اللي فاهمة .. بس الشعب نفسه مش فارقه معاه ومش فاهم .. خليت القضاء ينام على بطنه وركبت فوقه وفضلت رايح جي لحد ما ارتحت .. ومحدش من الشعب عمل حاجة .. اذا كان اللي نام على بطنه نفسه معملش حاجة .. كأن المسألة جات على هواه .. شوية زعلوا وحسوا بإهانة .. بس جابوا واطي على طول .. اللي اتهدد في أكل عيشه .. واللي اتوعد بمنصب " فلة " بعد المعاش .. واللي اشترى دماغه وقال زي ما جحا قال مادام " .... " بعيد عن " ... " يبقى مفيش مشكلة " .. مع انه لو بيفهم وعنده دم حيعرف ان المسألة مش بعيد خالص عن " .... " وبكره هو كمان لازم ينام على بطنه.. في الأول وكلاء النيابة راحوا للنائب الخاص وأجبروه على تقديم استقالته .. كان موقف شجاع وجميل .. قام مرسي كلم النائب العام وقاله : انت راجل ولا سوسن ؟ .. عايز يقوله انت راجل ولا مرة .. انا هنا حاميك وانا اللي عيّنتك وانا اللي البلد كلها تحت ايدي .. حتخاف من شوية وكلاء نيابة عيال .. ارجع مكتبك تاني وانا حاعرف شغلي مع ولاد ... دول.
وطبعا مرسي عنده وزير عدل " ربنا ياخده " .. قام جابه لحد مكتبه فوقف قصاده راسه وعينه في الأرض : جرى ايه يا سي مكي افندي .. انت اسمك احمد ولا حمدية .. هو انا معيّنك وزير عدل عشان تعدل بجد .. انا معيّنك وزير عدل عشان تعمل اللي انا عايزه مش اللي عايزه القانون .. " ... " ام القانون .. انا القانون .. انا الحاكم بأمره .. انا هنا اللي اقول كن فيكون .. اسمع يا مكي .. شوية وكلاء النيابة " العِرر " دول ، مش عايز اسمع صوت حد منهم .. وموضوع النائب العام ده ينتهي .. والحكم الأخراني اللي طلع من محكمة الاستئناف .. خلّي اللي طلعه يبرمه برمة حلوة مألوظة ويحطه لا مؤاخذة في " ... " ... سامع يا سي مكي افندي ولا ابعت اجيب ابنك من قطر واحرمه من ال 50 الف دولار وارجعه تاني مصر ياخد له 2000 جنيه .. كل شىء بتمنه يا مكي .. واللي عايز الدح .. ميقلش أح .. وبعدين قبل ما انسى .. هو مش الطب الشرعي ده تبعك ولا تبع أمي ؟ .. تبعك طبعا .. عايز موضوع الواد اللي رجالتي قتلوه في الجبل الأحمر .. الواد ده اللي اسمه محمد الجندي .. عايز الموضوع ينتهي وبتصريح منك انه مات في حادثة عربية .. وعليا الطلاق من بيتي يا مكي لو الموضوع ده حد نبش فيه تاني ليكون حسابك معايا عسير .. فاهم يا " مقطف " ولا أقول كمان؟
دكر يا مرسي .. اهو هو ده الكلام ولا بلاش .. اطعم الفم تستحي العين .. اما الشعب اللي مش لاقي ياكل ولا يلبس ولا يقضي مشاويره فاضربه على قفاه أجمد من كده .. مادام ساكت لك وساكت عليك وعلى عمايلك السودا المهببة بهباب ازرق وكحلي .. على رأى ابراهيم عيسى .. الشعب قاعد حاطط ايده على خده مستني إيه اللي حيحصل .. لأ .. والمضحك انه بيستعجل الشوية اللي بيثوروا .. قال ايه .. عشان يخلّصوه من مرسي والإخوان .. وهو قاعد يدعك في " ... " ، ومتضايق كمان ان الشوية اللي بيثوروا محدش سائل فيهم .. ياخي " ... " .. طيب ما تقوم انت بأيمان اللي اللي خلفوك واعمل حاجة .. هو انت مش عايز تعمل مجهود خالص .. عايز الأكل يجي لك لحد عندك مع السلطات والحلو من غير حتى ما تحاسب عليه .. ياخي قوم قامت قيامتك منك له له له!
جدع يا مرسي .. انت مراهن على الشعب ده وحتكسب الرهان .. حيغضب شوية وبعدين يتلهي في رغيف العيش يجيبه ازاى .. وانبوبة البوتجاز اللي لو مرجعش بيها مراته حتضربه بالشبشب .. وشبشب مراته أهون من شبشب مرسي .. اللي قاعد يلاحق اللي لسانهم طويل والنائب العام " الله ينور " ولا كأن فيه حكم صدر ضده ان وجوده هو والعدم سواء .. بس اول ما مرسي يشاور بصباعه اللي عايز قطعه .. على طول المكتب الفني يشتغل ونجيب الناس المحترمين ونبهدلهم ونخليهم يستلفوا عشان يدفعوا الكفالات اللي طلعت عبدالله ابراهيم اتفق مع هشام قنديل انه حيخلّيه يستغنى عن قرض صندوق النقد بفلوس الكفالات.
اعمل يا مرسي ما بدالك .. ويخرب بيت اللي يزعلك يا شيخ .. ان كان على جبهة الانقاذ .. والله لو قعدوا يصرخوا من هنا لسنة جاية ماحد حيسمع لهم كلمة .. خلي رهانك على الشعب .. زهّقوا في عيشته .. يأّسوا من حياته .. جوّعه .. حتلاقيه تحت رجليك .. هو صحيح قام بثورة بعد 30 سنة من الذل والقهر وقلة القيمة .. ومحتاج بميتين أمه 30 سنة تانية عشان يغضب ويثور .. لأ يا روح خالتك انت وهو .. خليك نايم في البيت زي الولايا .. وخلّي مرسي وجماعته " يبع... " زي ماهما عايزين .. واعمل بقى زي وكلاء النيابة وقول زي جحا ... مادام بعيد عن مش عارف ايه يبقى مفيش مشكلة .. حتفضل تقول كده لحد ما تصرخ وتجيب دم وتجيلك بواسير وانت بتقول : حد يشيل ابن الكلب ده من فوقي .. يمكن ساعتها يبقى عندك دم وتنزل الميدان وماترجعش منه الا ومرسي في السجن او اخذ طيارته وطار على قطر!!
