أزمات أنابيب البوتاجاز واللحمة أم 70 جنيه للكيلو والإضرابات والاحتجاجات والاعتصامات والتحكيم المصري الذي خلع برقع الحياء لصالح الأهلي.. أزمة أختفاء الحشيش وكأن مصر ناقصة أزمات.. عشان يبقي فيها أزمة حشيش كمان.!! قرش الحشيش من عشرين سنه كان بعشرين جنيه.. وقبل الأزمة الأخيرة كان بحوالي 150 ثم قفز قفزة مرعبة إلي 500 جنيه وياريته موجود كمان... والحشيش بغض النظر تماما عن وجهة نظرك فيه.. أو توجهات المجتمع بالنسبة له.. وثقافة كل شريحة التي تحكم تعاملها معه.. بصرف النظر عن كل هذه الاعتبارات.. فإنني سأتناول الشق الحكومي علي اعتبار أن الحشيش حكومي النزعة.. وطني التوجهات.. سياسي الميول.. واحدة واحدة ماتتحمقش عليا.. أنا أقول لسيادتك إزاي الكلام ده.. سمعنا الصلاة علي الحبيب خلي قلبك يطيب.. دلوقت الحشيش ده لو كنت سيادتك من رواده.. بيعمل إيه؟!.. بيخلي مزاجك حلو وتحس إن الدنيا جميلة من حواليك.. وبيهدي أعصابك.. وبيجلي مخك ويلمع أفكارك ويلغي الدوشة تماما من حولك.. وهو يخدرك لأنه مصنف كمخدرات.. ولكنه وبلا مجاملة أشيك وأنزه أنواع المخدرات.. ولست في مجال تعداد مآثر الحشيش.. فقد اختلفت الآراء حول ذلك.. ولست أحاول أن أروج له.. هو مش محتاج.. ولكنني أتحدث عمن يتعاملون معه فقط.. نكمل الكلام.. وبيعمل إيه كمان؟.. بيشيل الهم من علي أكتافك.. مش بيشيله خالص.. أنا قلت من علي اكتافك بس .. عشان ماتحسش بيه.. ممكن بقي ينزله علي بطنك مثلا أو علي رجلك أو علي جيبك.. ماشي معايا.. خد دي كمان... لو كنت فنان أو مبدع وبتشتغل من ملكاتك العقلية.. ومن نزيف أعصابك.. يبقي أكيد أو يعني علي الأرجح حتلاقي للحشيش ضلع كبير في منظومة الإبداع.. ليه؟ لأنه برضه حيتيح لدماغ الفنان قدر أكبر من رحابة الأفق الإبداعي.. لأنه حيلغي ولو حتي إلي حين.. الإحساس بالهم والغم لدي الإنسان الذي يعمل بالفن.. أضف إلي ذلك انه بيخلي للسجاير طعم تاني خالص.. علي أساس إنها أسهل ممارسات التدخين.. وفي إيدك علي طول.. والدخان الأزرق لما بيعشش في تلافيف الدماغ.. بيوريك الدنيا سكر حلوة الدنيا سكر.. ناهيك عن تصاعده أمام عينيك إلي سقف الأوضة.. فتشعر آنذاك أن حياتك كلها أصبحت بدون أي أسقف.. وليس لأحلامك وخيالاتك أي حدود.. كفاية جدًا موضوع السقف ده.. كل هذا وأكثر.. هكذا نلمح العلاقة الوثيقة والوطيدة.. بين الحشيش والحكومة.. هي الحكومة دي أو غيرها عايزة إيه خلاف إن المواطن بتاعها.. يبقي مش حاسس بأي هموم؟!.. ويبقي شايف الدنيا زي سمير صبري ما كان شايفها... سكر حلوة الدنيا سكر.. الحشيش بيعمل ده.. وعلي أساس أن حكومتنا فنانة بطبعها.. «ووزير الثقافة بتاعنا فنان كمان».. فهي بالحشيش بتاعها توفر الجو الإبداعي الجميل للفنانين.. فما بال حشيش اليوم؟! وهل تتخلي الحكومة عن هذا الأوبشن الخطير الذي يوفره الترالم لم وهو أحد أسماء الحشيش.. أم أن الأمر خارج سيطرة الحكومة.. والأزمة ضد إرادة الحكوميين.!! أنا أشك.. طيب لو عندنا دكتور دماغه عالية زي يحيي الفخراني في فيلم الكيف.. وعمل عجينة وشوية عطارة.. والكرف أخدها منه وغرق بيها السوق العطشان.. والبهظ بيه اللي هو جميل راتب... راجل خبرة وعنده دراية كاملة بالسوق المصري.. يستطيع أن يظبط هذه المسألة بما لا يضر بسمعة الحشيش المصري.. وبحيث لا يفسد ذوق الحشاش المصري في نفس الوقت!.. علي أساس إن ده حيبقي حشيش مضروب.. رغم جودة صناعته... ماذا لو أن الحكومة وهي قوية وقادرة علي كل شيء.. اتصرفت وجابت واحد زي يحيي الفخراني عشان تحل أزمة الحشيش.. ليه لأ؟ ولماذا لا يكون هناك تنسيق بين الوزارات... وهل الداخلية ضد الحكومة؟! مش بيقولك ظبطوا 4 طن حشيش.. ومزنقين علي كل المنافذ والتجار الكبار!.. وهل كبار الداخلية مش مركزين اليومين دول؟ البلد كلها فايرة وأعصابها علي المحك.. البرادعي والحركات المطالبة بالتغيير والإخوان والانتخابات الرئاسية المزمعة.. وإضرابات واحتجاجات واعتصامات وفتن طائفية.. ناهيك عن الاحتكاكات والمشاكل المعتادة بسبب الفقر والعيشة الضنك.. كل الظروف دي مش محتاجة علي الأقل20 طن حشيش..؟!! خلي الناس دماغها تعلا ومزاجها يحلو وتشوف الدنيا.... إيه؟؟.. علي معاليك نور.. سكر حلوه الدنيا سكر... لكن دلوقت استلم يا معلم أزمات من كل شكل ولون.. السكر غالي زي كل حاجة.. وتنظيمات التموين ملخبطة ناس كتير.. وأنابيب البوتاجاز لسه فيها أزمة.. والضرائب أزماتها مستمرة.. واللحمة وصلت 70 جنيه ولسه.. والتحكيم المصري قطع برقع الحياء بعد أن خلعه تماما.. والمنظومة الرياضية في مصر قررت أن الأهلي بطل الدوري خلاص.. وإن كان عاجبكم.. البلاوي دي كلها ومافيش حشيش... طب إزاي؟!.. أنا أعرف أن عندنا ناس كبار وفنانين ومبدعين عظام.. حياتهم آخر لخبطة هذه الأيام ومزاجهم ليس في أحسن حالاته.. بسبب أزمات مصر بوجه عام.. وأزمة الحشيش علي وجه الخصوص.. يارب فك أزمة الحشيش..... الحشيش ياباشا إللي بيخلي البني آدمين تشوف الدنيا إييييييه... أيوه.. سكر حلوة الدنيا سكر.. صباحكم بيضحك لوحده.. أو مساءكم جمييييييييييل...
