أسهل شيء في الدنيا لو حبيت تقلب الحقايق انك تحط أشياء متشابهة زي بعضها وتبتدي تتكلم عنها وتتفلسف وتقول زي ما إنت عايز وافتكر ان واحد دخل عليَّ وقال لي يا أخ مين مانديلا ده اللي رئيس الاتحاد الدولي بيصر علي إنه ياخد ضربة البداية في كأس العالم القادم في جنوب أفريقيا؟!..واستغربت بشدة وقولت له: فيه حد مايعرفش مانديلا!! رد وقال لي: ما انا بسألك مين مانديلا ؟ وعملت نفسي أبو العريف وبصيت للرجل من فوق لتحت بنظرة المثقفين الماركسيين أو الإخوة المجاهدين الإسلاميين ورحت متكلم وقعدت أشرح للرجل إن مانديلا ده رجل مناضل، وزعيم قعد سنين في المعتقلات وكان بيحب بلده وعاش علشان قضيتها وعاش أسطورة في العالم، وأفرج عنه بعد أكثر من ربع قرن وتوقعت أن كلامي الكثير والأحاديث اللي أنا عمال أحكيها حتجيب أثر في نفس الرجل ويفهم لكن المفاجأة بعد ما خلصت كلامي راح قايل لي: إيه يا عم الكلام اللي بتقوله ..زعيم إيه ومناضل إيه ..انت عارف مانديلا ده عامل زي مين ..ده رجل زيه زي عادل شكل بالضبط ..طبعا كاد يغمي عليَّ لأسباب كثيرة جدا ولأن زي الرجل اللي مش عارف مانديلا وقعدت أشرح له مين هو مانديلا مضطر إني أشرح لحضراتكم مين هو عادل شكل .. وهو يا سادة زعيم الجماهير بتاع نادي الاتحاد وصاحب سطوة في النادي وله كلمة مسموعة علي المدربين واللاعبين والإداريين، وهو رجل يحشد لك الناس في الانتخابات والمؤتمرات وفي الأفراح والمياتم باعتباره، رجل الجماهير، وممكن يدخل في عركة ويقفل فرح وقت اللزوم وبالتأكيد أن عادل شكل لا يمت من قريب ولا من بعيد للمناضل مانديلا علشان كده صرخت في الرجل وقلت له: كلام إيه يا مجنون اللي انت بتقوله؟ شكل ايه اللي زي مانديلا الرجل العظيم ده، وبسرعة كان الرد: والنبي تقعد علي جنب انت مش فاهم حاجة وعامل مثقف وانت جاهل عمرك ما حتوصل لحاجة ..علي طول قلت له: أنا جاهل طيب سيادتك قول لي ازاي شكل زي المناضل مانديلا ..؟! قال لي: اسمع يا سيدي هو مش عم مانديلا اتقبض عليه .. قلت له: أيوه .. رد: وشكل برضه اتقبض عليه أدي واحدة ..نمرة اتنين مانديلا اتسجن ولا لأ ..اتسجن يا سيدي وعادل شكل اتسجن، وكمل الرجل كلامه ..مانديلا كان بيحب بلده مش كده ..أيوه يا سيدي بيحب بلده جدا ..وعادل شكل عاشق للإسكندرية والاتحاد السكندري ..وبعدين مش إنت بتقول علي مانديلا زعيم ..أيوه وعادل شكل زعيم الجماهير يبقي زي مانديلا ولا مش زيه ..اتقبض عليه واتسجن وبيحب بلده وله قضية بيدافع عنها زيه زي مانديلا بالضبط. كلام الرجل لخمني وخلي عرقي مرقي ومش عارف أرد.. الرجل جاب كل أوجه الشبه ونفس الأوضاع والظروف ومش عارف أرد عليه ودي خيبة أدعياء الثقافة اللي زيه ..عاملين مفتحين وفاهمين وعارفين ودارسين وواعيين والأيام تمر علينا ونكتشف إن المناضل مانديلا زيه زي عادل شكل ..شفتوا خيبة أكتر من كده ..ازاي الحقايق ممكن تتقلب في لحظة، الأسود يبقي أبيض والعكس ..يعني المناضل العظيم مانديلا صاحب التاريخ الحافل رمز كل المناضلين والزعماء في العالم بقي زيه زي عادل شكل كبير مشجعي نادي الاتحاد، والحقيقة إن ده وارد في مصر وممكن يحصل وأنا مش مستبعد أي حاجة .. مشكلتنا في مصر اننا نواجه الحقائق بالأكاذيب وبنصر عليها ونتحدي بها الغير ..نزور الانتخابات ونقول قمة الديمقراطية .. ننشر الفساد والمحسوبية ونتكلم عن الشفافية ..نضيق علي الفقراء والغلابة وناخد منهم ضرايب ونتكلم عن المساواة والعدل .. من وجهة نظري لما المناضل مانديلا يتساوي مع زعيم الجماهير عادل شكل يبقي كل حاجة مباحة في مصر ..خوفي الوحيد أن عادل شكل ممكن يطلع أهم من مانديلا لأن مصر خدت بطولة أفريقيا 7 مرات لكن جنوب أفريقيا خدتها مرة واحدة بس.
