بالصور.. اتعلمي معانا النهاردة إزاي تنضفي الرنجة وتِخلِيها، وكمان هنعرفك إزاي تعملي طريقة جديدة ولذيذة للرنجة وتستمتعي بطعمها مع عيلتك في شم النسيم.. طريقة تنضيف الرنجة: 1- هاتي سكينة حادة واقطعي بيها راس الرنجة. 2- افتحي الرنجة من بطنها وشيلي كل أحشائها ونضفيها كويس. 3- افتحي ضهر الرنجة بالسكينة. 4- شيلي جلد الرنجة بشويش وابدأي من أول الرنجة. 5- اقسمي الرنجة نصين من ضهرها، وشيلي بعد كده بإيديكي الشوك وسلسة الضهر اللي بيكونوا في الرنجة، وبكده هتكون عندك رنجة مخلية ونضيفة. لفائف الرنجة على "سفرة دايمة * صحة وجمال اضغط على الصورة لمشاهدة الجاليري: لفائف الرنجة المقادير: كيلو رنجة 3 ثمرة فلفل رومي أو حامي مقطع شرائح 2 بصلة متوسطة مقطعة شرائح كوب بقدونس مفروم ورقة لاورا كبيرة ملح وفلفل أسود 1⁄3 كوب خل 1⁄3 كوب ميّه الطريقة: 1- اخلي الرنجة من الشوك والجلد وتبّليها بكمية ملح وفلفل أسود مناسبة. 2- احشي الرنجة بكمية مناسبة من البصل والفلفل الأخضر والبقدونس، ولفّيها بعد كده على شكل رولز وثبّتيها بالأعواد الخشبية علشان الحشوة ما تطلعش. 3- هاتي صينية وحطّي فيها باقي كمية البصل والفلفل الأخضر والبقدونس وورقة اللاورا ، ورصّي فيها بعد كده لفائف الرنجة. 4- اخلطي الخل والميّه مع بعض وضيفيهم على الرنجة، وغطّي بعد كده الصينية بورق فويل ودخليها في الفرن لمدة 30 دقيقة أو لغاية ما تاخد لون دهبي حلو. 5- رصّي لفائف الرنجة في طبق التقديم وقدّميها مع العيش البلدي.. وبالهنا والشفا. استنونا كل يوم مع وصفات جديدة... سلام،،،