مشكلتي أعتقد هي أزمة منتصف العمر، وهي إحساسي بإني محتاج تغيير في حياتي ضروري.. ببساطة أنا كأي طبيب اتجوزت متأخر، والحمد لله عندي ولدين وزوجة ملتزمة بس بسيطة جدا، آخرها هاطبخ إيه وعايزة طلبات إيه، يعني لا حركات ستات ولا دلع ولا رقص وبصراحة كشكل مقبول.. اللي بادور عليه هو ارتباط بست محتاجة راجل بجد، احترام.. ذوق.. أدب.. ومستعد للمصاريف بس مش شقة وفرش وشبكة، يعني ممكن ست أرملة وعندها طفل أو اتنين أو مطلقة وعندها سكن جاهز، يا تري ده طلب مستحيل ولا تفكير خيالي؟ يا ريت تساعدوني لأني حاسس بملل قاتل ومش عايز أغضب ربنا بأي علاقات، لأني طبيب جراحة عامة، ورأس مالي سمعتي، وكمان صعيدي ومقيم بالقاهرة وعمري 39 سنة.. أرجوكم أفيدوني.
dr_ad
أسهل حاجة على الإطلاق إنك تلاقي إنسانة مطلقة أو أرملة أو حتى بنت عدت الخمسة وثلاثين وماتجوزتش، ومش هيكون عندها مانع قوي إنها ترتبط بدكتور ناجح حتى لو كان متجوز ومخلف، وحتى لو كانت بكده هتساعده في إنه يهدم بيته اللي جاله على كبر. أيوة هتلاقي واحدة أكيد محتاجة راجل بجد، بس السؤال ومن غير زعل هل هتكون ليها راجل بجد؟ هل كنت لزوجتك راجل بجد؟ هل سألت نفسك إيه اللي ناقصها وبتطلبه منك وإنت دايما بتتجاهله لحد ما حوّلتها لهذه الإنسانة المملة الروتينية، اللي أكيد قالت زي ستات كتير أهي عيشة والسلام، وبلاش أهدم بيتي وأكيد حالي أحسن من غيري. الرجولة اللي قصدي عليها هي إنها تعتمد عليك وتحس معاك بالأمان وتشبعها عاطفيا وجسديا، مش إنك تطالبها بس إنها تكون دلوعة وشايفة طلباتك، إلا إذا كنت هتتجوز عروسة إلكترونية. مش عارفة إزاي واحد في عمرك وفي خبرتك مش قادر يقول لمراته على اللي هو عايزه؟ مش عارفة إزاي مافكرتش إنك لو اتجوزت غيرها فحتى ورقة التوت اللي هي عايشة علشانها مش هتكون موجودة، وإزاي مابتحمدش ربنا إنه كرمك بزوجة بتقول عليها بنفسك شكلها مقبول وملتزمة، وربنا رزقك منها بطفلين محتاجينك وهي كمان محتاجاك سواء كامرأة أو كأم. هل جربت مرة إنك تفاجئها بهدية بسيطة في وقت غير متوقع؟ ولا دايما بتقول دي هيافة وسايبها مربوطة في الساقية لوحدها، وبتكتفي بإنك ترمي لها مصروف البيت كل أول شهر؟ صدقني علشان تاخد لازم تدي، وماينفعش إن طرف يفضل يدي على طول، ساعتها هيترجم الموضوع لحالة من الإحباط، وزي ما هي مش لاقية احتياجاتها أكيد مش هتدي لك احتياجاتك. حاول تستعيد ذكرى زواجكم الأولى وتشوف بنفسك: هل هي كانت كده من الأول ولا اتغيرت؟ هل كانت دلوعة وبتلبس وتتشيك وتلاقي منك رد فعل حلو ولا كنت بتعمل مش واخد بالك؟ هل كنت بتسألها مبسوطة معاك ولا لأ ولا كنت بتقول لنفسك أكيد مبسوطة معايا وتحمد ربنا عليّ.. ده أنا لقطة؟ افتكر إمتى آخر مرة قلت لها كلمة حلوة أو شكرتها على حاجة عملتها، سواء ليك ولا للأولاد ولا بتتعامل معاها بمنطق إن ده واجبها أو إنها مش محتاجة أقول لها شكلك حلو النهارده؟ تفاصيل كتير يا دكتور ممكن تكون أدّت بيك للحالة اللي زوجتك فيها من روتين ورتابة خلتك تدوّر برة. وصدقني أي إنسانة هترتبط بيها لازم هيكون لها مطالب، ولازم تكون متأكد من قدرتك على العطاء ومش بس اللي هو عبارة عن ماديات ومصاريف، لكن العطاء اللي بيبان في المشاركة والود والاهتمام. قول لمراتك على اللي عايزه منها واللي عايزها تعمله لكن بأسلوب كويس ومافيهوش رفض، وقول لها إنت الكلام اللي عايز تسمعه منها واسمع منها اللي هي عايزاه وحاول تنفذه، وحتى لو ماعرفتش بس هي أكيد هاتحس بإنك بتحاول وإنك عايز تسعدها مش بتبص بس على طلباتك ورغباتك. أتمنى لك التوفيق وإنك تشوف الإنسانة اللي معاك وتشوف إنها محتاجة لراجل بجد.