أنا عندي 18 سنة في معهد خدمة اجتماعية، اتعرّفت على واحد في سنة أولى وحبينا بعض أوي، بس مع الوقت اتغيّر من ناحيتي أوي، ومش عارفة ليه!! وبدأ اهتمامه بي يقل ومعاملته بقت وحشة أوي، بس أنا ما عملتش حاجة لكل ده، لدرجة إني بدأت أمل وأزهق، وكل ما أسأله أنت عايز تكمل؟!! يقول لي آه عايز. آخر مرة كلمته فيها قعد يومين ما يردش عليّ، وقلت لنفسي أنا مش حاتصل تاني عشان حسيت ساعتها إني بافرض نفسي عليه أوي، وجيت على نفسي واتصلت تاني يمكن يكون تعبان علشان أطمن عليه، وبرضه ما ردش عليّ، وبعدين بعت ليّ رسالة قال لي ما تتصليش بيّ تاني، وقفل موبايله، الصراحة أنا اتخنقت ساعتها أوي، وبعت له رسالة قلت له إني مش عايزاك، وبعدين لما كلّمني رمى اللوم عليّ أنا لوحدي، معتبر نفسه إنه ما عملش حاجة؛ يعني مش عايز يغلّط نفسه، وبعدين قال لي: مش إنتِ قلتِ إنك مش عايزاني؟!! قلت له بس دي كلمة قلتها ساعة غضب.. قال لا إنتِ عايزة كده فعلاً، وبعدين أنا مش عايزك خلاص. أنا بحبه أوي أوي والله، بس أنا شفت منه كتير أوي واستحملته كتير. قولوا لي لو أنا غلط في اللي عملته أو أي حاجة عملتها؟!! وقولوا لي أعمل إيه عشان أصلح الغلط ده؟!! إحنا حنبقى مع بعض في المعهد، وأنا مش حقدر أروح وأشوفه، ردوا عليّ سرعة، بس عايزة رد يريحني وفي نفس الوقت ما يجرحنيش. lolo