أنا متجوزة من إنسان بحبه أوي بس والدته مسودة عيشتي، جوزي مسافر السعودية وأنا في الشقة بتاعتي بانام فيها وبس وأول أما باقوم من النوم بانزل تحت عند حماتي أعمل شغل البيت أكل ومسح وغسيل على شرط ليها ولحماي و3 شباب وبنتها متجوزة وقاعدة عندها البيت ومعاها ابنها وحامل، وأنا لحد دلوقتي لسه ما حملتش في طفل؛ لأن أصلا جوزي مسافر ومش باطلع شقتي إلا إذا كنت هانام أو هانظّفها كل ده ومش عارفة أرضيها. أهلي باروح أزورهم يوم واحد في الأسبوع، رغم إن بنتها مقيمة عندها مع ملاحظة إني طالبة في الليسانس وباذاكر، ولما طلبت من جوزي إني أقعد عند أهلي إلى أن تنتهي الامتحانات قالت له مش عاوزة مراتك تاني وطلّقها بس أنا عارفة إنه بيحبني وعمره ما هيسمع كلامها. أكتر من مرة طلب مني أكلمها وأنا كنت بارفض في الأول لأنها هتحرجني لكن عشان بحبه باعمل له اللي هو عاوزه، وهي بتعمل اللي أنا قلت عليه وتحرق دمي وآخر مرة رحت أزورهم قابلوني مقابلة وحشة أوي أوي فوق ما تتخيلوا وحماي واحد ما لوش كلمة، حماتي هي اللي ممشية البيت.. أعمل لها إيه لأني عارفة إن جوزي عمره ما هييجي على أمه عشان خاطري مهما كان بيحبني وأنا حاسة أني مش هاقدر أستحمل أمه مهما كنت بحبه وفي نفس الوقت إحنا الاتنين بنحب بعض وعاوزين بعض أرجوكم ردوا عليّ في أقرب وقت.
