[ممكن تقدّمي خضار سوتيه مع الجمبري] ممكن تقدّمي خضار سوتيه مع الجمبري النهارده هنقدّم لكم طريقة مميزة جداً لعمل الجمبري، نتمنى إنكم تجرّبوها وتعجبكم وتبعتوا تقولوا لنا رأيكم فيها.. جمبري مقلي بالجبنة المقادير: * كيلو جمبري مقشر * 2 بيضة مخفوقة * كوب بقسماط * ملعقة كبيرة بقدونس مفروم ناعم * قرن فلفل أحمر مقطّع قطع صغيرة * كوب جبنة رومي مبشورة * معلقة صغيرة ثوم مفروم * زيت ذرة للقلي * كوب دقيق * ملح وفلفل الطريقة: 1- اغسلي الجمبري كويس وبعد كده حطّيه في مصفاة وسيبيه علشان يصفّي الميه اللي فيه. 2- دقّي الثوم مع الفلفل الأحمر والملح والكمون والبهارات، واطحنيهم كويس مع بعض، وبعد كده ضيفي عليهم الليمون وقلّبيهم، وحطّي الخلطة دي على الجمبري، وقلّبيهم مع بعض كويس، وسيبيه لمدة ساعتين علشان يتبّل كويس. 3- حطي الدقيق في طبق، وفي طبق آخر اخلطي البقسماط والجبنة، وحطّي البيض في طبق ثالث واخفقيه مع شوية ملح وفلفل. 4- بعد ما الجمبري يتّبل، اغمسي الجمبري في الدقيق ثم البيض، وبعد كده في مزيج البقسماط والجبنة وغطّيه وحطّيه في التلاجة لمدة 15 دقيقة. 5- سخّني الزيت كويس، وبعد كده حمّري الجمبري في الزيت لغاية ما لونه يبقى دهبي، وبعد كده طلّعيه على ورق التقديم وزيّني الطبق بالبقدونس وقطع الليمون.
وبكده تكون خلصت وصفتنا النهارده.. يا ريت تجرّبوها وتبعتوا تقولوا لنا على النتيجة.. واستنونا بكره مع وصفة جديدة.. سلاااااااام،،،
