عصير الخوخ الخوخ من الفواكه المفيدة جداً، والعصير بتاعه بيكون طعمه حلو أوي.. المقادير: * 1/2 كيلو خوخ * 1/4 كوب سكر * مكعبات ثلج * 2 كوب ماء * عصير ليمونة الطريقة: هاتي الخوخ واغسليه كويس، وقشريه وقطعيه، حطي الخوخ المقطع في الخلاط، وضيفي إليه السكر والمية وعصير الليمون، واضربيهم كلهم مع بعض في الخلاط، وقبل أذان المغرب بربع ساعة صبي العصير في كاسات العصير، وضيفي إليه مكعبات الثلج.
******************* سلطة بقدونس سلطة بقدونس المقادير: * 2 حزمة بقدونس * عصير ليمونة * 3 فصوص ثوم مفرومين * ملعقة كبيرة طحينة * ملح وفلفل * شرائح ليمون * أوارق بقدونس * ثمرة طماطم مقطعة شرائح الطريقة: 1- هاتي البقدونس، واغسليه، وقطعيه قطعاً صغيرة جداً. 2- اخلطي الثوم مع الملح والفلفل، وضيفيهم للطحينة وقلبيهم مع بعض كويس، وضيفيهم للبقدونس، وقلبيهم مع بعض، وحطيهم في طبق السلطة. ******************* شوربة المأكولات البحرية بالليمون شوربة المأكولات البحرية بالليمون المقادير: * 1/4 كيلو سمك فيليه مقطعاً قطعاً صغيرة * 1/4 كيلو جمبري * 1/4 كيلو سبيط "اختياري" * كُرات * كرفس * بصل * ثوم * عصير ليمون * ملح وفلفل أسود * قرنفل * حبهان الطريقة: 1- نظفي السمك والجمبري والسبيط واغسليهم كويس، وبعد كده اسلقيهم في حلة عميقة مع الكرات والكرفس والبصل المقطع والحبهان والقرنفل. 2- خدي بالك وأنتِ بتسلقي السمك إنك تشيلي الريم أول بأول، بعد كده ضيفي الملح والفلفل الأسود والثوم المفروم والبقدونس، وخليه يغلي على نار هادئة لمدة نصف ساعة. 3- بعد كده صبي الشوربة في أطباق الشوربة، وللتجميل ممكن إنك تضيفي البقدونس المفروم وترشي عليها عصير ليمون.
******************* السمك الفيليه بصوص البقدونس السمك الفيليه بصوص البقدونس المقادير: * كيلو سمك فيليه * حزمة بقدونس (الأوراق فقط) * 1/2 حزمة كزبرة (الأوراق فقط) * 1/2 كوب عصير ليمون * 1/2 كوب زيت زيتون * 1/2 كوب زيت ذرة * ثوم مفروم * ملح وفلفل * كوب كبير دقيق * كوب كبير ماء * شرائح طماطم" للتزيين" الطريقة: 1- هاتي الثوم واخلطيه مع البقدونس والكزبرة و1/4 كوب مية في الخلاط أو الكبة، بعد كده ضيفي إليهم 1/4 كوب زيت زيتون واضربيهم مرة كمان. 2- هاتي السمك واغسليه كويس، بعد كده تبليه في تتبيلة السمك المكونة من (أربع فصوص ثوم مفرومين + ملح وفلفل وكمون وقرن فلفل أحمر مفروم)، واخلطي السمك كويس بالتتبيلة دي، ورشي عليه عصير الليمون، وسيبيه لمدة ساعة كاملة علشان يتّبل كويس. 3- هاتي الدقيق وحطيه في طبق، وضيفي إليها نصف كوب مية وعصير نصف ليمونة، وشوية كمون وقلبيهم مع بعض كويس، وبعد كده حطي السمك المتبل في الخليط ده. 4- سخني زيت الذرة كويس في طاسة كبيرة، وحمري فيه السمك لغاية ما يبقى لونه ذهبي، وبعد كده شيليه من الطاسة وحطيه في الطبق. 5- هاتي طاسة تانية وحطي فيها زيت الزيتون، وبعد كده ضيفي إليهم مزيج البقدونس والملح والفلفل والكزبرة، وحطيهم لمدة دقيقة على النار وقلبيهم مع بعض كويس، وبعد كده صبي الخليط ده فوق السمك في طبق التقديم، وزيني الطبق بأوراق البقدونس؛ وممكن مع الطبق ده إنك تعملي طبق بطاطس أو طبق رز أبيض.
******************* كاسترد بالمكسرات كاسترد بالمكسرات المقادير: * 4 أكواب لبن كامل الدسم * 1/4 كوب سكر * 3 ملاعق كبيرة بودرة كاسترد * 1/2 1 ملعقة صغيرة حبهان مطحون * مكسرات للتزيين؛ أي نوع أنت بتحبيه (جوز أو فستق أو عين جمل أو جوز الهند أو زبيب) الطريقة: 1- سخني اللبن والسكر والحبهان في إناء، وسيبيهم على نار هادية لغاية ما يغلوا مع التقليب المستمر. 2- دوّبي بودرة الكاسترد في حوالي 4/1 كوب مية، وضيفيها تدريجياً إلى خليط اللبن والسكر والحبهان، وخدي بالك إنك في الوقت ده تكون النار هادية، وتقلبي بملعقة خشبية باستمرار علشان الخليط ما يلزقش. 3- سيبي الخليط ده يغلي على النار كويس، وبعد ربع ساعة شيليه من على النار، وضيفي إليه ماء الورد، ورجعيه تاني على النار لمدة خمس دقائق كمان مع التقليب المستمر. 4- بعد كده هاتي أطباق التقديم وصبيه فيها، وبعد ما يبرد زيني الأطباق بالمكسرات، وحطيه في الثلاجة وطلعيه عند التقديم.
وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة... واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك.. كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله مع أطيب التمنيات بصوم مقبول وإفطار شهي بإذن الله سلااااااااام ********************* للتعرف على مزيد من الوصفات الشهية اضغط هنا "سفرة دايمة" *********************
