السلام عليكم.. أحب أقول لكم إني بجد باستفيد جدا من ردودكم عليّ، أنا عندي مشكلة محيراني وحاسة إني بجد حيوانة أوي في نظر نفسي. أنا مخطوبة بقالي سنتين ونص، وخطيبي اتفق مع بابا على مدة خطوبة 3 سنين، وهو ظروفه صعبة؛ لإن ماحدش بيساعده؛ فوالدته متوفاة وزوجة والده مش عايزاه يساعده، هو جاب الشقة ووضب فيها حاجات ولسه حاجات كتيرة ولسه العفش، بصراحة هو شغال ليل ونهار؛ بس المدة مش هيلحق يعمل فيها الشقة ويجيب العفش كمان.
ومن الفترة اللي فاتت كان بعيد عني أوي، وكان عصبي جدا، ومش بيخرجني خالص، حتى أنا اللي على طول باتصل بيه، ولما أشتكي له عدم اهتمامه بالخروج ولا المكالمات يقول لي الفلوس والظروف فمابقتش أطلب حاجة، بس أنا تعبت حاسة إني مخنوقة نفسي أحس إننا زي أي اثنين مخطوبين، بيكلمني وبيخرجني وبيهتم بيّ فجيت في آخر أسبوع في رمضان اللي فات كنت باكلم خدمة عملاء اتصالات كان عندي مشكلة في الخط رد عليّ واحد ذوق جدا وبعد ما انتهت المكالمة اتفاجئت برقم غريب يرن عليّ، ولما كلمته عرفته إنه اللي كان بيكلمني في خدمه العملاء.
اعتذر لي إنه رن عليّ وطلب مني نكون أصحاب، أنا وافقت عادي وهو مايعرفش إني مخطوبة، فقلت أكلمه أفضفض معاه، فطلب مني أقابله بس ماوافقتش، ومن كتر ما بيطلب نزلت شفته وكل ده مايعرفش إني مخطوبة، فأعجب بيّ، وطلب إنه يرتبط بيّ لفترة قريبة، ويتقدم لي بعد أربعة شهور لظروف معينة في شغله، أنا قلت له براحتك أوي لأني ماكانش في بالي إني أسيب خطيبي لأني بحبه، وبعد كده مع مرور الأيام كنت باقابله كتير، وهو بيقول لي إني باوحشه وحسيت فيه بالاهتمام اللي أنا مش لاقياه مع خطيبي.
بيخرجني وبيكلمني وشاغل كل وقتي فغصب عني اتشديت ليه، وخطيبي هو كمان حاول يغير من نفسه، وبقى حنين معايا وبيخاف موت عليّ، وبيكلمني من غير عصبية؛ فبقيت حاسة إني باخونه، وإن أنا مش كويسة، وإنه حرام عليّ.
أنا مش بانام من كتر التفكير، خايفة أنا خطيبي نسيب بعض بسبب المدة اللي عدت ومالحقش يعمل فيها أي حاجة، وأنا اللي خسرت السنتين ونص رابطني فيهم ممكن يكون لي فرصة مع حد تاني، وخايفة أسيب الشخص التاني وأبقى خسرت الاثنين.
مع العلم إن الشخص التاني أهله واقفين جنبه ومستوى تعليم كويس جدا، وشغل كويس وجاهز، بس مش باثق فيه زي ما باثق في خطيبي ولا بحبه، أنا بس حسيت إنه معوضني اللي ناقصني، وكل ما أفكر أبعد عنه مش عارفة ألاقي نفسي.. فيه حاجة بتشدني ليه، هو بيعوضني عن اللي ناقص من خطيبي، أنا عارفة إنكم هتقولوا لي سيبي الشخص التاني، أنا والله حاولت وما عرفتش، أنا بجد محتارة وعارفة إني غلطت غلط كبير.. بس أنا محتاجة حد ينصحني؛ لأني مليش حد يدلني على الصح خالص، ولا حتى أهلي باتكلم معاهم وباثق في "بص وطل"؛ لأن دي مش أول مرة أبعت مشكلة.. وآسفة إني طولت عليكم ولكم جزيل الشكر.
H.ma
أكثر ما أثار تعجبي من رسالتك هو معرفتك أننا سوف ننصحك بالابتعاد عن الشخص الثاني الذي لا تثقين فيه ولا تحبينه؛ لكنك مشدودة له لسبب ما مجهول بالنسبة لكِ.
أولا هذا الشخص الثاني شخص غير أمين مطلقا، فهو يعمل في خدمة العملاء في إحدى الشركات ومن غير المصرح له أن يتعامل مع أرقام المتصلين، ولا يفصح عن أرقامهم؛ حتى لنفسه، وقد خان الأمانة بأخذ رقم هاتفك والاتصال بكِ مرة أخرى، ولا أفهم كيف تركتيه يفعل هذا الأمر بكل سهولة وتقبلتي الأمر على الرغم من أن الوضع الطبيعي أن تتصلي بالشركة وتشتكينه لهم فورا.
هذا الشخص الذي يعمل في شركة الاتصالات باستطاعته معرفة الأرقام التي تتصلي بها بضغطة زر، وبنسبة كبيرة يعلم أنك مخطوبة، وبنسبة كبيرة هو لا يريد أن يخطبك والأمر كله لا يتعدى كونه يبحث عن فتاة يتسلى معها، ويقضي معها وقتا وبعدها يتركها.
وقعتي في خطأ كبير وقمتي بخيانة خطيبك الذي ائتمنك ويثق بكِ؛ برغم كل المشكلات التي بينكما، وبالتأكيد هو يحاول أن يعدل من أموره ويضبطها في ظل الظروف الصعبة التي يمر بها؛ في محاولة لتجهيز بيت الزوجية، وبالتأكيد مطلوب منه الكثير من المصاريف؛ وهو ما يجعله يمسك يده ويضعه في ضغط عصبي غير عادي، وأنتِ بدلا من أن تقدري هذا الأمر وتحاولين التخفيف عنه بمتطلباتك التي يحاول تلبيتها تركتيه وبحثتي عن غيره الذي يعطيكِ ما ينقصك.
أيتها الصديقة هذا الشخص الآخر شخص غير أمين بالمرة كما أنكِ لا تثقي به إذن فالمشكلة تكمن عندك وفي محاولاتك للابتعاد عنه يجب عليك أن تحسمي قرارك وتبتعدي عنه تماما وتقطعي كل وسائل الاتصال به بأي طريقة إن كنتِ تريدين خطيبك، أما إن لم تقدري فاعلمي أنه إن عاجلا أم أجلا فسيعلم خطيبك بشأن هذا الأمر ووقتها لن ينفع الندم ولن ينفع أي شيء.. وفقكِ الله لما فيه الخير والصواب وهداكِ إليه.