عندي 20 سنة في تالتة كلية هندسة، بحب بنت خالتي بجد، وصارحتها بحقيقة مشاعري وإني بحبها، ونفسي أرتبط بيها وأنا والله مستعد أعمل أي حاجة في الدنيا علشانها؛ بس المشكلة إن إحنا قد بعض هي كمان في 3 هندسة؛ بس مش نفس الكلية أنا بازعل أوي لزعلها لما أحس إنها زعلانة علشان حاسة إننا لما نتكلم على الشات أو الموبايل حرام، وإنها كده بتحس إنها بتخدع أهلها مع إننا ما بنقولش أي حاجة حرام أو غلط؛ بس هي شايفة كده، وبتكون زعلانة وأنا حاسس بيها إنها نفسها ترضي ربنا وترضيني وترضي أهلها. أنا متأكد إني لو قلت لهم عندي في البيت مش هيهتموا ومش هاكسب غير إني لفتّ نظرهم وتركيزهم لي، وممكن يتسبب لها في مشاكل وخلاص بسببي، وهيقولوا إني لسه صغير وإنها هتشغلني عن الدراسة والكلام اللي إنتم عارفينه ده طبعا. وده نفس الكلام تقريبا اللي ممكن برده يتقال عندها. وبكده مش هنكون كسبنا غير إن إحنا مش هنعرف نكلم بعض خالص، ولو حتى في سياق القرابة؛ لأن الكل هيكون بيراقبنا، أنا بجد باتمنى من ربنا إني ألاقي حل أو تكونوا حضراتكم سبب من الأسباب إني ألاقي حل يرضي ربنا ويرضيها ويرضي أهلنا عشان أنا بجد ما بقيتش قادر أفكر وحاسس إني عاجز عن حل أي مشكلة هتقابلنا في حياتنا، وبدأت أحس إني مش قد ثقتها فيّ، بجد أنا مستعد أعمل أي حاجة في الدنيا دي علشانها وعلشان ما أسببلهاش مشاكل في يوم من الأيام، وعشان ما حدش يبص لها بنظرة مش كويسة عشان حبينا بعض في يوم من الأيام. أنا والله باراعي ربنا فيها على قد ما أقدر، وربنا يعلم قد إيه أنا نفسي أعرف الدنيا كلها إني بحبها والدنيا كلها تفرح لنا أنا مش عايزها تضيع مني مش عايز أخسرها ولا أخسر ثقتها فيّ، ربنا يخليها ليّ وما يحرمنيش منها ويساعدني إني أراعيه فيها وخليني قد ثقتها فيّ وأكتر كمان يارب. أنا آسف إنى طولت على حضراتكم بس أرجوكم أفيدوني من فضلكم ولكم جزيل الشكر على الاهتمام.. محمد
