أنا مشكلتي بقى إني مش باعرف آخد موقف مع نفسي، ولا حتى مع الناس، أنا دايما ضعيفة مع نفسي أوي، يعنى مثلا أنا دلوقتي مش باكلم صاحبتي عشان حصلت مشكله بيننا، وكانت نتيجة لأنها دايما بتكدب عليّ في حاجات كتير؛ رغم إني مش عايزة أي حاجة منها؛ غير إننا نبقى صحاب وإخوات؛ لأني مش عندي إخوات بنات، وكان نفسي تبقى زي أختي. بس دي حتى مش عزمتني في خطوبتها، وكنا قبليها بنتكلم عادي جدا، وكنت باقول لها كل سنة وهي طيبة بمناسبة عيد ميلادها، وهي بتقول لي إن خطوبتها هتتأجل، والمهم عرفت من الفيس بوك بالصدفة إن خطوبتها كان في يوم أنا قبلها كنت مكلّماها عادي، أنا مش عارفة هي ليه عملت كده معايا؛ مع إني والله العظيم ما غلطش معاها في حاجة وحتى لو غلطت باعتذر، ومش باتكسف إني أعتذر؛ بس الظاهر إنها افتكرت إن ده ضعف مني. طيب دي مش تبقى خيانة لما صاحبة تخون صاحبتها بالشكل ده، دلوقتى أنا عايزة أكلمها وأصالحها؛ بس كل ما افتكر اللي هي عملته ده بازعل أوي بجد، و باحس إننا مش هنبقى صحاب تاني، وخصوصا بعد ما اتخطبت، أنا ضعيفة أوي، وممكن أكلمها تاني؛ بس ماما هي اللي مثبتاني على موقفي ده، وأنا بصراحة زعلانة منها أوي لأنها حتى ما عيّدتش عليّ، ولا فكرت تتصل بيّ. مش عارفة أعمل إيه أصالحها ولا لا؟.. أرجوكم ردوا عليّ لأني تعبت من كتر التفكير، وكل يوم بافتكر لو أنا عملت معاها حاجة غلط ولا لأ، و مش لاقيه بجد. so
