أنا بحب أوي الموقع ده وباثق في رأيكم جدا.. أنا عندي مشكلة ونفسي حد يلاقي لها حل معايا؛ علشان أنا تعبت جدا. أنا عندي 21 سنة، وبحب واحد مش من نفس المحافظة اللي أنا منها، وهو أكبر مني بسنتين، أتعرفنا على بعض من على النت، وحبيته من غير ما أشوفه شخصيا؛ لكن شفت صوره بس، وبقينا بنكلم بعض كل يوم عادي كأصحاب، وبعدين ارتبطنا، وشفته وكنت أنا اللي سافرت له؛ علشان ظروف شغله وكده، وبجد محترم جدا وطيب أوي، وباتمنى إنه يكون زوج ليّ. المشكلة بقى في إني حاسة إنه بيكلم بنات تاني، مع إني متأكدة إنه بيحبني، وده من تصرفاته طبعا، وحبيت أتأكد؛ فعملت إميل تاني واتعرفت عليه بنفس طريقة معرفتنا ببعض، وكان فيه تجاوب بنفس الطريقة اللي كانت معايا؛ بس مع اختلاف إن البنت دي من نفس المكان اللي هو منه، وطبعا طلب تليفونها، وبالفعل كلم واحدة أنا باثق فيها جدا، وطلب يشوفها وكده، وماقالهاش إنه بيحب أو مرتبط بواحدة أصلا. ومع ذلك في الفترة دي ماكانش مقصر معايا في حاجة.. المشكلة إني قفشت كذا حوار بنفس الطريقة على الموقع بتاعه وعاتبته، وقال لي: "أنا آسف دول أصحاب عادي"، قلت له: "هو أنا مش عاجباك أو مقصرة في حاجة تخليك تعمل كده وتضايقني؟!"، فاعتذر لي وقال لي: "مش هاعمل كده تاني". لكن رجع يرن على صاحبتي وده ضايقني؛ لإنه ماعملش اللي قال لي عليه، وكمان في يوم ماكلمنيش واتصلت بيه كان نايم، وقال لي: "ماعرفتش أكلمك"، وفي نفس اليوم كان بيرن على صاحبتي. المشكلة دلوقتي هل فيه حد بيحب حد أوي وبيصاحب ويلعب وكده، وهو عارف إن فيه واحدة بيحبها بجد فعلا وبيرجع ليها، مع العلم إني برضه باصاحب من النت وكده من وراه بس ماباخونهوش، وعارفة إني بحبه بجد، وباقول يمكن يكون هو كمان زيي كده؛ لإنه ماقصرش معايا في حاجة زي ما قلت، وبجد بيكون جنبي وقت ما باحتاجه.. بس ماباشوفهوش كتير. ساعدوني ألاقي حل، مع إني حاولت أبعد وماقدرتش، وعلى فكرة أنا كده بقالي معاه تقريبا 7 شهور. tota في البداية بنشكرك على ثقتك فينا ويا رب نكون على قد الثقة دي، وبالنسبة لمشكلتك فتعالي نفكر مع بعض بالراحة وبهدوء وبالعقل في كل جوانب العلاقة دي. فالأول اتعرفتي عليه من الإنترنت ومن غير ما تعرفي أي حاجة عنه غير اللي هو قالها ليكِ، ومن غير ما يعمل أي حاجة فعلية ولا حتى يحاول إنه ييجي يشوفك، وإنتي اللي سافرتي له بلده وشفتيه، ومش هاقول على اللي إنتي عملتيه ده غلطة؛ لأنها كان ممكن لا قدر الله تتحول لكارثة؛ لكن واضح من رسالتك إن ربنا ستر وعدت الزيارة على خير. وبعدين حسيتي بقلبك وبفطرتك الأنثوية إنه بيعرف بنات تاني، وحاولتي تتأكدي من ده وأتأكدتي بدل المرة اتنين وتلاتة وأربعة؛ ورغم ذلك لسة بتسألي إزاي ممكن يعمل كده وهو بيحبك!! وكانت الإجابة الجاهزة عندك واللي عقلك توصل ليها إن إنتي كمان "بتصاحبي" أولاد على النت ومن وراه؛ لكن مابتخونيهوش، وعارفة إنك بتحبيه.. فهو ممكن يكون زيك وبيصاحب برضه بس عارف إنه بيحبك. وأنا مش هادخل معاكي في نقاش أو تفسير لمعنى اللي بتعمليه، وهل هو خيانة فعلا ولا لأ سواء ليه أو لأسرتك. لكن اللي هاقوله ليكي واللي لازم تكوني متأكدة منه تماما إنه مش محتاج يسألك ولا يعرف منك بعلاقاتك دي؛ لإن ذهابك ليه وكلامك معاه على النت دليل لا شك فيه على العلاقات دي. فهو غالبا عارف، ويمكن يكون متأكد من إنك بتتسلي مع أولاد تانيين، وممكن يكون هو كمان عمل لك اختبار زي اللي إنتي عملتيه بس ماقالكيش عليه ولا على نتيجته؛ يمكن علشان يستمتع أكتر باللعبة، وما دام إنتي بتلعبي يبقى إيه المانع إنه هو كمان يلعب، وكل واحد وليه طريقة بتريحه. فبعد قراءة رسالتك أكتر من مرة يا "t" مالقيتش فيها أي حاجة تدل على حبه ليكي، فإنتي ماقولتيش إيه "تصرفاته" دي اللي أخدتيها دليل على حبه، وعدم ذكرك للتصرفات دي إن دل على شيء فيدل إنه حتى لو كان في فعلا "تصرفات ما" خلتك تحسي بحبه، فغالبا عقلك مامقتنعش بيها، وإنها دليل على حب فعلا. وده سواء بسبب إحساسك من الأول بأن في حاجة غلط، واللي أتأكدت منها فعلا، وأتأكدت إنه مابيحترمش مشاعرك ولا وجودك في حياته أيا كان توصيفه لهذا الوجود. وكمان عقلك مش مقتنع؛ بسبب التجارب اللي إنتي عشتيها وبتعيشيها فعلا كل يوم مع أكتر من واحد، واللي أكيد حد منهم على الأقل قال لك إنه بيحبك، وممكن إنتي كمان تكوني قلتي له نفس الحكاية، وأهو ماحدش شايف حد وكله بيتسلى. صديقتنا العزيزة.. اعتبري التجربة دي جرس إنذار ليكي ينبهك لخطورة اللي إنتي بتعمليه، وضرره على حياتك سواء دلوقتي أو في المستقبل، وتوقفي عن العلاقة دي وغيرها، واقطعي كل علاقاتك بشباب النت، وماتفتكريش أبدا إنك ممكن تشتغلي حد أو توهميه بحبك؛ لإنهم بيكونوا داخلين وعارفين عايزين إيه، وعارفين اللي داخلة بتكلم صبيان على النت عايزة إيه، وطبعا مش محتاجة أقول لك نظرتهم ليها بتكون إزاي. فماتعرضيش نفسك لمواقف بايخة، وتعرضي سمعتك ومشاعرك للخطر، وانتبهي لدراستك أو شوفي أي وسيلة لملأ وقت فراغك بدل النت والكلام عليه.. وربنا يوفقك.