السلام عليكم ورحمة الله.. أنا عندي مشكلتين كل واحدة فيهم مضايقاني، أنا عندي 22 سنة، والحمد الله اتعلّمت تعليم كويس، وارتبطت بشخص من 7 سنين، وحاليا هو خطيبي، وأنا بحبه جدا، مع إني عارفة إنه مش أحسن واحد في الدنيا؛ بس هو معايا غير الناس كلها، وبيحبّني جدا، وتعبت جدا لحد ما اتخطبنا. المشكلة إنه دايما لازم أراقبه؛ هو بيشوف مواقع مش كويسة، وأنا عارفة كويس، بس هو مايعرفش إني أعرف، واتعرّف على بنات كتير من النوع ده، وواجهته مرة وقال لي: "مش أنا"، واتهرّب وقعد يبكي لحد ما سامحته، وده كله كان قبل الخطوبة.. المشكلة إنه وعدني إنه مش هيعمل كده تاني، ونفس الموضوع اتكرّر تاني، وهو مفهّمني إنه مش بيدخّن؛ لأنه عارف إني مش بحب التدخين، وهو بيدخن فعلا، وأكتر من حد قال لي كده، وماكنتش باصدق.. سايسته كتير أوي، وتعبت من الكلام في الموضوع ده، وخايفة جدا من اللي بيعمله، وإنه يضيّع ثقتي فيه. المشكلة التانية.. كان فيه شخص متقدم لي من سنتين تقريبا ورفضته علشان خطيبي، مع إنه فيه كل مواصفات الزوج المناسب، بس أنا ساعتها فكّرت بقلبي قبل عقلي، هو الشخص ده كان محترم جدا ومتديّن أوي؛ مع إني شفته مرة واحدة بس ومانستهوش لحد دلوقتي.. مش عارفة ليه لما خطيبي بيعمل كده فيّ بلاقي نفسي غصب عني بافكر فيه وأعيّط غصب عني، وساعات أقول لنفسي هو ده ذنبي ولا ذنب كل اللي رفضتهم علشانه واختارته؟؟! أنا وقفت جنبه كتير أوي، وبتصرّفاته دي باحس بندم كبير إني ماكنتش بافكر كويس في اللي اتقدموا لي، ولازم أشرب كل اللي بيحصل.. يا ريت تقولوا لي أعمل إيه معاه؟؟ eltot صديقتي العزيزة.. أعجبني في رسالتك أنكِ بدأتِ تفكّرين بعقلك؛ وهذا شيء مهم جدا. وفي البداية فكرة الارتباط من 7 سنين ده أكبر غلط، وهو ده أساس المشكلة؛ لأنك كنتِ لسه في سن المراهقة، وطبعا ماعندكيش القدرة الكافية على الاختيار والحكم على مشاعرك أو معرفة الصح من الخطأ، والنتيجة الطبيعية هو ما يحدث لكِ الآن أنك بدأتِ تفكّرين بعقلك.. صديقتي الحب في سن صغير مش بيكون حب زي ما أنتِ فاكرة، والفترة دي المشاعر بتكون متقلّبة. أما بالنسبة للمشكلة اللي أنتِ فيها مع حبيبك اللي بقى خطيبك، والمفروض إنه يكون جوزك في المستقبل، فكفاية أن الشك دخل بينكم، وأنتي بدأتي تراقبيه، وكمان اتأكدتي إنه بيشاهد مواقع مش كويسة على النت وعرفتيه إنك عارفة؛ ومع ذلك رجع يعمل كده تاني، والسبب في المشكلة دي إنك ماخدتيش موقف منه لما عرفتي إنه بيعمل كده، واكتفيتي إنك تعرّفيه إنك عارفة. صديقتي.. لازم تعرفي إنه فيه مواقف في الحياة لازم تاخدي موقف كبير فيها، وبالنسبة لموضوع التدخين فأنتِ ممكن تتكلّمي معاه؛ إنه يقلل التدخين ده، وتتكلّمي معاه إنه التدخين ده مضر للصحة، وإنك بتخافي على صحته، وإنك هتساعديه إنه يقلل من التدخين، ومع الوقت يبعد عن التدخين تماما. عزيزتي.. لازم تعرفي إن الحياة دون ثقة تصبح مستحيلة، ودلوقتي ده خطيبك؛ يعني المفروض إنه هيكون جوزك في المستقبل، وأعتقد إنك لو أخدتي موقف معاه (يعني تربيه من الآخر) إنك ماتكلميهوش بالأسابيع، ولا حتى تردي على مكالماته، وتعرفيه درس إنك خلاص مش عايزاه؛ لأنه كداب، وشوفي هيعمل إيه، بس أهم حاجة إنك تسيبيه كده شوية، وساعتها هتعرفي غلاوتك عنده، وفعلا تكوني واخدة قرار إنه لو عمل كده تاني يبقى خلاص، وكمان لازم تفهميه إن دي آخر فرصة، وإنك فعلا لو عرفتي إن أي حاجة من الحاجات دي اتكررت تاني يبقى كده خلاص، ولو سابك وماحاولش إنه يكلّمك يبقى في الحالة دي هو مش باقي عليكِ وساعتها ماتندميش؛ لأن ده هيكون في مصلحتك وأنتِ اللي كسبانة. أما بالنسبة للشخص اللي أنتِ شفتيه مرة واحدة وبتفكّري فيه لما تحصل مشكلة بينك وبين خطيبك فده أمر طبيعي جدا، أنتي بدأتي تفكري بعقلك أكتر، وعايزة أقول لك حاجة مهمة أوي إن الشخص اللي شفتيه ده شفتيه مرة واحدة، وكمان أنتِ ماتعرفيش أي حاجة عن شخصيته والعيوب اللي فيه، ومش صح إنك تحكمي على شخص من مرة واحدة. صديقتي.. عليك التفكير جيدا، وإنك توصّلي لخطيبك إنك خلاص مش عايزاه؛ عشان يعرف إنك خلاص بتضيعي من إيده، وبعد كده تشوفي رد فعله، وتقرري أنتي هتعملي إيه ولو رجع تاني للعيوب اللي اتكلمتوا فيها يبقى أنتي لازم تبعدي عنه تماما، وأهم حاجة إنك ماتتسرعيش في اختيار شريك حياتك. وفي النهاية.. اطلبي من الله سبحانه وتعالى أن يقدّم لكي الخير، وخدي وقتك في التفكير بعيد عنه تماما، واكتبي كل شروطك، وادّي له آخر فرصة طبعا بعد ما تشوفي هيتمسك بيكي أد إيه ومقدار غلاوتك عنده.