السلام عليكم ورحمة الله وبركاته.. أنا عندي 26 سنة، وكنت بحب واحدة من سنتين وماحصلش نصيب، وبعدين خطبت بنت كويسة ومحترمة، بس قرار الارتباط بيها كان بعقلي بس، وبعد سنة من الخطوبة حاسس إن إحنا مش قادرين نفهم بعض، وغير كده هي ماقدرتش تنسّيني حبّي القديم، ومن فترة قريّبة اتعرّفت على بنت وأُعجبت بيها، واتكلّمنا وحسيت إن هي دي فعلا اللي بادور عليها، وهي اللي هتفهمني وتخلّيني ماشفش حد غيرها، أنا لسه ماصرّحتهاش ومش عايز أظلمها، وكمان مش عايز أظلم خطيبتي. على فكرة لمّا اتقدّمت لأهل خطيبتي كنت محدد سنة على الجواز، وفي فترة الخطوبة دي كنت باشتغل ومقطّع نفسي، وكنت باحرم نَفسي من حاجات كتير عشان أتجوّز في الميعاد. بس حصل أكتر من موضوع غصب عني خلاني صرفت من فلوس الجواز؛ زي مثلا مرض أخويا اللي أصغر مني صرفت فلوس كتير عليه وعدّا الميعاد، وبعدين حددت تاني بعديها بشهرين، وبعدين حصل موضوع تاني برضه غصب عني أجّلت لبعد العيد اللي جاي. ولمّا اتكلّمت مع خطيبتي زعلت أوي، واتعصّبت بس أنا صالحتها، وبعد يومين حسيت إن المعاملة اتغيّرت معايا، وكل ما يعدّي يوم تسوء أكتر لدرجة إنها قفلت تليفونها ولمّا كلّمت مامتها ما ردتش عليّ ولا بتتصل. أنا أخدت قرار إن كده خلاص أنا هافشكل الخطوبة عشان هي ماستحملتنيش، وأنا في أزمة مادية بس خايف أكون ظلمتها.. أنا في حيرة كبيرة، وعايز أعرف إيه نصيحتكم وشكرا أوي. Alaan na
