السلام عليكم أسرة الموقع الجميل.. بصراحة أنا باثق فيكم أوي علشان بجد آراؤكم حلوة أوي. أنا عندي مشكلة خاصة بواحدة أكتر من أختي، هي واحدة صاحبتي شافت أخويا وهو معايا، والاتنين أعجبوا ببعض، وحبوا بعض، وهو الحمد لله شخص كويس؛ بس ظروفه يمكن وحشة شوية؛ بس هو كان مستني سفر، وخلاص اتفق مع حد إنه هيسافر خلاص، واتأخر السفر بسبب ظروف البلد.. وهي قالت له إنها هتستناه لما يسافر وكده..
بس المشكلة دلوقتي إنها اتقدم لها حد، وأخويا ساب شغله على أمل السفر ودلوقتي مش شغال، وأهلها موافقين على العريس، وشايفينه لُقطة أو مناسب زي ما بيقولوا.
هي دلوقتي محتارة وبتتمنى تكون مع أخويا وهي واثقة إن لو ربنا كرمه بسفر وكده هييجي لها ويخطبها؛ بس أهلها بيقولوا لها ماتوقفيش نصيبك، لما ترفض العريس اللي اتقدم لها؛ لأن ظروف أخويا لسه مش عارفين هيسافر إمتى، وأنا محتارة، ومش عارفة أقول لها إيه لأني بحبها أوي.
المهم هي دلوقتي مترددة جدا.. يا ترى هي زي ما أهلها بيقولوا "هتوقف نصيبها"؟ ولا تستنى اللي بتتمناه ونفسها تكمل معاه، وهو شخص كويس بس لو ظروفه اتحسنت هيروح لها؟
هي استخارت ربنا كتير أوي ولسه ماشافتش نتيجة.. وأهلها مش عايزين يرفضوا العريس مع إنها قالت لهم إنها رافضة؛ بس لسه هم ماقالوش للعريس.
shahy
صديقتي.. كم هو لطيف شعورك بصديقتك وإحساسك بها؛ ولكن يا صديقتي لازم تهدي عشان تقدري تفكري كويس، وماينفعش إنها تحس إنك متوترة كده.
صديقتي.. لا داعي لكل هذا القلق، ويجب أن تعلم صديقتك أن الجواز قسمة ونصيب، واللي ليها نصيب فيه هيكون؛ ولكن يجب عليها التفكير الجيد.
أخوكي يا صديقتي بيحبها وعايزها فعلا؛ ولكن ظروفه لا تسمح؛ فهل تعلمين ما هي مسئوليات الزواج؟
الزوج مطلوب منه الإنفاق على أهل بيته، وأن يكون قادرا على تحمّل هذه المسئولية، وأخوكي لا يعمل الآن، ولا يدري متى سوف يعمل، ولا يدري متى سوف يسافر!
أنا أعلم أن المستقبل بِيَد الله وحده، وأن الله سبحانه وتعالى يرزق الإنسان بين يوم وليلة؛ ولكن لازم نفكر في الوضع الحالي.
وبالنسبة لأهلها، فطبعا مش هيوافقوا على الوضع ده، أما بالنسبة للعريس اللي متقدم لها، فيا ريت تفكر فيه وفي موضوعه كجزء منفصل وبشكل موضوعي بعيدا عن علاقتها بأخيك؛ يعني هي ممكن تشوفه وتصلّي صلاة استخارة، ولو حست إنها مش عايزاه يبقى خلاص مش نصيبها؛ بعيد عن التفكير في أخوكي خالص.. وأنا مش باقول إنها توافق على أي حد؛ لأن الزواج أهم شروطه القبول.
وأخوكي في كل الأحوال قدامه وقت -سواء سافر أو اشتغل هنا- عشان يكوّن نفسه، ولازم يكون فيه علاقة رسمية بينهم، وحرام إنهم يتعلقوا ببعض وفي الآخر أهلها يرفضوا.
صديقتي.. أخوكي في كل الأحوال لازم يبحث عن عمل، ومن الأفضل إنهم في خلال الفترة دي يفكروا كويس، وإن أخوكي يسعى في البحث عن العمل أو السفر، وبعد كده يكلم أهلها.
ولكن خلال هذه الفترة لازم يبعدوا عن بعض؛ لأن ده مش صح ومش في مصلحتهم.
وبالنسبة لكلام أهلها؛ فهُم صح عشان خايفين عليها؛ لكن لو هي مش عاجبها العريس فحقها إنها ترفض.
يجب على صديقتك التقرب من الله، وأن تدعو الله أن يوفقها للخير، ويجب أن تعلم أن الزواج قسمة ونصيب، وإن لو أخوكي نصبيها هتتجوزه، وأتمنى من الله أن يوفقها للخير قريبا.