أنا حبيت شخص جدا وهو كمان، وبقالنا خمس سنين، وكلّم أهله عليّ كتير مرة اتحجّجوا له بإنه لسه بيدرس، ومرة إنه لسه ما اشتغلش ومرة إني سمرا وهو أسمر فهنجيب أطفال سمر، لكن لو اتجوّز واحدة بيضاء زي أخوه ممكن يجيب أطفال بيض شوية، وسبنا بعض كتير وكنا بنرجع لبعض تاني على أمل إنه يحاول يقنع أهله. دلوقتي كل ما أقول له فاتح أهلك تاني يقول لي أنا مستني لما مرتبي يبقى كويس علشان أعرف أخطب وأتجوز، مع العلم إنه عنده شقته تمليك في نفس عمارة أهله ومرتبه 600 جنيه وأكيد قابل للزيادة، وأنا كمان باشتغل. أنا حاسة إني زهقت لأني حاسة إنه مش عايز يعمل حاجة دلوقتي، واحنا عندنا 24 سنة وأنا بيتقدم لي ناس، وباتخانق مع أهلي؛ لأنهم عارفين إني بارفض علشانه وهو مابقاش مهتم بيّ زى الأول ولا حتى بمشاكلي، ولما أبعد يكلمني ويقول لي إنتي عارفة مشاكل الشغل والله مش فاضي، ومعلش وسامحيني والكلام ده، أرجع أكلمه تاني ممكن يردّ وأكتر الوقت لا. هو شخص بجد محترم بشهادة أهلي وأصحابنا بس أهله كانوا معوّدينه إن العلاقات الجنسية حرام، وكان صحابه بيزنّوا عليه كتير من وهو في ثانوي، وإحنا ارتبطنا في الجامعة وبعد سنتين بقى يطلب مني حاجات غريبة قبلات وأحضان وتعامل من على الملابس، ودايما يقول لي إنه لو مش كويس كان أخد مني اللي هو عايزه، وسابني بس أنا بحبك ومتأكد إنك ماعملتيش كده مع حد ولا هتعملي لأنك متربية كويس. أنا كتير رفضت الموضوع ده لأني كمان مش باحس إني مبسوطة زيه، ودايما أستغفر ربنا على اللي بيحصل، وباقول له لا، بس هو بيفتكر إني مش بحبه يقول لي خلاص إحنا اتعودنا على كده جاية بعد كام سنة تقولي لا، وبعدين هانت إن شاء الله هنتجوز. والموضوع ده أكتر المواضيع اللي تاعباني نفسيا؛ لأني عارفة إني باعمل حاجة حرام، أنا باصلي وباستغفر ربنا، بس عارفة إنه مش هينفع إلا لما أسيبه، بس أنا عارفة إنه بيحبني جداً قولوا لي أعمل إيه؟ ومعلش طوّلت عليكم. koka