خطيبي بيتحكم فيّ جامد أوي، أنا مانكرش إني بحبه أوي، وهو كمان بيحبّني، بس فيه حاجات كتير أوي بيمنعني إني أعملها؛ مثلا إني أخرج، مع إني باخرج مع ماما، وغير كده إني مابرحش في مكان لوحدي، وقلت له سيبني براحتي، ولمّا نتجوّز ابقى احبسني براحتك، زعل جامد وأخد وقت على ما سامحني وصالحته، هو بيقول لي: "أنا باخاف عليكي أوي"، ومش عايزني أكلّم أي راجل حتى المدرسين بتوعي، ولما أحكي له مواقف هزار مع أخويا يقول لي: "إنتي بتحبّيه أكتر مني"، ولو ماشية معاه وبصيت جنبي يقول لي: "إنتي بتبصّي على الشباب ليه؟!!". وكلام كده بيزعلني جامد أوي، أنا بحبه أوي، أنا عندي دلوقتي 17 سنة، وإحنا مخطوبين من حوالي شهرين، ممكن تقولوا إني اتخطبت صغيرة؛ بس أنا كنت بحبه من سنتين، وخُفت إن الناس تتكلّم عليّ فجه خطبني؛ لأن بلدنا ماينفعش فيها العلاقات العادية من غير أي حاجة رسمي، وطبعا هو عايز يتجوّز، وعايز أول ما أكمّل 18 سنة نتجوّز، أنا شايفة إن سني صغيّر، بس برضه نفسي نتجوّز. أنا مُشتتة من جميع النواحي، وهو بيحبّني أوي، وأنا كمان بحبه أوي، مش عارفة أعمل إيه؟!! دي أول مرة أحب فيها، وخايفة آخد قرار غلط أندم عليه. يا ريت تساعدوني.. ولكم جزيل الشكر!! semsema