أعدّها لكم: مها مصطفى ورحاب سليمان أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، في عيد الأضحى المبارك، يا رب يعيدوا عليكم وعلينا بكل سعادة.. لسه مكمّلين معاكم حلقاتنا عن العروسة، هنعمل ماسكات لسنفرة الجسم ونعومته، وكمان ماسكات بالكيوي للبشرة والشعر، تابعونا... ماسك النشا ومية الورد لسنفرة الجسم المقادير: 1/ 2 كوب مية ورد 3 ملاعق سكر 3 ملاعق زيت زيتون 2 ملعقة كبيرة نشا (على حسب حجم الملعقة عندك) الطريقة: - هنحط السكر ومية الورد على النار، ونقلّبهم لحد ما السكر يدوب، وبعدين نضيف زيت الزيتون مع الاستمرار في التقليب لغاية ما الزيت يختلط بالميه، وفي الآخر هنضيف النشا، ونخلط المكونات مع بعض كويس لحد ما تتشكّل عجينة ناعمة أوي. - هنفرد الماسك على جسمنا كله بعد ما ناخد شاور، ونعمل به تدليك بسيط على الجسم كله من أسفل لأعلى في اتجاه القلب، ونسيبه لمدة ساعة وبعدين نشطفه. - هنستمر على الماسك يوميا لمدة شهر، وهنلاقي نتيجة هايلة؛ لأنه بيفتّح الجسم جدا وبيغذّيه وبيدّي له نعومة وترطيب.
إضغط لمشاهدة الفيديو: ماسك الخيار لنضارة البشرة الماسك ده بيشيل البقع والنمش الخفيف والكلف، وبيدّي لمعة طبيعية للبشرة. المقادير: خيار قطعة خميرة بيرة (في حجم عين الجمل) الطريقة: - هنبشر الخيار، ونحط عليه الخميرة، ونقلّبهم مع بعض لحد ما الخميرة تدوب. - هنغسل بشرتنا بالميه السخنة ونحط الماسك على الوش كله والمنطقة حول العين وكمان منطقة الرقبة والصدر بالكامل، ونسيبه لمدة نصف ساعة وبعدين نشطف بشرتنا بالميه، وهنكرر الماسك ده مرتين أو 3 مرات في الأسبوع. ماسك لتعطير الجسم المقادير: 3 ملاعق كبيرة زيت لوز حلو ملعقة متوسطة زيت برتقال عطري ملعقة زيت الياسمين (اختياري) ملعقة زيت اللافندر ملعقة زيت مشمش ملعقة عطر الطريقة: بنحط كل الزيوت مع بعض، ونحتفظ بالخليط في زجاجة، ونخلّيها في الحمام نستخدمها بعد الشاور. هنحط الزيوت على جسمنا من أسفل لأعلى في اتجاه القلب، ونسيبهم لمدة 3 : 4 ساعات، وبعدين ناخد شاور تاني قبل ما ننام. بالنسبة لزيت الجوجوبا وزيت جنين القمح نقدر نحطّهم على خليط الزيوت دي ونستخدمهم بعد سن 35 أو 40، وهو بيحتوي على فيتامين وكولاجين عالي جدا وبيبقوا مغذيين للبشرة في السن ده.
إضغط لمشاهدة الفيديو: ماسك الملح والليمون لسنفرة الجسم المقادير: ملعقة ملح كبيرة عصير ليمونة ملعقة زيت لوز حلو الطريقة: - بندوّب الليمون مع الملح، ونضيف عليه زيت اللوز الحلو. - هنحط الخليط ده على جسمنا بعد الشاور، وممكن نحطه قبل الشاور ونعمل به تدليك للجسم، ونسيبه لمدة ساعة، وبعدين نشطف جسمنا بميه فقط. - هحتفظ بالخليط ده في التلاجة ونقدر نستخدمه مرتين فقط في الأسبوع، وده يعتبر سنفرة سريعة للجسم بيدي له نعومة ولمعان وترطيب، وكمان بيفتح البشرة بفعل الليمون والملح. ماسكات الكيوي للبشرة والشعر الكيوي ممكن نستخدمه كماسك للشعر وكمان لبشرة الوجه. المقادير: حبة كيوي ملعقة صغيرة مية ورد ملعقة صغيرة عسل أبيض الطريقة: - هنغسل الكيوي ونقشّره ونقطعه ونحطه في الخلاط مع مية الورد والعسل. - الماسك ده ممكن نستخدمه للشعر الدهني والعادي، أما لو الشعر جاف فممكن نضيف له ملعقة زيت لوز أو زيت زيتون. - هنغسل شعرنا ونحط الماسك على الشعر كله من الجذور لحد الأطراف، ونسيبه لمدة نصف ساعة أو ساعة إلا ربع، وبعدين نغسله تاني بالشامبو. ماسك الكيوي للوجه المقادير: حبة كيوي ملعقة عسل نحل الطريقة: هنقطع الكيوي قطع صغيرة ونهرسه ونضيف عليه العسل، ونخلطهم مع بعض كويس أوي. هنحط الماسك على البشرة ونسيبه لمدة نصف ساعة وبعدين نشطفه، وممكن نكرره مرة أو مرتين في الأسبوع، هيدّي للبشرة نعومة ولمعان وتغذية.
إضغط لمشاهدة الفيديو:
خلصت ماسكاتنا النهارده.. استنونا في حلقة جديدة وماسكات جديدة.. سلام،،،
