لكل عشاق الليمون هنقدم لكم النهارده على "سفرة دايمة" طريقة عمل كيكة بصوص الليمون، جرّبوها وابعتوا لنا رأيكم فيها.. كيكة الشيفون بصوص الليمون المقادير: 8 بيضات رشة فانيليا 2 كوب دقيق 1/ 2 كوب ماء 1/ 2 كوب زيت كوب ونصف سكر ملعقة كبيرة بشر ليمون 1/ 4 كوب عصير ليمون ملعقة ونصف صغيرة ملح 3 ملعقة صغيرة بيكنج بودر لعمل الصوص: 1/ 4 كوب عصير ليمون 3/ 4 كوب سكر بودرة ملعقة صغيرة زبدة فانيليا الطريقة: 1- افصلي بياض البيض عن الصفار، وبعدين خدي البياض وحطي عليه نصف ملعقة ملح، واضربيه بالمضرب لحد ما الخليط يزيد حجمه. 2- بعد كده اضربي الصفار بالمضرب الكهربائي وضيفي معاه السكر والفانيليا والزيت لحد ما يبقى قوامه كريمي. 3- اخلطي الدقيق مع البيكنج بودر والملح، وبعدين ضيفيهم على الخليط السابق بالتبادل مع الميه وعصير الليمون، واستمري في ضرب الخليط، وبعدين حطي بشر الليمون في الآخر. 4- بعد ما الخليط ده يمتزج كويس ضيفي عليه خليط بياض البيض وقلبيهم مع بعض بحرص، وبعد ما يمتزجوا صبيهم في القالب. 5- بعد كده دخّليه الفرن على درجة حرارة متوسطة لمدة 45 دقيقة، وبعد ما الكيكة تستوي خرجيها من الفرن، واعملي فيها فتحات بالشوكة، علشان لما تصبّي عليها الصوص يدخل جوه الكيكة. 6- لتحضير الصوص، اخلطي كل مكوناته مع بعض في وعاء على نار هادية، وبعد كده صبيه على الكيكة وهي سخنة، وحطّيها في التلاجة، ولما تبرد قدميها.. بالهنا والشفا.
خلصت وصفتنا النهارده.. استنونا مع وصفات جديدة كل يوم.. سلام،،،