النهارده هنقدم لكم طريقة عمل الباباز أو كيكة الزبادي، واللي طلبها منا مجموعة من أصدقاء "بص وطل".. وكيكة الزبادي دي من الكيكات اللذيذة والخفيفة على المعدة، وممكن ناكلها على الفطار أو على العشاء، وهي بتتاكل ساخنة أو باردة.. يلا بقى نشوف طريقتها... المقادير: كوبين ونصف دقيق. كوب ونصف زبادي كبير. 2 معلقة كبيرة سمن. 5 بيضات. فانيليا. كوب سكر. باكو بيكنج باودر. ذرة ملح. مقادير الشربات: كوب ونصف سكر. 2 كوب ماء. نقط عصير الليمون. فانيليا.
الطريقة: 1- لتحضير الشربات: حطي السكر مع الماء على النار وقلبيهم لغاية ما السكر يذوب تماماً، وبعد كده ضيفي عصير الليمون وعلّي النار عليه؛ بس خدي بالك إنك تشيلي الريم أول بأول، وبعدين ضيفي الفانيليا واتركي الخليط لغاية ما يبرد تماماً. 2- اخلطي الدقيق مع الملح والبيكنج باودر والسمن. 3- اضربي البيض مع الفانيليا واخلطيه مع الدقيق والسمن. 4- اضربي الزبادي مع السكر وضيفيهم إلى خليط الدقيق، وقلبيهم مع بعض لغاية ما يتجانسوا، وسيبي الخليط لمدة ساعة. 5- صبي العجينة في صينية مدهونة سمن، ودخّليها الفرن على درجة حرارة متوسطة لغاية ما تستوي. 6- طلّعي الكيكة من الفرن، وسيبيها تهدى شوية، وبعدين صبّي عليها الشربات وهو بارد تماماً. 7- تقدم الكيكة في طبق التقديم وممكن تزينيها بجوز الهند أو الكريم شانتيه.. وبالهنا والشفا. وبكده تكون خلصت وصفتنا النهارده، ونتمنى إنكم تجربوها وتبعتوا تقولوا لنا رأيكم فيها، وكمان لو عندك أي وصفة عايزة تعرفيها ممكن تبعتي لنا وإحنا هنقدمها لك في أقرب وقت.
ولو عندك وصفة جامدة تكوني جربتيها قبل كده.. وعايزة تشاركي بها معانا بها.. وتنزل على باب صحة وجمال باسمك ابعتي على لينك... "ورينا شطارتك" وإلى اللقاء مع وصفة جديدة،،،