في رابع أيام العيد على "سفرة دايمة"، هنقدم لكم طاجن العكاوي بطريقة سهلة، واللي كتير منكم سألونا عليه، وهنعمل معاه الرز بالبهارات، والحلو هيكون عصير الرمان المثلج، جربوا وصفاتنا النهارده وكل عام وأنتم بخير. طاجن العكاوي المقادير: 1/ 2 كيلو عكاوي 1/ 4 كيلو بصل حبة بطاطس كوب بسلة ملعقة كبيرة ثوم مفروم 2 حبة فلفل حامي مكعبات 3/ 4 كوب عصير طماطم ملعقة صغير كمون ملعقة صغيرة زعتر ملح وفلفل الطريقة: 1- قطّعي البصل مكعبات صغيرة وشوّحيه في الزبدة أو السمنة لحد ما لونه يبقى أصفر، وبعدين قطّعي العكاوي مكعبات، وحطيها على البصل. 2-حطي معاهم الثوم، والزعتر، والكمون، والفلفل الأسود، والملح، والفلفل الحامي، وعصير الطماطم، وقطعي البطاطس مكعبات كبيرة، وضيفيها على الخليط. 3- قلّبي الخليط على النار، وممكن تزوّديه شوية ميه قليلة، وغطي الحلة، وسيبيه على نار عالية، وقلبيه من وقت للتاني، لمدة 15 دقيقة، أو لحد ما يبدأ يدخل في السوى. 4-بعد كده صبّي الخليط في طاجن أو صينية، ودخّليها الفرن لمدة 20 دقيقة، أو لحد ما اللحمة تستوي تماما، بعدين طلّعيه من الفرن، وقدّميه مع الرز بالبهارات.. بالهنا والشفا.
**************************
رز بالبهارات رز بالبهارات المقادير: 2 كوب رز بسمتي 2 ملعقة كبيرة سمنة 2 ملعقة كبيرة زيت عود قرفة 4 فصوص حبهان 3 ورق لورا حبة بصل متوسطة فصين ثوم مفروم ملعقة صغيرة زنجبيل مطحون 2 حبة طماطم مفرومة 1/ 2 ملعقة صغيرة كركم 1/ 2 ملعقة صغيرة بابريكا (فلفل مطحون) 1/ 2 كوب كزبرة 3 أكواب ميه ملح الطريقة: 1- حطي الزيت والسمنة في حلة على النار، وضيفي معاهم القرفة، والحبهان، وورق اللورا، وقلّبيهم لمدة دقيقة، وبعدين ضيفي عليهم البصل، وشوّحيه لحد ما يدبل ويبقى لونه دهبي. 2- بعدين ضيفي عليه الثوم والزنجبيل، وقلبيهم كويس، وضيفي عليهم الطماطم المفرومة، والكركم، والبابريكا، والملح، والكزبرة، وقلبيهم وسيبيهم على النار شوية لحد ما الخليط يتسبك. 3- بعد ما يتسبك حطي الميه وسيبيه يغلي، وبعدين ضيفي عليه الرز، وسيبيه على نار عالية لمدة دقيقتين لحد ما الرز يتشرب الميه. 4-بعدين غطي الحلة، وهدّي النار وسيبي الرز على نار هادية لمدة 30 - 35 دقيقة لحد ما الرز يستوي تماما، وقبل ما تقدميه شيلي منه البهارات الصحيحة زي الحبهان وورق اللورا والقرفة. 5-حطيه في طبق التقديم وقدميه.. بالهنا والشفا.
**************************
عصير رمان عصير رمان المقادير: 2 كوب ميه كوب سكر 2 كوب عصير رمان 1/ 4 كوب عصير ليمون الطريقة: 1-أول حاجة اعملي شربات خفيف؛ وده بإنك تحطي الميه والسكر على النار وتقلبيهم لحد ما السكر يدوب، وبعدين سيبيه يغلي على نار متوسطة لمدة 5 دقائق. 2- بعد كده ارفعيه من على النار وسيبيه يبرد، وبعدين اخلطيه مع عصير الرمان وعصير الليمون، وقلبيهم علشان يمتزجوا. 3- حطي العصير في التلاجة وسيبيه لحد ما يبرد، وممكن تقدّميه سائل، وممكن بطريقة تانية؛ إنك تحطيه في الفريزر لحد ما يتجمد، وبعدين اجرشيه وقدميه في كاسات.. بالهنا والشفا.
