تثبيت الوزن من الأهداف اللي كتير مننا مش بيقدر يحققها بعد التعب في مشوار الريجيم... وبعد شهور من الحرمان علشان نوصل للوزن المثالي بنلاقي نفسنا بنرجع كل الكيلوات اللي خسرناها بمجرد ما نتوقّف عن الريجيم، يعني تعب شهور يروح في لخبطة كام أسبوع... والمعادلة الأساسية لتثبيت الوزن والتي يفشل الكثيرون في تحقيقها رغم بساطتها، هي أن تكون السعرات الحرارية الداخلة للجسم تساوي السعرات التي يتخلّص منها الجسم خلال اليوم... وبما إن الرياضة هي الحل الأمثل للتثبيت ولعلاج السمنة الموضعية، هنعرف إزاي نمارسها من دكتور عماد طه أستاذ مساعد بكلية العلاج الطبيعي جامعة القاهرة. * إيه هي أهمية الرياضة في تثبيت الوزن؟! معظم المرضى عندهم قناعة إنهم بمجرد ما خلّصوا الريجيم ممكن ياكلوا كل اللي نفسهم فيه... ومش هيتخنوا لأنهم مثبتين وزنهم!! طبعا ده غلط جدا، والمريض بيرجع يتخن تاني عشان كده مهم جدا الانتظام في برنامج رياضي لحرق السعرات الحرارية باستمرار، وبكده الوزن يثبت، والجسم يبقى مشدود، ومعامل الحرق يكون أعلى، وده معناه إن معادلة التثبيت في صالح المريض. ولازم نعرف إن ممارسة الرياضة لازم تكون عندنا زي أي عادة مهمة في حياتنا؛ زي تنظيف الأسنان والأكل والشرب والشغل. * هل ممكن الرياضة تساعد في علاج السمنة الموضعية؟! التعامل مع السمنة الموضعية له عدة أشكال؛ أوّلها ممارسة تمارين مكثّفة على المنطقة المراد تخسيسها... والتمارين بتحتاج صبر ومجهود وده مع الأسف اللي بيخلي معظم الناس تتوقّف عن التمارين؛ يعني البداية بتكون دايما بحماس شديد، وبعد كده البعض بيزهق ويفقد الحافز... كمان الآلام المصاحبة للتمارين وخاصة في البدايات بتقلل من حماس الناس لمتابعة ممارسة التمارين الرياضية، ولكن ده طبيعي جدا؛ لأن العضلات بتكون في حالة سكون لفترة طويلة، وفجأة نبدأ نحمل عليها ونحركها، عشان كده نصيحتي إننا نتدرج في التمارين واحدة واحدة لتهيئة العضلات. لكن فيه بعض الحاجات الغلط اللي ممكن تخلّي التمارين غير مفيدة وغير مجدية؛ زي إننا نكون بنعمل التمارين بطريقة غلط، ممكن تؤذي فقرات الظهر أو تعمل مشكلات في الرقبة أو تتسبب في تمزق العضلات، والمشكلة إننا ممكن بدون أن نشعر نفضل مستمرين فترة ومش شايفين نتيجة، ومش بنكون عارفين السبب إيه. * بنسمع عن طريقة اللف التنحيفي لعلاج السمنة الموضعية.. يا ريت تعرفنا أكتر عنه؟! دي طريقة من ضمن الطرق اللي ممكن نعملها للتعامل مع السمنة الموضعية.. واللف التنحيفي.. هو عبارة عن دهن المنطقة بمواد خاصة بتكون غالبا خليط من الأعشاب، وربطها برباط ضاغط لمدة ساعة يوميا، وعلى فكرة نتائجها ممتازة جدا للكرش والذراعين والأرداف، لكن لازم يصاحبها ممارسة الرياضة، وميزة اللف التنحيفي إنه ممكن يتعمل في العيادة أو في البيت. * هل فيه طرق تانية للتعامل مع مشكلة السمنة الموضعية؟! فيه طريقة تانية للتخسيس الموضعي؛ وهي جلسات شد الترهلات بالكهرباء، والجلسات دي مهمة لتهيئة العضلات قبل تطبيق التمارين الموضعية، خاصة على عضلات البطن لإنها ضعيفة جدا.
وفيه طريقة كمان وهي إذابة الدهون موضعيا بجهاز مخصص وفعّال لإذابة الدهون، لكن كل الطرق اللي قلنا عليها دي لازم تكون مصاحبة للرياضة. * بعض الناس بيشتكوا إن المنطقة اللي كان بيعملوا لها تمارين رجعت تتخن تاني بعد التوقّف عن الرياضة.. إيه السبب؟ ده أمر طبيعي لأني طول ما أنا بامارس الرياضة عضلاتي بتكون مشدودة، وبمجرّد ما أرفع التحميل على العضلة ترجع ترتخي تاني، وتصبح مكان مناسب لتكوين الدهون.. علشان كده لازم نحافظ دايماً على ممارسة الرياضة. * إزاي رياضة المشي بتفيد في التخسيس؟ المشي المنتظم أكثر من نصف ساعة بيخلّي الجسم يستفيد من السكر الموجود في الدم لتحريك العضلات، وبكده نسبة السكر بتقل مما يستثير الكبد لحرق الدهون المخزّنة في الجسم... وعلشان المشي يؤدي للتخسيس لازم يكون خمس مرات في الأسبوع ومدة لا تقل عن ساعة... بشرط التأكّد من عدم وجود أي مشكلات صحية تمانع ممارسة رياضة المشي. * إزاي نتجنّب الآلام المصاحبة للتمارين الرياضية؟ الإحماء أو التسخين مهم جداً قبل ممارسة أي رياضة حتى لو كانت الرياضة مجرّد مشي، والإحماء ممكن يكون بالنط الخفيف للحبل وشد الأطراف. * ليه دكتور التخسيس بيطلب من مريض السمنة عدم ممارسة الرياضة في بداية الريجيم؟ الريجيم في البداية يحتوي على عدد قليل من السعرات الحرارية لا تسمح للجسم بممارسة مجهود كبير، وكمان بيكون المريض غير معتدل المزاج، وفي حالة خمول فمن غير المنطقي أن أطلب منه يلعب رياضة وهو في البداية؛ لأنه ممكن يزهق ويتعب ويبطل ريجيم ورياضة وكل حاجة. * ممكن مرضى السكر والقلب يلعبوا رياضة تساعدهم مع الريجيم؟ مريض القلب لازم يعرض رسم القلب بالمجهود على الطبيب المشرف على برنامجه الرياضي؛ لتحديد كمية المجهود المسموح بها بدون أن يتأثر القلب. أما بالنسبة لمريض السكر له مجموعة من المحاذير أبسطها التأكّد من لبس حذاء رياضي مريح لتجنّب مشكلات القدم السكري (إن المريض يصاب في القدم دون أن يشعر بألم) ومراعاة نوع الأنسولين لتحديد وقت ممارسة الرياضة... وكمان مهم المدرب يعرف مكان حقن الأنسولين في الجسم عشان يتعامل مع هذه المنطقة بحذر لتجنّب إصابة المريض بغيبوبة سكر... ومهم أن يحرص مريض السكر على أن يكون معه باستمرار زجاجة مياه وعصير وأي حاجة مسكرة (بونبون مثلا). وطبعا لكل مريض برنامجه الرياضي وخاصة الكبار في السن؛ لأنهم معرضون لكسور بسبب هشاشة العظام، والنوع ده من المرضى لازم يلعبوا رياضة خفيفة، وعلى فترات متقطعة طوال اليوم.
