أنا مشكلتي باختصار مع أمي؛ برغم إني بحبها جداً؛ لأ أنا باعشق تراب رجليها.. بس مشكلتي معاها إنها رافضة الإنسان اللي أنا بحبه؛ مع إنه ابن أخوها؛ بس هي رافضاه عشان ما عندهوش فلوس. هي أكيد عايزة مصلحتي، وعايزاني أبقى أحسن واحدة في الدنيا؛ بس رفضها بيبقى بطريقة وحشة أوي ومش مقنعة، بتخليني أحبه وأتمسك بيه زيادة؛ خصوصاً إني شايفة إنه ممكن يبقى حاجة عشان هو لسه صغير ما كمّلش 23 سنة، وأنا أصغر منه بسنتين؛ يعني أقصد إن لسه فيه وقت إنه يعمل حاجة. أنا باكلمه من وراها، وباقابله كمان؛ بس أنا كان نفسي أبقى زي كل أصحابي وأحكي لأمي على كل حاجة..
حاولت كتير أوي؛ بس كل مرة لازم تعمل مشكلة معايا، وممكن توصل لأنها تضربني وتهددني بأنها تقول لبابا..
وأنا مش بحب الأسلوب ده؛ عشان أنا شايفة إني مش صغيرة، ولازم أبقى مقتنعة باللي أنا باعمله، مش أعمل اللي هي عايزاه وخلاص؛ حتى لو أنا تفكيري غلط؛ بس أنا شايفة إن فيه طرق كتير ممكن تتعامل معايا بيها في الموضوع ده عشان ما يتحولش لعِند. أنا بجد بحبه جداً، وهو كمان؛ بس مش عارفين نعمل إيه؟ m