عصير العنب الأحمر باللبن العصير ده من العصاير المفيدة جداً، وكمان شكله حلو جداً وممكن تعمليه في العزومات.. المقادير: * 1/2 كيلو عنب أحمر * 1/2 كيلو لبن * 1/2 كوب سكر الطريقة: اضربي كل المكونات دي مع بعضها في الخلاط، وبعد كده صفيها بمصفاة وصبيه في كوبايات العصير.
******************* سلطة الجرجير والبصل سلطة الجرجير والبصل المقادير: * 2 حزمة جرجير * عصير ليمونة * 3 ملاعق كبيرة خل * 2 ملعقة كبيرة زيت زيتون * ثمرة بصل مقطعة قطعاً صغيرة * ملح وفلفل * 2 ثمرة جرز مبشورة
الطريقة: 1- اغسلي الجرجير كويس، وقطعيه إلى شرائح رفيعة. 2- اخلطي كل المكونات مع بعضها البعض وقلبيهم كويس وحطيهم في طبق السلطة.
******************* شوربه الأرز بالخضراوات شوربه الأرز بالخضروات المقادير: * ملعقة كبيرة زبدة * 5 أكواب شوربة فراخ أو لحمة * 1/4 حزمة بقدونس مقطعة قطعاً صغيرة جداً * 1/4 كوب زيت ذرة * ملح وفلفل * كوب أرز * 1/4 كيلو بسلة * 2 ثمرة جزر مقطعة قطعاً صغيرة * بصلة متوسطة الحجم الطريقة: 1- سخني كوب مية، وأثناء ما المية بتغلي اغسلي الأرز كويس وصفيه من المية، ضيفي الأرز إلى المية المغلية وقلبيه كويس، ولما تلاقي إن الأرز بدأ يتشرب المية غطي الحلة، وهدي نار البوتاجاز علشان الأرز يستوي كويس. 2- اسلقي البسلة والجرز، وسخني الزيت على درجة حرارة متوسطة، وضيفي إليه البصل، وقلبيه كويس لغاية ما لونه يبقى ذهبي. 3- لما تلاقي لون البصل بقى ذهبي ضيفي إليه الدقيق بالتدريج مع التقليب المستمر علشان ما فيش أي حاجة تكلكع منك. 4- استمري في التقليب لغاية لما تلاقي إن لون الدقيق لونه بقى ذهبي، ضيفي إليه شوربة اللحمة أو الفراخ، والأرز والبسلة والجزر والملح والفلفل وسيبيهم مع بعض على النار لمدة خمس دقائق مع استمرار التقليب. 5- بعد مرور الخمس دقائق حطي الشوربة في أطباق الشوربة وزيني الأطباق بالبقدونس.
******************* صينية الكفتة بالباذنجان والبطاطس صينية الكفتة بالباذنجان والبطاطس المقادير: * 1/2 كيلو لحم مفروم * 5 ثمرات بصل * 3 فصوص ثوم * ملح وفلفل أسود وكمون * 2 حبة باذنجان رومي * 3 ثمرات بطاطس (متوسطة الحجم) * 4 ثمرات طماطم * 2 مكعب مرقة دجاج * 3 ملاعق كبيرة معجون طماطم * 3 أكواب ماء ساخن الطريقة: 1- هاتي بصلة وقطعيها قطعاً صغيرة جداً، وقطعي معها قرن فلفل أخضر حامي، وبعد كده ضيفي إليهم الملح والفلفل الأسود والكمون والكركم وربع كوب مية، واضربيهم مع بعض في الخلاط. 2- هاتي اللحمة المفرومة، وضيفي إليها خليط البصل وتوابل اللحمة، وقلبيهم مع بعض، وبعد كده شكلي اللحمة على هيئة كرات أو صوابع، ورصيها في صينية، وبعد ما تخلصي حطيها في الثلاجة لمدة ربع ساعة. 3- قطعي الباذنجان إلى شرائح، وانقعيه لمدة عشر دقائق في مية بملح، وبعد كده اقليه في الزيت. 4- قطعي البطاطس والطماطم والبصل إلى شرائح، وضيفي إليهم شوية ملح وفلفل أسود. 5- هاتي صينية فرن ورصي فيها الباذنجان والبطاطس والطماطم والبصل ومن فوق حطي الكفتة. 6- ذوّبي مكعب مرقة دجاج ومعجون الطماطم في كوب ماء ساخن، وضيفيه إلى الكفتة والخضراوات. 7- غطي الصينية بالورق الفويل، وحطيها في الفرن لمدة ساعة ونصف، وبعد كده خرجيها وشيلي من عليها ورق الفويل، ودخليها تاني الفرن، وسيبيها لغاية ما تلاقيها احمرّت وخرجيها.
******************* السمبوسك الحلو السمبوسك الحلو المقادير: * 1/2 لفة جلاش * 1/2 كوب زبد سايحة * 1/2 كيلو جبنة ريكوتا * 2 ملعقة كبيرة سكر * 3/4 كوب شربات * 2 ملعقة كبيرة فستق مفروم للتزيين مقادير الشربات: * 1/2 كوب سكر * 3/4 كوب مية * عصير ليمونة * فانيليا الطريقة: 1- اخلطي الجبنة الريكوتا مع السكر في طبق. 2- حطي رقائق الجلاش على سطح مستوي وقطعي كل ورقة جلاش لمربعات عرضها حوالي 4-5 سم. 3- خدي كل مربع وحطي فيها 2 ملعقة صغيرة من خليط الريكوتا في الوسط، واطوي كل الأطراف للداخل علشان تبقى على شكل وردة مربعة وبداخله الحشو، وبتكرري نفس الطريقة دي لغاية ما تخلصي كل اللي عندك.. وادهني طرف كل واحدة بشوية زبدة علشان تلزق. 4- هاتي صينية فرن وادهنيها بالزبدة، وحطي فيها مثلثات السمبوسك، وادهني سطح السمبوسك بالزبدة. 5- سخني الفرن على درجة حرارة عالية (220 مئوية)، ودخلي الصينية الفرن لمدة 30 دقيقة أو لغاية ما تلاقي إن وش اللفائف بقى ذهبي، وممكن إنك تحمريها في الزيت بدلاً من وضعها في الفرن. 6- خرجيها من الفرن، وصبي على كل واحدة ملعقة من الشربات البارد ورشي عليها فستق. طريقة عمل الشربات: حطي السكر والمية كلهم مع بعض في إناء على نار هادئة لمدة ربع ساعة.. وبعد كده ضيفي الليمون وسيبيه لمدة 5 دقائق لغاية ما يغلي وحطي الفانيليا، وبعدين شيليه من على النار وسيبيه لغاية ما يبرد. ملحوظة: ممكن إنك تستبدلي حشو الريكوتا بأي حشو تاني زي المكسرات أو القشطة أو الكسترد أو المهلبية.
******************* وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة... واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك.. كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول.. وإلى اللقاء غدا إن شاء الله مع أطيب التمنيات بصوم مقبول وإفطار شهي بإذن الله سلااااااااام ********************* للتعرف على مزيد من الوصفات الشهية اضغط هنا "سفرة دايمة" *********************