أنا متابعة جيدة للموقع وبتعجبني دايماً الردود. ما عنديش مشكلة محددة؛ بس يمكن حسيت إني محتاجة أفضفض وبس؛ فمن غير ما أحس لقيت نفسي بافتح الصفحة وباكتب. أنا بنت عندي 22 سنة، متخرجة وباشتغل، ما اعتقدش إن عندي مواقف كبيرة أو مشكلات كتيرة ممكن أحكيها. بس يمكن من فترة هاجمني شعور بالوحدة كبير جداً؛ مع إني اجتماعية ولي أصحاب كتير؛ بس يمكن الشعور اللي هاجمني حسيته مختلف. أنا عارفة إن ممكن ناس تضحك على اللي باقوله وتقول لي إنتِ لسه صغيرة؛ بس أنا شايفة إن الإحساس مش مرتبط بسنّ. المشكلة إن الشعور شاغلني جداً ومسيطر على تفكيري فعلاً وبقى كل اللي يهمني إني عايزة أرتبط وخلاص لأن ممكن الارتباط يقتل الشعور ده. أنا مشتتة جداً تقريباً، مش عارفة أركّز في حاجة.. أنا باقرأ كتير جداً وباعتبر نفسي نوعاً ما من المثقفين؛ بس مش عارفة ليه حتى قرايتي ما شغلتنيش عن اللي أنا حاساه؛ حتى لما باكتب باحس إن الناس اللي أنا باكتب لهم عندهم نفس الشعور، كلهم لوحدهم؛ مع إني عايشة مع بابا وماما ولي أخين أولاد؛ بس مش لاقية حل للي أنا حاساه؛ فقلت أفضفض هنا. تحياتي r لو عايز تفضفض لنا دوس هنا